السلام عليكم اخواني و اخواتي الاعزاء
اول شي دعواتي للجميع بالسفر السريع و انا من ضمنهم و نخلص من الهم الي احنه بيه.
اني و زوجي مقدمين SIV و البارحه جانت مقابلتي بالسفاره حتى اقدم اوراق بنتي و رادوا مني DS-260 لكل افراد الاسره ( اني و زوجي اسويلها ابديت و بنتي امليلها فورمه جديده)و العدم محكوميه الي و لزوجي و قسم النه و فحص طبي جديد الي و لبنتي ( هذا ثالث فحص طبي الي).
طبعا وصلنه للباب الرابعه الي على الجسر مقابل ام الطبول ساعه 7 الصبح و احد افراد الجيش بلغنه انه النقطه ازدحام و لازم نكضيها مشي للسفاره و فوكاها يكوللنه ما بيها شي هيه بس كيلوين و نص ؟؟؟؟؟؟
المهم مشينه و وصلنه لنقطه الانتظار لكينه كميه الواصلين ما يقارب 250 شخص و كووووووووووووووومه جهال. اني دخت لان همه ذاكرين بالايميل انه عدم اصطحاب الاطفال دون 13 سنه و الجماعه مسويها الزوراء بعدد الجهال و مااحجيلكم اللفات و الجبس و العصاير الي كامت تطلع بالضبط حسيت نفسي بالزوراء. و الاطفال اتبهذلوا من وره الحرررررررر.
بالعشره الصبح دخلنه للسفاره و 80% من الحضور همه طلاب دراسات و يقدمون فيزا دراسيه و الباقين كلهم اس اي في تقديم جديد اول مقابله و الاغلبيه همه من اخوانه المسيحيين. اني و زوجي اقدم اثنين لان اني تقديم 2009 و زوجي 2010. حسيت يمكن اني و زوجي الوحيدين الباقين من جماعه الي ملفاتهم نايمه عليها الطابوكه...خخخخخخ
خلصنه بال11 و وصلنه خارج السفاره بال 12 و نص.
اما عن نتيجه المقابله كالتلنه الي قابلتنه انه انتظروا و ما بيدنه شي نقدمه الكم و ما ننطيكم اي امل او اي وقت تصدر خلاله الفيزا... يعني باختصار قفلتها بوجهنه. كالتلنه انتظروا من عدنه اي طلبات اضافيه في حاله وجود حاجه لاي اوراق اضافيه. كملنه القسم و طلعنه.
مثل ما كلت بالبدايه انشالله يوم السفر للكل.
تحياتي
ام كوكه
