قصة امنية اليمه للغاية اسفسارات واراء لذوي الخبرات


المحرر موضوع: قصة امنية اليمه للغاية اسفسارات واراء لذوي الخبرات  (زيارة 4439 مرات)

0 الأعضاء و 1 ضيف يشاهدون هذا الموضوع.

غير متصل غدر الزمان

  • عضو جديد
  • *
  • مشاركة: 2
    • مشاهدة الملف الشخصي
    • البريد الالكتروني





السلام عليكم تحياتي الأخويّة ارجو من كافة الاخوان والاخوات التمعن من قصتي
اني اليوم راح اشرحلكم موقف يخبل صار وياي
اولاً انا مترجم اشتغلت من عام 2006
وبسنة 2008 قدمت على الIOM وبوراها بسنة تركت ال IOM وقدمت على الSIVلان كلولي يابه تره الIOM يعطوك الكرين كارد بوره سنة وال SIVيعطوك اياها بوره سبوعين المهم اصدقائي اقنعوني كول باشرنا بالاجراءات المعروفه لدى الكل ما طوللكم السالفة وصلني الCOM  بال 2010 وقابلت بال 2011 وبوره المقابلة مال السفارة صارلي  موقف راح اشرحلكم اياه انتبهو عليه زين تعرفون طلعت من المقابلة حالي حال اي واحد مقدم مرتاح ومصار بيه اي موقف والحمد لله على كل حال نحمد الله سبحانه وتعالى المهم رحت للشغل بالعمل تعرفون اكو نوبات الحظ يلعب دورة وخاصتا اذا الوحده  مالتك زينه وناس حبابين وطيبين ويحبون يساعدوك او اذا صادف المسؤول خوش انسان وحبوب المهم الله بذاك الوقت ذبنا بوحده عنصريين واخباث وخاصتا العريف المسؤول وعريف الاستخبارات مال الوحده طبعاً بالمناسبة اكو واحد من اصدقائي جان يكلي من تقابل رئساً قدم استقاله وافلت ليصير بيك موقف وتتخربط شغلتك للاسف ما خذيت بنصيحته لحد مطحت بيها المهم رجعت للدوام وبوره كم يوم جنت بالشغل وجان وياي جندي قذر جان يطلب مني بعض الاشياء السخيفه يعني يريد اجيبله شرب لو حشيشه اني بطبعي ارفض وبفد يوم طبعا هو يحاول يستفزني بس اني مثل متكول لا عيناً رئت ولا اذنًاً سمعت صاحلي كلي تعال اراويك طلعلي جيس  بيه مادة يعني شلون اوصفها الكم بيها مثل التبغ ومعاها ورق مال لف شلون قبل الناس الاكبار عدهم تتن لف يشربون كلي تعرف هاي شنو كتله لا كال هاي حشيشه تعرف من دزوها النا كتله لا كلي اصدقائنا بامريكا هربوها النا طبعا مهربيها الهم عن طريق الشامبو يفصلون الجزء الاخير من بطل الشامبو ويحجزوه ويدزوه هو شرحلي لان يعرفني اني ما احجي واتخوف من التعامل لان اعرف الزله ممكن تضيع عليه رسم سنيين وتعب وخوف مر عليه بالشغل  .. المهم لا تكلي ولا اكلك .. صادف نظام شغلنا انو احنا مترجمين ووحدتنا راح تعزل وتسلم الموقع وبس اني ومترجمة نوبات اني يخلوني بموقع والمترجمة بموقع عدنا جدول نمشي على الجدول وللاسف المترجمة ومع احترامي للمترجمات لان بيهم بصراحه خوش بنات بس هاي كانت قمة من اللااخلاقية صاقطة بشكل غريب الوصف وسوابقها غريبه المهم تحاول تحرك تحاول تشلع كلب الواحد وجانت تطلب مني اسد بمكان دوامها واسوي كل شيء بس حتى ابعد على السانها والها علاقات مع ضباط يعني بالعربي تشتغل بتاع كله وعلاقات مع سبشل فورسس لا تكلي ولا اكلك انطردو من وراها اكثر ثلاث مترجمين قبل لا تنتقل للعمل بالوحده مالتنا ساعة السودة اللي جابتها علينا وبيومها تحذرنا منها وتنقلات الكلام بيناتنا احنا المترجمين يابا تره فلانه ديرو بالكم منها هيه بعدها شابه وحلوه وصاقطة وهيج وهيج شغلاتها فلا تحاولون تحتكون بيها اني من يمي هم الحمد لله ما يلعب الشيطان بكلبي على اي بنية ولله الحمد اعاملها مثل ما اعامل اي شخص بحياتي المهم بفد يوم من الايام نلزمت بقضية اخلاقية وبنفس وحدتنا يعني خل اكللكم القضية الاخلاقية بالتفصيل وانتو احكمو من رخصت الاخوان المراقبين بالموقع  فد يوم مصورة نفسها او خل نكول مصورة الجزء السفلي من جسمها الشيء المتعارف عليه خل نكول للتوضيح تحاول تصور خلفيتها وجهازها التناسلي وتراويه للجنود طبعاً الجنود من اول متحذرين منها المهم راح الجندي اللي صار الموقف معاه بلغ عليها الوحده وجان العريف الكلب ابن الكلب يراوفلها او ميريد يصير بيها اي شيء فانجبر انو يبطلها بدون قيد او شرط فراحت العينتين للبيت وكلنا اييه الله فكنا منها ومن شرها اشو بوراها ثلاث ايام رجعت وهيه كاشخه ها شو شماكو كالت اني عندي مقابله امنيه المهم تالي عرفنا انها من خلال علاقاتها تعرف السبشل فورسس والمخابرات اقصد بالمخابرات جماعت السكريننك طبت عليهم واحنا نباوع اشو دزو على العريف مسؤولنا وبعدين رجعوها المهم بعدين عرفنا ان علاقاتها ضغطو على الوحده بعدم تبطيلها وكالوا سامحوها بنية وشابه وصغيرة وتحب تتشاقا واحم احم أخ أخ غير انها حاروكتنا واخبار منا ومناك ولانها صاقطتنا ممكن تروح لهنا ولهناك واتوقع يستخدموها لكافة انواع التجسس بما فيها التجسس عالمترجمين والعراقيين بره وبالداخل ومعلومات استخبارية واعتقد اهواي اشياء المهم احنا نحلل التحليلات البسيطة حسب متنكشف عنها الوضعيه ولانها صاقطة خلقياً واخلاقياً يعني بالعربي الفصيح سبشل كيس او كيس تابع النا لتدخلو حسب تحليلاتنا وما رئيناه وشفناه وسمعناه المهم فرجعت للشغل هسه اريدكم تجمعون السالفه معاي من البداية وتابعون الاحداث حتى اكمل ................. المهم بوراها رجعت الامور على حالتها الطبيعية ومثل مكلتلكم حظي المسخم خلاها معاي او هيه الربليسمنت مالتي واتوقع الاختيار كان متقصد من الوحده مالتنا لان اني معندي منا ومناك او الله اعلم مجرد صدفه المهم انا اشوفها بوره الدوام طبعا جانت غرفتها قريبه على غرفتي فيجيها واحد ضابط بالسبشل فورسس صديقها وياخذها ويطلعون واني والله بعيني شفتها ومحد كلي لازمها بالسيارة مالته وبالظلمة وجان موقعنا مال المنام اظلم يبوس بيها البوس الجنسي المتعارف بكلبي كلت حتى بالسيارة مو القضية معروفه مو اللي اعرفها  الليل كله  يبقى معاها للثلاثه الفجر للاربعه طبعًا  اني اعرف من خلال غرفتها قربيه عليه كلش يعني تكرمون حتى من جنت اطلع اروح للدبل يو سي اشوفه موجود بس مالي شغل سكته يعني تصورو تجينه الصبح تعبانه وتنعس وتنام عالكرسي وهاي يوميه القضية المهم في يوم من الايام سافر صديقها واجتي زعلانه للشغل  وبعد مخلص الشغل تصورو جانت مراغبتني حتى تطلع معاي لان نروح من خلال الباص للغرف مالتنا لان دوامنا بعيد عن غرفنا المهم صعدت معاي وكعدت بصفي واني اقسملكم قسم طبعاً اروي لكم القصة حتى تعرفون التركيبه المئساوية اللي مريت بيها المهم من نزلنا ضلينا نتمشى سوه لان غرفتها بنفس السكشن اللي انا بيه فتتمشى معاي واني سكته وهيه تدردم واني والله ما منتبه لكلامها فمن وصلت لغرفتي لان غرفتي اقرب مسافه من غرفتها او على نفس الطريق جان تكلي اكدر اطب معاك اني تفاجئت بالقضية بس حذر للغاية  خفت اكوللها لا تسويلي مشكله كلتلها اوكي تفضلي اني بغرفتي مرتبها تلفزون وستلايت وماخذ راحتي فد شيء مرتب كلش هيه شافتها تفاجئت بيها كالت كلش حلو انته فد شيء مرتب لعد لو اراويك غرفتي مبهذله وما اعرف شلون المهم ضلت تسولف تسولف اخر شيء انتبهو اشكالتلي كلتلي اني اخاف انام بوحدي بالظلمه بغرفتي يعني من انام بوحدي احس يطب عليه شخص يفتح ايدي ورجليه وبدت تتكلم كلام وينام عليه بس من خوفي اخذ راحتي وانام اخوان تعرفون شكالت بوارها جان تكلي بصريح العبارة اني متغمض عيني اذا ما امارس الجنس وصاحبي سافر وخلي الكلام سر بيناتنا واريد انام معاك اليوم طبعاً اني صار وجهي احمر كلش من بذائت كلامها وصفنت صفنه قويه وبوراها ضحكت بجنون  ضليت اضحك وهيه تضحك لحد مسكتت ورجعت صفنت طبعاً سبب ضحكتي اسلوب الكلام اللي كالته اليه وخوفي واشلون اعالج الموقف جان اكللها لا يمعوده اني ما اكدر اتصرف هيج تصرف طبعاً خلال هاي اللحضات كلت لنفسي هاي تريد ترتكب عليه شكلك راد يقتصبني لو تتكلم بصراحه لو تجربني والله شبجت عليه التفكيرات بس كلت لنفسي انا راح احاول ارفض طلبها باسلوب هادي وحتى اذا حاولت ترتكب عليه ادعي بالقضية يعني شلون الغركان يجلب بالكشايه المهم كلتلها لا يابه احنا زملاء  وهاي خيانه للزماله وبعدين اني خاطب والابنية اللي خاطبها احبها وما اكدر اخونها لاي حال من الاحوال طبعاً لا خاطب ولاهم يحزنون ولا احب هماتين وضليت اكللها لازم اصيطر على نفسي وانتي مقامج اكبر من هيج عندي واعرف انتي بنية تحبين الجنس ومتكدرين تنامين اذا متمارسين الجنس بس هذا ادمان خطير انتي شابه لازم تتعلمين ان الحيات مو ممارسات شاذه ولازم تتعلمين الستر والعفه والادب راس مال الابنية لان اهلج من دزوج لهناء اكيد ثقتهم بيج جبيره وبعدين الحرام والزنى فاحشه الله نهانا عنها وحكمها بكل الاديان معروف واحتمال تتسببلج بتهلكه اجتماعية وتصيرين انسانه سيئت الصيت والسمعه وتنحرمين من بناء حياتج وتتبعين طريق شاذ وبالتالي راح تصيرين ادات لمحبين الاجرام والناس اللي تشتري عفاف جسمج وشبابج بثمن رخيص وتتقلص افكارج وتتحطم احلامج انتي ممكن ان هذا الطريق يخليج تحملين ويصير عندج ابن عديم الاب وبالتالي راح تنجبين انسان حياته راح تكون مهدومه بالعرف الاجتماعي ولا تنسين انج جميلة وناعمه ممكن انج تصيرين شابه تبحثين عن فارس احلامج وتتزوجين وتحسين بالسعادة والحب الحقيقي ويصيرون عندج اطفال ويعيشون معاج وبعد كم سنة تصيرين ام وبعدها يصيرولج احفاد ولازم ترسمين الهم السمعه الطيبه بان امهم جانت انسانه مؤدبه وتنقلين كل دروس حياتج الهم وبالتالي راح يستفاد الانسان الشاذ فينعدل والانسان المستقيم فيتشجع واعتبريني انا انسان فريد من نوعي ابحث عن اصلاحج...الخ ومن هالكلام هذا واباوع لوجها نضراتها احتقار اليه وندم اووجهها انطعج طعج كالت يعني هذا كلامك خلص لعد اني اروح اني هلو هلو اي شيء تحتاجين يابه دزيلي ايميل او دكي الباب عليه وما اقصر عنج المهم راحت ورجعت للدوام ثاني يوم بس بدت تخبث عليه وبدت موال جديد المهم اني اخذت الامور بهداوه وحذر شديدين احنا جانو مسويلنا جدول اني بالنسبة اليه اروح على جدولي ونظامي الى ابعد الحدود وبعمري لا مع الامريكان ولا بحياتي بالعراق سويت موقف مغاير للنظام المهم هيه الصبح لكيتها ماخذه مكاني يابه ليش كالت امر من المسؤول علينا اللي بالشغل مو المسؤول على المترجمين همه كلهم عرفاء كال انتي روحي لهذا المكان من اجي اني اروح وهو يكلي رحتله يابا مو جدولي هنا ليش تنقلوني لهناك طبعا احنا نتبادل على المكان لان مكانيين مختلفين بالجو واحد مريح وواحد غير مريح وشغل هواي فمقسمينها علينا لتكلي ولا اكلك كال لا انا دزيتها لهناك لان هيه يحتاجوها هناك وتاخذ راحتها طبعا اني بيني وبين نفسي كلت اكو ملعوب منها ليش تتصرف هيج تصرف وكالي بس اليوم اللي افتهمته بعدين انها تريد تروح لهناك لان وحدتنا راح يخلص شغلها فتحاول تلزك روحها مع وحده ثانية لان المكان اللي على اساس انا  بيه بنفس ذالك اليوم تمر من يمه شخصيات هوايه بالجيش فتريد تنسق اني هم كلت عادي وين مجان معندي مشكله المهم كملت ذاك اليوم ورجعت للغرفة وباليوم الثاني اجيت للدوام وهم نفس الحاله اتكررت وباليوم الثالث نفس الحاله فصدفتًا مر علينه مسؤول المترجمين وكتله  احنا مو نمشي على الجدول جان يكلي اي كتله لعد ليش فلانه هناك واني هنا صار ثلاث ايام احنا جنا اسبوع باسبوع كال ليش خل اشوف العريف المسؤول راح سئله طبعا اتداسرو بيناتهم جان يجي يكلي اي هيه بنيه وهنا تتعب وهناك اكو غرفة تكعد بيها انتبهو للغرفة لان وره الغرفة قصة انتبهو لكلامه المهم وانت رجال وتتحمل ونعتمد عليك بكلبي كلت اييييه بس هيه العريف المسؤول علينا والجنود يرتاحولها لان حشاكم بايعه كرامتها بشكل غريب وبين الاجنود وانتو احسبوها فكلت هسه انا مضوّج نفسي على شنو  خل اسكت والله يفرجها سكتت المهم بقيت اسبوع واسبوع اللاخ اشو اجيت للمكان اللي همه ثبتوني بيه لكيتها بيه ها يابه اشو هنا اليوم كالت ايه ميقبلون اروح لهناك كلتلها هيه شنو ماكو استقرار بالشغل رحت للعريف بس بداخلي غضب لان مثابتين على قرار طبيتله جان يكلي اييه احنا راح نثبتها هنا وانته روح لهناك من اليوم فصاعداً كتله ليش جان يكول لتسئلني ليش اذا ميعجبك اخابر على مسؤولك يقصد العريف مسؤول المترجمين  اللي هو هماتين صاحبه من نفس وحدته كتله خابر لان هو كلي ابقى اهنا واني تهت بيناتكم المهم كلي روح لهناك واني اخابره يجيك والله بوره كم ساعه اجاني ها عريف فلان شنو الفلم اشو حولتوها لهناك وضاع الجدول وتاهت عليه اريد اعرف انته غير تبلغني يعني اني اروح لهناك واتعب ومحضر نفسي لهناك وبعدين ارجع لهنا وبسهوله ليش  جان يكول لا لا لا مو فلانه هنا كامت تسوي علاقات مع الضبط واكو ضباط يسئلون عليها ويدورون عليها واكو ضباط مخابرين عليها على وحدتنا يريدون ينقلوها يمهم فاحنا منريد ننقلها لان ما عدنا مترجمين بكلبي كلت لعد من بطلتوها على اساس هيه صاقطه لو بذاك الوقت جان مضغوط عليك طبعاً بكلبي!! المهم جانو الجماعه مرتاحيلها فميريدون تسوي علاقات مع الضباط وينقلوها فيحاولون يخفوها تبقى يمهم شلون وردة الصباح يتصبحون بيها وبوسه لهذا وحضن لذاك فهماتين تقبلتها بروح رياضية اعذروني لان جاي اشرح موقفي بدقة المهم استمرينه على هذا المنوال .. فانا باقي مع جندي كلب ابن كلب ويصير مسؤوله المباشر العريف اللي هو علينه بالعمل وهو هذا الجندي نفسه اللي سبق وشرحتلكم قصته اللي كان يطلب مني شرب وحشيشه ..الخ  المهم استمريت نشتغل سوه فمع الايام احس بيه يكرهني كلش بدون اي سبب ما اعرف يتوقع او هيه تارسه راسه انو اني ما اريدها تجي لهذا المكان فبداء يتشاقى معاي يحاول يلكالي فد مطب الى ان وصلت بيه الحقاره فد يوم من الايام يكلي انته لا تدخل للغرفة اللي كلتلكم من وراها قصةالمهم بداء يكلي المكتب الغرفة يسميها مكتب وهذا المكتب بيه معلومات واجهزه و اسلحه وطبعا جان الجو حار بوكتها وبالمكتب اوراق ومعلومات وانته الك حق تكعد على هذا الكرسي جوه الظل ومن يروح الظل مشكلتك والمكتب اشبيه اخوان فقط طاوله وكراسي واجناطهم واسلاحهم ويعتبر نقطة او مكان للمترجمين بالاساس مسويته الوحده اللي قبلهم المهم هذا كل ما اشوفه كسلان وجان ينعس وينام بالمكتب على كولته فحرص مني على المكتب حتى ينام ويكضي وقته كله نوم بالشغل ويوصي صاحبه اذا اجه مسؤول لو زائر لو مراجع  يكعده حتى لا يتعاقب ومن ادخل انا يسويها مشكله اني تخبلت مره ومرتين كتله انا كل وقتي اطب للمكتب طبعا المكتب فد اسم واصلا غرفة للنقطه والله ما عدى الطاوله والكراسي اي شيء ما بيه وحتى بس لان يحاول يستفزني وهم بنفس الوقت يريد ينام وياخذ راحته اول يوم عبر وسكتت والثاني ادخل هم اتبرد اشويه واطلع لان انشويت شوي من الشمس وخاصتاً فترت الضهر جان يكلي انا مو كتلك لا تطب على المكتب انته ليش تريد تدخل للمكتب وهو كان من عشاق صاحبتنا ام القصة العريضة للعلم باوعو المفارقات هيه الانسه يخلوها بالمكان الاخر اللي انا ما ادخل اله ولا احاول ادخله لانه كله اجهزة واتصالاتا وشبكة معلوماتيه واني اكول لنفسي خل ابتعد ليش يصير علية موقف وهمه يخلوها تكعد وتتجول وتعطي اراء يالا العجب المهم فرئساً الجندي راح للعريف مالته طبعا عاف الشغل وراح انا عرفت راح يكله انو اني اطب على الغرفة اللي يسميها مكتب وبوره نص ساعه اجه وجان يكلي العريف يريدك اجيت للعريف جان يكلي انته ما الك حق تطب للغرفه او المكتب لان هذا خاص وبيه معلومات وانته ما يحقلك تطبله كتله يا خاص يا معلومات شبيه بس طاوله وكراسي انت تعاندني كتله لا ما اعاندك بس انا بره الجو غبار وشمس وانا مو جندي حتى اتحمل هاي الحالات وبعدين دخان مال سيارات وغبار كال بهاي العبارة مو احنا واكفين المهم روح لهناك ولا تطب للغرفة مرت اللوخ اني رحت للغرفة بس جان كلامي بعصبية معاه المهم بوراها تعرف الجنود وخاصتاً نكسب نبرتهم نعرف الاحداث وشنو الفلم من خلال  كلامهم وخاصتاً الامريكان واني ابو خبرة صارلي هواي معاهم اعرف اذا اكو دستره عليه وموقف حرك فعرفت ان المخابرات دازين على جندي ويانا بالشغل يسئلون عني فسئلته للجندي الجندي مثل اليعرف بس ميكدر يحجي وجان الجندي اللعين ابو الحادثه صاحبه ولكن الامانه لله ان الجندي اللي دازه عليه المخابرات خوش جندي المهم ففتهمت انو الجندي مسوي تقرير بالحاله وحاركني ودازها للمخابرات وموقع عليها العريف اللعين اللي كان مسؤوله وهو ايضاً بنفس الوقت مسؤولنه بالشغل والمخابرات محققين بالقضية وسائليه منو جان معاك كايللهم فلان اللي هوه الجندي اللي دازين عليه المخابرات المهم بوره يومين اجيت كالعاده للشغل وطبعاً متخوف من الحاله فالجنود يحجون اشياء هواي فكلي  واحد منهم كاله حجايه اليوم راح يصير اكبر يوم عليك يقصدني اني طبعاً كتله ليش كال لا لا ماكو شيء وحاول يغير الموضوع هو مواليد 88 طفل بنضري بس افتهمت منه انو عنده خبر بان اليوم راح اروح للتحقيق اني ابو خبره بهيج اشياء فاستعديت للدفاع عن نفسي واليكم ما جرى بالتفصيل الممل خوذو نفس حتى تكملون وياي ..... المهم الساعه تقريباً بالتسعة اجاهم اتصال يابه خل فلان يقصدوني  يجي للمكتب الرئيسي طبعاً  سمعته من خلال الجهاز وباوع الدقه كلولي ان العريف فلان اللي هو مسؤول المترجمين يريدك كتله اوكي ورحت اتمشى على المكتب دكيت الباب جان يطلعلي كلي تعال معاي كتله اوكي واحنا نتمشى سئلته وين رايحيين كلي لا لا هنا شغلة رايدك وخذاني للمخابرات طبعاً سئلته خو ماكو شيء كال لا تقلق مجرد استفسارات وياك واني مطمئن طبعاً العريف المسؤول يعني نكدر نكول خوش انسان بس هماتين نفس الطكه مع الباقين ساعه يصير زين وساعه ينكلب عالابطانه ومنكدر نحزره كلي انا مطمئن منك انك راح تطلع وانته ما عندك شيء وانا انتضرك طب كللهم وطلعولي هذوله جماعت اللحاية المخابرات واحد شاب بس صغير بالعمر يعني حتى خبرة تحقيقية بقضايه مظلوميه ما عنده واكو مشكله بالامريكان يصدكون شكو شيء عالعراقيين مهما كان اذا مصدره من اقل جندي امريكي ويغضون النضر على ان بعض الناس يكونون عنصريين او يحملون كراهيات او او ... الخ المهم طبيت اسمك سنك عنواك تحقيق اوكي راح تخضع لجهاز فحص الكذب راح اسئلك اسئله وانته فقط تجاوب بنعم او لا بداء يسئل لان طبعاً اني حلفت قسمني يمين قبل كل شيء وطبعاً جانت اكو مترجمة عراقية كات ثري  من هذوله الخاصين للمخابرات فما اكدر اشرح هاي الفقرة لاني قسمت عليها المهم اللي اكدر اكوله شيء واحد فقط انو الجماعه كاعديلي ركبة ونص بتقريرهم وعلى جولتين  لاني مظلوم فكنت مطمئن وغير مرتبك للغاية لان اعرف شنو اللي صار بالتفصيل فمو شيء فاجئني اللي جان مخوفني شيء واحد انو ليصير المثل وتنخلق من الحبه كبه المهم سئلتني المترجمة وهيه انسانه مثقفه وحبابه وكلتلي اكو واحد يكرهك من الجنود لان طبيعت الاسئله غريبه كلتلها بنص العبارة كره واضح ما اعرف وطبعاً كلتلها لا ست بصراحه اني ما اعرف شخص يكرهني لان خفت اكول اروح سين جيم واني اريد اخلص من الموضوع المهم طلعت منهم كلولي انته هسه تمام واحنا من نحتاجك راح ندز عليك باي باي طلعت رحت للشغل مالتي بس عرفت نفسي انو اني فعلاً عبرت لان اصلاً اني ما عندي شيء فرجعت مطمئن تماماً المهم عرفت القضية وين صارت وشنو ابعادها وتحذرت الى اقصى انواع الحذر من هذا الجندي وهذا العريف المهم عبر اول يوم وثاني يوم وثالث يوم واحنا نعرف ان اذا اكو شغله امنية مبيقه الواحد ساعه وحده بالمعسكر يوم الثالث وعرفت ايضاً ان هذوله العريف والجندي صاحبين الفعله النكراء كلش ضايجين لان اني عبرت ومنطردت بشغله امنيه المهم يوم الرابع اجىء عليه العريف المسؤول على المترجمين اللي خذاني للتحقيق كلي اني راح انقلك الى غير موقع ومن كلي هيج اني فرحت لان ما اريد ابقى يم هذوله الحقراء فرحت وعبرت شهر كامل انتبهو اخوان للقصة من يوم التحقيق عبرت شهر كامل ونزلت اجازة واجيت واني بموقعي الجديد والجنود اللي بيه حبابين والعرفاء ممتازين واصدقائي بس احس بان الاجواء ينتابها الحيطة والحذر عندي احساس ما اعرف  بس سبحان الله احس وقبلها جانت عيني ترف الها والله اكثر من شهرين المهم بفد مره اجاني عريف جبير بالعمر خوووش انسان ومثقف وهو مدرس تاريخ يعني انسان جداً مهذب اني من خلال عملي مع الامريكان اعرف اهواي اشياء من ناحية روتين العمل واعرف شنو انا بالنسبه الهم وهمه ناس روتينيين اكثر من انهم ناس روحانيين اقصد انهم يتعاملون بالروتين اكثر من الثقه والصداقه والاخوه  يعني المترجم اللي جاي من امريكا وعنده كرين كارد واللي جان حاله حالنه وراح وحصل الكرين ارد ورجع مرت اللوخ يشتغل يكون افضل لكون روتينه يقره امريكي  واحنا اقدم منه بالشغل يفضل امنياً وبالثقه علينه المهم فهذا الانسان العريف اللي صاحلي وانا بالشغل كلي تعال اريدك بشغله بيناتنا كلي انته شبينك وبين العريف فلان يقصد العريف الحقير اللي بالموقع اللي صارت بيه الحادثه كتله ولا شيء جان يكلي هذا عنصري انا اعرفه وحقير ويكرهك على مود لونك بصراحه رف كلبي من القضية وكلي انا دافعت عنك وجاي ادافع عنك وهو متابع قضيه معينه وانا ارجعلك الخبر باي باي طبعاً طلعت منه وعرفت شنو بالقضية تحليلياً عرفت انه فشل تقريره مع المخابرات وراد يطردني باي وسيله من الوسائل والضاهر معاندني الى ابعد انواع العناد يعني اتوقع انو كايللهم لو اني لو هو عليه لان العريف الطيب كلي انته عليك اجتماع خاص بيوم كذا وهو راح يقررون عليك عرفت انه يمشي بالقضية بس ما عرفت شنو ديسوي وبعدين اني لا احل ولا اربط يعني المن اروح والمن اشكي فكلت عليك يا رب بس انته الناصر على هذا الظلم المهم بوره ثلاث ايام اجاني عريف الاستخبارات الخاص بالوحده مالتي وجان بيوم الاجتماع اللي مقررينه عليه  فكلي وين باجاتك طبعاً اني مستعد لهذي اللحظة استعداد مباشر كتله اتفضل هاي الباجات باج الجي ال اس وباج الشغل سلمتها اله وكلي يالله على مكتب الشركة رحنا سلمهم باجهم وراح للغرفة مالتي اللي جنت لاظمها لظم طبيت الها وهو معاي فتحت اللوكر واخذت اوراقي بس والغرفة ملظومه لظم كلي يالله راح انساعدك تاخذ اغراضك كتله يا اغراض هاي هديه مني الك اخذ اللي تريده لان اني حالتي النفسية اللي جنت بيها يالله ترفع جسمي عن الكاع مو تريدني اشيل اغراض كال بكل وقاحه لعد وصي عليهم خل يجيبوها الك بعدين كتله لا لا خليها الك اخذها وهاك مفاتيح الغرفة واللوكر وانت تصرف طبعاً شعور لا يوصف من الغبطة والالم والحزن والبأسات يعني طلعت والله احس بان الجو مظلم يا اخي تره نوبات الانسان يخلي نفسه بعمق وحلم والا كل فكره واحلامه تروح مع الرياح المهم طلعت من المعسكر وجان كل همي انها لتأثر على فيزتي اللي هيه ال SIV اذا ترجعون لبدايت الموضوع راح تقرون تسلسل الاحداث اللي سردتها فبعدها افتهمت من بعض اصدقائي انو الطرده اللي انطرتها اجت من الوحده وليس من المخابرات طبعاً وتأكدت انو اني بالابلاك لست فاللي صار ان هذا العريف بعد ما عبرت من تحقيق المخابرات ضاج فدز الطلب لاستخبارات الوحده واستخبارات الوحده هم الها حق باتخاذ الاجراءات الامنية بس الفرق ان المخابرات تحقق معاك اما استخبارات الوحده تعتمد على المعلومات اللي جاية بالتقرير المرسل اليهم وازيدكم من الشعر بيت ان الملف الامني هو عند المخابرات اما الوحدات مالها اي ملف لاي شخص فقط اعتبار اي تقرير هو ملفك الامني ومن خلاله يتخذون الاجراءات فاللي صاير انو اكو عرفاء يدافعون عني وكلولهم لا يابه والضاهر صايرة شغلت اكون او لا اكون بيناتهم الى ان انتهت القضية بصالح العريف ...هسه اخذو نفس خل انكمل رجعت للبيت وبين خوف انو واحد شايفني وواحد يهددني وين اروح ووين اجي بقيت بالبيت شهرين تقريباً ومنتضر الفرج الى ان اجاني ايميل من الSIV يكول رفض ال COM  لاسباب امنية فاللي عرفته ان العريف طبعاً هو  يعرف انو انا مقدم على فيزا فالاستخبارات او عريف الاستخبارات الحقير داز تقرير للسفارة والتقرير بعد انتو فسروه شنو هو شراح يكتب وشراح يكول كلامه الصح واحنا الغلط لان مثل مكلنا الجماعة روتينيين طبعاً بالمناسبة التقرير راح من الوحده للسفارة بطريقة خباثه لان الوحده مالها شغله بالسفارة وللعلم معاملتي وكل روتينها صار على الوحدات اللي قبلهم ومن ضمنها الركمنديشنات والسرتفكيشنات قبلهم همه مقدمولي أي شيء نهائياً لكن يريدون يدمرون فيزتي مثل ما دمرو شغلي لان اكو هواي اشخاص بطلوهم امنيا بس فيزتهم مشت اعتيادية وبيهم اشخاص اعرفهم غير اللي سمعت عنهم بس لان الوحده اللي تتبع الحظ كانت بيها اشخاص عنصريين وسخفاء وشياطين ومابيهم أي ذرة انسانية دزو تقرير بالحاله للسفارة وهسه راح اكللكم شلون فتهمت الحاله طبعاً بوره ما اجاني الرفض كلبت الدنيا بالرسائل يمعودين اني حياتي بخطر والوحده الاخيرة ام الحادث مو الوحده اللي تم الاعتماد على معلوماتها او وصياتها او ركمنديشناتها لان وحده قبلها فالمهم دزيت ايميل ليش وكيف وشنو السبب وانا والله صادق ما عندي غلط ولا عندي مشكله وحياتي مهدده... الخ جانت كل الردود تاتي سلبيه القضية انرفضت من الCOM  لاسباب امنية المهم اخيراً ايست منهم وقررت اقفل الموضوع وانساها واعتبرها احد اهم دروس حياتي ان لا ابني حلم للمستقبل لان الاقدار قد تضع بطريقك اشخاص لا يملكون من الرحمة ولا الضمير ولا الانسانية فبديت ما اثق باي انسان ولا اي احد قفلت الموضوع وسكتت فبعد مده حوالي الشهرين او الثلاث شهور اتصل بيه صديق جان وياي بالشغل وكان اتصاله مفاجىء اليه واني اباوع عالتلفون كلت هذا اشذكره واحنا العراقيين بصراحه من يصير موقف مع  شخص نصير حذرين منه ليس لانه مشبوه ولكن حتى لا يعم علينه المهم فكل اصدقائي بالشغل متصلو بيه ولا حاولو يتصلون اني اقدر موقفهم لكن كلت هذا ليش اتصل وشنو الفلم طبعاً اني اريد انتباهكم لسرد القصة وحتى افهمكم اشلون عرفت انو سبب الرفض من استخبارات الوحده هيه اللي دازه التقرير للسفارة فرفعت التلفون على صديقي الو هلوووو اشلونك اخبارك شكو شماكو وين ما وين من هاي السوالف وجان صوته مال واحد مصدوم ومهضوم كال عندي كلام معاك طبعاً هو مثلي هم مقابل مقابلت الفيزا واموره اوكي مثلي بالضبط كال انا انطردت من الدوام ها ليش يا ستار كال والله طردوني نفسهم اهل القضية مالتي بالضبط  العريف اللي ارتكب عليه كاتب بيه تقرير يغيب هواي وهو خطية ابوه مريض ويعالج بيه وبس هو لابوه المهم فصار يسئلني انته شصار عليك كتله اني انرفضت فيزتي تخبل هو كتله عليمن هذا المقسوم ولازم نرضخ للواقع رغم مرارته لان وين نروح ومن يسمع والمن نشتكي بس عند الله المهم كالي تتوقع اني هم يرفضون فيزتي كتله  انته تعرف فلمي من الاول للاخير فانا شغلتي على اساس سووها شغله امنية وقضيتي ارتكاب وسببه كره وعنصرية من الجندي والعريف والعريف اللاخ المسؤول وانته تعرف كلش زين فركبو قضيتي الى قضية امنية  ويجوز همه اللي دازين بيه تقرير للسفارة فانت شيدزون بيك يكلولهم يغيب كلي واني هم يكرهوني اخاف كلشي يصير وكان متوتر خطية هواي كتله انتضر  رد السفارة وخلك ثكيل وحضر نفس لاي موقف حتى لا تنصدم مثلي وحاولت اطمنه لان كان خايف هواي المهم بوره كم يوم هم خابرني بس هالمره وهو منفعل كلش جان يكلي رفضو فيزتي كتله هاي شنووو !!!! سووها طبعاً هماتين بيك بس انته دز رسالة اسئل كال دزيت وجاني تم الرفض لاسباب امنية كلي انته شسويت كتله هماتين مثلك ومليت من كد الرسائل وماكو اي نتيجه وقررت انسى الموضوع خلاص المهم بوره تقريباً مدة طويلة ست اشهر تسعه كلت خل اخابره اشوف شكو شماو اني هماتين اتابع عين كاوه واقره المواقف المهم لكيت جهازه مقفول فتناسيت الموقف المهم استمرت الايام بالمسير الى ان صادفني احد الاصدقاء  جان مترجم ويانا ومعاي بالفيس بوك ولو انا موه الكد بالفيس بس صدفه سبحان الله وهذا الولد يعرف كل تفاصيل شغلتي ومظلوميتي وهو بامريكا طبعا كمل اجراءاته وقدم استقاله وحسبها صح  وضليت اتسائل ويسئلني وهاي مو صحييح وهاي حرام كتله يابه مو بس انا هم فلان خطية كال اي سعت بيه بس افلان تعرف وين هسه كتله لا وين كال بامريكا كتله هاي شنو كال اي والله كتله شلون مو هو خابرني ورفضه هماتين امنية يمعود اخاف متوهم كال أي صحييح بس بقى يراسلهم  للسفارة فتبين ان التقرير يجي للسفارة تم فصل فلان ابن افلان كذا كذا لاسباب امنية وميعطون تفصيل ودزو السفارة تحقيق بشكل تقرير للوحده مالته وسائليهم على مود السبب الامني وكايليله بسبب غيابه المتكرر فصلناه المهم السفارة كلتلهم اسباب غيابه ان ابوه مريض ودزلنا تقارير مرض ابوه وحتى الاوراق مال الايام اللي بيها الغياب وتقارير المستشفى الهم فالجماعة طلعو يتكهنون تكهن انه يغيب هذا ليش غايب شكو ومن هالكلام ويخلون بكيفهم المهم السفارة كلتلهم هاي الاسباب غير كافية ان تكون سبب امني لرفض فيزته واحنه راح نطعن بتقريركم يقصدون الوحده ونستأنف اجراءات السفر مالته فالسفارة اتخذت الاجراء من يمها ورجعتله ال COM  وبوراها بكم مده سافر لامريكا انته ليش مسويت مثله طبعاً اتفاجئت بالقضية مالته وماكنت اعرف ومن خلال احداث هذا الولد فهمت ان مجريات قصتي هيه بسبب الوحده اللي اتخذت موقفين مجرمين بحقنا الاول انها طلعتنا بالاعتماد على تقرير خالي من اي دليل والثاني انو  تدز للسفارة تقارير يابه ارفضوهم هذوله مشبوه بيهم والسفارة تاخذ هاي التقارير وترفض الطلبات واحنا نتدمر فسئلت نفسي اذا هو دافع عن نفسه بان سببه الامني كان بسبب غيابه وكدر انو يراسل السفارة ويعطيهم اوراق وسبب غياباته اما انا سببي الامني جنت اطب على غرفة بيها كراسي وطاولة وسووها عليه مكتب وبيه معلومات لان الجندي جان ينام وميريد احد يزعجه واربعة وعشرين ساعة منعس وبس يالله يحشش هل يا ترى لو ردت ادز للسفارة شنو الاوراق اللي تنجيني من تقريرهم فراجعت نفسي لكيت نفسي انو انا ما عندي اي شيء يثبتلي صحة ادائي او كلامي والوقت صارله اكثر من سنتيين تقريباً وانا سمعت متاخر فكلت خل اسكت احسلي وانسى لان هيج مواضيع تدمر حالتي النفسية واكيد ماكو نتيجة .... المهم فبقيت الى ان يوم من الايام تهددت لان جنت اشتغل مع الامريكان وحاولوا يقتالوني وتهجولت من البيت وكعدت بيت اخر اللي اني استقر بيه حالياً لا اكدر اطلع ولا اسوي اي شيء بس يالله العب مع الجهال بلي ستيشن واخاف من دكت الباب على اساس انو محد راح يعرف مكاني وما اريد اطلع حتى لا احد يشوفني او يعرفني المهم اتابع اخبار المنتديات فشفت موضوع انعرض هنا على عين كاوه انو واحد مرفوض امنياً من ال SIV وبوراها مقدم على الCOM  وجايه كيس نمبر ومقابل اولى وثانية وثالثه ومسافر وبالموضوع اتبين ان اجراءات الSIV ما الها شغل بال IOM فكتبت موضوع اني سئلت بيه هل انو يمكن ان الواحد يعيد الكيس نمبر مالته على ال IOM كالولي ايه بشرط ان يعطي سبب للرفض فأجت ابالي فكره ان ادز ايميل للIOM فدزيت رسالة الهم كلولي دزلنا استيتمنت بسبب عدم الرد على اتصالاتنا من جنا انخابرك بال 2008
طبعاً اني بينتلكم اني قدمت على ال IOM قبل الSIV المهم دزيت الاستيتمنت وقبلوني ورجعو الكيس نمبر مالتي وقابلت المقابلة الاولى ولحد هسه بعد ممقابل المقابلة الثانية المهم معاي ولد قابل بالصدفة تعرفت عليه وسئلتة عن ايميله وادزله ايميلات بين مدة ومدة اخير شيء كلي اني قابلت المقابلة الثانية وسوولي اياها مقابلة بمقابلتين وفحصت فحص بابن البيطار طبي ومال محلفين .. الخ واني لهسه مجاني ايميل منهم تتوقعون حسب رائيكم شنو الفلم او شيء يضدني من مقابلتي الاولى لو شنو ان بالنسبه اليه تعودت على الصدمات بس كلت عسى ولعل انها صايبه هالمره واخيراً اطلب من كل الاشخاص اللي قرو موضوعي ان يعطوني رئيهم وشنو التدابير اللي ممكن اتخذها وما هيه الحلول واترجاكم ان تخلون هذا الموضوع بالصفحة بالمفضلة عدكم اسئلتي هيه كالاتي
س/المظلوم مثلي بهيج قضية شلون يكدر يدافع عن نفسه ماهي الوسائل او الحلول
س/اذا رفض ال SIV جاء من سرد القضية واعتبرت امنية فهل يؤثر الرفض الامني السابق على اجراءات الIOM
س/شنو اللي اكدر اسويه ومنتبهله او ما اعرفه ويمكن ان يكون مفتاح لرفع الظلم بالقصة مالتي
واخيراً اكللكم اني تعبتكم ويايه هواي ويمكن اني اللي كتبت الموضوع تعقدت منه لعد اللي راح يقراه شراح يكول اي استفسار عن القضية اني حاضر
س/ اذا فكرت ان اقابل المخابرات الامريكية لشرح موقفي فهل هذا ممكن من الناحية القانونية
س/ اذا فكرت باتخاذ فكرة وضع محامي يتابع القضية كيف واشلون وهل هناك من هذا القبيل
س/ ما هو افضل حل للقصة باملها هل السكوت والرضوخ ام المطالبة وهل هناك نتيجة او امل
واخيراً اقول لطالما ان الانسانية موجودة فاللي خلاني اكتب واسرد الموضوع بالتفاصيل الدقيقة هو اني اامن بان هناك عقليات مختلفة ورؤيا غير متشابه وتختلف من انسان لاخر وهكذا قررت ان اضع قضيتي بين يدي كل القراء عسى ولعل ان هناك من يهديني لطريق لم تكشفه لي الاقدار واني كوني سجين الاقدار فليس هناك محامي لقضيتي سوى التامل والصبر ولان اين الاقدار قد سجنتني ولكنها علمتني ان اعرف الغدر وعنصرية من هم بهيئة انسان وليس بإنسان اتعبتكم معي شكراً لكم واخيراً اقول حسبي الله ونعم الوكيل على كل ظالم اللهم حقق لكل مظلوماً نصرتاً منك يا ارحم الراحمين وفقكم الله للخير ويا رب فرج عاجل لكل الاخوه والسلام عليكم         
عواني البريدي هو
careless140@gmail.com