السلام عليكم
اخواني اصحاب التقديم الجديد واللي بعدهم اجراءات بنص الطريق موضوع التقديم على الهجرة او اللجؤ لازم تخلون في بالكم اقل شي سنة او سنة ونص يلله يجي موعد السفر فنصيحتي الكم يا شباب انه ماتبقون كاعدين بدون عمل او شغل وحتى اذا حصلت على تعيين فاستمر لان الموضوع يطول سنين وحتى اذا احد افراد العائلة هو المقدم الرئيسي وانته بوسط مرحلة دراسية فلا تترك الدراسة استمروا يا اخوان استمروا بس قلل المشتريات الضرورية اللي ما الها داعي لان هواية امور راح تضطرون تعوفوها فالمن تبقى واذا عدكم من يستاهل تبقى الى الغراض فليش لا .. تبقى مسالة الزواج وللجنسين هذا الموضوع بي عدة عوامل نتركه لصاحب العلاقة ولكن دائما النتيجة انه تاخير حيصير على الملف لان اضافة شخص .....
اللي ديصير
1- انه العالم اشتغلت ويا الاميركان او اي جهة ثانية جمعت فلوس حلوة وصرفت فلوسها بالانتظار اللي طول اكثر من ثلاثة سنوات بحيث من يوصلون ما عنده ولا فلس يبدي بي حياته اهناك.
2- ترك مقاعد الدراسة والعمر اللي يمضي بانتظار اللجوء كان ممكن ان تقضي بانهاء مرحلتك الدراسية واذا كنت كلية تلحك على ان تحصل عمل وبعدك ما مسافر.
حقيقة ما دفعني لكتابة هذا الموضوع هو اتخاذ القرارات الغير مناسبة في بداية التقديم وللي ديأثر على مستقبل وعائلة صاحب العلاقة بحيث يتركون العمل والدراسة والامور الحياتية الاخرى بحجة عندي سفر وهذا التصرف ابدا مو صحيح لان لا المنظمة ولا الاميركان ولا اي شخص ثاني بالعالم راح يتأذى غيرك.. انته عزيزي او عزيزتي مقدم طلب اللجوء سوف تقضون وقتكم بالتفكير وكيف ولماذا وشلون وفلان سافر وفلان طلع واني بعدني مثل الحجارة واكف بمكاني وتبدا تحتار من ابسط الامور مثل الرموز في عنوان الرسالة او كلمة عابرة في رد المنظمة او او او وبالنتيجة ما تحصل جواب وبس راح يزيد القلق عندك فنصيحتي الكم ان
اولا اذكروا الله دائما ابدا واستحمدوه على كل حال فهو ارحم الراحمين ولطيف بالعباد ومجيب الدعوات .
ثانيااستمروا بالحياة ولا تجعلوها تتوقف من عمل او دراسة او اي موضوع من شأنه ان يطور من واقع حال ومستقبل الفرد او الاسرة .
بالمناسبة اني تقديم شهر الواحد 2010 رقم الملف 116 بغداد ومازالت حالة الملف بانتظار النتيجة
اسف على الاطالة بس شفت الموضوع يستحق الذكر
اخوكم
النعيمـــــــــــــــــــي
