السلام عليكم جميعا ..
سوف أدخل بالموضوع مباشرتا .. أنا قديم في هذا المنتدى ومن خلال قراءتي وتحليلي للأمور وبدون مستندات رسمية أو وثائق على تأكيد صحة كلامي أنما هي مجرد أستنتاجات خاصة بي أنا شخصيا ..
أخواني ان السفارة الأمريكية المتواجدة في كل بلد فيه عراقيين مقدمين على منظمة الهجرة الدولية أو اليو أن أو السبشل فيزا (iom & siv & un ) هي من تتخذ قرار أصدار الفيزة و الموافقة النهائية أو المشروطة ( التأجيل ) أو التعليق أو الرفض أو دراسة الملف وحتى لها الحق بتأجيل كل من لديه سفر أو لديه فحص طبي أو أعادة الفحص الطبي أيضا .. وأيضا لها الحق بـاجيل المقابلات والتوطين وغيرها ..
طبعا هذا الأستنتاج أعتقد هوه أقرب للواقع لما نراه من تخبط من سوء أدارة الأمور وأتخاذ القرارات الخاطئه من المنظمه وللأسف هي ليست من المنظمه وأنما هي من السفارة أو الأقسام المعنيه لمتابعه الملف لكل شخص منما يسبب عرقله الملف وأحراج المنظمه مع المتقدمين في كل البلدان المتواجين فيها العراقيين .
ببساطة من البداية المنظمه تنطيك رقم ملف بعد التأكد من صحة اهليتك للتقدم على برنامجها وبعدين راح تحددلك مقابلة أولى وتحجيلهم القصة وهنا أعزائي أنتهى دور المنظمة ويبدأ دور السفارة أو الأقسام المعنية لمتابعة ملفك وهي بالتسلسل التجييك الأمني الأول وهذا يتم داخل بلدك وهنا نلاحظ أكتماله يتزامن مع الفحص الطبي الأول أو البصمات أو مقابلة محلفين ,, حيث انك لاتمر على هذه المحطات الأخيرة بدون تجييك أمني أول .. وأقصد هنا تحديدا مقابلة المحلفين .... وخير دليل على كلامي مرات تشوفون ناس تكمل أمنيتهم بالموقع قبل المقابلة الثانية وراها ترجع أنتظار ...
بعد المقابلة مال محلفين راح يجيك قرار التأجيل أو قيد الدراسة أو التعليق أو الموافقة(مرات تجيك ومتسافر وهذا دليل ثاني على التجييك الأمني من قبل السفارة وديتأكدون من شي ثاني عليك ) أو الرفض ياستار .. وهنا يبدأ التجييك الأمني خارج بلدك وتحديدا في الولايات المتحده الأمريكية وهذا لايأخذ سوى أسابيع لأننا نتكلم عن دولة عظمى ولديها أجراءات متقدمه ونظام الكتروني أمني صارم وسريع ودقيق ولانتكلم عن مديرية التقاعد العامه في العراق ههههههههههههههه .. للترفيه فقط هي كل الدوائر تعبانه شمعنه هاي ههههههخخخخخخخخخ ..
وبعدين الملف ياخذ دوره عند الأنتر بول وهذا لايأخذ أيضا سوى أسابيع لأننا أيضا نتكلم على منظمة قوية ومترابطة جدا ومعلوماتها دقيقة جدا ولا نتكلم على كراج باب المعظم الذي تحول من تحفه فنيه ألى زريبه فنية وحفريات ..
يعني أخواني العملية خارج بلدك من تجييكات أمنيه متأخذ أكثر من 6 أشهر للحالات التعبانه وهذا بأعتراف الدي أج أس الأمريكية في واشنطن وتكدرون تروح للموقع مالتهم وتقرون هذا الكلام .. زيييييييييييين بقى التأخير مالتنه سنتين وثلاثه وأربعه وخمسه ليييييييييييييييييييييييش هيج
آني أكللكم ليش كله داخل السفارة ,, عندما يقول لك أبو المنظمه أنته تحت التجييك الأمني وانته تحت السلطات ألأمريكة يقصد السفارة بس ميكلك لأن أنته مو شغك تعرف وهاي الوكالات الأمنية هية بالسفارة نفسها أعزائي .. يعني بعد لحد يفكر ويكول آني شغلتي بعدها بأمريكا لا أنته شغلتك داخل السفارة في البلد الأنته مقدم منه وهذولة السفارات ينسقون مع السفارة الأمريكية في بغداد وهاي السفارة بيدها الحل والربط ( لعد مال شنو خاليلهم 3000 موظف بيها ) وتخيلو أنتو كم قسم بيها .. وبالمناسبة الدي أج أس واحد من أسامها المهمة .. من غير المخبرين السريين بكل مكان عدها عيون ومن غير الأرشيف مال دوله العراقية كلها بيها وهذا واقع حال ..
بس بالنهاية تره كلكم طلعون بس العنده قضاية أرهابية فعلية وليس أشتباه ميطلع والمشارك بحلبجه والخليج ميطلع ..
والباقين أجراءات أمنية أحترازية لعد هية كوتره تروحون لبلاد العم سام ..
أخواني تره دوختكم وهذا كله مجرد رأيي آني شخصيا .. والحمدلله رب العالمين والصلاة والسلام على سيد الخلق حبيبنا محمد وعلى آله وصحبه وسلم تسليما ..
شكرا وتحياتي ألكم وألي بالسفر القريب يارب .
