رفض وسياحه

[عصفورالنار]

السلام عليكم

اخواني اصحاب الخبرة .اني مرفوض (محلف)لعدم المصداقيه و مقدم استئناف و هم انرفض طبعا اني مقدم من بغداد سوالي هو اكدر اقدم على فيزة سياحه لاامريكا  v 2 علما انو عندي ثلاثه من اخواني و والدتي يعيشون هناك و واحد من اخوتي حاصل على الكرين كارت.علما ان والدتي قد اجرت عمليه فتح القلب قبل ايام و هذا هو السبب الرئيسي لزيارتي وعمل الدعوة من قبل اخي .اخواني ارجو ان تفيدوني باجوبتكم و اكون شاكر لكم جميعا

[محارب]

اخوانك اللي بامريكا يعرفون اكثر ويكدرون يسوولك طلب زياره ويكدرون يستفسرون من محامي بامريكا

[Attum Rose]

اخي العزيز، انت ما خسران شي قدم على فيزا زيارة و مناك خلي يرتبولك اخوتك محامي شاطر لان انت صاير رفض بقضيتك و يقدملك على لجوء مناك. و من الله التوفيق


اختك روز

[مــودي]

اخوية تمنياتي بشفاء الوالدة

واضم صوتي الى الاخوات ستار ووروز ..وتمنياتي الى ان تصل الى الحل الامثل لقضيتك..مع امنياتي للجميع بالسفر

[ريم عبد]

اخي عصفور النار
اذا حصلت فيزه وكدرت تدخل لامريكا بعد هناك ماعندك مشكله
لكن المشكله هنا عند تقديم الفيزه تحتاج اثبات لروبط ماديه او اسريه
فحاول اتقدم مثل هاي الاثباتات مثلا اذا كان عندك عمل ومستمر بي او عندك ملك مسجل باسمك
او راح تترك احد من عائلتك في العراق
هاي الاثباتات حضرها عند المقابله حتى تحصل على الموافقه مالت الفيزه
لان اصلا انت موقفك ضعيف لسببين انه انت كنت مقدم على لجوء وثانيا انه اغلب اهلك هناك
فنية اللجوء موجوده عندك وهذا يعتبر نقطة ضعف للقضيه لازم تشتغل عليها وشلون تقويها

[عصفورالنار]

اخواني الاعزاء

الشكر الجزيل لكم لاجوبتكم بس يمكن انوا قسم منكم افتهمو سوالي غلط لان اني مناوي اقدم على هجرة من اروح لو اعصى اهناك اني اريد اروح زيارة لاهلي فقطيعني اشوفهم و ارجع .علما اني راح اترك عائلتي زوجتي و اطفالي هنا في العراق و اعتقد انو هذة نقطه قد تفيدني عند التقديم وسبب قوي للرجوع للعراق

[Attum Rose]

 لعد توكل على الله ، شغلة عائلتك اهنا كلش اتفيدك لان تبين عندك روابط اسرية قوية بالعراق بس حصلك كتاب دعوة او كتاب من مستشفى او طبيب الوالدة يثبت انه هي سوت عملية و ان شاء الله بالتوفيق.


اختك روز

[Ali leo]

تحياتي الى صاحب الموضوع والى اهلي الكرام

بس حاب استفسر منك سؤال زغيروني

انت من اجاك رفض ليش اجاك رفض هاي النقطة الاولى ومن قدمت استأناف هماتين اجاك رفض وانا ما احب اهبط معنوياتك ولاشي بالعكس هاي خليها الك فد معلومة زغيرونة ايجوز اتفيدك بالمستقبل انت تريد تقنعني اذا قدمت على فيزا سياحية راح ينطوك اياها بسرعة بسرعة ولا زم اتسافر باسرع وقت انت تعرف كلش زين والكل يعرف هم كلهم كروب واحد او ( عصابة وحدة ) انطيك تجربتي انا ما عندي اقارب بامريكا من الدرجة الاولى بس عندي على كولة اهلنا رتب (ظباط) ميجر وكابتن واول ما انفتحت الفيزة السياحية قدمولي عليها بانفسهم وبايديهم همه والانفتيشن اشكد اذا اكلك اتكولي انت تهنبل والله والله 12 دعوة من ضباط بالجيش الامريكي تعرف شنو اجة الرد تعلق الى اشعار اخر لان انا بوكتها جنت مقدم اس اي في فضليت اتردد وارسل ايميل واتصل وهمة جماعتي هماتين يتصلون وجان الجواب معلقة الى اشعار اخر مرة دزيتلهم ايميل وشرحتلهم يابة اخاف هيه تنرفض لان انا مقدم على الاس اي في كالوا لا معلقة الى اشعار اخر استلمت الامنية مال الاس اي في وحسيت السفر طول كلت شنو خسران استفسر عن الفيزا السياحية اجاني ارد كالاتي ( ناسف لابلاغكم بانه قد تم رفض طلب الفيزا السياحية لاسباب قانونية ) يابة شنو السالفة السالفة مانكدر انكلك وهذا الحجي بـ 2009 واليومك هذا ماكو شي فياخي انت عندك رفض والرفض مو بفحص او فد شي عادي الرفض جايك من المحلف الي بيده كل شي وانت دزيت استفسار واستأناف وهم اجاك رفض
اشرحلي اشلون راح ايوافقون عليك وينطوك الفيزا السياحية حتة لو جان عندك اقارب من الدرجة الاولى انا من قريت موضوعك ما حبيت اغثك لو فد شي الله انشاء الله يسهلها عليك ويعمي اعيونهم وتسافر باسرع وقت ممكن وانشاء الله الوالدة اتكون بخير ويبعد عنها الشر ويجمعك باخوانك باقرب وقت ممكن .


اخوك علي ليو

[عصفورالنار]

اخويه ابو حسين...

طبعا شويه هبطت معنوياتي لان باني امال على شوفه اهلي عن قريب و الله كريم.اما بالنسبه للرفض فاني اتورطت و كتلهم اني جنت عسكري مطوع ن ض بلقوة الجويه اشو انكلبت الدنيه عليه شلون وليش و من هل حجي المهم انرفضت و الي صار صار .اما بخصوص فيزة السياحه فاني سامع من اكثر من واحد اهنا بعين كاوة انو الي مرفوض محلف ممكن يدخل امريكا سياحه و دعوة من قبل شخص قريب عليه .بس الي مرفوض امنيا هذا الي ميكدر يدخل امريكا نهائيا يعني اكو اختلاف ب سبب الرفض .و الله كريم اني اخويه بلش بمعامله الدعوة و انشاء الله خير

[Attum Rose]

اخ علي و لو فد مداخلة، ممكن  الاخ يحصل على فيزا سياحية او زيارة لكون الفيزا مو هجرة بس لازم الاوراق و المتطلبات تقدم بصورة صحيحة  و يبين عنده رابط معنوي و اسري قوي بالعراق بعد اذا هم و هناك و قدم على لجوء و لو هو ما ناوي بس اذا قرر لازم عنده محامي شاطر و لو تصير او ما تصير.

ثاني شي بال2009 مثل ما اتفضلت جانت شوية الحصول على فيزة زيارة صعبة اما هسة صارت احسن.
و انت حضرتك ذكرت دعوات حصلت للزيارة اخي و اذا حصلت دعوات ترى ما تاكل و لاتشرب اذا ما موفي شروط الفيزا، اكلك اني اول فيزا قدمت على شنكن رفضوا كالوا ماكو و ما وضحوا السبب و بعد فترة قدمت و حققت الشروط مالتهم و راسا انطوني فيزا، فاذا انرفضت مرة ممكن تقدم مرة ثانية ما كو اي اشكال.

 اخي من حق اي شخص حتى حضرتك تقدم على فيزا زيارة حتى لو انرفضت مرة و اذا قدمت كل المستمسكات المطلوبة ممكن ينطوك الفيزا و اثبتت عندك رابط معنوي و اسري و حتى مادي قوي بالعراق فالشغلة تكون سهلة و اذا تريد معلومات اكثر بالموضوع ادخل على موقع السفارة و شوف المتطلبات و اذا تحب تقدم قدم.

اما بخصوص الاخ صاحب الموضوع هو اهلة موجودين بالولايات المتحدة و اللي يساعده بالفيزا هو انه والدته اجرت عملية و عنده هو روابط اسرية قوية بالعراق فممكن يجرب هو ما خسران شي لطلب الفيزا و اكيد ماكو شي مضمون بس يكدر يجرب و من الله التوفيق.


تحياتي
روز

[أبوعبدآلله]

اخويه ابو حسين...

طبعا شويه هبطت معنوياتي لان باني امال على شوفه اهلي عن قريب و الله كريم.اما بالنسبه للرفض فاني اتورطت و كتلهم اني جنت عسكري مطوع ن ض بلقوة الجويه اشو انكلبت الدنيه عليه شلون وليش و من هل حجي المهم انرفضت و الي صار صار .اما بخصوص فيزة السياحه فاني سامع من اكثر من واحد اهنا بعين كاوة انو الي مرفوض محلف ممكن يدخل امريكا سياحه و دعوة من قبل شخص قريب عليه .بس الي مرفوض امنيا هذا الي ميكدر يدخل امريكا نهائيا يعني اكو اختلاف ب سبب الرفض .و الله كريم اني اخويه بلش بمعامله الدعوة و انشاء الله خير

أخي الكريم توكل على آلله وقدم طلب الفيزة واشتغل إبمعملاتها وإن شاءآلله تعالى ميصير إلا الذي كاتبه ربك , وبالتوفيق .

[Ali leo]

شكرا حبيبي صاحب الموضوع على الرد وانشاء الله ربي يتمم على خير بس شنو ما اريدك تفتهمني غلط هههههههههههههه انا والله ما حبيت اهبط معنوياتك بس انت تعرف ومثل ماكالوا الجماعة انت بالبداية يجيك رفض وهم رفض بس وراها الله كريم بلكت تتسهل وايصير كلشي بخير .


اخت روز شكرا على المداخلة وتنويرنا بمزيد من المعلومات ردت اوضح انا بس نقطة انوا كسر بجمع النتيجة هيه هم (عصابة وحدة ) متكونة
السيد المدير العام  : السفارة الامريكية
السيد النائب : SIV
السيد المحلف :IOM
اليكسر الخاطر : المواطن العراقي

انشاء الله ربي يتمم على خير وكلشي تمام وتشوف الوالدة ودعاءنا الها بالشفاء العاجل .



اخوكم علي ليو

[عصفورالنار]

اخوتي الاعزاء

اشكركم على جميع ردودكم والله ايقدم الي بي الخير.تحياتي