قصة الديـچ .. لا تفوتك !!
أكو ولد فقير أمه گلتله : هاك هذا الديچ بيعه وجيبلنه فلوس .
اخذه وراح للسوگ ، بالطريق فلت من إيده وگمز على سياج ودخل
واحد من البيوت ، الولد طفر السياج وراه عَلَمود يجيبه ، دخل البيت ،
لزم الديچ وباوع ، لگه مره يمها رجّال گاعد يبوس بيهه ، بنفس الوقت
آنـدگ الباب مال بيت ، المره گالت :
يبووو أجه رِجلي الگصاب واذا شافك يصلخ جلدك !! وختلتهم بالكنتور
بسرعة على ما يطلع رجلها ، وظل الولد والرّجال
بالكنتور مضمومين ينتظرون .
..............
الولد گال للرّجال : تشتري الديچ ؟ الرّجـال گاله :
لا عمو حبيبي ما أريد . الولد گاله : خوش لعد راح اطلع آني ,
ماعندي شي هنا ! گاله الرجال : لا لا يمعود جيبه أشتريه ،
لكن بيش تريده ؟ گاله الولد : بخمسة وعشرين ألف
( حوالي 21 دولار ) .
الرّجال گاله : أمري لله هاك ، أخذ منّه الدّيچ وآنطاه الفلوس ،
الولد صفن شويه وگاله :
تبيع الديچ ؟ الرّجال گاله : يمعـوّد مو هسّـه آشتريتَـه منك ...
لا ما أبيعه ! الولد گال : لعد أروح اني ماعندي شغل هنا ! الرّجال :
لا لا يمعود بيش تاخذه ؟ الولد : أشتريه منّـك بخمسة آلاف دينار !
الرّجال : مو هسه أخذته منك بخمسة وعشرين ألف ؟
الولد : أنت حـر براحتك ، آني ماعندي شي هنا راح أروح !
...........
الولد باع الديچ وآشترى الديـچ ، وباع الديـچ وآشترى الديـچ !
وره ساعة ، المره فتحت الباب وگالتله : أفلت بسرعة رَجلي دخل
للحمام ، وطلع الولد وبجيبه 150 الف دينار والديـچ بعده عنده !
............
وصل للبيت وأمه شافته ، گالتله : خير يمّـه , شنو مابعت الديـچ ؟
حچالها القصة وگالها : هـــــذا اللّـي صار .
الأم گالتله : يمّـه أخاف هاي الفلوس تعتبر مال حرام !
گلها أبنها : والله يمّـه ما أدري ، أنتي بكيفچ .
گالتله الأم : خلي نروح لمفتي الجامع ونستفتي بيــــه !
راحوا للجامع وسألوا عـن الشيخ ، گالولهم : الشيخ گاعد يصلي جـوّه .
گالتله أمّـه : يمّـه روح أسأله وآحچيله القصة ..
الولد راح للشيخ : گاله شيخنا هذا الديـچ ...
آندار عليه الشيخ وگلّـه : أنعل أبوك لابو حتى هذا الديـچ
اللّـي لاحگنـي بيه لهنانـــا !!
~ منقول ~
