شكرا والف شكر الكم اخوتي وخواتي على مشاعركم الطيبة وتهانيكم اللطيفة وعذروني لتاخري عن الرد لانه تمرضت مرضة من هاي الزينة جوهم ايخبل يوم صيف يوم شته ومن وراهه تمرضت
طبعا اكو اشياء نسيت اذكرهة بالموضوع الحباية اخذناهة من سليمانية والوزن كان جنطة وحدة ام 20 كيلو والجنطة الصغيرة ام 7 كيلوات , بس اني جنت حاطة بحدود 22-23 ومحد حجة وتندمت كلت لو حاطة اكثر
ومن ورة الرحلة كرهت فد شي اسمه طيارة عبالك تاته مو طيارة بس طيارة المحيط الي من فرانكفورت لنيو ورك جانت مريحة .. هسة احجيلكم على فرجينيا الي شفته بيهة مساحاتهة واسعة كلش يعني لازم سيارة الناس اشكال والوان بيهة سود وهسباك وبيض بس كلهم ناس طيبين وخدومين ومن تسالهم حتى تندل فد مكان معين مايهدوك الا تندل بالضبط هنا لكل شي حاسبيله حساب بادق التفاصيل عدنا بالعراق نسميهة تفاهات بس هنا لا كلشي اله حساب حتى الزبالة لازم نفرزهة كل شي بوحد لتسهيل عملية اعادة التدوير للمواد ويدورون راحة المواطن الى ابعد الحدود بس الي شفته الحياة هنا لازم تشتغل حتى تعيش واذا تعبت نفسك اكثر تعيش عيشة زينه بالنسبة للشغل زوجي قدم بعده اماكن وننتظر والله كريم بالرغم من ان المنظمة لحد الان كلشي ما مسويتلنه لا فود ستامب ولا فحص طبي ولا سوشيال من ورة العطل والكيس وركر مالتنه فاهية بس احنا رحنا قدمنا على السوشيال وكالوا ورة شهر تقريبا يطلع ودانقره بالكتاب مال تعلم السياقة علمود من يطلع السوشيال نكون جاهزين لاختبار السياقة هنا الاكل كلش غالي مو مثل ما جنت اسمع الاكل رخيص يمكن جيف دانصرف على حسابنا هيجي نشوف
وحتى اللبس هم مو رخيص يعني الاشياء الزينة غالية بس اكو هدوم سلابات يكونون رخاص وهاي تعتمد كل شخص ونظام اكله ولبسهة .. الجهال قبل يومين جتي الكيس وركر مالتهم وملينا كومة اوراق علمود تسجيلهم بالمدرسة وانصدمنا من كالو آمنه ما تدخل مدرسة لان عمرهة 5 سنوات الا شهرين لازم ننتظر لشهر التاسع الجاي وبهيجي مراح اكدر اقدم على شغل
تحياتي الكم جميعا
عمدة فرجينيا
