اخواني.....اني صيدلاني اخاطر بكلشي واروح لامريكا ساعدوني!؟

[summersnow]

السلام عليكم ...
  اخوتي باطيب منتدى احب اشارككم حيرتي ومتاكد راح تساعدوني باتخاذ قراري .
من قدمت للهجرة جانت اوضاعي متدهورة ومامستقرة بس مثل ماتعرفون تاخذ الموافقات والاجراءات فترة طويلة
تقريبا سنتين واكثر بحيث اني نسيت الموضوع واستمريت بحياتي والحمدلله اوضاعي هسة زينة واتفاجئت من
اتصلت المنظمة وكالت الكيس مالك مستوي وتعال للفحص الطبي ماقبل السفر
اني موظف بالحكومة وعندي شغلي الخاص فيستاهل بعد كل هالتعب اعوف كلشي واسافر؟
احب تفيدوني وخصوصا اذا تعرفون احد من المجموعة الطبية بامريكا شلون مشت احوالهم واشكركم مقدما

[EagleHead]

شوف شوف... يقدمون و ياخذون مكان الناس الي بامس الحاجة للسفر و بعدين و الله احنا هسه بحيره.. طبعا هذا واحد من مليون بس موصوجكم صوج المنظمة الي اصلا ما عدهه ستراتيجية لمعرفة منو حقيقة محتاج السفر حتى يحتفظ على حياته و حيات اطفاله..


 اخي صاحب الموضوع عذرا اذا جرحت مشاعرك بس هذا من ذنبك و انصحك ما تسافر لان انته هسه مسيطر و موظف بشركة سوني ...

تحياتي...

[phpcraft]

الافضل ان تسأل اشخاص داخل امريكا

[eng ali]

صديقي
شكلك متردد وخلي ابالك التردد هذا ميفيدك يعني اذا ماعندك صبر تتحمل اترك السفر بس لان للمره المليون نعيد امريكا مو بلد راحه ولا بلد وردي امريكا تريد اللي يتعب فانت عندك استعداد تتعب اكيد لازم اتسافر ماعندك استعداد وراضي بمكانك ومرتاح ابقه لاتسافر ولاتاخذ مكان واحد محتاج السفر فعلا فالاحسن تفكر الف مره بس من كلامك انت متردد لاتسافر اخويه.

[سهم التميمي]

والله انتوا  الي دمرتونة  الله لايرضى عليكم تاخذون  مكان غيركم حسبي الله ونعم الوكيل

[سوسو اسو]

اخويه اني اكول اخذ اجازه من شغلك سنه بدون راتب للسفر خارج العراق
واطلب تأجيل من الكليه مالتك
وسافر وشوف شنو الاحسن الك

لان اذا تجي على الحقيقه ... جو العراق ميصيرله جاااره
نفسيات الي بالعراق متصيرلها جاره
وبالعراق حتى الموضف مكانه ممضمون حتى اذا جان اكو واسطه... ممكن بأي تغيير نص الموضفين يطيرون همه والاعلى منهم

فتوكل على الله وهاي فرصه متتعوض . واخذ اجازه واجل كليتك .. ومن تاخذ الكرين كارت ارجع كمل ..حاول ادبر امرك
تره لا العراق يفيد ولا الدول المجاوره تفيد ...

تحياتي الك

[مرجانه]

اخويه اني اكول اخذ اجازه من شغلك سنه بدون راتب للسفر خارج العراق
واطلب تأجيل من الكليه مالتك
وسافر وشوف شنو الاحسن الك

لان اذا تجي على الحقيقه ... جو العراق ميصيرله جاااره
نفسيات الي بالعراق متصيرلها جاره
وبالعراق حتى الموضف مكانه ممضمون حتى اذا جان اكو واسطه... ممكن بأي تغيير نص الموضفين يطيرون همه والاعلى منهم

فتوكل على الله وهاي فرصه متتعوض . واخذ اجازه واجل كليتك .. ومن تاخذ الكرين كارت ارجع كمل ..حاول ادبر امرك
تره لا العراق يفيد ولا الدول المجاوره تفيد ...
 
آني اشوف رأيك صحيح ومناسب جدا" ... وبالتوفيق انشالله
تحياتي الك

[EagleHead]

والله انتوا  الي دمرتونة  الله لايرضى عليكم تاخذون  مكان غيركم حسبي الله ونعم الوكيل

الاخت الفاضلة سهم التميمي...

شفتي بالله عليك بكل دم بارد و الله اروح لو ما اروح... و الله الاخ متوظف ما يدري كلنه موظفين و اصحاب شهادات عليا و نريد نهج لان الوضعية حيات او موت... بس حسبي الله و نعم الوكيل..


تحياتي...

[phpcraft]

نعم انا مع رأي اخذ الاجازة

كلنا متأذين بس علكيفكم ويه الرجال هسة الي يسمعكم يكول ............................................................ خليني ساك

[it,s me]

أخوية ابو الموضوع مع احترامي بس اكو مثل يكول اللة ينطي wallmet للماعندة teeth

[سارة نبيل]

اخي اني برايي وحسب ما شفنا من الحالات اللي سافرو ورجعو
 انه قرار السفر مو سهل ابدا وهو قرار نهائي ومصيري
 واكثر واحد يكدر يقيم وضعه هو الشخص نفسه
ولو شي جيد انه الواحد يستشير غيره قبل ما يقرر
لكن يبقى القرار النهائي راجع لصاحب العلاقة
ثانيا تقريبا كل طالب لجوء صار عنده فكرة عن الوضع باميركا
وشكد صعبة الحياة خصوصا بالبداية  ومختلفة عن الحياة بالعراق بنسبة كبيرة
فالمتردد وخال بباله خط رجعة وخال احتياط وظيفة او التزام اخر مؤجل اكيد رح يقرر يرجع
ورح ينحني امام اول عاصفة تمر عليه وبهيج حاله يمكن يخسر فلوس ووقت

اذن المفروض يدرس الموضوع بعمق ويختار الاحسن لوضعه واكيد لازم يضحي
 بشي ماكو واحد يريد كلشي ويحصل كلشي

تقبل مروري
ا

[titan]

الاخ  صاحب الموضوع  اخذ اجازه سنه وشوف الوضع شنو , لكن اني حسب ما اعرف  لا يعترف  بغير الشهاده الامريكيه , يعني روح وشوف اذا عجبك الوضع كمل اذا لا ارجع لوظيفتك , الافضل ان تاخذ اجازه سنه بدون راتب او اجازه مرضيه .


صح سنتين من الاجراءات لحين الحصول عل موعد سفر اتغير الانسان من حال لحال .. اني مقدره هذا الشي واعرف اهواي صديقاتي لغو فكره السفر بعد تحسن اوضاعهم .


نتمنى التوفيق للجميع وماكو احد ياخذ مكان احد . كل واحد الله كاتبله رزقه ..


اختك

بهاء الكافي

[ابومروان]

شباب منو يكلي شكد تكلفه السفر الى امريكا سياحه مع جزيل الشكر

[ryan dani]

نصيحه لاتروح ...متفيدك

[رافت العراقي]

 اخويه اخذ اجازه وروح ... وما راح تخسر شي ,,,يمكن تلكه شغل هناك احسن ويعجبك ,,,, واذا لا ارجع الشغلك بالعراق

  واني ابد ما الومك اذا قررت تبقه وتلغي السفر ,,, اللوم على المنظمه اللي خلتنه ننتظر سنين واكيد هواي اشياء تتغير بهاي المده

 تحياتي الك اخويه العزيز

[yasir fakhri]

الاخ صاحب الموضوع تمت الاجابة على موضوعك في قسم مواضيع الحياة في اميركا

ما اعرف ليش نشرت الموضوع مرة ثانية هنا

تحياتي

[lord.baghdad]

ما اعرف شجاوبك لان اخاف احجي حجي ثكيل وتزعل منه

حسبي الله ونعم الوكيل

[فارس البغدادي]

باوع ابو الشباب اذا امورك مستقرة لاتفكر بسفر غير السياحة نهائيا اما اذا عندك استعداد تبدي من الصفر من جديد فروح لاميركا ترى السفر للي ما مستقر فانته ليش مبهذل روحك اكعد واسكت ترى البهذلة مو سهلة والله مو سهلة وتقبل مروري

[اسطنبولي]

يعني انتو صدك ما اعرف اشلونكم شبيكم ويا الولد متستحون هذا الي كله حسبي الله ونعمه الوكيل عليك وهذا الي كله خليني ساكت ما اريد اجرحك بل كلام وهذا الي كله متفيدك لا تروح
اول شي الولد كلكم اني وضعي قبل سنتين جان مو مستقر وحياتي جانت مو تمام واني قدمة ع iom والولد بل سنتين حياته تحسنت ونسه موضوع السفر وهسة خابرو iomكلوله ملفك جاهز يعني حقه من اي فكر مي سافر لأن صاله سنتين ينتظر وهسة يله خابرو اكو واحد يطلب لجوء وحياته بخطر اي طولون الجوء مالته سنتين لو اكثر وين صايره هاي  وبعدين انتو تكلوله الى الولد تاخذ مكان غيرك ماكو هيجي شي الي كاتبه ربك اي صير الك


اخي اني الي انصحك بي
اخذ اجازة سنه من الشغل مالتك وروح الى امريكا شوف اذا الوضع عجبك ولكيت شغل ابقى واذا معجبك الوضع ومحسيت بل راحه ارجع الى العراق والى الوضيفه مالتك وانشاء الله تقرر القرار الصحيح 

[abu shahab]

يعني انتو صدك ما اعرف اشلونكم شبيكم ويا الولد متستحون هذا الي كله حسبي الله ونعمه الوكيل عليك وهذا الي كله خليني ساكت ما اريد اجرحك بل كلام وهذا الي كله متفيدك لا تروح
اول شي الولد كلكم اني وضعي قبل سنتين جان مو مستقر وحياتي جانت مو تمام واني قدمة ع iom والولد بل سنتين حياته تحسنت ونسه موضوع السفر وهسة خابرو iomكلوله ملفك جاهز يعني حقه من اي فكر مي سافر لأن صاله سنتين ينتظر وهسة يله خابرو اكو واحد يطلب لجوء وحياته بخطر اي طولون الجوء مالته سنتين لو اكثر وين صايره هاي  وبعدين انتو تكلوله الى الولد تاخذ مكان غيرك ماكو هيجي شي الي كاتبه ربك اي صير الك


اخي اني الي انصحك بي
اخذ اجازة سنه من الشغل مالتك وروح الى امريكا شوف اذا الوضع عجبك ولكيت شغل ابقى واذا معجبك الوضع ومحسيت بل راحه ارجع الى العراق والى الوضيفه مالتك وانشاء الله تقرر القرار الصحيح 

 

[لاچع]

يا اخي ماعرف ليش من قريت موضوعك حسيت نفسي مثل واحد تايه بالصحراء بعز الصيف الاهف  وميت من العطش  .. وانته جيت شايل بطل ماي مجرررررررش  وبدل متشربه .. درته كله بالارض كدامنا واحنا نتوسل على قطرة ماي وحده !!!

اخوك بسوريا وصارلي اكثر من اربع سنوات انتظر الموافقه الامنيه !

تحياتي

[احمد النجفي]

كل واحد ورزقه
ليش هيه امريكه مال ابو واحد
الكاتبه ربك اتشوفه واحمدوا ربكم
وما تشائون الا ان يشاء الله رب العالمين
رزقكم في السماوات وانتم لاتعلمون
لا اعتراض على حكم الله
وشكرا

[ابو علاوي]

Please consider my case! I applyed  2 years ago

[NOORNOORI**]

السلام عليكم ................ اخي اذا ادور امان وكهرباء ومي وطلعه حلوة ومدارس مال اوادم لاطفالك واحترام للانسان اطلع وسافر ...........بس اذا ادور شغل توب ومنهل السوالف ابقى ......وانت اختار