السلام عليكم
وبعد عناء طويل ها نحن نخطو خطواتنا الاولى في ارض الاحلام ...
متمنية وداعية الرب ان يرزق الجميع بهذه الفرحة ...
وحابه اتكلم معاكم بالعاميه وانقل لكم تفاصيل رحلتي الى امريكا
كان يوم السفر هو الاثنين المصادف 10-2-2014 وموعد التجمع في ساحة عباس بن فرناس هو الساعه الخامسة عصراً
وبعد توديع باقي الاهل والاصدقاء اتصلنه بالشخص الي متواعدين وياه انه يوصلنه للمطار ... وحضر وخلينه حقائب السفر واتوجهنه لساحة عباس بن فرناس ... و وصلنه والحمد لله الساعه 4 .
بعدها حضر موظف المنظمه ( الاخ وسام ) بارك الله فيه ... وفعلا لا ينفع الا ان يكون شخص مقرب للاخ دبس وراشي . يعني بصراحه اني حسيت بأخلاق وذوق دبس وراشي من هالشخص المتعاون مع الجميع وبسلاسه توصيل الفكرة للشخص المقابيل .
ذكر اسمائنه وانطانه ورقه لكل شخص والي هيه يسوها التكت الالكتروني ... وتوجهنه للمطار بسيارات كبيره نوع شوفرليت وهيه خاصة بالمطار وتابعه لوزارة النقل والمواصلات. بعد 3 نقاط تفتيش ( بهذله ... بس ميخالف بس خلي نخلص ) وراها وصلنه لصالة بابل ... واستقبلنه ( عامل خدمة ) وخله حقائبنه بالعربانه ومشه بسرعه واحنه وراه ... داخل القاعه صار التفتيش فقط سكنرات ... و وصلنه صالة السوق الحره بعد الساعه 7 .
مطار بغداد ... حلو ... لكن قديم !! الخدمات بيه مقارنه بغيره للأسف ... مو شي . خدمة الانترنيت كانت موجوده بمطار بغداد بس جدا ضعيفه الخدمه. وتم النداء للتوجه للبوابه الخاصه برحلتنه قريب الساعه 9 وتوجهنه ودخلنه وبعد ما اكتمل العدد صعدنه الطياره ... طبعا على الخطوط الملكية الاردنية. المضيفات والكادر جداً ذوق واخلاق.
واقلعت بنا الطياره بالضبط الساعه 10 ليلاً.
تم تقديم وجبة طعام شهيه مكونة من شوربة صدر دجاج مع الخضروات و ماء و سلطة بزاليا و ذرة وقطعة موس كيك صغيره وعصير برتقال.
كملنه الاكل وراها ظلينه نبحوش بالشاشه الي موجوده مقابيلنه وضيعنه الوقت و وصلنه والحمد لله لعمان الساعه 12 ليلاً تقريباً.
بعد ما وصلنه لمطار عمان استقبلنه موظف الاي أو أم اللي هو لابس الجاكيت الازرق اللون وعليه رمز المنظمه. وبعدها بدء بتعدادنه وكل شخص بينا وقع كمبيالة تسديد مبلغ تكتات الرحله. وبعدها توجهنه لطابور التكتات لرحلة نيويورك ... والحمد لله اخذنه التكت... وبعدها على طابور امن المطار ... اجرائات روتينه وبعدها توجهنه لفندق خاص بمطار عمان .
الفندق حلو ومرتب ( لكن ) لا توجد خدمة انترنيت مجانية وفية ساعة الانترنيت بقيمة 8 دولار !!
ثانيا كلنه نعرف الفنادق بيها ( ثلاجه ) على الاقل يكون بيها ماء ... لكن مال ثلاجة فارغه واصلا طافيه ... هايه مشايفتها اني ههههههههه . عادي اقتصادهم ضعيف عمان ادري بس يعني اتكيت مع اجانب !!
وراها تقريبا دخلنه غرفنه الساعه 2 بالليل يادوب نعمل رفريش واننام وبين النوم من التعب وبين القلق اصبحت نومتنه مستحيله. طبعا حاليا واني دا اكتب الكم من الفندق ... يعني بعدني مواصله ... حاليا الساعه 5:42 صباحاً ومنتظرين وجبة الافطار وبعدها التوجه الى المطار لان رحلتنه الساعه 9:45 صباحاً ... يعني بعد 4 ساعات المفروض نطير ان شاء الله ... اكتبلكم بعدين من اوصل .
قضينه ليله مرعبه في فندق مطار عمان ... بسبب مخاوف تأخرنا واقلاع الطيارة بدوننا ... فمرتاحينه ابد ولا كدرنه انام ساعه زمان ... المهم الصبح فطرنه وانتظرنه يجي الباص الي ينقلنه للمطار واجه وسلمنه مفاتيح غرفنه وصعدنه الباص وتوجهنه ... مطار عمان حلو .. كبير ... لكن قيد التطوير لا زال ... المهم تفتيش دقيق ومجزع وخاصة الشباب وبعدها تقريبا الساعه 11 صباحاً اقلعت الطياره الي هيه على خطوط الملكية الاردنيه ايضاَ !!
وبدأت رحلتنه مع العذاب ... الطياره جدا جدا جدا جدا جدا غير مريحه ... الستاف والمضيفات كلوش اوكي لكن المقاعد غير مريحه و 13 ساعه ابداً مو قليله ... لا والحلو انه مشينه ويه النهار ... يعني اقلعت الطياره الساعه 11 الصبح وصلنه اميركا الساعه 4:20 دقيقه العصر !!! لان صار اختلاف الوقت ... تعذبنه بالطياره انام عشر دقايق نكعد نلكه جسمنه يون علينه وما اعرف ليش ... الناس الي ويانه النسبه الاغلبيه ناس مرتبه ... لكن اكو ناس !!
مثلا مثلا ... من الحيره وما اعرف شلون اخلص الوقت و ولا دا اكدر انام خليت الهيدفون واسمع اغاني اضيع وقت وامنع نفسي من التفكير والقلق ... واني كاعده الكرسي الي ورايه ولد صغير تقريبا عمره 10 سنين سحب من اذني الهيدفون وانداريت عليه جان يكولي ليش تسمعين اغاني تره تروحين للنار ... اني استغربت من كلامه كمت انداريت الكه امه خازرتني !! كتله حبيبي هاي منو علمك هيج ؟ وخزرتها واتمنيتها ترد عليه بوكتها ... اذا انتي الاغاني هيجي سويتي عليها لعد حياة الاميركان شراح تسوين بتصرفاتهم وانفتاحهم ؟ لو انتو هيج طبعكم اروح اكعد يم ...... واكابلهم واكعد ... الدين مو بالاكراه يا ناس ... وكان تكدر فعلا تقنعني اطفي الاغاني لكن لو بغير طريقه ... مو بهيج تخلف !! بس حرامات ما ردت عليه وانسد الموضوع بس اني ما اكعد راحه كلساع اباوع عليها واخزرها . من صدك احترك دمي .
ع العموم الرحله كان يتخللها وجبتين طعام وسناكس شي مرتين وزعو ... والحمد لله وصلنه مطار نيويورك بعد ساعات غير مريحه ومليئه بالضغوطات .
واحنه دنطلع من الطياره اجانه هوه بارد صدمني بصراحه لان شغله ثواني حسيت البروده اخترقت ملابسنه.
واستقبلونه موظفين المطار وقامو بأجرائات الاستقبال من صور وبصمات واستلام ( علاكة المنظمه ) .
وبعد تقريبا 4 ساعات خلصت الاجرئات واجانه باص ورحنه للفندق استعداد لطيارة يوم غد لكاليفورنيا ان شاء الله
امريكا حلوه ... احترام وتقدير للبشر ... نظافه ... بشر ... مطار نيويورك بعظمته الناس تطب وتطلع بدون تفتيش ... مو يجي مطار بغداد 4 نقاط تفتيش بابا اجه قلبه يوكف من وره التفتيش .
تفاصيل اخرى ما عندي ان شاء الله راح ابقى على تواصل وياكم على المستجدات الي راح تقابلنه .
تحياتي وتمنياتي للجميع بالخير وتسهيل امر رب العالمين لكل منتظرين السفر وان يعيشو حياة يستحقوها جنس البشري.
أختكم ملك \ نيويورك
