هلو كروبي العزيز
رح احاول انزل معلومات عن ولاية بنسلفينيا بس حسب الي اني شفته ،،،
نجي بالبدايه للطقس هنا الطقس متقلب دائما يعني يوم تمطر يوم شمس يوم رياح بس تقريبا مرتين بالاسبوع او مره تمطر ومرات قليله تصير رطوبه بالجو قبل لتمطر بس بعد المطر يصير الجو ربيعي حلو ودرجة الحراره متباينه بين 25 الى 30 درجه هذا الحجي كوله بالصيف اما بالشته فبعدني ممجربته هنا بس يكولون ثلوج وبارده حيل ويكولون تنزل درجة الحراره 7 تحت الصفر مرات.
بالنسبه للايجارات كلما تبتعد عن المدن كلما يكون الايجار ارخص يعني المدن مثل فلاديلفيا وبتسبرغ وهاريس برغ الايجارات بيها شويه اغلى من الضواحي يعني ارخص شقه بالمدن غرفة نوم وحده ب680 دولار بينما بالضواحي بيت حلو ومرتب وحجمه مناسب تكدر تحصله ب 550 دولار ومن اكول ضاحيه يعني مو عبالكم بيوت من طين وماكو شي بيها لااااااا بالعكس حلوه ومرتبه وهادئه وبيها اسواق وجيم واماكن ترفيهيه ومستوصفات ومدارس وكلشي ما عدا البنايات العاليه والزحمه بالشوارع.
بالنسبه للامان دائما المدن تكثر بيها الجريمه وهذا الشي عموما بكل امريكا يعني الضواحي امان اكثر يعني هاريس برغ الي اني ساكنه بيها شويه بيها نسبة جريمه بس الجرائم هنا اغلب الاحيان تصير بين تجار المخدرات مو ويه الناس العاديين احنه قبل فتره بالعماره الي ساكنين بيها ثنين تعاركو علمود المخدرات متفقو عالسعر ضربه طلقه برجله واجتي شرطه واسعاف وانخبصنه ..مختصر مفيد اذا انت مسالم وكاعد ابيتك ومعليك بالرايح والجاي محد عليه بيك ومدينة فلاديلفيا ومدينه بتسبرغ نفس الحاله بس هوايه اماكن ابنسلفينيا امينه وحلوه مثل لوك هيفن حلوه ورخيصه وامنه .
بالنسبه لسكان بنسلفينيا يكولون البيض اكثر بس اني شفت هوايه مناطق بيها نفس النسبه يعني السود بكد البيض وعموما كلهم طيبين السود والبيض بس السود شقايجيه اكثر والبيض ودودين بس رسميين حيل.
بالنسبه للاسواق والاسعار بنسلفينيا عموما ارخص من هوايه ولايات بالخظروات والفواكه والالبان وحتى المعدات الميكانيكيه لان الزراعه عدهم عمل اساسي وخوصا اكو اقوام اسمهم الاميش هذوله ناس ميعترفون بالتطور وميختلطون بالناس الي مو مثلهم على كد الشغل وبس بس همه مسالمين يعني من الفجر يكعدون يزرعون ويهتمون بحيواناتهم وحتى معروفين بالنجاره فهذوله يزودون الاسواق دائما بمحاصيلهم وحتى مرات اذا تفتر بالسياره تلكاهم على الطريق وعارضين خظرواتهم وهمه شكلهم مميز يعني لبسهم قديم ،،،،،، وبالنسبه للاسواق اكو هوايه بس اكو اسواق اسمها برايس رايت هايه ارخص اسواق موجوده هنا واكو الول مارت و الجاينت والدولار شوب بس اغلى شويه من البرايس رايت وطبعا فروع هايه الاسواق موجوده بكل الاماكن،،،،، ومحلات الملابس مو هوايه يعني اكو بس مو هوايه بس اكو محلات اسمها فاملي ستور موجوده بكل مكان يبيعون ملابس مستعمله واكو ملابس ممستعمله بس راح موسمها وتكون ارخص هوايه من الجديد
اما بالنسبه للمساعدات فهنا المساعدات تمتد من 4 اشهر الى6 وهي عباره عن فود ستامب احنه بالنسبه النه عائله 3 نفرات انطونه بالفود ستامب 600 دولار وكالو من نشتغل يكطعون نصه وانطونه 300 دولار كالو هايه للملابس ويعني غير سوالف وهنا اكو هوايه كنائس تساعد المحتاجين من ناحية ملابس حتى اكو كنائس بس تنطيهم 30 دولار ينطوك مسواك بقيمة 60 دولار وطبعا المديكل كير يستمر 8 اشهر والطفل يستمر لعمر ال18.
اما من ناحية الشغل فبنسلفينيا معروفه انو هيه احسن الولايات بفرص العمل لاحتوائها على مصانع الحديد ومصانع الاغذيه وشركات السيارات ومعامل الالبان وخصوصا الي عدهم لغه انكليزيه جيده يكيفون عليه لان يحتاجون مترجمين هوايه للغه العربيه بالمستشفيات خصوصا .
وبالنسبه للمستشفيات بنسلفينيا بيها احسن المستشفيات بامريكا وهوايه بحيث وين متروح تشوف مركز متخصص بامراض معينه الله يبعدنه.
والمدارس ايضا متوفره وبكثره وهمه يتصلون بالاهالي ويبلغوهم بموعد الدوام والدراسه اكثر شي على الكومبيوتر .
واما من ناحية جمال طبيعه فامريكا كولها حلوه وخضار وين متنطي وجهك ودائما بكل المدن يكون الداون تاون احلى شي.
وشكرا واتمنى وصلت المعلومات الي تريدوها ويارب الموفقيه الك اخويه كوستاف واذا اجيت لبنسلفينيا انطيني خبر .
واي سؤال اني حاظره
