اخي ابو ميس المحترم انا من تركيا بصراحه اجاوبك من حيث الدخل الشهري الذين لديهم عائله من خمس نفرات تصرف من 5 ــ الى 6 اوراق في
الشهر كحد ادنا . يعني اذا اتاجر شقه 250 ليره ـ 5 اوراق تكفيك مصرف مع الفواتير لمدة شهر واذ اتاجر شقه 500 ليره او 450 ليره. فان 6 اوراق
اعلاه تكفي مصرف وفواتير ....... وغيرها محسوبه . والتجيك للمبلغ راجع يمك انت وبقائك .اما في حال انتهى المبلغ لديك. اولا توجد اعمال بسيطه
لاكنها لاتكفي لسد الحاجه . اذا كانت مدعومه من العراق براتب شهري او عندك بيت موجر في العراق نعم يمكنك العيش في تركيا
. علما ان هاذا الدخل الذي ذكرته لك اخي العزيز قابل للنزول في حال اقتصادك
اخوك مرجان البحر وهلا وسهلا بك اخي العزيز
ابو ميس مرحبا
دعني اضعك بالصورة الصحيحة
الحياة تعتمد على نوع المعيشة الي انت متعلم عليها يعني تختلف من شخص الى شخص
دعني اوضحلك التفاصيل
الايجار وحسب المحافظة والمنطقة ونوع السكن والتدفئة يترواح من 250 الى 500 طبعا كلما زاد عدد الغرف والتدفئة زاد الايجار
الماء وانتوا خمس نفرات يجيك فاتورة او كارت تعبئة وحسب اعتقادي يحتاجلكم من 50 الى 75 ليرة شهريا لان عددكم هواية
الغاز اذا قنينة قنينة الغاز 12 كيلو غرام اتكفي العائلة ام نفرين من شهرين الى شهرين ونص واعتقد تكفيك لمدة شهرين كمعدل وسعرها بالصيف 59 ليرة وبالشتاء 70 ليرة
الكهرباء وحسب الاستخدام والمحافظة يعني اذا محافظات بالجنوب الاستخدام اقل لان الماء ادفء والاستخدام للتدفئة والغسل اقل يعني يحتاجلك اذا خمس نفرات فد 70 الى 100 ليرة بس كهرباء شهريا اذا ماكو دوار غاز لان تعتمد على الكهرباء في تدفئة الماء للغسل
بالنسبة لل انترنت فبكيفك اذا تشترك محدود او بدون سقف محدد ويبدا من 39 ليرة بالشهر ولغاية 65 ليرة وحسب نوع الاشتراك اكو اب 59 ليرة اكو اقل اب 44 ليرة
واذا اكو احد قريب منك تكدر تتشارك ويا بالانترنت بس ما انصح بيها
يبقى التدفئة اذا دوار كاز انت وشطارتك بس احسب اذا محافظة باردة اذا كلش تقتصد كلش يجيك فد 170 ليرة خلال موسم الشتاء. ( ملاحظة اذا دوار كاز عندك متحتاج قنينة غاز للطبخ )
اذا التدفئة كولوفير يعني مركزي ابو العمارة ياخذ وحسب كل ابو عمارة شكل من 130 ليرة الى 185 ليرة وياخذ مبلغ التدفئة لمدة عشرة اشهر بالسنة يعني سماح بس شهرين لان هنا النظام اذا التدفئة مركزية مسؤول العمارة ياخذ فلوس التدفئة حتى بالصيف وحسب طبعا المحافظة الي راح تسكن بيها اكو محافظات باردة اتموت في شمال تركيا
باقي المصاريف انت تتحكم بيها مثلا
كيلو اللحم طبعا هوش كله الغنم غالي جدا بين 19 الى 25 وحسب النظافة والجودة
كيلو لحم مثروم هوش 19 الى 23 ليرة
كيلو دجاج حسب النوعية من 4 ونص ليرة الى 7 ونص ليرة
بقية الاسعار تقريبا مقاربة لاسعار البضائع في العراق
النقل اذا عندك شخص ميكدر يمشي هواية بالباص ايكلف الشخص 1 ونص او اكثر بقليل ليرة
التكسي غالي بس اذا عددكم هواية يطلع اصرف من الباص بالمسافات القريبة ويفتح عداد اب 2 ليرة ونص
التلفون طبعا هاتف نقال مهم جدا جدا. ويجب تفعيل السم كارت على جهازك ويكلف تفعيل الجهاز والسم كارت تقريبا 150 ليرة وهذا التفعيل لمرة واحدة يعني بعد متحتاج اتفعله للسم كارت الا اذا بدلت الجهاز لازم اتفعل السم كارت والجهاز من جديد اذا كان الجهاز مشتري من خارج تركيا
الملابس واسعارها وحسب كل شخص يعني ارخص من العراق تقريبا للنصف او اقل بقليل وحسب الماركة
الهاتف يحتاج رصيد شهري لان متكدر اتخابر بي ووره فترة اذا متعبي رصيد ينسد الخط
الرصيد الشهري اكو عروض تبدا من 12 ليرة و15 ليرة و19 ليرة واذا تحجي هواية تحتاج لو 25 ليرة او 30 ليرة شهريا لان كل اشتراك ينطيك عدد دقائق محدد مثلا 180 او 200 او 250 دقيقة
فانت من المعلومات اعلاه احسب اشكد ايكفيك مصرف بالشهر
بالمناسبة اذا عندك طفل رضيع حليب الاطفال غالي والحفاظات همين غالية يعني حليب الاطفال ابتاميل 1200 غرام تقربا اب 45 ليرة واحسب اذا عندك طفل اشكد يرادلك بالشهر حليب واستفاد
ارجو ان اكون وضحتلك ما لم يستطع الاخوة الاخرين توضيحه يعني هاي الخمس اوراق ( خمسة مئة دولار ) وهسة الدولار صاعد اب 193 اغلب الوقت يتصرف على ال 176 ليرة الورقة ام ال 100 دولار اتسد مصاريف الايجار والكهرباء والماء والانترنت والتدفئة وكم شغلة لخ هاي من عدا الاكل والمصرف اليومي والمخضر واللحم والالبان والفواكه والبيض
ارجو ان اكون قد وضحتلك الصورة واذا اكو غلط ممكن الاخوة الاعضاء ايصححون الي كتبته
تحياتي للجميع
Cloudy
التصويت
موضوع: جــــمــــــــا عــة تـركـيــــــــــا (زيارة 755363 مرات)
