السلام عليكم شلوون الجميع
اعذروني صارلي فتره طويله مدا اكتب لان ماكو وقت كنت سابقا الوم الي يسافرون واكول ليش يختفون هسه صرت اني مثلهم لان فعلا هنا ما تلحك والوقت يطير بسرعه المهم استكمالا لموضوعي السابق حتى ما اطول عليكم
بعد الوصول لامريكا وانتظار رقم السوشيل سكيورتي والي ياخذ من اسبوع لغايه ٦ اسابيع حسب الولايه تبدون تكملون اموركم ومنها هويه الولايه الي تصدر من نفس دائره ال mvd الي تطلعون منهه اجازه السياقه
اما انتوو ترحون او المنظمه تساعدكم حسب عمل المنظمات لان كل وحده شكل بالنسبه النا رحنا بنفسنا وتالي عرفت انوو المنظمه تساعد بهاي الامور
فتح حساب بالبنك والي هو الدبت كارد بنفس الكارد حسابين جاري وتوفير ومن الافضل ما تخلون مبلغ هوايه مثلا اني خليت بالجاري 200$ وبالتوفير 300$
علمود بعدين اذا اريد الفايننشل ايد للدراسه ينطوني لان اذا شافوو موجود مبلغ كبير ما ينطون اني هيجي كلولي ومشيت ع التعليمات ههههه
طبعا البنوك معروفه وكاتبين عليهه هوايه بالمنتدى بنك اوف امريكا وويلس فاركو وجيس وكلهه سمعتهه جيده
ويطلع وياكم الموظف ويعلمكم شلون تستعملون ال Atm طبعا اني تعلمني واكولهه اي اي واني كولشي ما اعرف
طبعا من تفتحون الحساب راح يطلبون منكم الايميل ويسوولكم حساب اون لاين حتى عن طريقه تجيكوون الرصيد وتدفعون البلات
نصيحتي الكم ان من تجون ان شاء الله لامريكا يفضل ان تسوون ايميل جديد باسمكم حيكون رسمي ومحترم وتتعاملون بي مع كافه الجهات الي تطلبه
ويفضل ع الجيمل لقله مشاكله ومن هسه اكولكم حضرولكم كم باسوورد لان كل شغله ورادو ايميل وباسوورد مثل البنك والكليه والتقديم ع بيوت الحكومه
التلفون المجاني اما تقدمون عليه من المنظمه ويطول شهرين او انتو بنفسكم من تشوفون ع المحلات او مرات خيم وكاتبين عليهه تلفون مجاني قدموو بنفسكم كلهه ١٠ دقايق ما تطول بس يحتاجون الفود ستامب وهويه الولايه وال i94 واذا ردتوو اكثر من جهاز لا بنفس الوقت تقدمون كل يوم يروح واحد من العائله لان بعض الاحيان ما ينطون الا تلفون واحد لكل عائله. الصراحه اني اخذت منه والى هسه دا استعمله ما اشتريت موبايل لحد اللحظه
طبعا شهرين بالضبط اني ادور ع الخيمه ماكو الى ان فد اشوف كاتبين وانزل عليهم ركض جان يطلع السستم عاطل عدهم وانطوني عنوان المكتب الرئيسي ورحت اخذته منهم ههههه كولشي ما تدفعون ولا فلس تاخذون التلفون وبي رصيد ومعاه الشاحنه ومن يخلص الرصيد ترجعون عليهم ومده العقد سنه ويجدد في حاله بعدكم عدكم الفود ستامب ( هاي للمعلومات العامه ) لان محد حيبقى ع المجاني
التقديم ع بيوت الحكومه او الدخل المنخفض عده تسميات الهه ....
طبعا قد يتصور البعض انوو هي بيوت في مناطق رديئه او بيوت تعبانه لكن اني شفت هااي البيوت لعوائل صديقه ساكنه بيها بيوت في مناطق روعه وبيوت اروع
جائز كل ولايه شكل ما اعرف بعد يعني قسم من هاي البيوت شفتهه في مناطق ايجاراتهه 2500$ وقسم في مناطق ايجاراتهه 1500$
وشفت طريقه التقديم الهه وهي بسيطه ع الويب سايت تدخلون معلوماتكم وينطوكم عدد من المناطق انتوو تختارون المناطق الي تردون بيوتكم بيها اتصور ٤ مناطق تختارون وكل منطقه يشرحون عنهه شويه شكد عدد الوحدات السكنيه وكم غرفه بيها واذا كان تحتوي ع مصعد يعني تكون عماره او يكون طابق ارضي او بيت صغير
ف انتوو تخلون اختياراتكم وبعد اشهر تجيكم رساله انوو طلع الكم بيت حكومي هااي البيوت تدفعون ايجار بسيط وكل سنه يجدد العقد طبعا
صراحه معلوماتي بسيطه عنهه
اما بيوت السكشن 8 نفس الشي التقديم ع الويب سايت هااي في حاله كان التقديم مفتوح عليهه
ومن تطلع الكم يسوون معاكم مقابله ويشوفون عدد الافراد والدخل شكد ف ينطوكم فتره شهر لازم تلكى بيت باي منطقه الشخص يريدهه هو يختار مالهم علاقه
وبايجار معين هم يحدوو
وايضا تدفعون ايجار اتصور الثلث وفكرتهه شنو انو تكدر تسكن بالبيت سنه ومن بعدهه تكدر تحول لغير ولايه وايضا يتحول معاك السكشن 8
ف اغلب الناس من تطلع الهم هاي البيوت يحولون للولايات الغاليه مثل كاليفورنيا وغيرها
لكن هااي البيوت تقيد الشخص لان اذا زاد الدخل عن حد معين يسحبون البيوت
لذلك يفضل شراء بيت ويكون الشخص مرتاح وبالمناسبه. امريكا مو مال اثاث يعني لا تشترون هواايه اشياء وانتو كاعدين بالايجار لان راح تتعذبون بالتحويله
او اذا حولتوو لغير ولايه الا اذا اشتريتوو بيت ذاك الوقت تكونون مستقرين وتتصرفون ع راحتكم
هااي البيوت ( الحكوميه والسكشن 8 ) اشوفه تناسب الناس الكبار بالعمر او الي امكانياتهم الماديه او الحياتيه محدوده ما بيها شي
او الي بعدهم بالبدايه وديحاولون يرتبون وضعهم ... ويكدرون يبقون بيها شكد ما يردون
احنا الكيس ووركر مالتنه صارله ١٠ سنين كاعد بالسكشن 8 وما يريد يتطور بشغله علمود ما يسحبون منه البيت
ف كل شخص والي يناسبه موجوده الفرص للكل
البريد ... طبعا اني جنت اريد اعيش اللقطه من يطلعون بالافلام لازمين ١٥ ظرف باليد ياخذ المهمه ويترك الباقي ف اني عشتهه الى ان كلت بس هههههه
راح تشوفون هنا شكد يحبون الورق والدعايات والاعلانات الي تجيكم .... بالبدايه جنت اقراهه تالي كمت راسا اشمرهه تجيكم صفطه مال اعلانات ههههه
صناديق البريد طبعا اذا بيت حتكون يمه او اذا مجمع سكني شقق حتكون كل صناديق البريد بمكان واحد واتاكدو من اسمكم ع اي شي يجيكم لان بعض الاحيان تجي اشياء بالغلط ف ميصير تفتحون بريد غير شخص تحاسبون ع هالشي ف اتاكدو من الاسم
واذا اشتريتوو شي من النت راح تجي ع صندوق بريد اكبر شويه من مالتكم لكن موجود بنفس المكان وهذا الصندوق البريدي الجبير يكون اله مفتاح طبعا ف من توصل الكم شغله راح تشوفون مفتاح بالصندوق مالتكم تاخذو وتفتحون الصندوق الاكبر طبعا هااي اشياء بسيطه كلهه راح تعرفوهه بس اني حبيت اذكرهه احب التفاصيل بكل شي
طبعا هسه اكيد راح تشترون اشياء من النت ف لازم تفتحون حساب ويه موقع الشراء ومن خلاله تدفعون وتشترون وتطلبون بخلال شكد تريدوو يوصل مثلا اذا بخلال ٣ ايام اتصور ياخذون 12 $ واذا اسبوع 8 $ يعني هيج شي. احنا اشترينا هوايه اشياء مثل ايباد عدد ٣ والكفرات مالتهه مدفااه كهربائيه تكرمون احذيه رياضيه
كراسي ادويه ديكورات يعني هووايه امور وانتوو تطلبون طريقه التسليم يعني مثلا التوقيع عند استلام الحاجه او هم يتركوهه ع الباب
وهنا الناس هواايه يشترون عن طريق النت
السياره
طبعا شي ضروري جدا المهم تاخذون الكتاب من mvd وتحفظوو وتمتحنون النظري تقريبا نفس الاسئله بكل الولايات الاختلاف فقط بعض الاسئله حسب طبيعه الولايه اذا كانت ثلجيه او جبليه او تكثر بيها الطرق السريعه ومن ثم العملي
بالنسبه للاخوات الي ما تعرف سياقه المنظمه تدفع اجور التعليم يعني شوفوو اي مكتب والمنظمه تدفع الاجور وهي ع الاغلب 6 ساعات عملي باجور كمعدل 250$
اني بالصدفه عرفت هذا الموضوع لان اشتغلت بالمنظمه فتره وبطلت
طبعا من تشترون السياره مو اله تسجل بالدائره الرئيسيه اكو مكاتب تسجل السياره يمهه وتدفع مبلغ اكثر اني دفعت ١٠ دولارات زياده بخلال ربع ساعه بس احسن ما انتظر ساعات الى ان يوصل السره
اما التامين ع السياره طبعا عده شركات واسعارهم متفاوته والتايتل السالفج التامين عليه يكون عادي يعني من يصير حادث يدفع التامين للسياره الثانيه مو سيارتك
لان هي سالفج ومنتهيه شيصلحون منهه مره ثانيه هيجي حساباتهم اما اذا التايتل كلين يكون تامين شامل للسياره ويصلحوهه
بالنسبه لاخ سعد الدليمي سالني اي ولايه انسب للعائله
اغلب الاراء تتفق ع انو كاليفورنيا وفلوريدا ونيويورك وواشنطن ستيت واريغون وميرلاند واوهايوو وكولورادو وتنسي واريزونا وتكساس هي مناسبه للعوائل
لكن يبقى مو قياس لان كل عائله الهه حساباتهه ومو شرط اذا احد كال هاي ولايه مناسبه للعائله راح يكون الحجي ميه بالميه مضبوط
عن نفسي شفت هوايه مناطق كالو مناسبه وطلعت غير والعكس صحيح
ف اخ سعد ابد لا تشيل هم حتى لو طلعت الك ولايه غير مناسبه اعتبرهه فتره انتقاليه ابقى بيها فتره واتعلم ع السستم الامريكي اشتغل وشوف الراتب شلون ينحسب شلوون تدفع الفواتير والباقي سهل لان اغلب الناس ما تبقى بنفس الولايه لازم اتغيرهه
والاختلاف كبير بين مناطق الولايه نفسهه ف كل شخص لازم يجي ويشووف الوضع وبعدين يقرر المناسب اله
كتبت هوااايه هههههه يله يوميه اقروو جزء بعد ما اكدر اكتب عن نفسي ووضعي او انزل صور غير مره ان شاء الله جنت اريد اكتب اكثر
اخيرا اتمنى تعذروني لان الخاص مغلق واعرف انوو البعض منكم زعلان مني لكن ما اكدر ارد ع احد لضيق الوقت وعدم التواجد دائما وهاي الوضعيه
اكيد الكل راح يمر بيها اتمنالكم السفر القريب للاخوه الي مخلصين كولشي وسرعه الاجراءات من قبول واستيطان وفحوصات لباقي الاخوه والاخوات
اختكم راي
التصويت
