المحرر موضوع: حوار (طيّاري!) مع سياوش ... يحرره سياوش!  (زيارة 1327 مرات)

0 الأعضاء و 1 ضيف يشاهدون هذا الموضوع.

غير متصل اوراها دنخا سياوش

  • عضو فعال جدا
  • ***
  • مشاركة: 687
    • مشاهدة الملف الشخصي
حوار (طيّاري!) مع سياوش ... يحرره سياوش!
في حوار (طيّاري عالمي!..هيّ بقت عليّ آني هم اصير عالمي بجرة قلم!!) أجرته جريدة "النهضة" (اللي چانت نايمة)، من ساحة النهضة (التي لا تنام) على يد مراسلها "العالمي" سياوش مع احد كتاب شعبنا "النكرة" والمتخفي والمتأشور، والمنتحل لاسم سياوش أيضاً، حيث تم اصطياده بعيداً عن المياه العكرة، متنكراً، وهو يَهمُّ الصعود على متن (كوسترات) اشهر كراج (عالمي!!) لنقل الركاب في العراق "والعالم"، والمتجهة الى سوق العورة. وبعد أخذ ورد ومحاولة التملص من الصحفي سياوش تم اقناع الكاتب "المدعو" سياوش على اجراء حوار هادئ وختلاوي معه!!
الصحفي سياوش : اقدملك نفسي سياوش من صحيفة "النهضة" العالمية
"النكرة" سياوش : اهلاً وسهلاً... يا محاسن الصدف! آني هم سياوش! هم اسمك سياوش وهم اسم صحيفتك "نهضة" على اسم كراج النهضة! ذكّرتني بفد مؤتمر على نفس الاسم !
الصحفي سياوش: مؤتمر ؟ وين ؟ معقولة وآني صحفي ما اعرف بهيچي مؤتمر ؟!
"النكرة" سياوش : لا، هذا فد مؤتمر غريب عجيب، گعَّدْ فد جماعة چانت نايمة من اكثرمن 2500 سنة! وسمّوه باسم الكراج اللي آني وياك گاعدين بيه! وهسة مديعرفون شيسوون بعد كل هالنومة، بيا اتجاه يروحون! صايرين واحد يجر بالطول والثاني بالعرض ! واحد يرفع والثاني يكبس ! وهذا المؤتمر ما انعقد هنا بالعراق بلد الكتاتورية السابقة والديمقراطية الحديثة المستوردة والمفخخة ! لا، انعقد من زمان في بلد الديمقراطية ابو 24 قيراط ! تدري الجماعة يخافون من المفخخات، مو مثلنا احنا ولد الخايبة اللي عايشين هنا، واحدنا صاير يلعب ختّيلان بين المفخخات!    
الصحفي سياوش : لاحظنا انك ذاهب الى سوق (العورة!) ببساطة لمـــاذا؟
"النكرة" سياوش : ببساطة حتى (المفتحين!) لا (يلحـگوني)!
الصحفي سياوش : منو قصدك بـ (المفتحين)؟
"المدعو" سياوش : اقصد اصحاب القيل والقال..من عشائر قلو.. وقلّي.. وقلتلّو!! فبعد ما گصّبونا اصحاب الاقلام "العالمية" وسوّنا ثريد! اجو هذولة (المفتحين) اللي يسمون نفسهم مستقلين وكملوها !
الصحفي سياوش : شلون يعني ثريد ؟
"المتخفي" سياوش : يعني، جابونا احنا الكلدان السريان الاشوريين، گصگصونا وسوّنا متاشورين خلّوا  علينا المتكلدنين وضافوا علينا سوب مال المتسرينيين، وجابوا بهارات التهميش والاقصاء والالغاء وخلّوها علينا وخبطوهــا كلها وخلونا بجدر عالنار!!!! وهسه الكل دينتظر شوكت هاي الطبخة راح تستوي!!! ويكولون طبخة الوحدة التشريبية بجدر واحد، احسن من الوحدة القطارية الفاركونية البعيرية!!
الصحفي سياوش : طيب وهذولا جماعة القيل والقال شنو دورهم ؟
"الخائف" سياوش : هذولة ناصرية ! جوّي يزيدون النار حتى الطبخة مو تستوي بس، لكن تحترگ!!
الصحفي سياوش : هاي اول مرة اسمع بهذولة الجماعة، ممكن تعرفني عليهم ؟
"المرعوب" سياوش : وداعتك اني هم مثلك ما سامع بيهم، بس اكو واحد ما ادري منين طلع يگول احنا مستقلين، ونريد حقوقنا من الدياچة اللي عايشة بالزبالة! حقّه والله حقّه ... بلكد الرجال جوعان ! والله لو آني ديچ چان اتبرعتله بمزبلة من مزابلي واخليه يآكل منها الى ان ينتخُم ! بلكي يسمن شوية ! خطية أشو بالصورة مبين سعلوّة هلگد ما ممصوص وضعيف! بس بيني وبينك استاذ سياوش يبين عليه شرس ! لانه يگول بنهاية مقالته (انّ غدا لناظره قريب!!). هذي معناها انه مراح يبقّي ديچ اذا ما يملص راسه! لو الزبالة ! عفوا .. عفوا اقصد الحقوق.. لو (انّ غدا لناظره قريب!!). يا اخي هيچ واحد يخوف ! لتروح اتطّخ براسه ويفخخ نفسه ويفجرها باكبر مزبلة ! ويخلي هالدياچة المساكين لا شغل ولا عمل ! يعني يقطع رزقهم ! ومثل ما تدري استاذنا العزيز يگولون : قطع الاعناق ولا قطع الارزاق !!
الصحفي سياوش : والله هيچي ديچ.. لا .. لا.. قصدي هيچي واحد، لازم اصيده مثل ما صدّتك واسوي وياه لقاء صحفي !! طيب بس هذا تعرف من المستقلين ؟
"المتأشور" سياوش : لا، أكو فد واحد لاخ، بس هذاك وين راح توصللّه، اولاً بعيد، وثانياً منتمي الى منظمة عالمية سرية، يعني يخوف! لهذا يگلون عليه دولي! ويصيحوله شخصية دولية ! مثل ملعب الشعب الدولي!! هذاك عليه فنطازيات يقشمر بيها الناس ! متعرف منين يجيبها !  
الصحفي سياوش : فنطازيات!! مثل ايش ؟
"المُتكلدن"  سياوش : هذا يا محفوظ البُگا والسلام فنطازياته ما تخلص ! هلگد ما عاجبته نفسه، يعني بالفصيح نرجسي، صار هو ينفخ نفسه بنفسه، وكلمة (أنا) ما تنزل من لسانه، شايف نفسه فد شوفه، لانه مسويله فد كتاب، چم واحد من ربعه مصدگين بيه وصاير (استخفر الله) مثل الانجيل عندهم. بهذا الكتاب گالب التاريخ عالبطانه وكاتبه بالاتجاه المعاكس ! هلگد ما متأثر ببرنامج الاتجاه المعاكس لفيصل القاسم ! مو بس هذا، الكتاب متروس چذب مصفط، على رأي المثل اللي يگول: الچذب المصفّط احسن من الصدگ المخربط ! ومن وره هالكتاب سوّه نفسه شخصية دولية ! اتخيل أستاذ سياوش ربعه هذوله ضربوا چلاق كل كتب التاريخ اللي انكتبت عالتاريخ الآشوري والبابلي بالعراق وچلّبو بكتابه اللي يحچي فنطازيات ! مو غريبه ؟ لو بس آني دا اشوفها غريبة؟
 الصحفي سياوش : والله كلامك صحيح، كُلّش غريبه ! بس ليش ؟ يعني ليش هالرجال (الدولي!) يريد يگلب التاريخ عالبطانه ؟! شنو دماغة مگلوب عالبطانه ؟!
"المُتسرين" سياوش : خوش سؤال. هذا الرجال حسب ما تبيّن منتمي الى منظمة عالمية سرية يسموها ماسونية، ويگولون ان هذه المنظمة صهيونية، ومثل ما تعرف الصهيونية هي حركة عنصرية، تريد تضرب تاريخ اللي سبوهم (الاشوريين والبابليين). ويمكن هذا الرجال (الدولي) يشعر انه من بقايا اليهود اللي سبوهم اجدادنا فيريد ان ياخذ بثارهم عن هذا الطريق، يعني عن طريق تزوير تاريخنا ويخلينا نتعارك بيناتنا حتى نتقسم ونتشتت مثل ما شتتوهم اجدادنا!. ويمكن يريد يصير فد واحد مثير للجدل! يعني كلشي يفسره بالمگلوبي ويْمَشّيه عكس التيار ويزوّر براحته حتى الناس تظل عينها عليه ويصير مشهور وهاي هو يريدها ! بعدين شْسوّا، راح سوّه لجماعته شعار حتى يفصلهم عن عن بقية المللة ! گلنا هم ميخالف! بس سواها بلا ملح لمّن ربط تاريخ الشعار (17 آيار) بتاريخ علم هذولة اللي يداعون بحقوقهم  واليسموهم مثليين، هاي منين جابها وشلون دبرها ما اعرف؟!!
الصحفي سياوش : على اية حال الحچي وياك ممتع ومثير بس مثل ما دا الاحظ يبين عليك مستعجل ؟!
"الخائف" سياوش : اي والله.. اريد اوصل لسوك العورة گبل ما يعزلون وگبل مل تظلم، شوية آني خوّاف، اخاف من الظلمة... من طرف المفخخات!!
الصحفي سياوش : طيب عندك كلمة اخيرة تريد تگولها ؟
"المرعوب" سياوش : اريد اگول الله يحفظ عراقنا وامتنا وملتنا وخصوصاً ابناء شعبنا اللي لازگين واحد وره الثاني وصايرين مثل القطار، ويحفظ دياچتنا ويبعدنا عن المزابل وعن القيل والقال ويرفع عنّا الاعلام المشبوهة !!!!
الصحفي سياوش : شكراً استاذ سياوش، على هذا الحوار، وانشاء الله نلتقي بمناسبة اخرى...
"النكرة" سياوش : انشاء الله ..شكراً
اوراها دنخا سياوش