ܒ. ܐܣܪ̈ܐ ܐܬܪ̈ܝܐ ܘܢܛܪܬܐ ܕܐܝܬܘܬܢ ܒܐܪܥܢ
ܡ̣ܢ ܝܘܡܐ ܕܥܒ݂ܪܬܐ ܕܚܝܠܘܬ݂̈ܐ ܕܣܓܝܐܘܬ݂ ܓܢܣ̈ܐ ܠܚܪܪܬܐ ܕܥܝܪܩ ܡ̣ܢ ܫܘܠܛܢܐ ܕܟܬܬܘܪܝܐ ܕܨܕܐܡ ܡ̣ܢ ܥܠ ܩܕܠܐ ܕܥܡܐ ܥܝܪܩܝܐ، ܡܘܒܝܢܗ݇ܘܢ ܥܠ ܡܫܛܚܐ ܥܝܪܩܝܐ ܟܘܬܫ̈ܐ ܒܝܢܝ ܥܘܫܢ̈ܐ ܡܫܚܠܦ̈ܐ ܕܡܢܝܗܝ ܡܚܘܦܛܠܗ݇ܘܢ ܠܫܪܪܬܐ ܕܐܝܬܘܬܝܗܝ ܘܛܠܒܬܐ ܕܙܕܩܝ̈ܗܝ ܐܬܪ̈ܝܐ ܢܡܘܣܝ̈ܐ ܘܡܢܝܗܝ ܪܚܩܠܗ݇ܘܢ ܡ̣ܢ ܟܠܝܗܝ ܝܩܪ̈ܘܬ݂ܐ ܘܐܝܬܝܩܘܢ̈ܐ ܐ݇ܢܫܝ̈ܐ ܘܫܘܪܐܠܝܗܝ ܠܡܦܠܘܚܐ ܐܢܝ ܫܒ݂ܝܠ̈ܐ ܒܫ ܨܘܢ̈ܐ ܕܡܪ̈ܗܒ݂ܢܐ ܘܩܛܘܠ̈ܐ ܘܙܪܥܬܐ ܕܦܬ݂ܢ̈ܐ ܘܫܓܼܘܫܝ̈ܐ ܒܣܒ݂ܪܐ ܠܡܕܥܪܬܐ ܠܓܝܓܼܠܐ ܕܡܬܛܘܪܢܘܬܐ ܠܒܬ݂ܪܐ ܒܚܫܒ݂ܬܝܗܝ ܠܥܒ݂ܕܬܐ ܠܥܝܪܩ ܦܘܩܣܐ ܐܘ ܩܢܛܪܘܢ ܕܪܗܝܒ݂ܘܬ݂ܐ ܕܡܢܗ ܫܪܐ ܠܬܠܚܬܐ ܠܟܠ ܡܐ ܕܡܛܝܬܐ ܝܠܗ̇ ܐ݇ܢܫܘܬܐ ܥܠܗ ܡ̣ܢ ܡܬܛܘܪܢܘܬܐ.
ܒܥܠܬܐ ܕܠܝܬܝܘܬܐ ܕܡܫܠܛܘܬܐ ܘܫܪܛܬܐ ܘܪܚܩܬܐ ܕܫܝܢܐ ܡ̣ܢ ܐܬܪܐ ܡܘܒܝܢܗ݇ܘܢ ܡܝܠܝܫܝܬ݂̈ܐ ܬܘܕܝܬܢܝ̈ܐ ܕܡܫܘܪܐܠܗ݇ܘܢ ܬܚܘܬ ܥܠܬ̈ܐ ܕܒܘܥܝܐ ܕܩܥܝܕܐ ܘܡܪ̈ܗܒ݂ܢܐ ܘܐ݇ܚܪ̈ܢܐ ܒܫܡܐ ܕܫܪܝܬܐ ܕܫܝܢܐ ܘܫܠܡܐ. ܟܠܗ ܐܗܐ ܡܘܥܒ݂ܕܠܗ ܕܐܬܐ ܥܠ ܒܢ̈ܝ ܥܡܢ ܐܬ݂ܘܪܝܐ ܠܐܢܝ݇ ܒܫ ܓܕܫ̈ܐ ܨܘܢ̈ܐ ܘܒܣܘܥܪ̈ܢܐ ܕܡܪ̈ܗܒ݂ܢܐ ܦܝܫܠܗܘܢ ܬܠܝܚܐ ܒܬ̈ܢ ܘܕܘܟܢ̈ܐ ܕܣܓܼܕܬܢ ܘܦܝܫܠܗܘܢ ܩܛܝܠ̈ܐ ܪܒܐ ܡ̣ܢ ܐܢܝ݇ ܒܢܘܢ̈ܢ ܒܫ ܛܢܢ̈ܐ ܓܘ ܡܘܨܠ ܘܒܓܼܕܕ ܘܐ݇ܚܪ̈ܢܐ ܡ̣ܢ ܡܕܝܢܬ݂̈ܐ ܕܐܝܬ ܒܢ̈ܝ ܐܘܡܬܢ ܓܘܝܗܝ ܘܠܝܬ ܗܘܐ ܦܝܫܐ ܩܐ ܥܡܢ ܫܒ݂ܘܩ ܡ̣ܢ ܠܫܒ݂ܩܐ ܕܐܬ݂ܪܐ ܐܘ ܡܬ݂ܓܘܣܢܘܬ݂ܗ ܠܦܢܝܬ݂̈ܐ ܕܩܠܝܡܐ ܕܟܘܪܕܣܬܢ ܕܬܡܐ ܦܝܫܠܗ ܩܘܒܠܐ ܒܫܝܢܐ، ܘܒܡܚܕܐ ܪܚܛܠܗܘܢ ܟܠܝܗܝ ܓܒ̈ܐ ܕܒܢ̈ܝ ܐܘܡܬܢ ܐܬ݂ܘܪܝܬܐ ܠܦܠܚܐ ܠܡܥܕܪܘܢܐ ܠܟܢܫܢ ܡܘܫܚܛܐ ܒܟܠ ܐܘܪܚܐ ܕܡܬܡܨܝܢܬܐ ܝܠܗ̇، ܘܦܝܫܠܗ ܟܢܫܢ ܚܝܐ ܓܘ ܒܬ̈ܐ ܡܛܝܒ݂̈ܐ ܕܐܝܬ ܗܘܘ ܐܘ ܒܢܝܬܐ ܕܒܬ̈ܐ ܚܕܬ̈ܐ ܠܐܢܝ ܕܠܝܬ ܗܘܐ ܠܗܘܢ ܦܝܫܐ ܣܒ݂ܪܐ ܕܕܥܪܬܐ ܠܕܘܟܢ̈ܐ ܕܡܫܟܢܝܗܝ ܫܪ̈ܫܝܐ.
ܣܘܥܪܢܐ ܕܗܝܡܢܘܬ݂ܐ ܒܝܢܬ݂ ܒܢܘܢ̈ܐ ܕܟܠܗ ܥܡܐ ܥܝܪܩܝܐ ܝܠܗ ܚܕ ܣܘܥܪܢܐ ܘܗܝܡܢܘܬܐ ܩܘܝܬܐ ܘܘܪ̈ܝܕܗ ܥܡܝܩ̈ܐ ܝܠܝܗܝ ܒܥܡܩܘܬ݂ܐ ܕܐܓܼܘܢܐ ܕܥܡܐ ܐܬܘܪܝܐ ܥܡ ܥܡܐ ܩܘܪܕܝܐ ܘܥܡܐ ܥܪܒܝܐ ܘܡܢܘܬ݂̈ܐ ܐܚܪ̈ܢܐ، ܟܕ ܡ̣ܢ ܗ̇ܘ ܝܘܡܐ ܕܫܘܪܐ ܠܗ ܙܘܥܐ ܩܘܪܕܝܐ ܒܐܓܼܘܢܗ ܕܪܩܘܒ݂ܠ ܛܟ݂ܣܐ ܥܝܪܩܝܐ ܡ̣ܢ ܐܝܠܘܠ ܫܢ݇ܬܐ 1961 ܪܚܛܠܗ ܥܡܢ ܐܬ݂ܘܪܝܐ ܠܡܫܘܬܘܦܐ ܥܡ ܐܚܘܢܗ ܥܡܐ ܩܘܪܕܝܐ ܓܘ ܐܓܼܘܢܐ ܡܛܠ ܫܪܪܬܐ ܕܕܝܡܘܩܪܛܝܘܬܐ ܘܙܕܩܐ ܕܒܢܘܢ̈ܐ ܕܐܗܐ ܦܢܝܬ݂ܐ ܒܝܕ ܡܕܒܪܢܘܬܐ ܕܓܢܗ̇ ܒܓܢܗ̇ ܘܦܪܣܬܐ ܕܣܘܟܠ̈ܐ ܕܝܡܘܩܪ̈ܛܝܐ ܘܣܓܝܐܘܬ݂ ܐܡܘܬ݂̈ܐ ܕܒܢܘܢ̈ܐ ܕܩܠܝܡܐ ܕܟܘܪܕܣܬܢ ܕܥܝܪܩ.
ܕܡܐ ܙܟܝܐ ܕܣܗܕ̈ܢ ܐܢܝ ܕܢܦܠܗ݇ܘܢ ܡܥܠ ܛܠܘܡܝ̈ܐ ܕܙܒ݂ܢܐ ܕܡܘܫܬܐܠܗ ܠܐܗܐ ܐܪܥܐ ܠܐ ܗܘܐ ܕܠܐ ܝܘܬܪܢܐ. ܕܡܐ ܕܣܗܕ̈ܐ ܕܒܢܘܢ̈ܐ ܕܩܘܪܕ ܘܐܬܘܪܝܐ ܕܚܒ݂ܛܠܗ ܥܡ ܚܕܕܐ ܘܡܘܫܬܐܠܗ ܐܪܥܐ ܕܩܠܝܡܐ ܠܐ ܫܒ݂ܩ ܫܘܦܐ ܕܐܩܠܐ ܠܐܢܝ ܕܒܢܛܪ̈ܐ ܝܠܝܗܝ ܠܡܫܦܠܬܐ ܕܬܪܡܝܬܐ ܕܝܡܘܩܛܝܬܐ ܐܝܢܐ ܐܚܢܢ ܒܫ ܒܕ ܙܝܕܚ ܠܒ݂ܝܒ݂ܘܬܐ ܠܪܚܫܐ ܠܩܕ݇ܡܐ ܗܠ ܕܫܪܪܝ ܟܠܝܗܝ ܣܒ݂ܪ̈ܐ ܕܣܦܝܪܐ ܝܠܗ ܟܠܗ̇ ܚܝܘܬܗ ܐܓܼܘܢܝܬܐ ܕܪܩܘܒܼܠ ܟܠܝܗܝ ܡܒܝܢܝܬ݂̈ܐ ܕܡܢܣܘܝܐ ܝܠܝܗܝ ܕܠܐ ܡܢܬܝܬܐ ܕܩܢܝܬ݂̈ܐ ܕܝܡܘܩܪ̈ܛܝܐ ܐܬ݂ܪ̈ܝܐ ܩܐ ܒܢܘܢ̈ܐ ܕܥܡܐ ܥܝܪܩܝܐ.
ܡܗܝܡܢܘܬ݂ܐ ܕܣܘܥܪܢܐ ܐܬ݂ܪܝܐ ܐܝܢܝ ܕܕܒ݂ܩܠܗ ܒܝܗ ܟܠܝܗܝ ܒܢܘܢ̈ܢ ܘܓܒ̈ܢ ܓܘ ܩܠܝܡܐ ܕܟܘܪܕܣܬܢ ܘܟܘܢܫܝܗܝ ܠܡܢܬܝܬܐ ܕܬܪܡܝܬܐ ܕܝܡܘܩܛܝܬܐ ܘܡܘܬ݂ܪܬܐ ܕܫܝܢܐ ܡܘܥܒ݂ܕܠܗ ܠܝܬܝܪܘܬܐ ܕܐܣܘܪ̈ܐ ܕܐܚܘܬܐ ܬܫܥܝܬܢܝܬܐ ܘܡܩܘܝܬܐ ܕܗܝܡܢܘܬܐ ܒܝܢܬ݂ ܒܢܘܢ̈ܐ ܕܐܗܐ ܩܠܝܡܐ.
ܪܘܚܐ ܕܐܚܘܬܐ ܒܝܢܬ݂ ܟܠܝܗܝ ܙܘܠ̈ܐ ܕܥܡܐ ܕܩܠܝܡܐ ܕܟܘܪܕܣܬܢ ܘܗܝܡܢܘܬ݂ܐ ܫܪܝܪܬܐ ܒܣܘܟܠ̈ܐ ܕܝܡܘܩܛܝ̈ܐ ܕܦܐܪܗ ܝܗܘܐ ܢܡܘܣܐ ܕܝܡܘܩܛܝܐ ܐܬ݂ܪܝܐ ܐܝܢܝ ܕܐܘܨܚܢܗ ܠܓܡܝܪܘܬܐ ܕܙܕܩ̈ܐ ܐ݇ܢܫܝ̈ܐ ܘܐܘܡܬܢܝ̈ܐ ܘܦܘܠܝܛܝܩܝ̈ܐ ܠܟܠܝܗܝ ܒܢܘܢ̈ܐ ܕܦܢܝܬ݂ܐ ܘܨܚܚ̈ܐ ܨܦܝ̈ܐ ܘܠܐ ܫܒ݂ܩܬܐ ܕܚܕ ܒܙܥܐ ܠܗ̇ܘ ܕܒܥܐ ܨܝܕ ܓܘ ܡܝܐ ܗܪ̈ܫܢܐ ܡܛܠ ܦܠܓܼܬܐ ܕܚܕܝܘܬܐ ܕܥܡܢ ܐܬ݂ܘܪܝܐ. ܟܕ ܡܘܕܟ݂ܪܗ ܢܡܘܣܐ ܓܘ ܡܠܘܐܐ ܕܚܡܫܐ ܕܥܡܢ ܟܠܕܝܐ ܣܘܪܝܝܐ ܐܬ݂ܘܪܝܐ ܐܝܬܠܗ ܙܕܩܐ ܓܘ ܫܘܠܛܢܐ ܝܬܝܐ ܓܘ ܦܢܝܬ݂̈ܐ ܕܐܝܬܠܗ ܣܓܝܐܘܬ݂ ܟܢܫܐ.
ܘܠܝܬܐ ܐܘܡܬܢܝܬܐ ܒܛܠܒܐ ܝܠܗ̇ ܡ̣ܢ ܟܠܝܗ ܓܒ̈ܢ ܘܫܘܬܐܣ̈ܢ ܐܘܡܬܢܝ̈ܐ ܘܫܪܝܪ̈ܐ ܡ̣ܢ ܒܢ̈ܝ ܥܡܢ ܠܦܠܚܐ ܒܟܫܝܪܘܬܐ ܘܣܙܓܪܬܐ ܫܪܝܪܬܐ ܘܪܚܩܬܐ ܡ̣ܢ ܕܘܪ̈ܫܐ ܘܡܡܠܠ̈ܐ ܣܦܝܩܘܬ݂ ܝܘܬܪܢܐ ܐܝܢܝ ܕܠܐ ܡܝܬ݂ـܝ ܫܒ݂ܘܩ ܡ̣ܢ ܢܟ݂ܝܢܐ ܘܠܐ ܡܢܬܝܬܐ ܘܬܘܬܒ݂ܘܬܐ ܠܥܠܡܐ ܢܘܟ݂ܪܝܐ ܚܪܬܐ ܚܘܣܪܢܐ ܕܩܢܝܬ݂̈ܢ ܓܘ ܚܕܝܘܬܐ ܕܐܘܡܬܢ ܘܙܕܩܗ̇ ܢܡܘܣܝܐ ܓܘ ܫܘܠܛܢܐ ܝܬܝܐ ܓܘ ܦܢܝܬ݂̈ܢ ܬܫܥܝܬܢܝ̈ܐ.
