السلام عليكم اخواني واخواتي الاعضاء
اشلونكمو
طبعا هاي اول مشاركة الي وياكم
حبيت اخلي الموضوع بشكل فكاهي حتا لحد يمل من يقرى
المهم رح ابدي وياكم واتمنى من كل واحد ينطيني راية واذا يكدر ينصحني هم خلي يتفضل
طبعا اني عراقي (شنو هاي عراقي لعد قابل هندي
) المهم طلعت من العراق سنة 2007 بالاحداث المشتعلة
باختصار تهددت وطفرت اني وعائلتي بعد ما تعرضنا لحادث ف توجهت لسوريا ومن سوريا صممت انه ما انتضر واسوي حل لنفسي
ف طلعت تهريب وكانت وجهتي السويد والحمد لله وصلت سلامات بعد ما كان وزني 73 وصلت للسويد وزني 65 هههههههههه
احسن طريقة للريجيم هوة التهريب
بعد ما وصلت للسويد الغبرة اشتغلت رحمة الله رفض ورة رفض لانه بالذات احنا جماعة 2007 كلنا
انعلسنا من صارت الاتفاقية المشؤومة بين الحكومتين على اعادة الاجئين وعلساس العراق وضع زين وامان
المهم ماطولها عليكم اهلي بقو بسوريا منتضريني اوصل حتا اسويلهم حل واسحبهم وبنفس الوقت وقدمو على اليو ان وطلعو لامريكا واني ضليت متحمل هنا على امل يصير فد حل وهاي خمس سنوات طارت من عمري واخرها انلزمت وهسة بالحجز ومنتضر التسفير
المشكلة مادري اضحك مادري ابجي لانه ماضل عندي احد بالعراق والدتي واخواتي طلعو لامريكا وباقي اهلي بالسويد ورح ارجع للعراق غريب في
بلدي يعني حتا ماعندي شخص يستقبلني ولا اعرف احد وحاير اشلون رح تكضي وبنفس الوقت مقرر انه اطلع مرة ثانية لو الاردن لو تركيا وحاير وين
اروح اقدم على اليو ان بلكي التحق باهلي وخصوصا والدتي اول ما سمعت خبر توقيفي اتخربطت وحالتها حالة
حبايبي ممكن يعني لو اقدم على اليو ان تكون عندي فرصة بما انه والدتي بامريكا ؟؟؟ وين برايكم احسن تركيا لو عمان ؟؟؟
ارجو من كل واحد يقرى موضوعي يشاركني ولو بشي بسيط من المعلومات الي يملكها وبنفس الوقت حبيت اخلي موضوعي كدامكم حتا يكون
عبرة الكم مثل ميكولون الي يشوف مصايب غيرة تهون علي مصيبتة ف يا اخواني خلي كل شخص يحمد الله ويشكرة على كل حال والصبر هوة سلاح الانسان المؤمن والقوي
تحياتي يا حلوين ومنتضر ردودكم
مراسلكم من نكرة سلمان (السويد )
