صباح الخيرات ....
قبل كل شيء احب ان اقدم اعتذار واقدم شكر وامتنان ..
احب ان اقدم اعتذاري لجميع اعضاء المنتدى وجميع الضيوف عن فترة الغياب الي كانت اسبابها كثيرة ويمكن اهمها الانشغال بنشاط الحياة الي لا يترك الك اي وقت فراغ والي في امريكا اكيد حاسين بيه والي راح يوصلون انشاء الله راح يشوفوه فاحب اقدم اعتذاري للجميع وبالاخص العدد الهائل الي ارسلي على الخاص والي هسه يله شفت رسائلهم لاني لم ادخل للمنتدى من اشهر طويلة فانشاء الله راح احاول ارد على الي اكدر عليه فاتمنى من الجميع ان يتقبل اعتذاري ..
واكيد اقدم شكري وامتناني لجميع من اتصل بيه سواء بالتلفون او بالايميل او بعثلي رسالة او ذكرلي موضوع اكيد هذا اثبتلي واكيد يثبت للجميع باننا بهذا المنتدى لسنا متصفحين انترنت لكننا عائلة كبيرة محترمة تربطها علاقة محبة وتعاون ..
اما اخر اخبار ابو قمر وهو السبب الرئيسي الي جعلني مشغول الفترة السابقة هو الحمد لله دخولي لجامعة نورث او تكساس وبداية دراستي لبرنامج الدراسات العليا الماجستير والدكتوراة , واخيرا اصبح فعليا طالب دراسات عليا في مجال هندسة البرامجيات والحمد لله ايضا زوجتي ام قمر طالبة وياي ايضا بس هي اختصاص ادارة قواعد البيانات , الفترة الي فاتت كانت العائلة بارهاق رهيب بسبب الدراسة وبسبب العمل ايضا الي ياخذ اغلب وقتك وايضا الواجبات العائلية بالذات لمن يكون عندك عائلة ومسئولية ..
نجي هسه للمهم ابو قمر شجايبلنا وياه اليوم بعد كل هالغيبة , فكرت بموضوع مهم وحبيت ان يكون على شكل سلسلة مواضيع , هذا الموضوع دا المسه كثيرا من عراقيين عايشين في امريكا الي وصلوا حديثا وايضا بعض القدماء البعيدين كل البعد عن المجتمع الامريكي , الموضوع جدا خطير بالذات على المهاجر الجديد الي بعده بالكرتونه وايضا على الي دينتظر رحمة السفر ويحاول يجمع معلومات وبعده قلق وخايف ومرتبك , الموضوع كلكم راح تلمسوه اذا مو كثير منكم لمسه , مفاهيم خاطئة وكلام ليس له اي صحة يتداوله الكثيرون على انه حكم وحقيقة , المفاهيم الخاطئة الي للاسف دتنتشر بين العراقين وتئثر كثيرا على الواصلين الجدد وعلى الي ينتظرون السفر , طبعا هذه المفاهيم الخاطئة كثيرة جدا ولهذا راح احاول ان انزل كل مفهوم خاىء في موضوع وندرسه ونثبت للجميع انه مفهوم خاطىء , ولهذا النصيحة المهمة لا تصدق كل ما يقال وانتقي الاشخاص الذين تسئلهم .
اليوم اخترتلكم مفهوم خاطىء شايع جدا وكثير منكم سمع عنه المفهوم هو
// شهادتك في امريكا ورقة متسوى شي بللها واشرب ميها ؟؟؟؟ //
طبعا هذا المفهوم مفهوم سلبي بعيد كل البعد عن الواقع بالذات لمن تكون الجملة بهذا الشكل مطلق للعموم , يعني ممكن اتفهم الجملة لمن تكون ان من الصعب جدا ان تجد عمل في امريكا عن طريق شهادتك , جمله منطقية وحقيقة , ولكن ان تلغي فائدة الشهادة الي حاصل عليها سواء كانت شهادة بكلوريوس او شهادة معهد او حتى شهادة اعدادية فهذا كلام غير صحيح وهذا الي راح اوضحه اليوم بهذا الموضوع .
راح اخذ خريج الجامعة كمثال حامل شهادة البكلوريوس , هل شهادته معترف بها ؟؟؟
هنا السؤال غير مكتمل السؤال يجب ان يكون كالتالي هل شهادته معترف بها اكاديميا ؟؟؟؟
الجواب نعم اكيد طبعا , اغلب جامعات العراق معترف بها اكاديما بغض النظر عن التدريس وعن اسلوب التدريس والمناهج, هي معترف بها اكاديميا ,
السؤال التالي ايضا مهم : هل الشهادة معترف بها بسوق العمل الامريكية ؟؟؟
هنا الجواب لا يمكن الجزم فيه , اذا كانت الشهادة مصحوبة بخبرة وامكانية في مجال الاختصاص فنعم هناك مجموعة كبيرة من الشركات ممكن ان تقبلك باختصاصك واكو بعض التجارب موجودة حاليا في امريكا ودتعمل باختصاصها بدون تعديل الشهادة لكن بنفس الوقت هناك شركات تفضل الشهادة الاكاديمية والخبرة تكون من داخل الولايات المتحدة .. اذا الموضوع يعتمد على الشركة الي تقدم عليها وقناعة المدير او الشخص الي دتسوي وياه الانتر فيو ..
نجي للموضوع للشهادة من النضرة الاكاديمية والي كثير يسئلون عن الدراسة في امريكا وللاسف البعض يجاوبهم شهادتك مراح تفيدك شي والافضل ان تبدا من الاول , والبعض للاسف يكلك تبدا من الاول حتى تاخذ كراند منحة والي هي باحسن احوالها متجاوز ال 4000 دولار على اساس ان الدولة تنطيك الكراند اذا كنت غير حامل للشهادة وحامل الشهادة ياخذ قرض عليه ان يرجعه بعد التخرج على شكل اقساط وهذه التفاصيل راح نشرحها بالتفصيل مستقبلا .
اكيد كلام غير منطقي وغير صحيح , طيب الجميع راح يسئل بشنو راح تفيدني شهادتي ؟؟؟؟
الشهادة راح تفيدك انك ممكن تقدم مباشرة على الدراسات العليا يعني متحتاج ترجع تقرا البكلوريوس من جديد وبالمقابل راح تحصل على شهادة عليا اكيد الدخل السنوي الها راح اكبر بكثير من الدخل السنوي لصحاب شهادة البكلوريوس , طبعا اكيد الطريق مو بالسهولة لي يتصورها البعض لكنه ايضا مو بالصعوبة الي يتصورها البعض الاخر , الي تحتاجه حتى تدخل مباشرة للدراسات العليه هم 3 اشياء
الاول : تجتاز امتحان الجي ار اي او امتحان الجيمات حسب الاختصاصات العلمية او الغير العلمية وبدرجه معقولة , وحتى لو كانت درجتك قليلة ممكن ان تنقبل اذا اقتنع بيك الاستاذ والموضوع يختلف من جامعة الى اخرى ومن استاذ الى اخر .
الثاني : شهادتك من العراق مترجمة , المعدل مالتك ايضا مهم لكن يختلف من جامعة الى اخرى , طبعا بعد متقدم راح تتحول درجاتك لنظام الجي بي اي ودائما ما يطلب ان يكون الجي بي اي مالتك 3 او اكثر والي هو تقريبا 68 بالمية وفوك طبعا هذا مثال مو قياس الموضوع يختلف بحسب الدروس وعدد ساعات كل درس , طبعا هنا ايضا الموضوع يعتمد على الاستاذ وعلى الجامعة .
الثالث : امتحان التوفل بعض الجامعات متطلب هذا الامتحان اذا كان عندك كرين كارت لكن البعض يطلبها حتى لو كان عندك كرين كارت بما انك متخرج من خارج الولايات المتحدة .
هذه الاشياء الثلاثة تجعلك تدخل مباشرة للدراسات العليا وخلال سنتين اقل او اكثر يكون عندك ماستر وممكن خلال 5 سنوات يكون عندك دكتورا , طبعا اذا مكنت تملك شهادة فلازم تبدي من الاول يعني لازم تقطع اربع او خمس سنين دراسة ومصاريف حتى ممكن تدخل للدراسات العليا .
ايضا الشهادة الي متعجب الكثيرين اتساعدك في المعادلة الاكاديمية لشهادة البكلوريوس المواد الي ماخذها انت في العراق راح تشطب من المواد الي لازم تاخذها فممكن معادلة البكلوريوس متجاوز السنتين بالنسبة للي عندة شهادة , بينما للي معندة شهادة راح يحتاج اربع سنوات او اكثر ..
اذن الشهادة مهمة ومفيدة فلا تخلي اي كلام يهبط من معنوياتك المهم ان تسئل في المكان الصح , طبعا كان بودي ان اكتب شوية عن الفايننشيل ايد سواءا كان منحى او قرض فدرالي او قرض غير فدرالي ايضا مفاهيم كثيرة خاطئة في هذا الموضوع , لكن انشاء الله راح نكمل بالموضوع القادم , انشاء الله راح احاول ان انزل موضوع اسبوعي اذا اسعفني الوقت واكيد الموضوع مفتوح للنقاش والاسئلة حتى تزيد الفائدة وقيمة المعلومة ...
تحياتي للجميع ابو قمر
الموضوع التالي :
http://www.ankawa.com/forum/index.php/topic,616448.msg5790411.html#msg5790411
