اخواني اني في حيره من امري ارجو المساعده

[firefox]

السلام عليكم اخوان اني طلعلي توطين امريكا وانتظر مقابله محلف بس حدث طارئ على صحتي والان صحتي حيل تعبانه وصار عندي فقر دم ونزيف بلمعده فبعد هاي المستجدات وبعد التحاليل اتضح عندي فقر دم وراح يستمر لفتره طويله يعني من امشي ادوخ وحرارتي ترتفع وانتم اخواني تعرفون امريكا ومساعداتهه لللاجئين واني عندي 6 اطفال اكبر واحد عمره 12 سنه فقررت ان ارفض امريكا بلكي تطلعلي استراليا او كندا اخواني اريد نصيحتكم لان نصيحتكم راح تهديني الى اتخاذ القرار واعتمد عليكم اخواني ارجوكم انصحوني واذا رفضت امريكا شكد راح اتطول شغلتي

[موزارت]

up للمساعدة

[كابتن الحب]

الله يشافيك  من  هذا  المرض   ان شاء الله با اسرع  وقت  ممكن ؟؟ ولكن  يا  اخي  عصفورا  بل  اليد  خيرا من عشرره  عل  الشجره

[ألن في بلاد العجائب]

الله يشافيك اخويه

استراليا نحسين جدا بموضوع القبول للاشخاص الي عندهم امراض

بس شغلة الرفض ما ادري بعدها تمشي او لا بس باعتقادي فايلك رح ينام علي تريله بلوكات و كم طن شيش تسليح و خبطه مال كونكريت

[*Ray]

 الاخ   firefox

طبعا عندك العافيه واحنا نعرف شكد صحتك تعبانه وشلون جنت قبل المقابله بس الله سهلهه عليك وراعوو حالتك وخلصت
وان شاء الله المحلفين يجون ب 11 وان شاء الله تقابل بهاي الوجبه يعني ما بقى شي ليش ترفض امريكا وانته امورك ماشيه والحمد لله
وتعرف الانتظار هنا بتركيا يطول يعني اذا ترفض امريكا راح تتاخر هوايه اخلص من وقت وانته ضامن الطلعه احسن من الانتظار الطويل
والقرار الك ...

                                                                                                 اختك راي

[steven_siv]

اذا امكانيتك المادية تسمحلك البقاء لمدة طويل ارفض امريكا

[michigan]

اولا ان شاء الله الصحه والعافيه عليك وعلى عائلتك
ثانيا اخي الكريم اذا ثبت انه عندك مرض وهذا المرض يمنعك من العمل فكن على ثقه محد راح يجبرك تشتغل وراح تبقه تستلم مساعدات لان الحاله خاصه وهذا يبقى حسب تقرير الدكتور الي راح يعالجك.

[الفرج2]

   اخي العزيز , اولا اتمنى لك الشفاء العاجل بعون الله تعالى وبرعايته , ثانيا  , انت اذا حصلت امريكا فكندا واستراليا وغيرها من هاي الدول اتصير كلش بسيطه , لكن اذا هسه رفضت امريكا راح تتاخر ويجوز ما تطلعلك الدوله اللي تريدها , انت لو ضامن انك راح تحصل وحده من هاي الدول , اني جان هسه كلتلك اي ارفض , لكن ما مضمونه , ومثل ما كال احد الاخوه الاعزاء :


                                 عصفورا  بل  اليد  خيرا من عشره  عل  الشجره


 اعتقد هذا الراي كل الاخوه والاخوات متفقين عليه هو الارجح والاحسن وانت بكيفك .

[a7med_al3ra8e]

السلام عليكم . اخويه فايرفوكس الف الحمدلله على السلامه ومتشوف شر ان شاء الله . اخويه دير بالك ترفض امريكا لان قضيتك تنام ومحد يكلبه بعد حتى لو عندك تقارير لان ميراعون هاي الامور وانت اعرف . اخي العزيز انت اول متوصل امريكا بالسلامه ويجيكون حالتك صدك حتستمر المساعدات ويعتنون بيك ان شاء الله لان انت عندك مرض . وان شاء الله الشفاء العاجل .

[sniper elite]

اخوية العزيز firefox ..
الحمد لله على سلامتك ومتشوف شر ان شاء الله ..
موضوع فقر الدم راح يستمر لفترة طويلة شنو هذا ؟؟؟؟   ترة ماكو هيج شئ بالطب ... اذا فقر دمك صار من ورة نزف القرحة فبالأمكان يعوضوك بالدم وتنتهي المشكلة وتستمر على علاجك للقرحة وهسة علاجات القرحة بتطور مستمر ونتائجها ممتازة .. اما اذا كتبولك دواء علمود فقر الدم ويطول فترة فد 3 اشهر فيعني انه فقر الدم  عندك بسيط وما يحتاج اي نقل دم ... فلا يخلون ببالك انه استراليا احسن من امريكا بالمساعدات وتاخذ من مرضك حجة لرفض امريكا ... حرامات انت صاحب عائلة وتظل تنتظر هنا فترة طويلة ودتشوف العيشة شلون مكلفة هنا بتركيا ..

تحياتي لك اخي والله يحفظك ويحفظ عائلتك ....

[gheed ... جـهــيـــــــد]

اخي العزيز

تحيه طيبه
انت مادام عندك اطفال  تره الضمان الصحي بالنسبه الك ميتوقف ويظل مستمر وعندك اول 8 اشهر ميه بالميه ضمانك ماشي ولو علاجك يكلف الاف الدولارات هم يعاجوك فاني انصحك تتوكل عله الله ولتغير شي اخاف بعدين لاهاي ولا هاي

تمنياتي لك بالشفاء العاجل

[سارة نبيل]

اخي العزيز

اشوف رأي الاخوان صحيح بما انه حضرتك تنتظر مقابلة محلفين يعني بعد عندك كومة  وقت للسفر وبأذن الشافي تتعافى الى ان يصير موعد السفر انت ماشي خطوات بطريق اذا تتركه ترجع لاول خطوة و ويجوز تضيع المشيتين

الله ينورلك طريقك ويهديك للاختيار الاسلم

بالتوفيق

[um reem]

ادعي من الله الشفاء  ودوام الصحه لك ولكل مريض ,,
اخويه صحيح التامين لللاجئين ميغطي كل شي وضغيف
بس اذا انت فعلا تحتاج للعلاج ومن اول يوم اذا حالتك تعبانه بمجرد متروح لاي اميرجنسي
يقومون بالازم حتى لو ماعندك تأمين ومراح يكولولك ادفع يله تدخل وراح بعملون اللازم بكل ضمير واخلاص
والله اكو عائله اجتي وره 12 يوم الرجال اتخربط ودخل مستشفى راسا سوله عمليه كبرى بالقلب وهسه ويانه يداوم
مثل الورد وحولول الى ا كثر من طبيب اخصائي حسب الحاله وحتى اجهزه ضغط وسكر هم انطوه
وهو هذا الشي الحلو بامريكا عدهم انسانيه واهتمام بالبشر
وشي ثاني انت ماشاء الله عندك اطفال يعني مسالة المساعدات لاباس بيها بس حاول تختار ولابه بيها مساعدات طويله
يعني مو 8 اشهر وتخلص ,, وعندك الف عافيه

   ام ريم

[firefox]

السلام عليكم اخواني واخواتي الاعزاء جزاكم الله الف خير على النصيحه الي نطيتونياهه ونورتوني بمعلومات مكنت اعرفهه واشكر اهتمامكم وان شاء الله راح اخذ بنصيحتكم وان شاء الله يسر اموركم ويحفظكم ياربي