܀ ܒـܪܹܐܠܝܼ ܕܚܵܙܸܢ ܢܸܣܝܘ̇ܢܵܐ ܀
ܬܠܵܬܼܵـܐ ܐܸܣܛܘܼܟܼܣ̈ܐ ܒܚܲܝܠܵܐ
ܛܠܲܩܬܵـܐ ܘܒܲܪܒܲܙܬܵـܐ ܘܡܲܘܬܼܵܐ
ܟܡܵܐ ܒܲܣܝܼܡ̈ܐ ܘܫܲܦܝܼـܪܹ̈ܐ
ܥܲܡܝܼ ܗܘܹܐܠܗ̄ܘܼܢ ܗܲܠ ܐ̄ܚܲܪܬܼܵܐ،
ܒܐܲܝܟܸܢܘܵܬܼܵܐ ܥܲـܘܩܵܢ̈ـܐ
ܥܲܡܲܝܗ̈ܝ ܥـܒܸـܪܝܼ ܒܟܼܠ ܫܲܥܬܼܵـܐ
ܐܝܼܡܵܢ ܕܗ̄ܘܹܐܠܝܼ ܡܼܢ ܝܸܡܵܐ
ܓܵܘ ܒܹܝܬܼ ܟـܪܝܼܗܹܐ ܚܸܫܟܵܢܬܵܗ̇،،
ܒܡܲـܪܸܒܥܵܐ ܗܘܹܐܠܝܼ ܐܵܢܵܐ
ܓܒܼܝܼܠܵܐ ܒܟܲـܪ̄ܣܵܐ ܕܚܲܢܲܢܬܵܗ̇
ܦܠܸܛܠܝܼ ܡܫܘܼܡܗܵܐ ܒܲܪܢܵܫܵܐ
ܫܲܒܼܪܵܐ ܒܟܼܵـܝܵܐ ܒܓ̰ܢܵܢܬܵـܐ
ܡܐܲܝܟܼ ܨܲܒܝܼܵـܐ ܒܸܠܝܵܝܵܐ
ܣܢܝܼܩܵܐ ܠܚܸܕܼܝܵܐ ܕܡܪܲܚܡܲܢܬܵܗ̇،،،
ܫܬܹܐܠܝܼ ܒܐܝܼܡܵܡܵܐ ܘܪܲܡܫܵܐ
ܪܒܹܐܠܝܼ ܡܛܹܐܠܝܼ ܚܲܕ̄ ܥܠܲܝܡܵܐ
ܨܲܕܪܵܐ ܕܝܸܡܵܐ ܡܐܲܝܟܼ ܕܒܼܫܵܐ
ܚܕܸܪܝܼ ܒܐܲܪܥܵܐ ܕܐܲܒܼـܕܵܢܵܐ
ܒܝܼ ܦܵܣܘ̇ܥـܝܵܬܼـܝܼ ܫܓܼܝܼܫܵܐ
ܠܵܐ ܚܙܹܐܠܝܼ ܫܠܵܡܵܐ ܘܫܲܝܢܵܐ
ܡܢ̄ ܠܒܵܐ ܐ̄ܟܘܼܡܵܐ ܕܒܲܪܢܵܫܵܐ
ܗܲܪ ܩـܪܵܝܵܐ ܐܵܢܵܐ ܘܐܵܢܵܐ،،،
ܒܟܼܠ ܟܦܲܫܬܵـܐ ܒܟܼܠ ܕܘܼܪܵܫܵܐ
ܐ̄ܚܘܼܢܵܐ ܠܐ̄ܚܘܼܢܵܐ ܣܲـܪܒܼܵـܢܵܐ
ܬܸܦܸـܩܠܝܼ ܒܨܵܨܵܢ̈ܐ ܕܫܸܡܫܵܐ
ܘܒܝܲܡܵܐ ܕܚܘܼܝܵܐ ܥܲܡܛܵܢܵܐ
ܢܘܼܢܝܵܬܼܵـܐ ܚܢܝܼܩܹ̈ܐ ܡܢ̄ ܚܸܫܵܐ
ܡܢ̄ ܓܸܢܣܵܐ ܕܐܵܕܲܡ ܥܲܦܪܵܢܵܐ
ܟܡܵܐ ܕܒܥܹـܐܠܝܼ ܕܡܲܚܕܸܢ ܓܵܐܢܝܼ
ܕܥܸـܪܝܼ ܦܫܝܼܡܵܐ ܒܓ̰ܢܵܢܵܐ،،،
ܠܫܟܘܼܪܵܐ ܕܡܲܢܝܵܚܬـܝܼ ܡܛܹܐܠܝܼ
ܡܢ̄ ܛܲܗܪܵܐ ܘܚܸܡܵܐ ܕܦܘܼܠܚܵܢܵܐ
ܥܲܠ ܓܘܼܕܵܐ ܚܵܨܝܼ ܩܢܝܼܙܠܝܼ
ܢܲܦ̮ܫܝܼ ܢܗܵܝܵܐ ܘܒܸܢܗܵܡܵܐ
ܓܸܢـܝܵܐ ܘܓ̰ܗܝܵܐ ܒܗ̇ـܝ ܫܲܥܬܼܵـܐ
ܒܠܸܠܝܵܐ ܕܩܲܝܛܵܐ ܚܸܡܵܢܵܐ
ܗܲܠ ܕܢܵܚܵܐ ܘܨܲܦܪܵܐ ܚܲܕ̄ܬܼܵܐ
ܓܵܘ ܫܟܲܢܬـܝܼ ܐܝܼܬܼ ܗ̄ܘܵܐ ܚܢܵـܢܵܐ
ܐܝܼܡܵܢ ܕܪܥܸـܫܠܝܼ ܡܼܢ ܫܸܢܬܼܵـܐ
ܚܙܹܐܠܝܼ ܕܲܥـܬܼܝـܕ ܕܸܡܵܢܵܐ،،،
ܡܐܲܝܟܼ ܗܘܲܝܬܵـܐ ܕܐܵܕܲܡ ܚܲܝܵܐ
ܦܸـܫܠܝܼ ܒܸـܪܝܵܐ ܡܢ̄ ܗ̇ـܝ ܓܒܼܝܼܠܬܵـܐ
ܒܡܲܕܪܲܫܬܵـܐ ܕܠܵܐ ܝܘܼܠܦܵـܢܵܐ
ܝ̄ܠܝܼܦܠܝܼ ܕܪܵܫܵܐ ܡܢ̄ ܚܲܝܘܼܬܼܵܐ
ܓܸܚܟܵܐ ܫܝܼܦܠܝܼ ܡܼܢ ܦܵـܬܼـܝܼ
ܕܠܵܐ ܦܵܣܥܸܢ ܥܲܡ ܚܵܕܘܼܬܵܐ
ܡܼܢ ܡܸܫܬܘܼܝܵܬܹ̈ـܐ ܪܚܸܩܠܝܼ
ܚܕܸܪܝܼ ܠܬܵܙܝܼ̈ـܐ ܕܒܪܝܼܬܼܵـܐ
ܒـܪܸܢـܝܵܐ ܩܸܫܝܵـܐ ܠܵܐ ܡܨܹܐܠܝܼ
ܡܨܲܝܬـܝܼ ܡܢ̄ ܣܲܟܼܠܘܼܬܼܵـܐ ܫܦܸܠܬܵܗ̇
ܝ̄ܬـܝܼܒܼܠܝܼ ܓܵܘ ܐܘܼܪܚܵܐ ܢܘܝܼܠܵܐ
ܓܪܝܼܫܵܐ ܦܸـܫܠܝܼ ܡܼܢ ܡܨܲܝܬܼܵـܐ،،،
ܩܵܠܝܼ ܫܸܠܝܵܐ ܒܢܝܼܚܘܼܬܼܵـܐ
ܡܘܼܪܸܡܠܝܼ ܒܟܼܠ ܨܸܦܝܘܼܬܼܵܐ
ܥܲܠ ܚܵܨܝܼ ܕܪܹܐܠܝܼ ܝܘܼܩـܪܵܐ
ܕܟܼܠܲܝܗ̈ܝ ܟܹܐܦ̈ـܐ ܕܓܵܘ ܡܕܝܼܢ̄ܬܼܵـܐ
ܡܼܢ ܪܹܫܵܐ ܕܗ̇ܘ ܦܘܼܠܚܵܢܵܐ
ܠܵܐ ܫܩܸܠܠܝܼ ܚܕܵܐ ܚܵܩܘܼܬܼܵܐ
ܐܲܚܟ̰ܝܼ ܚܲܕ̄ ܡܸܢܕܝܼ ܙܥـܘܼܪܵܐ
ܡܼܢ ܐܲܓܼܪܝܼ ܒܒܵܨܘܼܪܘܼܬܼܵܐ
ܡܛܠ ܠܵܐ ܝ̄ـܘܸܢ ܛܝܼܡܵܢܵܐ
ܐܲܦ ܐܸܢ ܢܲܦܠܸܢ ܓܵܘ ܗܲܘܬܼܵܐ
ܫܒܼܘܼܩ ܛܲܡܪܵܐ ܒܲـܪܢܵܫܘܼܬܼܝܼ
ܒܥܘܼܡܩܵܐ ܕܐܲܪܥܵـܐ ܡܛܲܡܪܲܢܬܵܗ̇،،،
ܒܵܬ̄ܪ ܥܸܨܝܘܼܬܼܵܐ ܘܢܸܣܝܘ̇ܢܵܐ
ܐܲܢܸـܢـܩܵـܝܵܐ ܝ̄ܠܹܗ ܡܲܘܬܵܐ
ܚܘܼܒܵܐ ܪܵܒܵܐ ܦܝܼܚܵܐ ܝ̄ܠܹܗ
ܡܢ̄ ܒܲـܪܢܵܫܵܐ ܕܠܲܝܬܠܹܗ ܦܝܵܫܬܵـܐ
ܓܵܘ ܢܘܼܪܵܐ ܠܲܚܡܹܗ ܝ̄ـܩܝܼܕܼܵܐ
ܘܒـܕܲܥـܬܹܗ ܚܵܨܸܕ ܠܚܸܦܸܪܬܵـܐ
ܟܡܵܐ ܕܡܵܚܹܐ ܪܘ̇ܦ̮ܫܬܵـܐ ܘܡܵܪܵܐ
ܟـܟ̰ـܚܹܗ ܠܲܝܬܠܹܗ ܡܛܲܝܡܵܢܬܵـܐ
ܗܵܕܟܼܵܐ ܩـܪܹܐܠܲܢ ܓܵܘ ܟܬܼܵܒܼ̈ـܐ
ܢܘܼܩـܙ̈ܐ ܕܗ̇ܘ ܩܵܢܘܼܢ ܚܲܕ̄ܬܼܵܐ
ܫܒܼܘܼܩ ܕܕܵܥܸـܪ ܗ̇ܘ ܒܲـܪܢܵܫܵܐ
ܠܥـܘܼܒܵܐ ܕܐܲܪܥܵـܐ ܥܲܦـܪܲܢܬܵܗ̇،،،
ܓܵܘ ܬܹܒܹܝܠ ܕܠܲܝܬܼܒܵܗ̇ ܩܘܼܫܬܵـܐ
ܕܥܸܟܼܠܹܗ ܫܪܵܓܼܵܐ ܢܘܼܗܪܵܢܵܐ
ܓܵܘ ܫܒܼܝܼܠܵܐ ܕܚܸܫܟܵـܐ ܦܬܸܠܠܝܼ
ܒܝܼ ܐܿܣܵܠܿܩܬܵـܐ ܘܨܠܲܝܬܵـܐ ܕܒܹܗ̄ܢܵܐ
ܟܡܵܐ ܩܛܝܼܥܠܝܼ ܡܼܢ ܚܲܝܘܼܬܝܼ
ܢܸܫܡܵܐ ܕܪܘ̇ܚܵܐ ܒܟܼܠ ܥـܕܵܢܵܐ
ܚܫܸܒܼܠܝܼ ܕܡܵܛܸܢ ܠܚܲܕ̄ ܕܲܥـܬܝܼـܕ
ܠܚܲܝܘܼܬܝܼ ܡܲܢܝܸـܚܵܢܵܐ،،،
ܐܝܼܢܵܐ ܡܛܹܐܠܝܼ ܠܚܲܕ̄ ܢܝܼܫܵܐ
ܩܵܐ ܢܲܦ̮ܫܝܼ ܡܲܡܪܝܼܥܿـܝܵـܢܵܐ
ܗܵܕܟܵܐ ܝܕܝܼܥܿܠܝܼ ܘܒܘܼܪܡܹܐܠܝܼ
ܘܵܠܝܼܬܵـܐ ܠܕܵܐܗܵܐ ܓܵܐܢܵܐ
ܟܡܵܐ ܕܗܵܘܝܵܗ̇ ܦܣܵܥܵـܐ ܠܥܲـܦـܪܵܐ
ܕܦܲـܪܝܵـܗ̇ ܫܩܘܼܠܬܵـܐ ܕܣܵܛܵܢܵܐ
ܐܲܓܼܪܵܐ ܦـܪܹܐܠܹܗ ܒܲـܪܢܵܫܵܐ
ܡܬܵܢܲܚܝܵܬܼܵـܐ ܕܐܘܼܠܨܵܢܵܐ،،،
ܡܼܢ ܣܦܝܼܣـܘܼܬܼܵܐ ܕܠܫܵܢܵܐ
ܒܲـܪܢܵܫܵܐ ܠܵܐ ܡܝܲܩـܪܸܢܹܗ
ܓܵܘ ܫܠܵܡܵܐ ܕܒܵܛܝܼܠܘܼܬܼܵܐ
ܐܝܼܕܼܝܼ ܠܲܡܨܸܢ ܦܲܫܛܸـܢܹܗ
ܒܒܵܪ̈ܣܲـܡـܝܵܬܼܵـܐ ܕܘܼܓܠܵܢܹ̈ܐ
ܓܵܘ ܦܵܬܹܗ ܒܓܵܚܟܸـܢ ܡܢܹܗ
ܒـܪ̈ܝܼܢܹـܐ ܕܓܵܘ ܨܲܕܪܹܗ ܡܲܫܚܸܢ
ܘܪܘܼܡܚܝܼ ܒܚܵܨܹܗ ܒܚܲܪܙܸܢܹـܗ،،،
ܒܢܝܼܚܘܼܬܼܵܐ ܓܲܪܫܸܢ ܐܲܩܠܝܼ
ܕܪܲܚܩܸܢ ܘܥܲـܪܩܸܢ ܡܼܢ ܫܠܵܡܵܐ
ܕܠܵܐ ܫܵܡܥܸܢ ܫܲܦܝܼـܪ ܡܲܡܠܵܐ
ܠܵܐ ܕܟܵܗܢܵܐ ܘܠܵܐ ܕܐܵܡܘ̇ܡܵܐ
ܒܛܸܫܘܵܐ ܓܲܢܒܸܢܵܗ̇ ܓܵܐܢܝܼ
ܕܠܵܐ ܗܵܘܸܢ ܡܛܲܝܒܼܵܐ ܬܵܡܵܐ
ܒܕܸܫܝܵܬܹ̈ـܐ ܬܲܪ̈ܩܠܵܢܹܐ
ܦܵܣܥܸܢ ܒܵܬ̄ܪ ܚܘܼܘܵܐ ܐ̄ܟܘܼܡܵܐ،،،
ܒܲܝܢܵܬܼ ܗܲܝܟܠܹ̈ܐ ܕܒܝܼܫܘܼܬܼܵܐ
ܒـܪܹܐܠܝܼ ܕܚܵܙܸܢ ܢܸܣـܝܘ̇ܢܵܐ
ܗܘܹܐܠܝܼ ܒܚܲܝܠܵܐ ܕܬܕܡܘܼܪܬܵܐ
ܓܪܝܼܟܼܵـܐ ܬܚܘܼܬ ܓܸܫـܪܵܐ ܕܙܲܒܼܢܵـܐ
ܪܥܵܫܬـܝܼ ܛܥܸـܢܵܗ̇ ܢܟܼܝܼܠܘܼܬܼܵܐ
ܩܛܸܠܠܝܼ ܠܫܪܵܪܵܐ ܕܪܸܥـܝܵـܢܵܐ
ܬܗܘ̇ܡܵܐ ܕܗܲܘܢܝܼ ܣـܦܝܼܩܘܼܬܼܵܐ
ܚܪܝܼܟܼܵܐ(ܚܪܝܼܚܵܐ) ܒܲܝܢܵܬܼ ܐܲܬܘܼܢܵܐ
ܬܚܘܼܬ ܝܵܨܝܼܠܹ̈ܐ ܕܦܲܢܕܘܼܬܼܵܐ
ܦـܪܵܡܵܐ ܠܙܲܕܝܼܩܵܐ ܘܟܹܐܢܵܐ
ܓܵܘ ܬܹܒܹܝܠ ܕܠܵܚܘ̇ܫܘܼܬܼܵܐ
ܡܛܘܼܠܸܩܠܝܼ ܠܣܸܦـܪܵܐ ܘܩܸܢܵܐ،،،
ܥܲܒܼܕܝܼܫܘ̇ܥ ܣܲܗ̄ܕܐ ܐܲܠܒܝܼܠܵܬܝـܼ
