كتيب امتحان السياقه - لولاية كاليفورنيا

[bashar85]

اخواني الاعزاء الي ساكنين بكاليفورنيا ,,, اكو مثل ملزمه او كتيب صغير مال امتحان السياقه لولاية كاليفورنيا حته هو بالعربي ديمتحنو ,,,
اذا موجود عدكم اللنك ماله  ياريت لو تفيدونه بي مع الشكر الجزيل ,,

[steven_siv]

اخي اني عندي الاسئلة والاجوبة كلها بس شون اوصلها الك

[bashar85]

شلونك اخويه steven_siv ,, شكرا للرد ,,, بس شلون عدكياها يعني اوراق لو لنك لو سكانر ؟؟

[steven_siv]

لا اخي حصلتها من منظمة عراقية اهنا بكاليفورنيا دزلي ايميلك خلي اشوف اكدر ادزهن

[steven_siv]

دزيت على الياهو مالتك pdf شوف واضح هذا بالعربي
بس شغلة الخ
روح لل dmv  عدهم كتب تعلم السياقة والتهيئة للامتحان

[maraliano]

اخي هاي الموقع بيها الاختبارات بس ب الانكليزي
http://dmv.ca.gov/pubs/interactive/tdrive/exam.htm

وهاي اكو ب العربية ب منتديات المبتعث
http://www.mbt3th.us/vb/forum8/thread277961.html

[shay.ray]

العفو اخوان اني هم اريده هالكتيب عفيه

[steven_siv]

اخي هاي الموقع بيها الاختبارات بس ب الانكليزي
http://dmv.ca.gov/pubs/interactive/tdrive/exam.htm

وهاي اكو ب العربية ب منتديات المبتعث
http://www.mbt3th.us/vb/forum8/thread277961.html

عاشت ايدك اخي سهلت الموضوع  للاخوة

[firas_siv]

السلام عليكم

والله اني قريت بس على هذا الموقع

http://www.youtube.com/californiadmv

انت اهم شي ديربالك تسوي الكرتيكل ايرر

الك حق تخطأ 15 خطأ .. بس ولا خطأ من الاخطاء الحرجة

موجودات عندك بالفديو

لتخاف اني والحمد لله التيست الرتن نجحت بي من اول مرة
والبيهايند ويل من اول مرة

وبعدييييييييييييييييييين ياله عرفت اني ممكن امتحن بالعربي .. خلصتهن بالانكليزي احسن

[bashar85]

اخواني الاعزاءshay.ray,,  firas_siv,,  maraliano,, steven_siv  , شكراااااااااااا جزيلالالالالالا ياورود على مساعدتكم واكيد وفيتو وكفيتو وخصوصا الاخ ستيفن ,, اتمنالكم كل التوفيق بحياتكم ياورود ....

بشـــــار

[kunda]

مرحبا أخواني الاعزاء ...
مع حبي وتقديري واحتراماتي لجميع من شارك في الموضوع لكن اسمحولي بمداخلة ضرورية تفيد الاخ السائل وتفيد اي شخص يريد التقدم لاٍداء الامتحان التحريري لاجازة السياقة في كاليفورنيا النسخة العربية ((وذلك لااهمية الموضوع القصوى واهمية اجازة السياقة في امريكا عموما وكاليفورنيا خصوصا ))...
بالنسبة للامتحان التحريري وبعد مشاكل وفضائح الرشاوي التي عصفت بDMV الكاهون...والتي كان بطلها (وللأسف) أحد خواننا العراقيين...لذا فقد\ اتبعت الdmv سياسة مختلفة وذلك بتغيير نوع الاسئلة التحريرية بين فترة وفترة ....
بالنسبة للامتحان هناك اربعة نسخ من الاسئلة يرافقها ايضا اربعة نسخ من اسئلة الاشارات
الاسئلة التحريرية كل نسخة 36 سؤال يسمح لك ان تخطىء ب6 فقط  
اسئلة الاشارات كل نسخة 12 سؤال ويسمح لك ان تخطيء ب2 فقط
اذا تمكنت من اجتياز احدهما (التحريري أو الاشارات ) فلاداعي لاعادته مرة اخرى في حالة الفشل بالاخر ...
انصحك بقراءة الاسئلة النسخ الجديدة جيدا وفهمها جيدا حتى تتمكن من اجتياز الامتحان ......
للأسف فأن اغلب النسخ المتوفرة هي نسخ الاسئلة القديمة والتي ليست متعمدة بعد الان
نصيحتي الذهبية (اذا رغبت بالنجاح) هي:- ان تذهب شخصيا الى مبنى الDMV وتأخذ معك جهاز تلفون حديث وتنتظر اي شخص عراقي (راسب في الامتحان ) وتترخص منه وتصور النسخة التي رسب فيها .... وكلما جمعت نسخ اكثر كلما كانت فرصتك في النجاح اكبر ,, لاتنسى هي 4 نسخ فقط اذا حفظتها عن ظهر قلب  تضمن النجاح ان شاء الله .

أخوكم كوندا العنكاوي

[kunda]

ملاحظة اخرى نسيت ان اذكرها ... وهي ان دائرة تسجيل المركبات الDMV قد اعتمدت في ترجمة الاسئلة التحريرية على مترجمين مصريين ولبنانيين , او عرب غالبا غير عراقيين .. وقد استخدم هؤلاء المترجمين كلمات  عربية شعبية قد تكون دارجة في مجتمعاتهم ولكنها غريبة على المجتمع العراقي لذا عليك تقبل الامر وفهم الاسئلة وحلها كما هي حتى لو صعب عليك فهم بعض الكلمات  باللغة العربية .
بعض الكلمات التي لاازال اتذكرها هي
حارة..  هنا لايقصد بها حارة  يعني منطقة مثل باب الحارة وأنما تعني (مسار ) يعني الجهة المخصصة لسير السيارة في الشارع وتكون محددة باللون الابيض
 مزلقان .. يعني انحدار
طبون .. ويعني دعامية السيارة بالعراقي
رفراف .. جاملغ
الشبورة المائية ... بصراحة احتاريت بهذه الكلمة لكن اعتقد يقصد بها الضباب الذي يتراكم على الزجاج الامامي
رضوخ .. yield بالانكًليزية وتعني الاسبقية ليست لك
المصابيح ..لايتات
نفير السيارة ..يعني الهورن
جهاز الرد حر اليدين ... يقصد به سماعة الهاتف البلوتوث (لاسلكية )
يحظر القانون ...يعني يمنع القانون
مصابيح الفرامل الوامضة ..يعني الاربع اشاير  بالعراقي
اختبار الضباب الدخاني ... يعني فحص الانبعاث الغزات ويسمى بالعامية smog test
شخص كفيف يعبر الشارع ... يعني شخص اعمى يعبر الشارع
واذا اتذكر كلمات ثانية راح اكتبلكم اياها ايضا  

[bashar85]

شكرااااااااا اخويه  kunda على ملاحظاتك الجميله والمفيدة والي اكيد الكل راح يستفاد منه  ,,  اتمنالك التوفيق قي كل خطوات حياتك ,,

بشـــــــار

[maraliano]

شكرا  اخي kunda   للتوضيح الله يوفقك