ܒܦܘܪܣܐ ܕܕܘܟ݂ܪܢܐ ܕܣܗܕ̈ܐ

[بولص دنخـا]

http://www.youtube.com/watch?v=6jAyMxcCjV0&feature=plcp

ܐܵܬܘܿܪܵܝܵܐ ܚܘܿܪ ܠܬܲܫܥܝܼܬܘܼܟ̇ ܡܘܼܕܝ݇ ܒܸܚܙܵܝܵܐ
ܫܒ̣ܘܼܩ ܡ̣ܢ ܛܠܘܿܡܝܹ̈ܐ ܘܦܸܪ̈ܡܹܐ ܒܪܹܫܘܼܟܼ ܠܲܝܬ ܒܹܐܬܵܝܵܐ
ܒܐܲܪܥܵܐ ܕܐܝܼܠܹ̈ܐ ܕܠܵܐ ܡܸܢܝܵܢܵܐ ܪܹ̈ܫܵܝܗܝ ܩܸܛܥܝܹ̈ܐ
ܕܝܼܗܘܵܘ ܡܗܘܼܡܢܹ̈ܐ ܒܥܹܕܬܵܐ ܘܐܘܼܡܬܵܐ ܘܫܘܼܒ̣ܚܵܐ ܕܡܵܪܝܵܐ.

ܒܐܘܼܪܗܵـܝ ܡܕܝܼܢ݇ܬܵܐ ܕܓܲܢ݇ܒܵܪܘܼܬܵܐ ܘܒܹܝܬܡܲܪܕܘܼܬܵܐ
ܙܪܵܩ ܙܲܗܪ̈ܝܪܹܐ ܕܗܲܝܡܵܢܘܼܬܵܐ ܘܦܪܵܣ ܬܲܘܕܝܼܬܵܐ
ܦܸܫܠܗܘܿܢ ܦܪ̈ܝܼܡܹܐ ܒܐܲܠܦܹ̈ܐ ܕܣܲܗܕܹ̈ܐ ܒܝܲܕ ܚܲܢܦܘܼܬܼܵܐ
ܡܸܛܠ ܕܝܼܗܘܵܘ ܐܵܬܘܿܪ̈ܵܝܹܐ ܒܫܲܪܝܼܪܘܼܬܵܐ.

ܓܵܘ ܗܵܟܵܪܝܼ ܐܲܪܥܵܐ ܕܓܲܒܼܪܹ̈ܐ ܘܥܠܲܝܡܹ̈ܐ ܕܐܘܼܡܬܵܐ
ܫܦܸܟ݂ܠܹܗ ܕܸܡܵܐ ܕܡܵܪܝ ܒܸܢܝܵܡܹܝܢ ܒܥܲܬܝܼܬܘܼܬܵܐ
ܡܸܛܠ ܕܝܼܗܘܵܐ ܗ̇ܘ ܦܵܪܘܿܩܵܐ ܕܣܘܼܪܵܝܘܼܬܵܐ
ܘܙܪܵܩܬܵܐ ܕܣܲܒܼܪܵܐ ܡܥܲܠ ܛܘܼܪ̈ܵܢܹܐ ܕܢܝܼܢܘܹܐ ܚܹܐܪܬܵܐ
ܘܒܲܗܪܵܐ ܠܕܲܥܬܝܼܕ ܕܐܵܬܘܿܪ ܝܸܡܲܢ ܒܕܵܪܹ̈ܐ ܛܠܝܼܡܬܵܐ

ܓܵܘ ܛܘܼܪܥܒܕܝܼܢ ܫܦܸܟ݂ܠܹܗ ܛܪܘܿܢܵܐ ܕܗܘܿܠܵܟܵܝܵܐ
ܦܪܸܣܠܹܗ ܪܗܲܒܼܬܵܐ ܠܙܥܘܿܪܵܐ ܘܓܘܼܪܵܐ ܒܲܪܸܒܪܵܝܵܐ
ܒܣܲܝܦܵܐ ܕܢܚܵܫܵܐ ܠܵܐ ܒܸܦܪܵܫܵܐ ܠܒܲܟܼܬܵܐ ܘܓܲܒܼܪܵܐ
ܕܘܼܡܝܹ̈ܐ ܠܥܘܼܪ̈ܒܹܐ ܨܦܵܚܵܐ ܠܫܠܲܕܹ̈ܐ ܘܐܲܪܥܵܐ ܫܘܵܝܵܐ
ܨܸܗܝܹ̈ܐ ܠܕܸܡܵܐ ܢܗܵܫܵܐ ܒܫܠܲܕܵܐ ܕܡܝܼܬܵܐ ܘܚܵܝܵܐ.

ܫܸܡܫܵܐ ܓܢܹܐܠܵܗ̇ ܘܚܸܫܟܵܐ ܦܪܸܣܠܹܗ ܓܵܘ ܣܸܡܹܝܠܹܐ
ܩܵܠܵܐ ܕܛܘܿܦܹܐ ܘܡܵܘܬܵܐ ܘܦܢܵܝܬܵܐ ܗܵܐ ܡܘܼܝ݇ܬܹܐܠܹܗ
ܒܢܘܿܢܹ̈ܐ ܕܐܵܫܘܿܪ ܡܟܠ ܚܕܵܐ ܦܢܝܼܬܵܐ ܕܡܨܹܐ ܟܘܼܦܫܹܐܠܹܗ
ܠܣܸܕܪܵܐ ܕܣܲܗܕܹ̈ܐ ܐܵܬܘܿܪ̈ܵܝܹܐ ܟܲܕ ܣܘܼܦܝܹܐܠܹܗ.


ܥܲܠ ܣܸܡܹܝܠܹܐ ܫܦܸܟ݂ܠܹܗ ܛܪܘܿܢܵܐ ܒܬܘܿܦܹܐ ܘܢܝܼܙܵܐ
ܓܲܒܼܪܹ̈ܐ ܘܥܠܲܝܡܹ̈ܐ ܘܒܢܵܬ݂ܵܐ ܕܐܘܼܡܬܵܐ ܡܘܼܟܠܹܐ ܪܹܐܙܵܐ
ܚܲܕ ܢܸܣܝܘܿܢܵܐ ܠܬܘܿܦܹ̈ܐ ܕܒܪܹܝܬܸܢ ܟܡܵܐ ܒܸܕ ܚܵܪܙܵܐ
ܘܓܲܝܣܵܐ ܕܐܸܢܓܠܸܣ ܟܲܕ ܦܵܪܘܼܓ̰ܹܐ ܒܫܲܘܦܹܗ ܪܘܵܙܵܐ.

ܕܵܐܟܼܝܼ ܒܡܲܢܫܸܢ ܓܵܘ ܣܸܡܹܝܠܹܐ ܠܝܲܘܡܵܐ ܟܘܿܡܵܐ
ܠܒܵܒܵܐ ܩܛܝܼܠܵܐ ܘܠܕܸܦܢܹܗ ܒܪܘܿܢܹܗ ܪܹܫܹܗ ܦܪܝܼܡܵܐ
ܠܟܲܪ݇ܣܵܐ ܕܝܸܡܵܐ ܒܢܝܼܙܵܐ ܨܪܵܝܵܐ ܗ̇ܘ ܛܠܵܘܿܡܵܐ
ܓܸܚܟܵܐ ܕܣܲܟܼܠܵܐ ܐܸܢܓܠܸܣܢܵܝܵܐ ܒܐܵܐܲܪ ܪܝܵܡܵܐ.


ܝܵܐ ܚܲܒܝܼܒܼܝܼ ܐܵܬܘܿܪܵܝܵܐ ܕܟܼܘܿܪ ܠܣܸܡܹܝܠܹܐ
ܟܡܵܐ ܪ̈ܘܼܡܝܵܬܹܐ ܗ̇ܘ ܛܵܠܘܿܡܵܐ ܡܓܲܪ̈ܡܘܼܟܿ ܒܢܹܐܠܹܗ
ܐܵܢܝ݇ ܕܸܫܝܵـܬܵܐ ܘܛܘܼܪܹ̈ܐ ܒܕܸܡܘܼܟܿ ܟܲܕ ܡܘܼܫܬܹܐܠܹܗ
ܒܩܲܪ̈ܩܲܦـܝܵܬܵܐ ܕܣܲܗܕܘܿܟܼ ܠܓܵܢܹܗ ܓܲܢܹ̈ܐ ܣܝܹܓ݇ܠܹܗ.

ܓܵܘ ܨܘܿܪܝܼܵܐ ܓܲܝܣܵܐ ܕܒܵܥܲܬܼ ܦܪܸܣܠܹܗ ܪܗܲܒܼܬܵܐ
ܫܬܸܩܠܹܗ ܩܵܠܵܐ ܕܫܲܒܼܪܹ̈ܐ ܙܥܘܿܪܹ̈ܐ ܡܓܵܘ ܕܲܪܓܘܿܫܬܵܐ
ܡܩܵܠܵܐ ܕܛܘܿܦܹ̈ܐ ܠܵܐ ܒܸܦܪܵܫܵܐ ܠܘܲܠܘܲܠܝܵـܬܵܐ
ܥܒܸܕܠܹܗ ܠܒܵـܬܹ̈ܐ ܐܵܢܝ݇ ܪ̈ܘܼܡܝܵـܬܵܐ ܕܟܼܵܪܵܐ ܚܲܕܬܵܐ
ܘܐܵܢܝ݇ ܓܲܢܝܵـܬ݂ܵܐ ܘܚܲܩܠܹ̈ܐ ܕܙܪܘܿܥܬܵܐ ܕܠܵܐ ܥܲܩܒܼܵـܬܵܐ.

ܒܕܵܪܵܐ ܕܥܸܣܪ̈ܝܼܢ ܫܲܠܸܛ ܚܸܫܟܵܐ ܓܵܘ ܒܹܝܬܢܲܗܪܹ̈ܝܢ
ܬܠܸܚܠܹܗ ܠܒܵܬܲܢ ܐܵܦ ܡܘܼܩܸܕܠܹܗ ܠܕܐܵܢܝ݇ ܚܲܩܠܵܢܲܢ
ܒܛܘܿܦܹ̈ܐ ܡܚܹܐܠܹܗ ܐܵܢܝ݇ ܥܸܕܵܬܵܐ ܕܗܲܝܡܵܢܘܼܬܲܢ
ܘܒܥܹܐܠܹܗ ܕܫܵܝܸܦ ܡܓܵܘ ܬܲܫܥܝܼܬܵܐ ܐܵܬܘܿܪ ܝܸܡܲܢ.

ܒܲܣܵܐ ܡܛܠܘܿܡܝܹ̈ܐ ܘܕܸܡܵܐ ܕܟܹܐܢܹ̈ܐ ܐܲܢ݇ܬ ܒܸܫܬܵܝـܵܐ
ܕܵܐܟܼܝܼ ܒܝܵܗܒܸܬ ܝܲܘܡܵܐ ܕܕܝܼܢܵܐ ܐܲܢ݇ܬ ܦܘܼܢܵـܝܵܐ
ܒܙܲܒܼܢܵܐ ܕܐܵܐܲܪ ܟܲܕ ܒܸܛܠܵܡܵܐ ܠܐܵܬܘܿܪܵܝـܵܐ
ܠܵܐܡܨܸܬ ܗܵܘܸܬ ܡܵܪܵܐ ܠܐܵܬܘܿܪ ܝܵܐ ܢܘܼܟܼܪܵܝـܵܐ.

ܐܵܬܘܿܪ ܝܸܡܲܢ ܠܟܹܐܦܘܿܗ̇ ܢܩܝܼܪܵܐ ܐܵܫܘܿܪ ܫܸܡܲܢ
ܠܢܝܼܫܲܢ ܒܦܵܠܚܲܚ ܠܲܝܠܵܘܵܬܲܢ ܐܘܼܦ ܐܝܼܡܵܡܲܢ
ܠܕܐܵܢܝ݇ ܬܪܹ̈ܝܢ ܢܲܗܪܹ̈ܐ ܒܸܕ ܡܲܣܡܸܩܲܚ ܡܕܵܐܗܵܐ ܕܸܡܲܢ
ܐܵܘ ܒܸܕ ܡܵܛܲܚ ܠܚܲܕ ܦܘܼܪܩܵܢܵܐ ܐܵܘ ܫܘܼܠܵܡܲܢ.