اخوان منو يصدك حجيي ؟؟؟؟

[nickazawee]

مرحبا بالحبايب من زمان ماداخل على هالكروب الحلو ب حبيت اسال اكو واحد مثل حالتي اني مقدم لزوجتي واطفالي siv وقابلوا من زمان من تاريخ 4-11-2010 ولحد هسه همه بالعراق منتظرين الفيزا واني بامريكا اكو شي جديد تنصحوني بيه اكو حاله مثل حالتي لو بس اني بالدنيا هيجي الله غاضب عليه ...صارلي 3 سنوات بامريكا ولحد هسه متغير شي بحياتي يارب الفرج مليت الشكوى ... اذا احديعرف شي لا يبخل عليه برد لان اني دا اموت اهنا وحدي بدون عائلتي واطفالي ...

[steven_siv]

اخي العزيز
هواي مثل حالتك مع فارق الوقت يعني مو بس وحدك وخصوصا الفترة الاخيرة ورة 2010 بدوا يطلعون الرجال اويخلون الزوجة هاي بالنسبة للاس اي في والاي او ام هم كاموا يطلعون شخصين ويبقون الثالث وهكذا بس انتة اخي ماعندك نقص باوراق العائلة ؟ زين عادوا الفحص الطبي لو لا ؟ زين دزيت تستفسر لو لا ؟ ومن خلال هاي الكم نقطة تعرف ششنو سبب التاخير


تحياتي

[slam hawk]

يا رب الفرج

[nickazawee]

والله العظيم ماكو اي نقص واني راح اتخبل معقوله كل العالم سافرت وبقيت بس عائلتي

[naseerx5]

يابة كول يا الله شلون تكول على روحك الله غاضب علية اشو قسم من الي سافرو قبلي وقبلك رايحين هناك ديلعبون شاطي باطي وما اريد احجي اطوخ من هيج والعاقل يفتهم
هذولة الله راضي عنهم وسرع معاملاتهم؟؟؟
يا حبيبي اتقي الله وكول اكيد بيهة صالح والله رايد بيهة خير متعرف شنو الي مضموملك
فة استغفر وادعي والله ايسر

[sparky]

حاول ان تعمل تغيير ولو شويه بقضيتك عائلتك
لقد قرانا من بعض الاخوه كان يكن عملوا تغيير بالسكن متعمدين لكي فقط يحركوا الطابوقه والغبار من على قضيتهم والله اعلم من صدق هذه المعلومات وارجو ان تنتظر بعض الاراء من الاخوه اصحاب الخبره - ياريت الاخ الن ممكن يجاوبك ومن الله التيسير

[هذا عراقي]

اخوية الله يسهل ويفرج عليك وتسمع اخبار حلوة ويجمعك بعائلتك بالقريب العاجل

راسلهم وخابرهم ولح هواي عليهم لاتتوانة ابد

يارب الفرج على الجميع بحق محمد وال محمد

[RRYOUSIF]

عزيزي انصحك بملا الاستمارة 7001 dhs مع ارفاق كافة الاوراق الرسمية التي تخص قضيتك وسياتيك الجواب انشاء الله ولاتستهين بالموضوع فالموقع للمظالم وسيتم متابعة قضيتك من قبل مختصين وسيراسلون وزارة الهجرة وستحصل على اجابات وطبعا الموضوع مجاني يعني ليس مكتب محاماة او ماشابه بل جهة رسمية تنظر بالمظالم واتمنى لك التوفيق
بالنسبة لي قمت بهذا الاجراء ووصلني الرد بعد ان خاطبوا uscis وكان الرد بان الملف بانتظار المزيد من الاجراءات الامنية التي لايمكن التكهن بموعد محدد لانتهاءها وان الملف ليس منسيا من قبلهم يعني موضوع الامنية حقيقي وبعض الملفات تاخذ وقت طويل
ملاحظة :انصح جميع الاعضاء الذين تاخرت قضاياهم بشكل غير اعتيادي بالقيام بنفس الاجراء
اكتب dhs7001 على الجوجل واكمل الاجراءات
اي سؤال انا حاضر

[اسطنبولي]

يارب الفرج القريب  للجميع 

[nickazawee]

اخوان والله العظيم يوميه دمعتي بخدي وحتى كمت ما اشكي لان مليت نظرة العطف عليه اريد ارجع وما اكدر ارجع ابقى اهنا وروحي وعقلي وكلبي يم اولادي وزوجتي .. اريد اعرف سبب واحد للتاخير ويريحون كلبي يريدون كليتي والله انطيها بس خلي اولادي يعيشون بسلام وراحة بال ... حرت والله حرت واحس نفسي تايه بكابوس ماله اول من تالي  .... شنو هذا الفورم ومنين ادزه اريد تفاصيل اكثر فدوه لان لامحامي بقيت ولا منظمه خيريه بقيت ولا اكو سناتور ميعرف بقضيتي ... فدوه زودني بالتفاصيل برساله اي شي اترجاك ... ممنون الكم حبايب والله لايراوي احد الحاله الي اني بيها حتى عدوي ما اتمناها اله ...

[مهجر وافتخر]

اخوي
اخي نفس شغلتك هم طلعوة وخلو عائلتة بس طلعت العايلة بعد شهرين 
هم هو اس اي في
بس انت اكيد اكو مشكلة لازم تتاكد ممعقولة تطول سنين وهما معاك
اخي سوالي انت سويتلهم معاملة معاك
لو من وصلت سويت لهم لم شمل

[RRYOUSIF]

عزيزي اني اترجاك ان تقوم بهذا الاجراء وانشاء الله تنطينا اخبار طيبة
مثل ما ذكرتلك اكتب في محرك البحث جوجل dhs7001 راح يظهرلك موقع الاستمارة بصيغة ملف pdf املا المعلومات على الكومبيوتر مع ملاحظة ان الصفحة الثالثة لاتخص مقدم التظلم وانما تخص من يتابع الطلب من قبلهم ثم اطبع الملف ووقع توقيع حي على الفورم بس لازم يكون نفس توقيعك بالمعاملات التي تخص الاي او ام او ممكن صاحب الملف (يعني مقدم الطلب من الاهل)يقوم بهذا الاجراء ثم اعمل للملف بعد التوقيع نسخ الى الكومبيوتر (scan) وبعد ذلك اعمل (scan)للاوراق المتعلقة بالتقديم واهمها قرار المحلف ثم ترسلها بالايميل الى العنوان الذي ساضعه لك لاحقا تمنياتي لك بالتوفيق

[جاوين اهلنا]

الله يفرجها عليك وعلى جميع الي مثلك بجاه محمد وال بيت محمد
والله مثل هذه المواضيع تقهر الانسان فكيف انت وتعيش هذه الحالة الله يكون بعونك

[مس لارا]

الله يفرج همك ويزيح غمك . ويجمعك بعائلتك عن قريب.