مسااااااااء الخير وروووود
شلونكم؟
تسلموون جميعاً لكل الأماني الحلوة
الف الف مبرووووووك وصولك بالسلامة لأميركا اخ مغامر وكل التوفيق الك بحياتك الجديدة
الف الف الف مبروووووووووووك اخ صهيب واخيرررراً توصلون بالسلامة وتشوفون كل الخير
اعذروني آني مكَدرت افوت رأساً انشغلت انو اطلع اوراقي وهالأشياء ومشغولة هسه انو انتقل لولاية ثانية لغرض الدراسة
اخ صهيب الخطوط التركية ممتازة، رحلة عمان لاسطنبول رح تكون جيدة الخطوط بس من اسطنبول لأميركا رح تكون السيرفس والاهتمام روعة وتخفف عنكم طول الرحلة
احب اكَوللكم بالنسبة للأغراض اللي تاخذوها سمعت من الناس ويايه بالرحلة انو مثلاً شاحن التلفون ممنوع بالجنطة اللي ويانه او الميك اب ممنوع ينشال وتندمو مجابو شاحن بس آني مجان احد كَايللي هيجي وجنت جايبه كل شي اريده بجنطة الكتف ومحد حجى واستفاديت من الشاحن بالطيارة من اسطنبول لنويورك شحنت التلفون من ال port مال يو اس بي بس سوائل ممنوع وجنت ماخذه جيل معقم بعلب مو اكثر من 100 مل العلبة بس اخذت اكثر من علبة.. اللي اريد اكَوله انو عادي حتى محد سأل على الفلوس شكد شايله ويايه ولا أبداً
الساعه 12 الا شويه بالليل خابرني موظف الـ IOM من المطار يسألني وين آني هوايه متأخرة!، كَلتله بالورقة كاتبيلي 1 اكون بالمطار.. المهم وصلت هناك 12 ونص وخلصنا بسرعة فلا تخافون تلحكَون الإجراءات تنحصر بتوزين الجنط واخذ التكتس
طبعاً رحلتي جانت الفجر يوم 16.. وصلنا بعد 3 ساعات تقريباً لمطار اتاتورك باسطنبول، وهناك شفنا موظف لبناني ويه مجموعة جايين من سوريا وطالعين لكندا وجانو متبهذلين كلش خطيه لأنو مطارات سوريا مسدودة وجانت رحلتهم طويلة ومتعبة اكثر من عدنا
كملنا كل شي والترانسيت جان 6 ساعات هوايه ناس نامو عالكراسي مو بس من عدنا لكن هوايه ناس بالمطار اللي تعبانين نايمين عالكراسي بانتظار رحلاتهم
الملابس المريحة والأحذية المريحة كلش مهمة وهسه خصوصا بدا البرد فحضرو اشياء تدفي
شكراً لأم دودو عالنصيحة بالنسبة للمخدة مالت الركَبة اللي على شكل حرف U اخذت وحدة ويايه (اذا ما تعرفون منين وحدة من الاماكن اللي تبيع هالمخدة كارفور للي بالأردن.. ما اعرف بالعراق اكيد اكو اماكن تبيعها)
لأنو الرحلة الثانية طويلة كلش جانت 12 ساعة تقريباً وتتوجع الركَبة بالنوم وحيكون نوم هوايه بالطيارة..
رحلة اسطنبول - نويورك جانت مرتبة ويعتنون بالراكب
وصلت لنويورك القريب المغرب واستقبلنا موظف الـ IOM واخذنا لغرفة لكينا بيها موظف IOM ثاني ومجموعة مهاجرين وموظفين اميركيين ياخذون معلوماتهم بس احنا مسألتنا غير.. واخذو معلوماتناالموظفين الثنين وبقينا هناك آني والعائلة اللي جانت ويايه بس جنا كيسين
وطلعنا سوولنا الكارت الأبيض وودوني للفندق بباص جانو بي ناس عراقيين شفتهم صباح السفر بالـ IOM ووزعولنا اكل والساعة 5 الفجر اخذونا آني وعائلة من العوائل النازلة بالفندق للمطار القريب من الفندق جان ويانه ولد من المغرب العربي حباب كلش ويحجي عربي طبعاً وكمللنا الإجراءات وشحنو جنطنا وطلعت وراها برحلة إلى فيلادلفيا ورأساً طيارة من فيلادلفيا لوجهتي النهائية واستلمت جنطي لمن وصلت
وهذا مختصر الرحلة واتمنى للكل السفر القريب ورحلة ممتعة ويوصلون بالسلامة
