السلام عليكم
حبيت اشارك بالموضوع جميلا وعرفانا مني بمواقف هذا الانسان النبيل , الاخ دبس وراشي خير مثال وخير نموذج على الانسان العراقي صاحب القلب الطيب الذي يحب مساعدة الاخرين دائما ويضحي براحته في سبيل راحة الاخرين دائما , بوركتم اخي الكريم وبارك الله فيكم وعجل من سفركم ان شاء الله
وهذه بعض من الابيات الشعرية مهداة الى هذا الصديق العزيز الذي لم تراه اعيينا ولم تتكحل اعيينا برؤيته الى الان
الاصدقاء
مو كلمن فتحلك باب يهواك ... ولا كلمن يكرهك بابة ينسد
أكو مسدود بابة وكَلبة مفتوح ... وكو مفتوح بابة كَلبة اسود
اذا طشيت صحبانك على الماي ... اثكلهم وفة الجواك يركد
وخففهم يظل طافح على الراك ... يروح وية الجزر ويرجعك مد
اذا محتار سافر تعرف الناس ... منو يزت القطار ويوكف ازيد
أكو تشدة بحبل ويكطعة ويروح ... وكو بكلمة شرف ع سجة ينشد
وكو بمشية قطارك عينة تحتار ... وبلحظة الأخيرة وياك يصعد
وكو يشي المحظة ويلقطارات ... ويدكهة علكَلبة وصدرة ينسد
فرق بين اليعبدك بلمحطات ... وفرق بين البناك بكَلبة معبد
لا تامن بشر من طينة مخلوق ... بس 14 طينة محمد
مو كلمن ضحكلك منة ترتاح ... ترة ناب الضبع كل ضحكة ينحد
ولا تحقد على كلمن يبجيك ... اذا دمعك طفح صدكني تبرد
البشر دمة ويفور بداخلة الظيم ... اذا يطفح دمع نيرانة تخمد
ولا تحقد على الصعدو بلا جناح ... معروف الصكر لو جنحة ينشد
ومو كلمن نزل يسمى مذلول ... ولا كلمن صعد يسمى امجد
أكو صاعد رغم ما هوة علكاع ... وكو نازل يضل لو قمة يصعد
راسك من تصب اعلى من اليدين ... بس آمن السهل تتناوشة اليد
اذا عندك جبل خلهم يصعدون ... فرق بين الصعد والراد يصعد
اكو يهدة الجبل لو هد الجفوف ... وكو يهد الجبل لو جفة ينهد
وعلى المبرد كفر تنغر السيوف ... لان سف ع سيف بكلبة ينحد
وذا عنهم رحل كلهم يخسرون ... نشو نفع السيوف بلية مبرد
مايرحل جذب مو خاف يعمون ... ويضل السف تالي بكصبة ينصد
اذا تعزف لحن ويذلك السان ... لا تكطع كمانك صعبة ينشد
مرات اللحن مايطرب الناس ... ومرات البشر اذاناتة تنسد
ومرات اللحن تطبلة طرشان ... بس طبع اليسمعك زور يشهد
على البلبل يكلك منكر الصوت ... وذا ينهج حمارة يصيح غرد
اذا حجيك حكم وتخاطب الناس ... كل انسان على كدة وياك ينشد
لان روس البشر عكس الفراغات ... كلمات تنترس تستوعب ازيد
وذا تحجي ويرد صوتك كما كان ... يعني اليستمع فارغ مجرد
صوتك مايردة الراسة متروس ... لان بس بلفراغ الصوت يرتد
وذا ضيمك كبر لا تحجي بلعيب ... وتشوف الدنيا كلهة بلون اسود
منو بهذا الوكت ما غيرة الضيم ... حتى بيوم الاحد ماكو احد
لاكن لا تضل تحسب توابيت ... انا كبلك علي صب اسود العد
أرفعت راسي وكمت احسب بلعراس ... على خشم السوادب الابيض امتد
ولو غثني الطفل من شفتة بلعيد ... يشل بجروح ثوبة ودمعة علخد
بس انة افرحت جي جتة الاطفال ... ومسح كل الدموع وراح عيد
علمنة الطفل يصبر على الظيم ... وطلع منة الطفل ايمانة أزيد
أريد اطرح قضية وأنتو أسلام ... وريد اسئل جمعكم وطلب الرد
بنيتو شكد معابد كلهة علكاع ... منو البيكم بنالة بكَلبة معبد
ماكولن كفر لو قلت ايمان ... لاكن مهزلة ومائلهة أحد
لتلاثة الملاهي مفتحة بليل ... وبلعشرة الجوامع كلهة تنسد
وهذا رابط الفديو لهذه القصيدة مهدة الى الاخ العزيز دبس وراشي
https://www.youtube.com/watch?v=UIHiCeZZg_cأخوك جار الانتظار
