السلام عليكم
شلونكم اخواني حبيت اكتبلكم ما حدث معي وقصتي يمكن طويلة بس الهدف هو المساعده وارجوا منكم الدعاء
طبعا اني من اجيت لامريكا اجيت عن طريق فيزة سياحية صادرة من بغداد ومن وصلت لامريكا ثقوا ما اعرف بشر بيهه واختاريت هيوستن لان قريت عنها وشفتهه هي الملائمة الي
اول يوم بامريكا وبعد وصوولي بساعات قررت ان انزل للشارع واشوف شكو وشنو اللي يدور حولي واني معتمد كل الاعتماد على الله ومن بعده الفلوس الماخذه ويايه وهي فد شي قليل وكنت حاجز موتيل من بغداد بس الصراحة الاحجز لغوه من وصلت الموتيل كان بمنطقة سيئة جدا وسعر الليلة 45 دولار بدون اي شي لا فطور ولا شي فقط القهوة وصرت امشي على الاقدام مستعين بتلفوني وبالخرايط والحمد لله الكورك اشتغل هناك
بعدها قمت بالبحث عن سكن والبحث عن المناطق الجيدة للعيش في هيوستن
في هيوستن هنالك مناطق جيدة للعيش مثل الجالريا وويست هايمر والميديكال سنتر وغيرها خلي نكول ساوث ويست هيوستن اما الباقي حسب قول العاملين في الفندق تعبانة وبيها مشاكل فوقع اختياري على ويست هايمر وهو شارع يعج بالمطاعم والمقاهي العربية الكثيرة وقريب على الداون تاون وفيه الكثير الكثير من العراقيين
بعدها وبعد معاناة دامت 4 اشهر ولحد الان مع السكن بسبب صعوبة تاجير سكن لاحد ليس لديه اوراق عملت جاهدا بالبحث عن المحامين ورحت اجمع الصحف العربية والبحث في النت وبعد جمع اكثر من راي تبين انه المحامين كلهم ما ينطوك ضمان على قضيتك ولاكن عملهم هو تنظيم الاستمارة وتقديمها واسعارك بموعد البصمة والمقابلة وفي يوم المقابلة تدفع له باقي الاجور ويكلك مع السلامة
فقررت ان اقد بنفسي وبدون محامي بعد ما تحققت من القانون الامريكي حيث يقول بانه بامكانك الاستعانه بمحامي ومترجم
فاول خطوة قمت بها هي فتح حساب في البنك
ثانيا عمل عقد مع شركة att
والسبب لاثبات سكني لان اسمي ليس مدرج في عقد الايجار لاني اسكن مشترك مع احد الاشخاص ورفض اني يخلي اسمي معاه في العقد
المهم بعد ما جتني اول فاتورة هاتف واول كشف حساب رحت للبريد وااجرت صندوق بريد حته يكون عنوان ثابت حتى لو غيرت سكني لعده مرات
المهم قبل التقديم رحت وكعدت مع محامية سورية امريكية شاطرة جدا وكانت الساعة للاستشارة ب 300 دولار وعرضت قصتي الكاتبه وانطتني رؤوس اقلام والتعديلات
المهم عدلته ورحت على مترجم قانوني يعمل مع uscis وترجم الاوراق والمستمسكات وقدمته الحمد لله من يوم التقديم حسبت 10 ايام جاني بريدد والمعاملة راجعه بسبب كلش ضغير وهو نسيت اخلي عنوان البيت بالعراق واكو ورقة تكلك شنو او ليش راجعه
كملت النقص وارسلته بعدها ب 14 يوما وصلتني رسالة موعد بصمات رحت وبصمت وما طولت سوى خمس دقائق
بعدها ب 20 يوم وصلتني رسالة بموعد المقابلة وهسة اني كاعد انتظر
اللي احب اقوله كالاتي
1- هل ممكن اقدم بدون محامي وجوابي نعم
2- هل استطيع الاستعانة بمترجم للترجمة معي والجواب نعم
3- هل هناك مساعدات خلال هاي الفترة من اي منظمة والجواب لا الما يطلع القرار بالقبول بعدين تروح على المنظمة اللي تعجبك وانته واللي جاي من العراق نفس المساعدات
4- هل استطيع العمل خلال هاي الفترة الجواب اي بس بالكاش يعني محدودة جدا
5- هل استطيع اصدار اجازة سوق الجواب نعم لمدة سنه مؤقتة
6- هل استطيع اصدار بطاقة هوية وفتح حساب بالبنك وان اشتري تلفون بالاقساط الجواب نعم
7-هل المحامين يعطوك ضمان الجواب كلا
8- كم يتراوح اسعار المحامي الجواب من 500 دولار لغاية 10000 دولار وكلهم بدون ضمان
9- هل يوجد عرب في هيوستن الجواب هواية هواية
10- هل الاختلاط بالعراقيين والعرب جيد الجواب ما افضل ولو مو كل الاصابع سوه بس اللي شفته اني وبالنسبة اللي احذر
11-شكد يرادلك مصرف بالشهر الجواب اذا كنت كاعد مشترك وية احد ف 800 بالشهر والزم ايدك
12- اسعار ترجمة الاوراق ( الورقق بورقة 100 دولار او حسب الكلمات يعني اني حاسبوني الكلمة بعشرة سنت ) اللي يريد يجي خلي يترجمه ابغداد وتمشي هنا عادي
13 - شلون العيشة بتكساس الجواب جميلة جدا ناس طيبيبن ولحد الان ما شفت اي عنصرية فقط من المكسيكان
14 - هل هناك مشاكل مع ارتداء الحجاب الجواب كلا وهناك الكثير من المحجبات يعملون في الدوائر والمؤسسات
15- واللي حاب يسال بعد اني حاضر واجاوبة
اما نصيحة كلش مهمة سواء بتكساس او باي ولاية وهو العنوان اخواني سوو مثل ما سويت ولا تثق باقرب الناس الك واسف على هاي الكلمة بس ترة العنوان كلش مهم وكذلك احب انصح ان يكون الخروج مشيا على الاقدام قليل لان العلاسة هواية واحب اذكر نصائح المحامين ( لا تختلط بالعراقيين والعرب ابد ) لان ياثرون عليك
تحياتي وادعولي المقابلة تمشي على خير
