الحمد لله رب العالمين على كل حال
أنا رحت أستلمت المغلف بعد إجراء مقابلة لإضافة طفل
هاي المرة الثانية اللي أستلم بيها المغلف ، بعد ان إستلمت الأول في 2009 .
المرة الماضية في 2009 كانت المغلفات لأصحاب الموافقات و أصحاب قيد الدراسة نفس الشيء (نفس الشكل و التأشير) ، و أنا كنت قيد الدراسة.
المرة هاي أكو حالتين ، النوع الاول موافقات محلفين بس مع إنتظار الأمنية ( مثل حالتي الحمد لله على كل حال).
و النوع الثاني موافقات محلفين مع موافقات امنية كاملة ما شاء الله ، يعني بس ينتظرون دورة تثقيفية و موعد سفر مع خط رحلة، و مليون مبروك عليهم و الله يوفقهم.
الشغلة المؤلمة انه انا حسيت نفسي رجعت للمربع الأول بعد 4 سنوات و نصف، لأن امنيتي كانت كاملة قبل مقابلة المحلفين الأخيرة الخاصة بإضافة الطفل، و هسة رجعنا بإنتظار الأمنية
دخلت دراسة عليا خمس سنوات و خلصتها و الجماعة بعدهم ديدرسون وضعي الأمني !!
حسب اللي شفته من أول مجموعة وزعولهم المغلفات أنه الكل موافقات محلفين ، قسم من دون الأمنية و قسم مع الأمنية.
كان أكو رجل كبير بالعمر حيل إنقهرت عليه قال أنه جاي يستلم المغلف للمرة الثالثة !!! و هو من جماعة 2009 ، مع الأسف ما عرفت نتيجته، إن شاء الله يا رب تكون موافقة و يسافر بسرعة.
الموعد الأصلي لإستلام النتائج كان الساعة 2 الظهر، لما إتصلت تلفونيا بالمنظمة قبل 4 أيام حتى اتاكد منهم الموظف الحباب قال تعال الساعة 10 صباحا ، رحت الساعة عشرة الحارس بالباب قال النتائج الساعة 2، و عاااادي خلف الله عليهم.
و نبقى على المغذي و الله كريم
