السلام عليكم
تحية الى جميع الاخوة الاعضاء بالمنتدى
طبعا موعدي كان ساعة 6ونص الصبح الساعة 6 اني بساحة النسور وششوف امة الثقلين هناك المهم بدو يدخلونة الحرس بالستة ونص ووقفنة ننتظر بدو يجون الموظفين المهم لاتكلولي ولا الكللكم انتقام الننجا الى الساعة تسعة يلة دخلنة وطبعا اتصور عدد الي كانو موجودين بحدود ال 150 شخص مابين الي ديراجعون السفارة والمنظمة
المهم دخلنة للمنظمة احنة جماعة المقابلة الثانية كنا اقل من 40 كيس بقليل
وطبعا بعده دخلو جماعة المقبلة الاولى وان عددهم اتصور نفس الشي
المهم عدد الافراد الي كانو موجودين في قاعة الانتظار اتصور يصل الى 100 شخص او اقل بقليل
المهم
دخلنة للمحلف كان رجل امركي من اصول عربية ويتكلم العربي بطلاقة عرفنة بنفسة وقال تفهمون علية بصورة جيدة كتلة اي واذا تحب تككلم انكليزي هم ماكو مشكلة كال لا اذا تفهمون علية راح اتكلم عربي كتلة اوكي
اقسمو وراية قسمنة وبداء
قال مثل ماتعرف انت مقابلتك لاضافة الزوجة وراح نظيفه ونراجع معلوماتها وايضا راح نراجع ونستكمل بعض الامور معاك كتلة اوكي
بلش يسال الرجل بالاسئلة وقبلها قال اسف اكو كثير من الاسئلة اعرف متنطبق عليكم بس لازم نسالها كتلة ماكو مشكلة
الاسئلة كانت التقليدية عن تفاصيل العمر والدراسة وبعدها منتمية للحزب لو لا خادمة عسكرية لو لا دعمتو ارهاب لو لا دفعتو فدية لو لا
طبعا الرجل كانت كلش مرتب ومتعاون ومتعاطف معانا بس الشغلة الوحيدة الي ركز عليه انه شلون زوجتي مخلصة جامعة وهية مامنتمية للحزب
واحنة الي نعرفة ونسمع انه انتو كنتو تجبرون وتتعرضون الى مضايقات بهذا الخصوص وانت يعني منتمي لان من وصلت الجامعة نجبرت
هنا اني يعني وضحتلة كتلة يابا هية الالحاح على الانتماء موجود بكل مرحلة من نوصلله يعني من خلصنة متوسطة كلولنة يابا ترة متكدرون تدخلون بعدين اعدادية وبعدين من خلصنة اعدادية ترة متكدرون تدخلون جامعة اذا متنتمون بس الصراحة كانت الدرجات متفاوتة واكو كثير ناس كانت تكدر تفلت من الامر ومتنتمي وترة الامور الي تسمعوه مو كلها صدق 100 % يعني اكو كثير من الناس كانت تقدر تفلت من موضوع الانتماء واكو لا
وكتلة بالاخص بالنسبة للبنات كان الامر بي مرونة يعني التشديد اكثر على الولد اكثر من البنية هاي الشغلة الوحيدة الي ركز عليه
والرجل كان متفهم للامور
المهم الاسئلة الي طرحه عموما هية نفسه المتعارف عليه
منتمي للحزب لو لا
منتمي لجماعة ارهابية
دفعت فدية لو لا
اجبرت على التعامل مع جه ارهابية
تلقيت تدريبات عسكرية او وية مجاميع مسلحة
كان عندك سلاح لو لا
انظميت الى تنظيم القاعدة او جيش المهدي او والله الصراحة معرف بعد هية الجهات الي سئل عليه هواية اكو حتى منه ماسامع بيه
سئلني عن وظيفتي الحالية ومكان دوامي وعن وظعي الحالي شلون
المهم من خلص الرجل كال انت عندك سوال
اني كتلة اي نعم كال تفضل
فسالته عن موعد الاجابة على رد المحلف كال 60 يوم كتله اني مستلم قبل رد باول مقبلة فهل راح يجيني مرة ثانية كال اي نعم
هنا كتلة احنة مشكلتنة مع المدة اولا اذا كانت 60 يوم ننتظر بس على الله لاتكون اكثر الجان يسالني عن ايميلي وارقام تلفوناتي وكال اكيد راح يوصلكم الرد وراح نكون حريصين انه يكون باسرع وقت واتصور حسب مااستشفيت من كلامة احتمال راح يكون الرد مباشر من قبلهم وسئلني عن الوقت الي اشتريت بيه هاي الارقام
سئلت عن الدفرال لتر وكتله هية معناها او ترجمته الصحيحة هية تاجيل واحنة حسب مانعتبره انه هية موافقة المحلف المبدئية والمشروطة باكتمال الامنية وهنا جاوبني وكال صحيح ممكن تعتبره هيجي شي وكال هية اكو موافقة نهائية واكو رفض واكو هاي الدفرال لتر معناها انت بعد بعدك عندك بعض لاجراءات الامنية والفحوصات واستكمال بعض الاجراءات قبل ان تحصل على الموافقة النهائية
سئلت عن انه احنة دنسمع بتصفية الملفات القديمة واكو تسريع بالاجراءات
وهنا كانت اجابته انه فعلا اكو تسريع بالاجراءات وديحاولون يعني ينهون الاجراءات من فحص طبي واجراءات امنية وانشاء الله خير
شكرت الرجل وطلعنة
الصراحة المقابلة جرت بسهولة والرجل كان جدا لطيف وطيب وخلوق
الاجواء بشكل عام شفتهة مطمئنة ومشجعة وفعلا الي لمستة اكو تسريع وديحاولون يمشون اكثر قدر ممكن من الملفات ويحسمون امره
نصيحتي لكل الاخوان الي بعدهم ممقابلين انه لايتوترون ولايخافون من مقابلت المحلف لان همة ناس ودودين ولطفاء بالتعامل اني مريت على 3 محلفين بس انت كون صادق بكل اجاباتك ولاتحاول تستذكى براسهم كون طبيعي وتكلم بصدق وصراحة وبأدب معاهم وراح تشوف كلش متعاونين معاك واولا واخيرا النجاة بالصدق
وهية المسئلة مسألة قسمة ونصيب وتوفيق من رب العالمين
المحلف مراح يكدر يسوي شي غير انه ينفذ مشيئة رب العالمين الي كاتبلك اياها انه تطلع او لا فكون صريح وصادق واترك الباقي على رب العباد
واني حاضر الى اي سوال
تحياتي الكم
اخوكم الصقر
