مع كامل مودتي و احترامي لكل الاعضاء,أطلب من الادارة الغاء عضويتي

[صبراً جميلاً]

السلام عليكم اخوتي و خواتي الرائعين الخلوقين الورود ( الكل ) تشرفت بيكم و بالسوالف وياكم و بمعلوماتكم و جنتو الي خير ونيس و مقوي و مشجع بردودكم و اجوبتكم و مواضيعكم الرائعه .

طبعاً هسه قبل شويه يالله كدرت ادخل عينكاوا كلت بلكي اكدر اسلم على الطيبين ,,, عموماً :
قبل يومين او ثلاثة ايام حاولت الدخول للموقع ( عينكاوا ) و اذا بي ارى جملة حمراء داخل اطار احمر في اعلى الصفحة تقول :

( نأسف صبراً جميلاً, لقد تم حظرك من الكتابة و إرسال الرسائل الشخصية في هذا المنتدى ).

عموما اني مضجت و الله العظيم بس انقهرت على فراق الطيبين اخوتي و خواتي اللي مشايفهم بس يجمعنه هم مشترك و يا رب تفرج علينه كلنه ، و ما اريد اعرف ليش صار عليّ حظر على الاطلاق لان اني اعرف نفسي و اعرف اخلاقي و ثقافتي و تربيتي و دائما افكر بالكلمه الف مره قبل ما اكتبهه.
و اتمنى تعذروني بالفترة الاخيرة لقلة مشاركتي بالمواضيع بس اكيد الكل يعرف يعني شنو احباط و حالة نفسيه تعبااااانة.

أطلب من الاداره ان تقوم بالغاء عضويتي حالاً و ارجو من الكل ان يعذروني و يسامحوني اذا فد يوم بدرت مني اساءه او تطاول او استهزاء باي احد ( حشاكم طبعاً ).

امنياتي للكل بالسفر القرييييييييييييييب جداً ان شاء الله و اتمنى للكل السعادة و الراحة و الرزق و السلامه و ابقى ادعيلكم بالخير و تيسير الامور و اتمنى همينه تدعولي كلما اجي على بالكم .

أسألكم صالح الدعاء اخوتي و متشرف بيكم حيل حيل و الله و دمتم في رعاية الرحمن و حفظه .

اخوكم صبراً جميلاً

[علاوي السعدي]

السلام عليكم
اخي صبرا جميلا اتمنى ان تتراجع من قرارك بالغاء العضويه لانه نحن مستفادين كثير من مواضيعك الهادفه والمهم والصادقه وانا اشتغرب من قرار بحضرك من الادار مع اني لا اعرف السبب ولكن انته انسان خلوق ومحترم ومعرفتك مكسب لنا بالمنتدى عينكاوا والغاء عضويتك خساره كبيره

اخوك علاوي السعدي

[ابو مرتضى]

السلام عليكم اخي صبرا جميلا

وهم اكلك صبرا جميلا ولتستعجل وتلغي عضويتك اخونة انت عضو عزيز

ومع شديد الاسف هواي غيرك هم ديلغون عضويتهم رغم انو المنتدى حلو بوجودكم

اتمنى انو تفكرون 100 مرة قبل الغاء عضويتكم

مع تحياتي لحضرتك


اخوك ابو مرتضى النعيمي

[lele200982]

مساء الخير
يعز علينه كل يوم شخص ينسحب من المنتدى ويا ريت ترجع تفكر بموضوع انسحابك
واحتمال موضوع الحظر اكو تفسير اله
بكل الاحوال اتمنالك الموفقه والسفر القريب

[السهل الممتنع]

اخي العزيز طول بالك وما تسوى تحرمنا من عندك وبالنسبة للخط الأحمر صار معاي أكثر من مرة وفهمت  أنها خطى الإلكتروني لأني فاهم  وعارف نفسي اني ما متجاوز حدودي وبالنسبة معاك أيضا أنت صار هذا الشي معك والله الزين ينقال عنه زين وصعب حدا يفتقده وانت منهم 

[هذا عراقي]

حبي ماكو داعي تلغيهة

ترة هاي الحالة صارت ماعتقد من المراقبين ترة هذا خلل جرب افتح من غير متصفح وشوف لان صارت هاي الحالة وبدون مادخل باسم العضوية يكلي انت مالك حق تدخل هذا الموقع وفتحت من غير متصفح مشة الحال وعادي وانت بكيفك ياورد بس طول حبالك اغاتي

[ankawa_2010]

حبي ماكو داعي تلغيهة

ترة هاي الحالة صارت ماعتقد من المراقبين ترة هذا خلل جرب افتح من غير متصفح وشوف لان صارت هاي الحالة وبدون مادخل باسم العضوية يكلي انت مالك حق تدخل هذا الموقع وفتحت من غير متصفح مشة الحال وعادي وانت بكيفك ياورد بس طول حبالك اغاتي

بالفعل كلامك صحيح وحدتثت هاي الحالة معي قبل فترة قصيرة
فارجو من صاحب الموضوع عدم الاستعجال

[علاوي السعدي]

السلام عليكم
انا اتمنى انه ادارة عينكاوه ترد على موضوع الاخ صبرا جميلا وتبين شنو الاسباب وليش صار هيج وي الاخ المحترم صبرا جميلا

[بتر فلاي2]

مرحبا اخي اني هم صارت عندي هاي الحالة مرتين بس ورة شوية تروح عادي يعني يصير خطا وماكو داعي تلغي عضويتك صدك اكو خطا بالموضوع

[alazzawi]

اخوية العزيز الادارة ماعدهة شي وياك وصدكني هاية تصير خطأ بالبرمجة وصارت وياية شخصياً وهو خطأ ولو مو خطأ جان مفتحت انت الموقع وكتبت الموضوع
تقبل تحياتي ياغالي

تقبل تحياتي
اخوك
علي العزاوي

[زرزور بغداد]

أخي صاحب المزضوع ,,,

أني قبل فترة حدث معي نفس الشي ,,,,, بس خاطبت الادارة رفع الحضر لانه كان هناك خطاء

وهاي عادي أذا أي شخص ماكو أي غلط منه ليش دايخ خاطب الادارة

[ابو سماني]

الادارة ردت على هذه المســـألة وضحتها بأن الحضر يكون على شخص بس المشكلة هناك أشخاص مرتبطين معه بنفس ((الاي دي)) على ما اذكر لذلك الكلمة حطيتها بين قوسين وبعدين يتم أعادة الخدمة للبقية وعزل الشخص المحضور.........,وهذه انكتبت بالمنتدى قبل يومين تقريبا

وإن شاء الله يردون الادارة ويوضحولكم اكثر

[Sound of Soul]

تحية طيبة


 هذا الامر لايتعلق بالمنتدى باي شكل من الاشكال بل بمنطومة الانترنت في العراق
 الادارة تقوم بحظر بعض الاعضاء المسيئين عن طريق منع الاي بي من الكتابة
 وبسبب تشابك الايبيات في المنظومة و اشتراك المئات من المشتركين بنفس الاي بي
 يحدث احيانا بان يكون من نصيبك احد الايبيات الممنوعة مما يؤدي الى عدم تمكنك من الكتابة
 و بسبب كون توزيع الاي بي في المنظومة بشكل عشوائي وديناميكي .
 وهذه المشاكل لاتحدث للاعضاء من اوروبا و امريكا و استراليا فقط في الدول العربية .
ولغرض طلب الغاء العضوية يمكنك القيام بمراسلة الادارة على الايميل التالي info@ankawa.com



تحياتي
الادارية
sound of soul

[steven_siv]

بالتوفيق