ܗܘܡܣܐ ܡܚܪܝܐ
ܡܫܘܚܬܐ ܚ
ܒܡܲܕܢܵܚܵܐ ܕܨܲܦܪܵܐ ܩܵܠܵܐ ܕܩܲܪܢܵܐ ܘܲܕܫܝܼܦܘܿܪܵܐ ܡܚܹܐ ܠܹܗ ܪܵܡܵܐ
ܐܲܝܟ̣ ܪܲܥܡܵܐ ܕܫܵܥܸܫ ܠܛܘܼܖܹ̈ܐ ܘܐܲܝܟ̣ ܐܲܪܝܵܐ ܒܥܵܒ̣ܵܐ ܢܗܵܡܵܐ
ܚܲܝܠܵܢܵܐ ܘܪܗܝܼܒ̣ܵܐ ܪܲܒܵܐ ܘܦܪܝܼܫܵܐ ܘܠܲܝܬ ܗ̄ܘܵܐ ܠܹܗ ܦܘܼܚܵܡܵܐ
ܣܸܠ̄ܩܠܹܗ ܒܪܵܐ ܩܵܠܵܐ ܒܲܡܪܵܘܡܵܐ ܕܲܫܡܲܝܵܐ ܕܠܲܝܬ ܠܹܗ ܬܘܼܚܵܡܵܐ
ܢܚܸܬ̣ܠܹܗ ܠܐܲܪܥܵܐ ܘܲܠܥܘܼܡܩܵܐ ܕܲܫܝܘܿܠ ܘܠܲܬ̣ܗܘܿܡܵܐ ܬܲܚܬܵܝܵܐ ܕܝܵܡܵܐ
ܦܬܝܼܚܠܗ̄ܘܼܢ ܬܲܖ̈ܥܹܐ ܥܒ̣ܝܼܪܠܗ̄ܘܼܢ ܡܙܲܝܢܹ̈ܐ ܕܠܵܐ ܫܩܲܠܬܵܐ ܕܲܫܠܵܡܵܐ
ܡܲܩܘܘܿܚܹ̈ܐ ܪܥܘܼܫ̈ܘܼ ܩܘܼܡ̈ܘܼ ܕܡܝܼܟ̣ܹ̈ܐ ܒܫܸܢܬ̣ܵܐ ܕܢܸܚܠܹܗ ܐܝܼܡܵܡܵܐ
ܣܲܝܦܲܝܗ̈ܝ ܚܲܪܝܼܦܹ̈ܐ ܡ̣ܢ ܚܸܠܬ̣ܲܝ̈ܗܝ ܓܖ̈ܝܼܫܹܐ ܨܪܵܚܵܐ ܘܒܸܓܙܵܡܵܐ
ܐܲܝܟ̣ ܕܐܸܢ ܒܝܵܘܡܵܐ ܐ̄ܚܲܪܵܝܵܐ ܘܚܲܝܹ̈ܐ ܡܛܐܹ ܠܗ̄ܘܼܢ ܠܫܘܼܠܵܡܵܐ
ܐܲܝܟ̣ ܩܕܲܡ ܕܝܲܢܬܵܐ ܪܲܒܬ̣ܵܐ ܕܐܵܫܘܿܪ ܓܵܘ ܝܵܘܡܵܐ ܕܢܘܼܚܵܡܵܐ
ܝܵܐ ܪܲܒ ܚܸܙܘܵܐ ܝܠܹܗ ܫܲܪܝܼܪܵܐ ܝܵܢ ܚܸܠܡܵܐ ܗ̄ܘܹܝܢ ܒܸܚܠܵܡܵܐ؟
ܐܸܓܲܪܬܵܐ ܥܲܠ ܠܘܿܚܵܐ ܕܛܝܼܢܵܐ ܦܝܼܫܠܵܗ̇ ܩܪܝܼܬ̣ܵܐ ܦܸܬ̣ܓ̣ܵܡܵܐ ܒܦܸܬ̣ܓ̣ܵܡܵܐ
ܣܸܦ̈ܘܵܬ̣ܵܐ ܕܩܵܪܘܼܝܵܐ ܒܸܫܥܵܫܵܐ ܥܲܡ ܙܵܘܥܹ̈ܐ ܕܗܘܼܓܵܝܵܐ ܘܡܸ̈ܠܹܐ ܒܸܪܬ̣ܵܡܵܐ
ܠܲܥܙܹܗ ܐܵܫܘܿܪܵܝܵܐ ܦܫܝܼܩܵܐ ܘܦܫܝܼܛܵܐ ܡܸܬܕܲܪܟܵܢܵܐ ܕܠܵܐ ܬܘܼܪܓܵܡܵܐ
ܒܲܕܡܘܼܬ̣ܵܐ ܟܲܗܢܵܐ ܒܗܲܝܟܠܵܐ ܕܐܵܫܘܿܪ ܕܸܩܢܹܗ ܝܲܪܝܼܟ̣ܵܐ ܚܘܵܪܵܐ ܘܐܘܼܟܵܡܵܐ
ܐܝܼܢܵܐ ܠܲܝܬ̣ ܚܕܵܐ ܐܵܬ̣ܵܐ ܡܲܚܙܘܼܝܹܐ ܕܝܼܠܹܗ ܒܲܟܢܘܼܫܝܵܐ ܕܟܲܗܢܹ̈ܐ ܗܲܕܵܡܵܐ
ܝܵܐ ܪܲܒ ܦܘܼܩܕܵܢܵܐ ܝܠܹܗ ܡ̣ܢ ܡܲܠܟܘܼܬ̣ܵܐ ܝܵܢ ܠܘܼܚܵܫܵܐ ܕܚܲܣܵܡܵܐ؟
ܡܲܡܠܠܵܐ ܕܲܓܵܠܵܐ ܣܵܟ̣ ܠܲܝܬ̣ ܒܹܗ ܫܪܵܪܵܐ ܠܹܐ ܝܠܹܗ ܒܸܠܚܵܡܵܐ
ܟܲܗܢܵܐ ܙܹܐܦܵܢܵܐ ܝܠܹܗ ܘܕܲܓܵܠܵܐ ܘܛܲܡܐܵܐ ܘܡܸܠܝܵܐ ܫܘܼܚܵܡܵܐ
ܓܵܘ ܥܲܝ̈ܢܹܗ ܒܸܚܙܵܝܵܐ ܗ̄ܘܹܝܢ ܒܝܼܫܬܵܐ ܘܪܹܝܚܵܐ ܕܢܸܟ̣ܠܵܐ ܒܸܢܫܵܡܵܐ
ܐ̄ܡܝܼܪ ܠܹܗ ܙܘܼܗܵܪܵܐ ܝܠܹܗ ܐܝܼܬ̣ ܫܠܲܡܬܵܐ ܝܵܢ ܣܲܝܦܵܐ ܘܦܪܵܡܵܐ
ܡܵܢܝ ܝܼܠܹܗ ܕܸܩܠܲܬ̣ ܒܪܘܼܢܵܐ ܕܐܝܼܢܵܢܵܐ؟ ܫܒ̣ܘܼܩ ܦܵܣܸܥ ܠܲܩܵܕ̄ܡܵܐ
ܝܸܡܝܼ ܫܓ̣ܝܼܫܬܵܐ ܡܲܢܬ̣ܘܿܖܹ̈ܐ ܕܸܡܥܹ̈ܐ ܒܟ̣ܵܝܵܐ ܥܲܠ ܦܲܐܬ̣ܵܗ̇ ܒܸܠܛܵܡܵܐ
ܩܒܵܠܵܐ ܒܵܥܘܼܬ̣ܵܐ ܩܵܐ ܐܲܠܵܗܵܐ ܘܘܲܥܕܵܐ ܒܲܨܠܘܿܬ̣ܵܐ ܘܨܝܵܡܵܐ
ܕܥܵܒ̣ܸܕ ܦܘܼܪܩܵܢܵܐ ܘܲܡܦܲܨܹܐ ܠܚܲܒܝܼܒ̣ܵܗ̇ ܡ̣ܢ ܐܝܼܕܼܵܐ ܕܠܝܼܛܵܐ ܚܲܪܵܡܵܐ
ܝܒ̣ܝܼܫܠܝܼ ܒܫܵܘܦܝܼ ܟܠ ܡܸܢܕܝܼ ܩܕܲܡ ܥܲܝ̈ܢܝܼ ܡܫܘܿܪܹܐ ܠܹܗ ܟܝܵܡܵܐ
ܡܘܼܕܝܼ ܥܲܒ̣ܕܸܢ ܠܲܝܬ ܠܝܼ ܚܲܪܒܵܐ ܘܚܸܪܦܵܐ ܘܠܵܐ ܢܸܣܝܵܢܵܐ ܒܢܘܼܩܵܡܵܐ؟
ܡܘܼܕܝܼ ܡܓܵܒܹܝܢ ܚܲܝܹ̈ܐ ܒܥܲܒ̣ܕܘܼܬ̣ܵܐ ܝܵܢ ܡܘܿܬ̣ܵܐ ܒܚܸܩܪܵܐ ܘܪܘܼܡܪܵܡܵܐ؟
ܣܲܒ̣ܪܝܼ ܒܐܲܠܵܗܵܐ ܘܐܘܼܪܚܵܐ ܕܦܘܼܪܩܵܢܵܐ ܓܵܘ ܡܘܼܚܝܼ ܒܣܘܼܪܗܵܒ̣ܵܐ ܪܫܵܡܵܐ
ܒܚܲܝܠܵܐ ܕܲܥܠܲܝܡܘܼܬ̣ܝܼ ܥܪܝܼܩܠܝܼ ܠܲܩܵܕ̄ܡܵܐ ܘܥܲܝܢ̈ܝܼ ܥܲܠ ܣܲܝܦܵܐ ܣܝܵܡܵܐ
ܐܲܝܟ̣ ܩܪܲܒ̣ܬ̣ܵܢܵܐ ܨܦܝܼܚܠܝܼ ܠܚܲܕ̄ ܡ̣ܢ ܒܥܸ̈ܠܕܒ̣ܵܒ̣ܝܼ ܒܲܠܒ̣ܝܼܒ̣ܘܼܬ̣ܵܐ ܕܠܵܐ ܙܠܵܡܵܐ
ܐܲܝܟ̣ ܟܘܼܬܵܫܵܐ ܕܓܸܠܓܵܡܸܫ ܥܲܡ ܚܲܡܒܵܒܵܐ ܕܠܵܐ ܪܲܚܡܹ̈ܐ ܘܠܵܐ ܪܘܼܚܵܡܵܐ
ܨܲܕܪܵܐ ܒܨܲܕܪܵܐ ܕܠܵܐ ܟܠܵܝܬ̣ܵܐ ܘܠܲܝܬ̣ ܫܠܲܡܬܵܐ ܗܲܠ ܙܵܟ̣ܘܼܬ̣ܵܐ ܘܚܘܼܬܵܡܵܐ
ܢܦܝܼܠ ܠܹܗ ܬܚܘܼܬ ܐܲܩ̈ܠܝܼ ܦܲܠܓܹܗ ܡܝܼܬ̣ܵܐ ܝܕܝܼܥܠܝܼ ܕܠܲܝܬ ܠܹܗ ܩܘܼܝܵܡܵܐ
ܕܥܝܼܣܠܝܼ ܠܣܲܝܦܹܗ ܣܡܝܼܡܵܐ ܓܵܘ ܠܸܒܹܗ ܕܠܵܐ ܗܵܘܹܐ ܠܹܗ ܣܘܼܡܣܵܡܵܐ
ܐܸܢ ܓܘܼܢܚܵܐ ܝܠܹܗ ܘܩܸܛܠܵܐ ܚܸܕܝܵܐ ܗ̄ܘܹܝܢ ܕܩܲܒܠܹܢ ܟܹܐܦܹ̈ܐ ܘܪܓܵܡܵܐ
ܐܸܢ ܓܲܢ̄ܒܵܪܘܼܬ̣ܵܐ ܝܠܵܗ̇ ܫܒ̣ܘܼܩ ܟܵܬ̣ܸܒ̣ ܡܵܚܘܿܪܵܐ ܒܕܝܘܼܬ̣ܵܐ ܘܩܲܠܵܡܵܐ
ܟ̣ܵܡܝܼܣ ܓܝܼܘܲܪܓܝܼܣ
