السلام عليكم ..بارك الله بيك اخوية ايكو يا وردة هذا من طيب اخلاقك
وابو مريم ميقصر اخ عزيز وكريم وميقصر والله دائما
عساكم دوم بخير وربي يحفظكم
..عندي سؤال اذا عندكم خبرة بالموضوع ياريت تنوروني
تعرفون الي ينتظر الفيزا يظل محتار ليكدر يبيع ولا يشتري ولا ياجر !!
فهسة احنة مكملين كولشي والمنظمة اتصلت بالكفيل ووقع اوراقنا وكلة الكيس ووركر مالتنا انه احنة قاطعين شوط كبير بالامنية وقريبا رح يجوون ..وهذا الحجي قبل 15 يوم تقريبا..الي اريد اعرفه انه حاليا عدنة ضرف جدا صعب ومنكدر نبقى بالبيت ورح نظطر نبيع غراضنا لان باعتبار مبقالنا شي منكرد ناجر بعد واكو ضروف متخلينا نبقى بالبيت ورح نتحملهة يم الاهل ..لكن عدنة تخوف اخاف نتاخر اكثر ..يعني على ضوء هذه المعلومات الي ذكرتهة شكد تتوقعون وتصير ايشود
ياريت الي عنده خبرة او سامع بهيجي شي لان خايفة نتبهذل اذا شهر نتحمله بس اخاف اكثر
وتسلمولي يا طيبين ربي يحفظكم
اختكم اما اتنا
اختي الكريمة
ربي يحفظكم ويسهل امركم
يعني انتم ليهسه ما اجتكم الفيزة وبعدكم بمرحلة الانتظار ... هذا ما فهمته من خلال سؤالكم الاخير وايضا وزيارتي لصفحتكم الشخصية !!
اختي الغالية وعن تجربة مريرة من ال SIV لا تتصرفون اي تصرف قد تندمون عليه قبل اصدار الفيزة نهائيا ... وعن تجربة شخصية ..
فقد وقعت بنفس المشكلة سابقا مع ال اس اي في وقمت ببيع ممتلكاتي وبيتي وحتى السيارة بعتها بعد المقابلة وحسب كلام الصينية سيئة الصيت القابلتني وابلاغي من قبل الكفيل بتوقيعه على الاوراق بعد استدعائه من قبل المنظمة واذا على ما اذكر كان اسمها وورلد ريليف بولاية كارولينا الشمالية ... هذا الكلام من شهر ال 7 2011 ولغاية 6 2013 ماكو فيزة وخسرت مئات الملايين من الدنانير يشهد الله والمقربين لي هنا من الاعضاء امثال الاخوان ايهم وعراقي هواي يعرفون ذلك بحكم قربهم مني حيث بعت بيتي البنيته بايدي بتراب الفلوس والاثاث والسيارات على اعتبار بعد رايح لامريكا وماكو حاجة ابقي شي وراي ..وهاي صار 3 سنوات تقريبا بعد المقابلة وفيزة ماكو لغاية شهر 6 هاي السنة اجتني الفيزة المشؤومة ولكنها ناقصة احد افراد عائلتي ولكوني بوضع لا احتاج فيزتهم الان فلم ارد عليهم ...
الهدف تلاحكت روحي اخيرا واشتريت بيت اقل من بيتي اللي بعته بسبب فيزتهم وضيعت الكثير من الاموال اللي انا وعائلتي كنا اولى بيها بسبب كذبهم ومراجعتهم الادارية ...
فرجاءا اختي ونصيحة من اخ لاخته العراقية لا تكررون نفس قصتي قد تندمون بعدها على اللي راح ...
لا تستعجلون وتتصرفون باي شي الى ان تخلون الجوازات بايديكم وساعتها تصرفوا باللي يعجبكم لان وداعة عمري الامريكان مو ثقة ابدا وياما نزلوا ناس هنا من الطائرة ورجعوهم ...
ترا تحديد الولاية وتوقيع الكفيل وتحديد المنظمة ابدا مو مقياس لقرب السفر واللي اتمناه لكم باقرب وقت يا رب
انا ما اريد اسودها كلش بس هذا ما يمليه ضميري انبهكم وانتم احرار والله يسهل امركم ...
تحياتي
