السلام عليكم اخواني بالمنتدى الرائع اتمنالكم السفر باسرع وقت ياربي
اول شي احب احيي الاخ دبس وراشي على وكفاته الي متنسي وهوه رجل شهم ولتنسون ان تدعوله ان الله يفرجها عليه وعلى عائلته ويسافر باسرع وقت
واني اسف لان انقطعت عن المنتدى لان كانت اول ايام ملتهي بالمعاملات والحمدلله هسة كملت كل شي وكانت كلها سهلة ومعاملاتهم متعب ابد كل شي سهل اني هسة ساكن بكاليفورنيا سان دييغو الكهون
طبعا المنطقة كلش حلوة والجو بعد احلى كل يوم اروح للمنظمة ينطوني محاضرات عن امريكا وشلون نتعامل ويه الناس وبالمقابلات مال الشغل وهواية شغلات يعلمونه طبعا اني مدخلوني كورسات مال لغة كالو ميحتاج لان اللغة مالتك زينة بس الي ماعنده لغة يدخلوه مدرسة ويتعلم
نجي على المساعدات ينطون كل شهر 317 دولار والفود ستامب 200 دولار وطبعا المديكل هم وهاي كلها تطول 8 شهور وتنقطع بس اذا ملكيت شغل الفود ستامب يمددوه سنة لخ الى ان اشتغل
الشغل هنا تكدر تلكي يعني كاشير بمحل او اي وظيفة بس اغلب العراقيين هنا يدخلون مدارس علمود ينطوهم فلوس يعني ميشتغلون اما كبار السن الي همه اعمارهم اكثر من 65 سنة ينطوهم تقاعد وظمان صحي طول العمر والتقاعد تقريبا 720 دولار لكل شخص وطبعا النقل والمراجعات للكبار بالعمر يكون عن طريق المنظمة هيه توفرلهم سيارات
الايجارات هنا غالية يعني تكدر تحصل شقة غرفتين نوم ب 1000 دولار وطبعا ضروري جدا تشتري سيارة لان تكسيات غالية كلش وماكو بمنطقتي تكسيات لازم نخابر الشركة اني بالنسبة الي بعدني ممشتري سيارة لحد الان دااستعمل الباص والترولي
الباص اكو طريقتين بالدفع اما تدفع 2.25 سنت مرة وحدة تستعمله او تدفع 5 دولارات وتستعملة لمدة 24 ساعة وظل افتر بيه محد يكلك وين رايح لو كوم انزل مواعيد الباص مضبوطة كل نص ساعة يجي والسواق كلش متعاونين والباصات بيها تبريد ونظيفة
الترولي هوه عبارة عن قطار صغير وسريع يوديك ويفرك سان دييغو ب5 دولارات وتكدر تستعمل نفس التكت مال الباص يعني تدفع خمس دولارات وتفتر بالباص والترولي اليوم كله لمدة 24 ساعة واكو اشتراك شهري ب 72 دولار للباص والترولي تستعمل نفس البطاقة طبعا اما كبار السن فعندهم تخفيضات الاشتراك الشهري للكبار او المعاقين هوه 18 دولار يعني شلون فرق كبير والطلاب بلاش طبعا
الاكل والملابس رخيص هنا لحد يجيب ملابس هواية لان حرامات هنا ارخص ونوعية احسن والاكل متوفر يعني اكو اكل عراقي ومطاعم عراقية ومحلات عراقية هواية وشتريد اكو
اتمنى ان مطولت عليكم واذا احد يريد يستفسر عن اي شي اني حاضر
وانشاء الله تفرحونا بيوم سفركم
