ܗܘܡܣܐ ܡܚܪܝܐ
ܡܫܘܚܬܐ- ܙ
ܓܵܘ ܒܲܝܬܵܐ ܕܢܸܫܹ̈ܐ ܓܵܘ ܩܲܨܪܵܐ ܪܵܡܵܐ ܒܲܡܕܝܼܢ̄ܬܵܐ ܥܡܝܼܪܵܐ
ܕܡܝܼܟ̣ܵܐ ܥܲܠ ܡܸܣܛܲܒܬ̣ܵܐ ܓܵܘ ܚܘܼܫܵܒܹ̈ܐ ܘܗܸ̈ܪܓܹܐ ܥܲܡܘܼܩܹ̈ܐ ܛܡܝܼܪܵܐ
ܫܘܼ̈ܐܵܠܝܼ ܒܲܪ ܡܵܢܝܼ ܗ̄ܘܹܝܢ ܐܵܢܵܐ؟ ܚܹܐܪܵܐ ܗ̄ܘܹܝܢ ܝܲܢ ܐܲܣܝܼܪܵܐ؟
ܦܲܓ̣ܪܝܼ ܫܸܢܝܵܐ ܘܫܦܝܼܠܵܐ ܪܸܦܝܵܐ ܘܫܸܠܝܵܐ ܐܲܝܟ̣ ܢܲܗܪܵܐ ܨܡܝܼܪܵܐ
ܫܸܢܬ̣ܝܼ ܝܲܩܘܼܪܬܵܐ ܘܚܸܠܡܝܼ ܩܲܠܘܼܠܵܐ ܦܪܵܚܵܐ ܐܲܝܟ̣ ܛܲܪܦܵܐ ܢܬ̣ܝܼܪܵܐ
ܒܨܲܦܪܵܐ ܦܬܝܼܚܠܝܼ ܠܥܲܝܢ̈ܝܼ ܪܓ̣ܸܫܠܝܼ ܒܲܫܚܘܼܢܬܵܐ ܕܫܸܡܫܵܐ ܘܙܲܗܪܝܼܪܵܐ
ܓܵܘ ܚܸܡܵܐ ܕܩܲܝܛܵܐ ܒܥܸܕܵܢܵܐ ܕܛܲܗܪܵܐ ܐܲܝܟ̣ ܐܲܬܘܼܢܵܐ ܕܢܘܼܪܵܐ ܫܓ̣̄ܝܼܪܵܐ
ܬܲܪܒܵܐ ܕܡܘܿܚܝܼ ܩܸܫܝܵܐ ܐܲܝܟ̣ ܫܥܘܿܬ̣ܵܐ ܪܟܝܼܟ̣ܵܐ ܫܚܝܼܢܵܐ ܘܦܫܝܼܪܵܐ
ܠܸܒܝܼ ܚܪܝܼܟ̣ܵܐ ܩܝܼܕܵܐ ܘܨܸܗܝܵܐ ܠܡ̈ܝܼܵܐ ܘܬܲܠܓܵܐ ܩܲܪܝܼܪܵܐ
ܒܠܲܝ̈ܠܘܵܬ̣ܵܐ ܚܸܫܟܵܐ ܥܲܡܛܵܢܵܐ ܡܓܲܫܘܼܩܹܐ ܒܚܸܙܘܵܐ ܕܲܫܡܲܝܵܐ ܫܲܦܝܼܪܵܐ
ܐܘܼܪܚܵܐ ܕܬܲܒܵܢܵܐ ܒܲܗܪܵܢܬܵܐ ܘܟܵܘܟ̣ܒ̣ܹ̈ܐ ܕܠܵܐ ܡܸܢܝܵܢܵܐ ܘܣܲܗܪܵܐ ܓܡܝܼܪܵܐ
ܠܲܝܬ̣ ܕܡܵܨܹܐ ܕܲܡܦܵܫܸܩ ܠܐ̄ܪܵܙܵܐ ܕܲܟܝܵܢܵܐ ܠܵܐ ܐܵܦ ܟܲܠܕܼܵܝܵܐ ܒܚܝܼܪܵܐ
ܒܸܙܕܵܥܝܵܐ ܕܲܡܒܲܩܪܸܢ ܐܲܝܟܵܐ ܝܠܹܗ ܐܲܠܵܗܵܐ ܕܠܵܐ ܗܵܘܹܝܢ ܒܬܵܘܕܝܼܬ̣ܝܼ ܟܦܝܼܪܵܐ
ܚܲܝܵܐ ܓܵܘ ܫܡܲܝܵܐ؟ ܝܵܢ ܡܝܼܬ̣ܵܐ ܥܲܠ ܐܲܪܥܵܐ ܐܲܝܟ̣ ܨܲܠܡܵܐ ܢܩܝܼܪܵܐ؟
ܡ̣ܢ ܪܸܚܩܵܐ ܒܸܫܡܵܥ̄ܝܵܐ ܩܵܠܵܐ ܕܙܸܡܪܵܐ ܕܫܲܗܪܵܢܵܐ ܒܡܲܫܬܘܼܬ̣ܵܐ ܫܗܝܼܪܵܐ
ܩܵܠܵܐ ܕܩܸܪܕܸܚܬܵܐ ܕܟܵܣܹ̈ܐ ܘܡܵܐܢܹ̈ܐ ܕܲܫܬܵܝܬܵܐ ܘܠܝܼܢܵܐ ܬܒ̣ܝܼܪܵܐ
ܒܸܚܙܵܝܵܐ ܗ̄ܘܹܝܢ ܐܝܼ̈ܕܵܬ̣ܵܐ ܪܓܵܕܵܐ ܡ̣ܢ ܚܲܝܠܵܐ ܕܚܲܡܪܵܐ ܥܲܬܝܼܩܵܐ ܬܛܝܼܪܵܐ
ܫܲܟ̣ܪܵܐ ܡܲܫܢܘܼܝܹܐ ܠܦܲܓ̣ܪܵܐ ܕܒܲܪܢܵܫܵܐ ܡܚܝܼܠܵܐ ܐܲܝܟ̣ ܣܲܡܵܐ ܡܲܪܝܼܪܵܐ
ܘܪܘܵܝܵܐ ܒܚܘܼܒܵܐ ܕܪܵܩܲܕܼܬܵܐ ܙܲܠܝܼܠܬܵܐ ܒܸܩܛܵܠܵܐ ܚܲܫܵܐ ܕܠܸܒܵܐ ܟܡܝܼܪܵܐ
ܢܫܵܡܵܐ ܗ̄ܘܹܝܢ ܪܹܝܚܵܐ ܕܚܲܡܪܵܐ ܕܥܸܢܒ̣ܹ̈ܐ ܐ̄ܟܘܼܡܹ̈ܐ ܕܟܲܪܡܵܐ ܥܨܝܼܪܵܐ
ܘܪܹܝܚܵܐ ܗܲܢܝܼܐܵܐ ܘܒܲܣܝܼܡܵܐ ܕܒܸܣܪܵܐ ܢܵܝܵܐ ܕܥܸܓ̣ܠܵܐ ܢܚܝܼܪܵܐ
ܡܛܘܼܝܵܐ ܥܲܠ ܓܘܼܡܖܹ̈ܐ ܕܫܸܚܪܵܐ ܘܚܸܡܬ̣ܵܐ ܕܢܘܼܪܵܐ ܢܲܓܝܼܪܵܐ
ܠܵܝܫܵܐ ܕܩܲܡܚܵܐ ܕܚܸܛܹ̈ܐ ܚܡܝܼܥܵܐ ܘܓܸܒܝܵܐ ܡ̣ܢ ܚܲܝܠܵܐ ܕܲܚܡܝܼܪܵܐ
ܝܵܦܵܝܵܐ ܒܹܐܦܵܝܵܐ ܠܲܚܡܵܐ ܕܲܓܪܝܼܨܬܵܐ ܒܬܲܢܘܼܪܵܐ ܓܵܘ ܐܲܪܥܑܵܐ ܚܦܝܼܪܵܐ
ܩܵܐ ܟܲܪܣܵܐ ܟܦܝܼܢܬܵܐ ܠܲܝܬ ܦܘܼܪܫܘܼܢܝܵܐ ܠܲܚܡܵܐ ܚܡܝܼܥܵܐ ܝܵܢ ܦܲܛܝܼܪܵܐ
ܥܲܒ̣ܕܵܐ ܡܸܣܟܹܝܢܵܐ ܥܒ̣ܵܕܵܐ ܬܸܫܡܸܫܬܵܐ ܠܲܝܬ ܠܹܗ ܦܘܼܪܥܵܢܵܐ ܝܼܠܹܗ ܐܲܓܝܼܪܵܐ
ܙܸܕܩܹܗ ܡܬܘܼܚܸܒܵܐ ܒܢܵܡܘܼܣܵܐ ܥܪܝܼܒ̣ܵܐ ܡܗܲܝܡܢܵܐ ܠܡܵܪܹܗ ܥܲܬܝܼܪܵܐ
ܡܫܘܼܥܒܕܼܵܐ ܬܚܘܼܬ ܫܘܼܠܛܵܢܵܐ ܘܩܵܢܘܼܢܵܐ ܕܠܵܐ ܒܨܸܒ̣ܝܵܢܹܗ ܦܠܵܚܵܐ ܒܲܩܛܝܼܪܵܐ
ܝܸܡܝܼ ܫܗܝܼܪܬܵܐ ܡܬܲܢܘܼܝܹܐ ܠܗܘܼܡܵܣܵܐ ܕܓܸܠܓܵܡܸܫ ܡܲܠܟܵܐ ܢܲܚܫܝܼܪܵܐ
ܒܘܼܬ ܚܲܝܹ̈ܐ ܘܡܵܘܬ̣ܵܐ ܘܲܡܬ̣ܘܼܡܵܝܘܼܬ̣ܵܐ ܕܓܲܢ̄ܒܵܖܹ̈ܐ ܕܐܵܫܘܼܪ ܒܙܲܒ̣ܢܵܐ ܥܒ̣ܝܼܪܵܐ
ܒܘܼܕ ܢܵܕܹܢ ܒܪܘܼܢܵܐ ܣܲܟ̣ܠܵܐ ܘܡܲܬ̣ܠܹ̈ܐ ܕܚܲܟܝܼܡܵܐ ܐܵܚܘܿܢܵܐ ܚܩܝܼܪܵܐ
ܐܵܚܘܼܢ̈ܘܵܬ̣ܝܼ ܒܫܸ̈ܢܹܐ ܕܝܲܠܘܼܕܵܐ ܘܛܲܠܝܵܐ ܘܫܲܒ̣ܪܵܐ ܘܲܥܠܲܝܡܵܐ ܟܲܫܝܼܪܵܐ
ܒܓܵܘܢܹ̈ܐ ܦܪܝܼܫܹ̈ܐ ܚܘܵܖܹ̈ܐ ܘܣܡܘܿܩܹܵܐ ܘܚܲܕ̄ܟ̈ܡܵܐ ܐ̄ܟܘܼܡܹ̈ܐ ܐܲܝܟ̣ ܩܝܼܪܵܐ
ܟܠܲܢ ܡ̣ܢ ܚܲܕ̄ ܐܲܒ̣ܵܐ ܘܓܵܘ ܫܸܖ̈ܝܵܢܲܝܢ ܘܘܲܖ̈ܝܼܕܲܝܢ ܒܸܚܕܵܪܵܐ ܕܸܡܹܗ ܝܲܩܝܼܪܵܐ
ܚܲܬ̈ܘܵܬ̣ܝܼ ܟܵܘܣܲܝ̈ܗܝ ܝܲܪܝܼܟ̣ܵܐ ܓܕܝܼܠܵܐ ܨܘܼܨܝܼܬ̣ܵܐ ܐܲܝܟ̣ ܚܲܒ̣ܠܵܐ ܙܩܝܼܪܵܐ
ܒܨܸܒ̈ܥܵܬ̣ܲܝܗܝ ܥܸ̈ܙܩܵܬ̣ܵܐ ܕܣܹܐܡܵܐ ܘܕܲܗܒ̣ܵܐ ܡܬܘܼܪܨܹܐ ܒܝܲܕ ܩܝܼܢܵܝܵܐ ܡܗܝܼܪܵܐ
ܥܲܠ ܩܕܵܠܲܝܗ̈ܝ ܚܘܼܡܖܹ̈ܐ ܘܒܐܝܼܕܵܬܲܝܗ̈ܝ ܩܘܼܠܒܹ̈ܐ ܡܛܲܥ̈ܡܹܐ ܒܟܹܐܦܵܐ ܕܫܲܡܝܼܪܵܐ
ܡܲܠܟ̈ܝܵܬ̣ܵܐ ܐܲܝܟ̣ ܡܲܠܲܐܟ̣̈ܝܵܬ̣ܵܐ ܐܲܣ̈ܝܼܪܹܐ ܕܚܘܼܒܵܐ ܕܡܲܠܟܵܐ ܫܘܼܦܪܲܝ̈ܗܝ ܬܗܝܼܪܵܐ
ܐܲܪܡ̈ܠܝܵܬ̣ܵܐ ܕܡܲܠܟܹ̈ܐ ܥܢ̈ܝܼܕܹܐ ܣܝܼܒ̣ܹ̈ܐ ܘܟܵܘܣܲܝܗܝ ܐܲܝܟ̣ ܬܲܠܓܵܐ ܚܘܝܼܪܵܐ
ܝܸ̈ܡܵܬ̣ܵܐ ܟܠ ܚܕܼܵܐ ܡܲܩܪܘܿܒ̣ܹܐ ܠܒܪܘܿܢܵܗ̇ ܒܘܼܟ̣ܪܵܐ ܐܲܝܟ̣ ܩܸܒܠܵܐ ܢܕܝܼܪܵܐ
ܩܵܐ ܐܵܫܘܼܪ ܐܲܠܵܗܵܐ ܕܲܩܪܵܒ̣ܵܐ ܘܡܵܪܵܐ ܘܡܲܠܟܵܐ ܕܲܫܢܵܐ ܘܕܸܒ̣ܚܵܐ ܒܲܪܝܼܪܵܐ
ܚܲܕ̄ ܒܲܠܚܘܼܕ ܒܸܕ ܗܵܘܹܐ ܡܓܘܼܒܝܵܐ ܘܲܠܟܘܼܪܣܝܵܐ ܕܡܲܠܟܵܐ ܢܛܝܼܪܵܐ
ܡܵܘܬܒ̣ܵܐ ܥܸܠܝܵܐ ܕܲܟܢܘܼܫܝܵܐ ܕܐܲܠܵܗܹ̈ܐ ܕܲܒ̣ܫܡܲܝܵܐ ܗܲܠܵܐ ܠܹܐ ܝܠܹܗ ܩܛܝܼܪܵܐ
ܟܪܝܼܟ̣ܵܐ ܗ̄ܘܹܝܢ ܒܩܸܢܛܵܐ ܐܲܡܝܼܢܵܝܵܐ ܐܲܠܝܼܨܵܐ ܕܗܵܘܹܝܢ ܠܚܲܝ̈ܝܼ ܙܗܝܼܪܵܐ
ܠܲܝܬ ܫܒ̣ܘܼܩ ܡ̣ܢ ܝܸܡܝܼ ܒܹܝܬ̣ ܓܵܘܣܝܼ ܡܥܲܕܪܵܢܵܐ ܘܚܲܒ̣ܪܵܐ ܫܲܪܝܼܪܵܐ
ܟ̣ܵܡܝܼܣ ܓܝܼܘܲܪܓܝܼܣ
