الى ادارة هذا الصرح الشامخ اللي هو بيتنا الثاني واللي يوميآ نقضي بي ساعات وساعات . واني اريد اختصر الكلام.
توجد حالة تكررت اكثر من مرة في هذا المنتدى وهي قيام احد الاعضاء من باب النصب والضحك عالناس أو من باب عدم المعرفة بالتعليق على موضوع قديم جدآ جدآ ولأن المواضيع متشابهة والمشاكل مكررة فخطية بعض الاعضاء يبدون يدخلون عالموضوع ويقدمون اجاباتهم وخبراتهم وميدرون هو الموضوع قديم وتلكي الموضوع صعد في قائمة المواضيع والناس احتمال تدخل وتقرة مامكتوب واحتمال تستند عليه وهو اصبح قديم وبي كلام لايصلح تطبيقه الان .
يعني آخر حالة صارت من احد الاشخاص علق على موضوع من 2008
وخلينا واقعيين. اني ماطلب من ادارة المنتدى الغاء عضوية الشخص اللي دخل. لأن هذا الاجراء ميعني شي يسوي غير ايميل ويدخل. ويجوز هو اصلا هم خطية فعلا ميدري ان الموضوع قديم . ويجوز عنده نفس سؤال الموضوع ويحب يعرف احابته.
لكن هذا المنتدى من اهم المنتديات وخصوصآ موضوع الهجرة لأنه يتعامل مع اخطر قرار مصيري للأنسان وهو الهجرة و اكو ناس ماعدها مصادر اخرى للمعلومة وديتحدد مصيرها وقراراتها بناءآ على معلومات استندت عليها من خلال مواضيع هذا المنتدى.
صحيح احتمال السؤال نفسه موجود عند شخص آخر في هذا الوقت ويريد يطرحه لكن المداخلات في ذلك الموضوع قديمة والكثير منها غير صحيح وغير صالحة الان واحتمال سيعتمد عليها ويتخذ قراراته بالاستناد اليها وهي قبل سنين. مثل موضوع في 2008 ومعظم اللي ورد فيه اصبح قديم جدآ . واذا كان هذا الشخص فعلا يريد يحصل اجابة فمرح يلكاها لأن الكثير من الناس اللي يريدون يساعدون من يدخلون يشوفون الموضوع قديم . رح يتركوه مباشرة. ويكدر هذا الشخص ينزل موضوع جديد افضل له وتكون الاجابات وفق آخر المستجدات.
يعني بربكم اللجوء الى اوربا تهريب (كجغ) اللي نسميها ( بلان B) كانت في 2008 وقبلها مثل هسة في 2013!!!!!!!
بالعكس يجوز حنورط الناس هاي المرة. اذا كانوا فعلا مهتمين بالموضوع ويريدون يسألون نفس السؤال ..
لذلك اني اطلب من ادارتنا المحترمة ان توقف امكانية اضافة تعليق على اي موضوع مرت مدة طويلة مثلا 3 اشهر أو 6 اشهر على آخر تعليق فيه . ويبقى الموضوع للأطلاع فقط كموضوع من الارشيف.
احب اسمع آراء الاعضاء وماعرف تأيدوني بطلبي هذا أو لا
وكل الارء محترمة .
تحياتي
