صباح الخيرات ...
اليوم حبيت ان نستمر بتكملة الموضوع السابق الخاص بالدراسة رغم اني كان في بالي مواضيع اخرى عن المفاهيم الخاطئة , بس الاقبال والاسئلة الي شهدها الموضوع السابق جعل من المهم تكملة الموضوع حتى تكون الصورة واضحة للجميع , ولهذا راح اشرح الموضوع بالتفصيل ولجميع المراحل الدراسية .
السؤال عن الدراسة يدور في بال كثيرين يمكن اكثر من 90 بالمئة من العراقيين المهاجرين شغلهم الشاغل الدراسة , وهو تفكير صحيح ومحترم كون الشهادة الامريكية ستقلب حياتك 180 درجة من حيث العمل وفرص العمل ومن حيث المكانة الاجتماعية , لكن قبل ان ابدأ بالموضوع احب انوه على شيء مهم جدا لمسته من خلال تجارب كثيرة لعراقيين وصلوا الى امريكا مؤخرة ولهذا راح اوجه نصيحة وهي وجهة نظر لا اكثر ولا اقل , لا تحاول تدخل المجال الدراسي اذا متكون عندك الخبرة الكافية عن الكليات الي تقع بالقرب منك وعن انظمتها وقوانينها واسعارها وايضا يجب ان يكون عندك المعلومات الكافية عن الاختصاص الي تريد تدرسه , ايضا والاهم يجب ان تكون معتدل ماديا قبل الدخول باي موضوع دراسة بالذات لاصحاب العوائل أي بمعنى أمن مصرف بيتك واضمن انك مراح تدخل بضائقة مادية وبعدها ممكن تدخل في مجال الدراسة , ملاحظة موضوع العمل كفول تايم يعني عمل دوام كامل 40 ساعة بالاسبوع مراح يرهم مع الدراسة في امريكا الدراسة مو بالسهولة الي يتصورها بالعض وبالذات مرحلة الجامعة والدراسات العلية , ممكن تعمل بارت تايم وتدرس بارت تايم ايضا , السبب في كلامي هذا ان لاحظت الكثير من العراقيين اول ميحط رجله بامريكا يكلك اني لازم اروح ادرس وباجر اروح للجامعة ومن هذا الكلام طبعا الاندفاع هذا جميل جدا لكن للاسف اغلب هذه الحالات فشلت في دراستها وفي اختيارها , غالبا ميختار أي كلية وللاسف قد تكون كلية غالية او غير تابعة للولاية على اساس ان مراح يدفع شي من جيبه لان الفايننشيل ايد راح يدفع وكثر مرات يختار اختصاص صعب عليه ويدرس اسبوعين ثلاثة ويترك الكليه ويصرف المنحة مالته بدون مياخذ أي شهادة , هذه الحالة كثيرة جدا جدا بين المهاجرين العراقيين الاندفاع مالهم يخليهم يخسرون كل شيء , ولهذا اتمنى انك اول شي تفكر بيه من توصل هو الاستقرار من حيث السكن ومن حيث المادة من حيث جمعلك للمعلومات عن مدينتك , جمعك المعلومات الخاصة بالدراسة أي جامعة انسب اسعارها أي جامعة قوانينها انسب الك أي اختصاص مناسب لامكانياتك , ايضا الفترة الاولى حاول ان تقوي بيها انكليزيتك اذا كنت تعمل راح تشوف تطور جيد في لغتك من خلال احتكاكك بالمجتمع , مهما كنت تتصور انكليزيتك قوية راح تلكه فرق كبير لمن توصل وايضا لتنسى اللغة الاكاديمية الي تستخدم بالدراسة اصعب بكثير من لغة الشارع او المجتمع , ولهذا نصيحتي ان تبقى مندفع وعندك طموح لكن لتتسرع واحسبها صح وادرس ظروفك وظروف عائلتك قبل أي خطوة تخطوها , وهاى الفكرة الدراسة في امريكا غير محددة بعمر راح تشوف بالجامعة مختلف الاعمار الصغير والكبير عمرا مثل ما راح تشوف مختلف الالوان والثقافات .
نجي لموضوعنا اسئلة كثيرة سئلت بالموضوع السابق وللاسف الوقت الضيق الي املكه ممنحني فرصة الرد على الجميع بس انشاء الله راح ارد لكن باوقات متفرقة , اليوم حتى لنظلم احد راح ناخذ الموضوع بشكل شامل , راح نقسم المهاجرين الواصلين دراسيا الى 3 حالات هي :
حامل شهادة الاعدادية او ممكمل شهادة الاعدادية ( ترك الدراسة في مراحل الدراسة الاعدادية )
حامل شهادة معهد ( دراسة اكاديمية لمدة سنتين او ما تسمى الدبلوم )
حامل شهادة البكلوريوس و حامل الشهادة العليا (ماجستير او دكتوراة )
راح نبدي اليوم بالقسم الاول وهو خريجين المرحلة الاعدادية الي مكمل الشهادة والي ترك الدراسة في هذه المرحلة ولم يأخذ الشهادة شنو خياراتهم وشنو الي بامكانهم يسووه , هنا الطريق الوحيد والاسهل هو اخذ امتحان
GED® test
هذا الامتحان اجتيزة يعطيك شهادة اعدادية امريكية اي تكون خريخ هاي سكول تكدر بعدها مباشرة تدخل باي كلية ترغبلها , يعني مفتاحك للحصول على شهادة الاسوشييت او شهادة البكلوريوس هو هذا الامتحان , طبعا من الافضل اذا كنت خريج المرحلة في العراق اتجيب شهادتك وياك مترجمة ومصدقة لكن تبقى في اغلب الاحوال تحتاج ان تاخذ هذا الامتحان .
طيب شنو هذا الامتحان وشلون نحضرله ووين ناخذه وشكد يكلف ؟؟؟
هذا الامتحان عبارة عن خمس امتحانات مدتهم مع بعض 7.5 ساعة , طبعا تكدر تاخذهم بشكل منفصل , هذه الامتحانات تقسم الى
GED social studies
GED science
GED reading
GED writing
two-part GED mathematics test
GED social studies
امتحان يختص بمعلومات عن التاريخ والجغرافية في امريكا وفي العالم , طبعا اكيد اكو كتاب تدرس بيه , مدة الامتحان حوالي ساعة وربع وعدد الاسئلة حوالي 50 سؤال
GED science
الامتحان يختص بالعلوم من فيزياء وكيمياء واحياء مدة الامتحان ايضا حوالي ساعة وربع وايضا عدد الاسئلة حوالي 50 سؤال
GED reading
خاص باللغة من ناحية القراءة والفهم , طول الامتحان حوالي ساعة وخمس دقايق , عدد الاسئلة حوالي 40 سؤال تجيك بيه قطع نثر يعني ممكن تكون ادبية او علمية
GED writing
ينقسم هذا القسم الى قسمين هما :
language writing editing
وهو عبارة عن مجموعة اسئلة حوالي 55 سؤال وعندك وقت بيه حوالي ساعة وربع
language writing essay
هذا الامتحان لاختبار قدرتك على الكتابة ينطوك موضوع وتكتب عنه مدته حوالي 45 دقيقة
نجي هسه لدرجة النجاح طبعا الدرجة لكل امتحان تكون ضمن مدى 400-800 حتى تنجح لازم تاخذ اقل درجة تاخذها متقل عن 410 ولازم يكون معدلك بجميع الامتحانات ميقل عن 450 , يعني لازم تحصل درجة كلية 2250 درجة على اقل تقدير , طبعا ايضا هذه الدرجة تختلف من ولاية الى ولاية بعض الولايات قد تطلب اعلى شوية ..
ملاحظة عدد الاسئلة وفق سنة 2011 المفروض هذه السنة راح يتم بعض التغييرات على عدد الاسئلة واحتساب الدرجة لكن بشكل عام المبدا والاقسام واحد ..
طبعا الاحصائيات تتكلم ان كل 3 يدخلون الامتحان 2 منهم ينجحون يعني نسبة النجاح جيدة بالذات لمن تدرس زين وتحضر للامتحان , الجميل بالموضوع انك اذا نجحت في احد الامتحانات متحتاج تعيده اذا رسبت بالمعدل , يعني تعيد بس الي درجتك قليلة بيه , طبعا بعد متنجح راح تستلم شهادة اسمها
GED Diploma
وهي شهادة تعادل شهادة خريج الاعدادية ممكن تتعين فيها في الاعمال الي تتطلب شهادة هاي سكول او ممكن تدخل الكولج وتبدي تدرس بالكلية والاختصاص الي ترغبه ,طبعا في بعض الكليات راح يكون هناك برامج دراسية لشهادات معينة متحتاج منك ان تكون خريج اعدادية يعني مثل متكول دورات تاخذ بعدها شهادة في اختصاص معين مثل تبريد وتكييف او صيانة لاشياء معينة هذه الشهادات مبيها كردت يعني متعتبر شهادة اكاديمية لكنها تفيدك بسوق العمل ..
التحضير للامتحان والتقديم اله , طبعا اكو كتب كثيرة ومواقع كثيرة بيها تمارين خاصة بالامتحان , ممكن تستعير الكتاب من المكتبة بمدينتك او ممكن تشتريه اون لاين وسعره جدا معقول 20 او 25 دولار وهذا رابط بعض الكتب اذا حبيت تشتري :
http://www.amazon.com/s/ref=nb_sb_ss_i_1_8/192-2954369-6047035?url=search-alias%3Dstripbooks&field-keywords=ged%20books%202012#/ref=nb_sb_noss?url=search-alias%3Dstripbooks&field-keywords=ged+books+&rh=n%3A283155%2Ck%3Aged+books+
وهذا رابط بيه اسئلة وصيغة الاسئلة وتمارين ممكن تتطلع عليه :
www.gedpractice.comتكلفة الامتحان والتقديم اله , بالنسبة للعسر فالامتحان بخمس اقسامه ميتجاوز ال100 دولار , والامتحان يكون بمركز امتحاني ماكو اون لاين, المراكز الامتحانية موجودة بكل الولايات وهذا رابط تكتب بيه الكود البريدي مالتك ينطيك المراكز الامتحانية القريبة منك طبعا ممكن تتصل بيهم هاتفيا وترتب وياهم :
http://www.gedtestingservice.com/testers/locate-a-testing-centerكنت اتمنى ان اكدر اكمل الموضوع بس الموضوع صار طويل وراح يكون ممل انشاء الله بالموضوع القادم نكمل ونوضح الفرق بالاسلوب في الدراسة بين العراق وامريكا ونظام السمستر ونظام الكردت اور الي كثير يكون غريب عليه ..
How do I register for the GED Test?
Just call the nearest test center for registration, test information and GED testing dates. Use the easy Official GED Testing Center™ locator above to find the GED locations closest to your home.
How much does the test cost?
The cost varies from state to state. The average is $40 per test, but check with the test center about scholarships or fee waivers. The fee is a pretty good investment when you consider that GED grads make about $500,000 more in their lifetime. Learn how affordable GED prep can be.
How do I get copy of my GED test results?
GED results and GED testing scores are kept by your state department of education. Contact your state GED Administrator™ using the list below to get your GED results and GED transcripts. If you took the GED exam in another state, contact the GED Administrator™ in that state to get a copy of your GED results.
How often can I take the GED Test?
How often you can take the GED exam varies from state to state, but most states allow you to retake the test up to three times in a year. Contact one of your local Official GED Test Centers™ for the GED testing dates and GED schedule.
تحياتي للجميع
أبو قمر
