مخضرمين الاس اي في محتاج نصيحتكم

[Birch]

مساء الخير اخواني و اخواتي الاعزاء

اني مثل متعرفون مقدم SIV و حددولي مقابلة .بس عندي استفسار و ارجو التوضيح و المساعدة و النصيحة.

من قدمت بالبداية على SIV كتبت بالفورم DS157 بخصوص الدول الي سافرتلها خلال العشر سنوات الماضية و ايضا كتبت رقم و نوع الجواز .

سؤالي اني بالنسبة للسفرات سافرت بالبداية بجواز نوع S و بعدها طلعت جواز G .بصراحة اني كنت ممنتبه للهاي الفقرة .

حاليا شنو تنصحوني اسوي بما انه لحد الان ممقدم الفورم DS260 Online و مقابلت لحد الان؟ لو هذا الموضوع ميأثر شي؟

تقبلوا تحياتي

[امين عبد الله]

هسه الاخ كلش حباب يجاوبك

[امين عبد الله]

اخي الكريم

تره بصراحة مفتهمت سؤالك. يعني انت خايف لا يطالبوك بالجوازات القديمة؟؟؟

[محارب]

بس اريد ارعرف انت شنو قصدك
ويادول رحتلها


تدري نسيت
السلام عليكم اخي

[احلى مهندسة]

اي عادي اخوية اني جان عندي جواز ال H و اخذتة وياية بالمقابلة بس مو مهم اهم شي تاخذ الجي.. واذا الاس بعدة عندك اخذة وياك اذا ماعندك عادي ماكو مشكلة كلهم سلمتة للجواز من قدمت جواز الجي

[Birch]

السلام عليكم اخواني الاعزاء امين عبدالله و كلش حباب و مشكورين على الاجابة.

اني افهمكم بالضبط شنو اقصد.اني قدمت على برنامج SIV و بداية التقديم قدمت الفورم DS157 , وكان احد الاسئلة ان تذكر رقم الجواز و فقرة الثانية هي الدول الي زرتها خلال 10 سنوات.

اني كتبت رقم الجواز الي عندي حاليا و نوع الجواز , وكذلك ذكرت الدول الي سافرت الها بالمضبوط.

بس اني نسيت اوضحلهم بانه اني سافرت تقريبا 4 سفرات بالجواز القديم , وسافرت تقريبا 4 سفرات بالجواز الجديد الي ذكرت رقمه.

يعني همه حاليا فهموا مني باني سافرت للسفرات كلها بنفس الجواز, مع العلم اني ذكرت السنوات الي سافرت بيها و كلها , والجواز الي قدمته صدر بعد السفرة الرابعة تقريبا.اتمنى وضحت الفكرة.

[Birch]

شكرا اختي العزيزة احلى مهندسة و تسلمين على الاجابة و المساعدة.

اختي انتي من قدمتي بالبداية على بالبرنامج, ذكرتيلهم بالفورم DS157  بانه حاليا عندج جواز نوع G , بس قبلها كان عندج جواز نوع H؟ لو لا؟

و من ذكرتي السفرات وضحتيلهم بانه سافرتي بجوازين مختلفين لو لا؟ يعني كتبتي بس مسافرة و بجواز واحد؟

[محارب]

السلام عليكم اخواني الاعزاء امين عبدالله و كلش حباب و مشكورين على الاجابة.

اني افهمكم بالضبط شنو اقصد.اني قدمت على برنامج SIV و بداية التقديم قدمت الفورم DS157 , وكان احد الاسئلة ان تذكر رقم الجواز و فقرة الثانية هي الدول الي زرتها خلال 10 سنوات.

اني كتبت رقم الجواز الي عندي حاليا و نوع الجواز , وكذلك ذكرت الدول الي سافرت الها بالمضبوط.

بس اني نسيت اوضحلهم بانه اني سافرت تقريبا 4 سفرات بالجواز القديم , وسافرت تقريبا 4 سفرات بالجواز الجديد الي ذكرت رقمه.

يعني همه حاليا فهموا مني باني سافرت للسفرات كلها بنفس الجواز, مع العلم اني ذكرت السنوات الي سافرت بيها و كلها , والجواز الي قدمته صدر بعد السفرة الرابعة تقريبا.اتمنى وضحت الفكرة.

عادي اخي
جدأ عادي
مادام انت بلغتهم بسفراتك كلها هم يعرفون جان عندك جواز قديم وهذا شغلهم
هم  اخذ وياك الجواز القديم للمقابله للاحتياط


امنياتي بالتوفيق وسرعة السفر

[احلى مهندسة]

لخاطرك كمت طلعت الفورم وجيكتها بالنسبة لل DS-260 ممطلوب منك الدول اللي زرتها بس رقم الجواز واني كتبت رقم جواز الجي اللي عندي حاليا واللي اني مسافرة بي دولتين فقط
اما بالنسبة للDS-157 فاني ذكرت الدولة وبجانبها السنة فقط اللي رحت بيها
انت من تروح للمقابلة ان شاءالله مثل مكتلك اخذ الجواز وياك للاحتياط فقط وهمة مراح يسالوك علية وانت من تكلهم وين مسافر اشرحلهم انه الدول الفلانية بجواز اس والدول الفلانية بجواز جي وخلص
ترة الجماعة كلش مريحين وهسة تشوفهم يخافون عليك من تحجي وكلش يهتمون بيك ومحد يضغط عليك ... تعاملهم حلو وراقي
اتوكل على الله و بالمناسبة اذا حبيت تبقي الجواز يمك عادي كول للمحلف او المحلفة انه تريد تبقي الجواز راح تكلك ماكو مشكلة بس من نحتاجة ادزة النا كلهم اي اوكي ادزة ان شاءالله
بالموفقية واي سؤال اني حاضرة

[امين عبد الله]

اخوية Birch

لاتتوتر ولا تخاف لان مرات يكون التوتر الزائد وبالا على الانسان. ان ذكر الدول في الفورم الذي اشرت اليه هو سؤال روتيني. اذكر انني كنت في زيارة للولايلت المتحدة في تشرين الاول 2004 وكان سؤال الموظف عن الدول التي زرتها طوال حياتي وطلب مني ذكرها الواحدة تلو الاخرى ثم سألني عن ابنتي وهل انها دخلت الى المدرسة ام لا ثم طلب مني الانتظار لحين ختم الفيزا.
لذا اخي الكريم دع عنط التوتر واتبع رأي الاخت (( احلى مهندسة )) و ارجو ان لا تتردد باي سؤال مهما كان بسيطا 

[ABO SARAH]

السلام عليكم

اخي العزيز ولو الاخ كفت ووفت وياك بس احب اطمنك انه اني حالتي مثلك بالضبط واذا انته احد ذكرك تاخذ الجواز الاس وياك اني نسيته ما اخذته واصلا مطلبوا مني. لو رادوا جان دزيتلهمياه علما انه سفراتي كلهه جانت بالاس والجي ولا سفرة بي.
تحياتي الك ولا تخل الموضوع في بالك ترة ميستحق القلق الله يسهلك امرك.


ابو سارة

[iraqi siv]

السلام عليكم   

نصحيتي تكول ما تسافر خاصة اذا انت بقي بدولة لاكثر من ست اشهر لازم تجيب عدم محكومية من هاي الدولة.......علما انا مسافر لاكثر من دولة وجوازي ال N القديم كلة ختمات وفيز لكن كلت ما مسافر ولا عندي جواز قديم لان التجيك الامني رح يطول وهو اكو عراقي ما سافر وشنو سوة هو برة غير على الرزق ..............مختصر الكلام لا تكول عندي جواز ولا تكول مسافر....علما اني بامريكا حاليا ومعي الكرين كارت


تحياتي الك يا طيب

[الطيار العراقي]

حبيبتي خلي انطيج مختصر مفيد


جواز فئة S مموجود بالسجلات الالكترونية بس سجلات مكتبية وورقية

يعني اذا تغلسين محد راح يعرف

برايي غلسي على السالفة ترى الامنية تصير لوصة

ولاجنج كان عندج جواز ولا جنج مسافرة

[علشحن]

انا سافرت ايضا بجوازي القديم وذكرت هذا الشي بالفورم وبيوم المقابله كالولي عندك الجواز القديم كتلهم لا ماعندي وكان الامر طبيعي جدا جدا

[killer007]

سلام عليكم

عيني اني من كثر ما مستفر دول عندي جوازين اس الاول خلصت اوراقه وطلعت واحد ثاني وذكرت كل الدول الي مسافرها بالفورمه امر طبيعي وعادي جدا حتى محد سالني على الجواز القديم لان همه ما يعترفون غير بجواز الجي فلماكو اي مشكله من هل الناحيه

تحياتي

[احلى مهندسة]

اخونا الحمدلله والشكر الاراء كلها تنطيك نتيجة وحدة اخذ جواز الجي و روح سوي المقابلة والله يسهل عليك

[Birch]

شكرا اختي العزيزة احلى مهندسة و الله يخليج و يوفقج و ممنون منج هواية.

شكرا للاخوان امين عبدالله وكلش حباب و ابو سارة و اس اي في عراق و الطيار العراقي و علشحن و كلر 007 و تسلمون على المساعدة و النصيحة.

ان شاء الله راح اخذ الجواز القديم وياية للمقابلة و الله كريم و ان شاء الله خير.اني كان الغرض الرئيسي من السؤال هو ,قرأت موضوع مشابه للحالتي و شفت احد الاخوان مجاوب احد الاخوات بانه احتمال تنرفض اذا متذكر هذا الشي .بصراحة اني كنت ممنتبه للموضوع فلذلك حبيت استفسر منكم بخصوص هذا الشي.

بالنسبة للاخوان الي يكلون لتذكر موضوع الجواز القديم ,اني اعتقد ميصير لانه اني ذكرت كل السفرات و الدول الي سافرتلها و مع ذكر سنوات السفر.الجواز الجي صادر بعد بعض السفرات القديمة.

ولو تعبتكم وياي اني راح اخذ برأيكم و اخذ الجواز القديم وياية للمقابلة ,بس حبيت اسئلكم هل تنصحوني ارسلهم اميل و ابلغهم بهذا الموضوع لو لا؟يعني اقصد جماعة الاس اي في الي قدمتلهم الفورم دي اس 157؟

و هل اكو احتمال اذا ما ذكرتلهم موضوع الجواز القديم احتمال لا سامح الله انرفض ؟ علما اني كتبت كل الدول الي مسافرلها بالاضافة الى تواريخ السفر , والجواز الجي صدر بعد بعض السفرات القديمة؟

شكرا الكم مرة ثانية و ممنون منك يا طيبين........

[احلى مهندسة]

لا اخوية ميحتاج كلشي تسوي واعتقد احد الاخوان جواز الاس مالتة خلص من كثر السفرات وطلع جواز ثاني وسافر وهسة هو باميركا حسب مفهمت من كلامة
اخي همة يعرفون انه الجوازات اتغيرت اكثر من مرة ولذلك همة يطلبون الجي او الاي
اخذ جوازك القديم وميحتاج ادز اي ايميل وهسة تقابل و محد يسالك وين جوازك القديم وراح تتذكر كلامنا

[Birch]

شكرا اختي العزيزة احلى مهندسة و تسلمين على الاجابة.

[killer007]

لا والله اختي لساعني ما سافرت بس الموضوع ابد ما سوالي مشكله ولا سالوني عليه اي شي

والله متفائلتلي بالسفر ههههههههههههههه

يله مشكورة على كل حال

تحياتي للجميع

[احلى مهندسة]

لا والله اختي لساعني ما سافرت بس الموضوع ابد ما سوالي مشكله ولا سالوني عليه اي شي

والله متفائلتلي بالسفر ههههههههههههههه

يله مشكورة على كل حال

تحياتي للجميع

ان شاءالله تسافر عن قريب

[killer007]

مشكورة وانشاء الله الجميع

تحياتي

[Salih Alfahham]

تقبلي تحياتي ....انا SIV قابلت يوم 25/1/2012......اذا كانت المستمسكات المطلوبه كلها كامله فالمقابله اقرب
ما يكون الى ان تكون روتينيه......الاجابه على قدر السؤال ...ابتسامه عريضه على الوجه....الابتعاد عن الكذب(حاشاك)والمشاطره
لاتنسي اذا كانت لك فترة اقامه باي دوله عليك جلب عدم محكوميه ...الكويت والسعوديه ميحتاج انا متأكد...ولكن بقية الدول يراجع
الرابط المرسل لك من NVC ضمن التعليمات ...... تحياتي

                                                                                       
                                                                                                                    صالح الفحام

[kunda]

همه بصراحة مو كلش يأكدون على موضوع الجواز الاخر القديم .. يعرفون وصار عدهم علم كلش زين انه جوازاتنا كل فترة تتغير وتتجدد