السلام عليكم
نحجي عراقي لان ماكو احلا من حجينه بلا فصحى وبلا اخ اوي
نبدي قصتنه العظيمه عن رومانيا والافلام الهيروغلوفيه
طبعا صار كم شهر العالم مسطوره كال رومانيا وحجه رومانيا والي ممقابل وفد وللي مدري شنو والي و.........
ياشباب وان شاء لله الكل شباب
موضوع رومانيا صحيح بس اكو شغله انتو متعرفوهه وهي
انو الي مشمول برومانيا مو الي ينتظر وفد ولا الي ينتظر امنيه ولا الي ينتظر فيزه ولا الي ينتظر عمتي كميله
اني هم مثلكم اول مسمعت الموضوع مال رومانيا قبل اشهر هم كلت يالله الله ومالنه غيرك يالله بكل شي
حقكم الغركان يتعلك بكشايه بس ياناس كافي قصص تخدعون بيه العالم وانتو ممتأكدين منه فلان سافر وفلان راح لرومانيا
تره حرام الي يكتب شي وهو كلام فاضي لان هاي السوالف تغير حياه ناس ومصائر ومستقبل عوائل
نجي هسه للي مشمول برومانيا الي همه ...
سنه ال2011 شهر ال12 و 1من السنه الجديده الي هيه 2012 وال2
اتصلت منظمه الهجره الدوليه بعدد من الناس الي ممقابلين وفد وتم تحويل ملفاتهم الى الدول......
برطانيا.نمسا.سويسرا.فلنده.هولندا.وكثير دول هم اضافه الى امريكا في حالات خاصه
الي تحول ملفهم صارو مثل جوهر وزازا لاشربت ولا حامض حلو
تسألهم يابه شخبار ملفكم يكولك نايم ورح نرجع للعراق وهمه حضرتهم امورهم ماشيه ومتحول ملفهم ورح يرحون لرومانيا
هناك عده وفود ينتظرون مو بس امريكي
ليش مو اخوتك احنه عراقيين ؟
راح نحسدك لو راح نبوك جوازك ونسافر بي؟
الله يسهللهم من كول غير شي
هاي من شهر ال12 بدت هل المسأله سنه 2011
واعرف ناس سافرو ووصلو لهولندا وغيرهه وغيره عن طريق رومانيا
اما عن الحلات الخاصه الي حجيت بيه لمقابه الوفد الامريكي
برومانيا نجي نحجي بيهه
الرجل الضريراو المراه
المراه الي ذاكره بقصته انو تعرضت لللاغتصاب
غيره لنسى ياعيني وياحبيبي الي تحلم برومانيا
هواي مواضيع ناس تكول الشاب السنكل اله اولويه وناس تكول الي ينظر امنيه وناس تكول العائله
اقرب مثل الكم اني كدامكم انتظر وفد لحالي سنكل صار سنه ونص وعندي خدمه ويا الجيش الامريكي 6 سنين شنو رايكم ؟؟
طبعا هسه تسالوني ليش مقدمت اس اي في من بغداد وسافرت راح اكولكم لان قصتي حقيقيه والي قصته حقيقيه ميبقى بالعراق للي يفتهم بهل الموضوع
بس شنو رايكم رومانيا متشملني ؟
اما للعائله اخويه هم نفس الشي ونفس الخدمه وعائله وبدون اطفال هم شنو رايكم ؟؟
فيا اخوان الي اريد اوصله الكم انو رومانيا مو النه اتحدى اي واحد يجيب ولو شخص سافر ينتظر وفد امريكي بلا هل الاشياء الذكرته اتحدى من اي شي يريد
فلحد يلعب بعقول الناس وبمصائره علبو فلان راح وفلان برومانيا وهيج اخبار الكمب وهيج غرف وهيج طركاعه
انتو ليش تغشمون روحكم خابرو عله المنظمه وسالو المطي او المطيه الي ترفع السماعه عن رومانيا تشملكم وشوفو شيكولولكم ؟
راسا الجواب بالكصه
بس احنه متعلمين عل القصص وعله ليلى والذئب
اني هم حالي حالكم ولله بس واحد يبعد عن الكلام الخطء نسمع الاف السوالف وكله جذب
اما سالفه التوريق اي الفلوس يكولك ولله منظمه سوريا تمشي بالفلوس هههه
ي وينك يلا شكد يريد الي يطلعني 50 ورقه الك مني بس عرفني عليه 50 فوك مالت الشخص الي يطلعني
هاي السالفه انسوهه
صحيح اكو ناس تسافر قبل ناس تدرون ليش مو لعبه حظ لا
بس جماعه المنظمه الي بسوريا مطايه مطاااااااااااااااااااااااااايه حت الوفود مطايه
لاعدهم احترام بالمكالمات
لاعدهم سستم يمشون عليه
المدير يفوت يتمضحكون عليه
وهاي شوف عيني وياليلي
تروح تكولهم اريد اقابل اي مسوؤل طركاعه جفجير ينزلك العينتين يسكط معنوياتك
تره خطيه احنه الي بسوريا
هم المنظمه علينه وهم جذب العالم
اما عن كندا
كندا ماشيه اموره وعالم دتسافر واليوم ودعت ولد صديقي وراح توكل بالله والمطار جان بي مايقارب ال30 عائله متوجهين ترانزيت امارات وراها ايطاليا وراها ارض كندا
امريكا واكفه مثل مكلت بس للحالات الخاصه او الي تحول توطينهم بالتواريخ الي ذكرته
واتحدى اي واحد يجيب غير كلام
والي عنده معلومه مو جذبه معلومه موثوقه يقدمه ولله كريم
ندعي ان نتحول او نسافر حت لموزنبيق هم ميخالف لله كريم
احترامي لكل من يبحث بمواضيع رومانيا ولكن هذه الحقيقه
اسف للجميع
