راح اصير اب الحمد لله... بس خايف من الIOM.

[علي الاجئ]

الحمد لله والشكر راح اصير اب سنة الجاية بنهاية شهر 6. بس خايف من موضوع الIOM وهل راح يأثر لو لا.
اني يوم الخميس الفات اكتملت الامنية مالتنة والحمد لله. وهسة زوجتي حامل تقريباً راح نطلب بشهر الثالث.... وماعرف شسوي، هل اذا عرفوا الIOM بوجود حمل راح يأخرون الملف وينتضرون لحد مايجي الطفل؟

هل ابلغهم؟
هل اسكت وماحجي شي؟
هل اكو فحص طبي بعمان قبل السفر؟ وهل راح يبين؟

آسف على الاطالة اخوان بس بصراحة اني كد مافرحان بالطفل... بس كلش قلق على هذا الموضوع لان ماريد بعد اتأخر اكثر لان اني مقدم من 2007 وهسة يلا شفنة خير من اللجوء.

شكراً الكم

[steven_siv]

اول شي الف مبروك
ماكو داعي تكوللهم هسة بخصوص الحمل لان راح يكولون دز الاوراق من يجي الطفل
انتظر يجي بخير وبسلامة واذا مامخابريك على سفر كوللهم

[كوكي 2004]

اخويه العزيز علي

ألف مبروك ويارب وجه الخير والسعادة عليك بأذن الله
لتقلق اخويه مادام الأمنية مكتملة رح سافرون قريبآ وبدون أي تأخير ان شاء الله
بالنسبة للحامل مسموح لها تسافر لحد نهاية الشهر ال 7 من الحمل وزوجتك بعدها بالأشهر الأولى يعني عندكم مجال تسافرين والولادة تكون بأمريكا ان شاء الله


     الله يوفقك ويسهل امرك ويتممها عليكم بالخير يااااارب

      أختك كوكي / عمان

[ORCA]

الف مبروك اخي 

[علي الاجئ]

شكراً الكم اخوان بارك الله بيكم.. وشكراً لاختنا كوكي. 

[غــريـبــه!!!]

الف مبروك والله يتمملكم بخير
اني اعتقد تبلغهم احسنلك

[abuhatem]

ربي يفرحك بيه وتشوفه وهو ناجح بحياته وتزوجه.
شفت مواضيعك السابقة لان استغربت انك مقدم 2007
وفهمت انك مقابل محلفين قبل كم شهر بس يعني انت جديييييييييييييييييييييييييد ، وهذا زين ، لان الجدد امورهم ماشية وانشالله انت هم امورك ماشية وتسافر بالخير والسلامة
الله يسهل امرك ويقرب سفرك بخير وسلامة اخ علي

[مهجر وافتخر]

مبروك    مبروك     مبروك
قول يلله من طلب الله نال

[علي الاجئ]

ربي يفرحك بيه وتشوفه وهو ناجح بحياته وتزوجه.
شفت مواضيعك السابقة لان استغربت انك مقدم 2007
وفهمت انك مقابل محلفين قبل كم شهر بس يعني انت جديييييييييييييييييييييييييد ، وهذا زين ، لان الجدد امورهم ماشية وانشالله انت هم امورك ماشية وتسافر بالخير والسلامة
الله يسهل امرك ويقرب سفرك بخير وسلامة اخ علي

والله اخوية اني مقدم على الامم المتحدة من 2007 وما مشة الملف لحد سنة 2010. اعذرني بس اني ماعرف حسابات الجديدن والقديمين اني عبالي تنحسب من تاريخ تقديم على الامم المتحدة.

شكراً الك عزيزي... مع الاسف الامنية رجعت انتظار بس الملف بقة فعال... الله يستر ويسهلها.

[حامل المسك]

روح سافر والله وياك ..........وان شاء الله الولادة تكون في امريكا وطبعا هذا الامر راح يسهلك سرعة الحصول على الجنسية الامريكية ..لان ابنك عندما يولد هناك راح يستكم جنسيتهم على طول

[أبو أياد]

الف مبروك يتربى بعزك
خليها سكتة الى ان ينولد او تسوي فحص طبي

[nuha 22]

اخي الكريم ... اني راح احجيلك قصتي وياهم اني طبعا اختك كنت  بشهري السادس واتصلو بينا على موعد فحص طبي الثالث ومن اتصلو بينا ميعرفون اصلا اني حامل لان مرت  سنة على الفحص الثاني ومحد اتصل لكن فجئة اتصلو وكالو تعالو ومن رحت طبعا عرفو بية حامل بالمستشفى وكنت خايفة من الاشعة بس الدكتورة كالت مابيهة خطورة اذا بالشهر الخامس فما فوق بس كالت انت مسؤلة اذا تحبين لتفحصين وطلبي تاجيل الفحص بس كتلهة هسة شلون اني ممكن اسافر لو لا كالت ال iom للشهر السابع نهايتة ممكن تسافرين اذا جتي الامنية ووراهة ممنوع .. بس اني كان عندي مشكلة بالحمل والدكتورة كالت عندج ولادة مبكرة خلال شهر السابع وانتبهي وبلغت الiom بهذا الشي لكن لا حياة لمن تنادي وبعدهة اتصلو بينا وكالو عدكم موعد سفر لكن بالوقت الضائع يعني اني بعد مولدت والحمد لله على كل حال

خلاصة الموضوع اخوية انت اذا مسوي  فحص طبي ومكمل كلشي وامنيتك جاية محد راح يعرف لكن من تسوي فحص بالنسبة لزوجتك هي راح تسالهة اذا حامل اولا وراح تبين طبعا وخليهة تكلهة بلكت سفركم قريب وان شاء الله تسافرون والبيبي يجي بامريكا ومبروك عليكم وان شاء الله ربنا يكتبلك كل الخير

اختك نهى

[هذا عراقي]

بتلوفيق ان شاء الله يجي موعد فركم قبل السابع وتسافرون عادي وبكل يسر وسهلة ويارب تفرج على الجميع ان شاء الله

[علي الاجئ]

أشكركم جميعاً.. وشكراً الج اخت نهى على المعلومات القيمة.... الحمد لله يعني المهم مراح يأثر الحمل على السفر لحد مايوصل الى ال7 اشهر. ان شاء الله قبل هاي الفترة تطلعلنة.

ممنون الكم جميعاً وشكراً لاهتمامكم

[dynamic]

 

  الف مبروك وان شاء الله الولد الصالح .

تحياتي

[اسطنبولي]

اول شي الف مبروك
ماكو داعي تكوللهم هسة بخصوص الحمل لان راح يكولون دز الاوراق من يجي الطفل
انتظر يجي بخير وبسلامة واذا مامخابريك على سفر كوللهم

+1

[kunda]

اولا مبروك على المولود الجديد
ثانيا اتمنى ان تستفاد من هذا الموضوع الذي هو بخصوص الطفل والسفر وكل مايتعلق بهما

http://www.ankawa.com/forum/index.php/topic,470620.0.html

[abuihab]

مبروك وانشاءالله يولد بامريكا وياخذ الجنسية قبلك ؟؟!...

[علي الاجئ]

أشكركم اخواني وأخواتي جميعا....

ههههه الف عافية الجنسية هسة المهم بس نوصل ههه عيني باردة!!

[برنسو]

الف مبروك اخوية العزيز ..... وان شاء الله تسافر خلال الاسابيع القريبة القادمة