موعد سفر وشلون اكدر اخذ فلوسي ارجو المساعدة

[الشاطر حسن]

اخواني الاعزاء ..
اجاني موعد سفر بعد انتظار دام تقريبا  اربع سنوات .. تقديم 2010
بصراحة عندي مبلغ حوالي 100 الف دولار واريد اعرف اذا اكدر ادخلة بدون تصريح يعني اضمة بالجنط لان حسب علمي اذا اكللهم عندي هيج مبلغ مراح احصل اي مساعدات والمبلغ بصراحة مال بيع قطعة ارض الي هية كل ما املك .. هل هذا ممكن ؟ الرجاء الافادة ولكم جزيل الشكر

[طالب لجواء الى امريكا]

الف الف مبروووووووووووك على موعد سفرك ......اخي خلي فلوسك بجيبك ومحد يكلك طلع فلوسك من جيبك خليها سكتة ما عليك شي

[um shaheen]

اخي العزيز
اذا كنت سنكل رح تنكشف لان المبلغ مو مال ينضم
الشغله الثانيه من الخطوره انك تحطهم بجنط الشحن لان اذا راحو متكدر تحجي
نصيحه اخويه حطهم بالبنك اكو بنوك بالعراق اذا حطيت الفلوس بيها تكدر تسحبها من امريكا  وسوي فيزه كارد وتكدر تسحبهم هنا بامريكا بكل سهوله ولو رح تصير بيهم تكلفه بس أأمن شغله جيب وياك اذا سنكل 10 الاف  واذا عائله تكدر توزع فد 20 الف على العائله الكريمه
والف مليون مبروووك وبكل خطوه مليون سلامه وتنووووور كل امريكا
 تحياتي
اختك ام شاهين

[slam hawk]

الف الف مبروووووووووووووووووووووووووووووك مثل ما كالت الاخت العززة ام شاهين ودعهم بنك احسن واسحبهم

[3ausha]

ليش متحوله عن طريق مكتب لواحد ثقه هسه اني ناويه احول فلوسي لاخويه و نصيحه لتخلي الفلوس بجنط الشحن خليهم بجنطك البيديك
و انشاء الله توصل بالسلامه
ياريت تنطينه تفاصيل ملفك لان اني هم نفسك تقديم 2010 بس صارلي 3شهور عله التجييك الامني و دانتظر
تحياتي

[احباب الرووح]

السلام عليكم مبروك السفر وتوصل بسلامة...

حبيبي ليش اتعب نفسك ترى اذا لزموك بالمطار تروح افلوسك..ولا تخلي بالجنطة فلوس.

بس انت اخذ ويا كل شخص الة حق 10000$ وتكدر اتطلع فد ثلث المبلع والثلثين الثاني ايداع بنك وانا اعرف شخص مودع افلوس في بنك اسمة بنك ببلوس مقابل مستشفى دار النجاة هذا تودع بيه واطلع ماستر كارد وتبقى تسحب مناك احسن الك واضمن..

نصيحة لا تاخذ وياك افلوس اكثر من الحد المطلوب لان اكو ناس راحت افلوسهم بالمطار فأنت اتبع القانون احسن الك واستر وراسك بارد عيوني..

توصل بالسلامة تحياتي لك.

[الشاطر حسن]

احبائي شكرا على مروركم والاجابة وبارك الله بيكم على النصيحة  .. المشكلة احنا اشخاص اثنين فقط وما عندي احد اهنا باقي ..
اريد اعرف شنو يصير اذا عرفو بالمطار اهناك اني شايل مبلغ اكثر من الي مصرح بي وشنو قصدكم تروح الفلوس ؟ يعني تصادر لو شنو ؟

[um shaheen]

اخي العزيز
اذا حطيت المبلغ بجنط الشحن فأحتمال وارد جدا انه تتمزق الجنطه او حتى تنفقد زين اذا كلتلهم اني حاط بيها كذا مبلغ رح يسالؤلك انت مبلغ عن هذا الشي وانت لاجيء
الشغله الثانيه اذا حطيتها بحقيبه اليد وبالمطار لزموك مباشرة رح تنقطع عنك المساعدات
رأي الشخصي ونصيحه من اخت
يوجد في العراق بنوك تعملك الفيززه كارد وتستطيع بكل سهوله تستعملها هنا بامريكا
انت في بداية مشوراك جيب وياك المبلغ المحدد ومعه المساعدات تساعدك خاصه ببداية الطريق طبعا الى ان تتعرف على قوانين البلد وكيفيه انشاء عمل به تاخذ فتره ليست بقليله برأي اقل شي سنه الى سنتين
اوصل بخير وسلامه وعندك مبلغ يسندك بالبدايه وتستلم مساعدات المقرره لك واذا احتجت مبلغ اضافي فتستطيع بكل سهوله من السحب من الماكنه
طبعا القرار بالاول والاخير هو ألك بس اعتبرها نصيحه من اخت وانت فكر بكلامي
تحياتي
اختك ام شاهين

[سبيس]

اخي العزيز مبروك عليك السفر

سؤال ماذا تفعل بالمبلغ شراء بيت مثلا

اذا كان شراء بيت او استثمار فهذا يأثر على مساعداتك بالتأكيد حتى وان اخفيت المبلغ في مغادرتك

فعليك اخذ معك ما مسموح به والباقي ايداعه في المصرف مثل ما قالت اختنا ام شاهين

ابو الوليد

[الشاطر حسن]

شكرا جزيلا للاخت ام شاهين وللجميع على اسداء النصيحة والجواب ادعو من الله التوفيق للجميع .
اني عندب ATM كارد من احد المصارف راح اتاكد انه اكدر اسحب من عندة اذا احتاجيت بعدين من امريكا.سلامي يا أحبة

[أبو توفي]

السلام عليكم ورحمة الله وبركاته


نصيحتي لك ان تعمل لك فيوة كارت وضع المبلغ كامل بها وخذها معك الى أميركا من فروع البنك التجاري العراقي بحيث البنوك العالمية نسنطيع ان تستخدمها هناك وأتصل بالكفيل واستفسر منه اي البنوك التي تتعامل مع الفيزة كارت هذه ئأمن طريقة للحفاظ على المال





          أخوك أبو توفي

[abed basem]

الأخ العزيز
بالنسبة الى العائلة أو السنكل,أكثر ميلغ مسموح هو 10000$,وأكثر من هذا المبلغ يجب التصريح به وبخلافه ولا سامح الله سيعتبرونه جنحة,ولاكن تستطيع أدخال أي مبلغ الى أمريكا بشرط ان تصرح به,وأتصور بهذه الحالة سوف تؤثر على المساعدات
وهذا الرابط يوضح ذلك
وأنا مع فكرة الأخت أم شاهين
https://help.cbp.gov/app/answers/detail/a_id/195/kw/money%20allowence

تحياتي بالموفقية

[abuali1919]

اعمل كارت فيزا كارت مثلا بمصرف بغداد واخذ الكارت وياك

[THE SENATOR]

عزيزي تكدر ترتبهن بس لتخليهم بالجنط .. همه مراح يفتشون اصلا بس مجرد استماره وبيها اسئله ومن ضمن الاسئله جايب وياك اكثر من دفتر راح اتكول لا .. مسئله عاديه

[الصبر الجـميل]

الف مبروك أخي السفر وسلامة الوصول أنشاء الله
وحول المبلغ
نصيحة أخوية أن لاتفكر أطلاقا ً بموضوع أن تضع المبلغ
في حقائب السفر لأنها غاية في الخطورة على المبلغ
نصيحه لله مثل ماتتفضلت الأخت أم شاهين
هناك مصرف حكومي هوالمصرف العراقي يقع الفرع
الرئيسي في الحارثية ـ آخر شارع الكندي ولا أعرف الفروع
الأخرى , تقوم بفتح حساب الفيزة كارد وبالدولار وتضع فيه المبلغ
الذي تريد وتستلم الكارت بعد أسبوع أو أسبوعين وتستطيع
بهذا الكارت أن تسحب المبلغ في امريكا وهو طريقة مضمونه
وسليمة .
                        أبو روان

[keeto]

اخي العزيز
 اذا جبت المبلغ وياك وانمسكت بي راح تعتبر جريمه تهريب أموال وعدم اخبارك عنها  مصيبه ثانيه  يعني اول متوصل اتريد تنحط في موقف لاتحسد عليه
لان هاي الفلوس هنا في أمريكا ايخافون منها لتروح تمويل  الى شغلات انت تعرفه والمبلغ الي اتجيبه وياك 10000 عشرة الاف دولار وياك مو اكثر
  
                     مع تحياتي
                     keeto

[alzandawi]

أبد لتخليه بالجنطه إذا راحت الجنطه تروح الفلوس تره  حوله لاحد ثقه ومن توصل تأخذه افضل طريقه هايه

[الصبر الجـميل]

ألفت أنتباه اخي الكريم أن نصيحتي التي قلتها لك هي ماحدث لشخص قريب لي جداً
أخذ معه مبلغ من المال بهذه الطريقة ( الفيزا كارد ) وأبقى مبلغاً آخر لدينا حيث  قمت أنا
 شخصياً بأيداعه في حسابه بعد سفره وبعد حاجته اليه و على دفعات أصبحت تحت تصرفه
, وكما رأيت يستخدمها الكثير من التجار وأصحاب الأموال هنا في العراق .
                                                             أبــــــــــــــــــــو روان 

[hardihardi]

انت واحد بطرااااااااااااااااااااااااان
مابقت اي مشكلة بس .................................
يبين لاعليك لاتهديد ولا خوف
خوب اشتريلك اقامة من دولة الاردن الصجراوية
يطون اقامات 33 الف دينار اردني
تقريبا 48 الف دولار

[al-bayati]

اخواني الاعزاء ..
اجاني موعد سفر بعد انتظار دام تقريبا  اربع سنوات .. تقديم 2010
بصراحة عندي مبلغ حوالي 100 الف دولار واريد اعرف اذا اكدر ادخلة بدون تصريح يعني اضمة بالجنط لان حسب علمي اذا اكللهم عندي هيج مبلغ مراح احصل اي مساعدات والمبلغ بصراحة مال بيع قطعة ارض الي هية كل ما املك .. هل هذا ممكن ؟ الرجاء الافادة ولكم جزيل الشكر

السلام عليكم

اذا كانت سفرتك الى ولاية ميشيغان راسلني على الخاص وراح افهمك شلون ادخلها لفلوسك بطريقة سهله عن طريق تحويل


تحياتي لك