انا اريد اشتغل بأمريكا ... اعرف انقش حناء وين ألقى شغل بهذا المجال أرجو المساعد...الف شكر

[Lamyaa alani]

السلام عليكم صار شهرين وصلنا أمريكا
وأريد اشتغل بمجال نقش الحناء
بس ما اعرف وين اشتغل شلون أدور شغل
أرجوكم ساعدوني الله يسهل أمركم

[FIVE-STAR]

تحية و سلام
اتنمى لكم الموفقيه و النجاح، في اي ولايه انتم؟ اعرف ان العراقيين الموجودين في ديترويت يعملون ليله الحنه قبل العرس وبصورة شائعه جدا. فان كنت فى ديترويت ما عليك سوى الذهاب الى اصحاب القاعات و الاستفسار هناك. وبالتوفيق

[Lamyaa alani]

أنا في تكساس
أنا لا اقصد ليلة حنه الأعراس
اني اقصد نقش حنا على الأيدي

[FIVE-STAR]

انى اتنمى ماكون غلطان بس النقش او الرسم على ظهر اليد بالحناء هو المقصود، لانه قبل سنتين كنت فى ديترويت وحضرت ليله الحنه و بعدها الزواج كانو موجودبن بنات اثنين ديرسمون على الكف و ظهر اليد لكل البنات الموجودات، ان كان هذا قصدك من النقش بالحناء.
بالنسبه لتعلم قص الشعر هذه يحتاج لها شهاده ممارسه المهنه ولازم كورس وبعدها امتحان صعب نوعا ما لانه تدخل بيه كل مايتعلق بالشعر و الراس و المواد المستخدمه. اذا اكو حلاق قريب يمكن تساءلين و اكيد راح تكون تفاصيله اكثر.

[Lamyaa alani]

صحيح كلامك بس اول مره اسمع ينقشون حنه في قاعات الأعراس ... بس شكرًا لأنك نبهتني
لان بدبي صالونات لنقش الحنه مو بصالات الأعراس
بس هنا الله اليعلم اكو أعراس عرب لو لا؟
زين اخي سؤال هل اذا نتشارك في محل لنقش الحنه ينجح ؟يكون سهل ناجر لو غالي؟؟
اني تعبتك بس منعرف كلشي لان جداد ومنعرف شنسوي زوجي مهندس ميكانيك مدا يلگى شغل  وأني افتريت على كل الصالونات يكولون ما نريد نقش حنه
و ما اعرف شنسوي

[FIVE-STAR]

اعرف جيدا معاناة القادم الجديد و ان شاء الله كل اموركم تنحل، بالعكس نحاول من خلال هذا المنتدى تبادل الخبرات و الاستفادة للجميع. انى لا اعتقد هنا اكو مثل الخليج يتزينون النساء بالحناء لانه الشائع هنا هو التاتو وحتى العربيات لا يستخدمون الحنا، ربما اكون مخطئ بس انى صار لى هنا 15 سنه لم اصادف صالون أو محل للنقش بالحنا و ربما اذا فتحت انت محل تكونين الأولى بس هل سينجح؟
انا ذكرت ديترويت لان فى السنوات الأخيرة أصبحت تقام حفلات حنا ورأيت يعملون نقش على اليد من قبل بنات لذلك ذكرت ذلك، و هذه حفلات عراقىه و ليست عربيه أو خليجية و تقريبا  كلها الان تقام قبلها ليله الحنا. لا اعرف ما هى الأمور فى تكساس أو ما مقدار الجاليه هناك و اعتقد الاغلبيه هم من القادمين الجدد، الاكثريه متمركزه فى ديترويت و سان دييغو. لذلك عندكم ربما ستكون صعب.
اعتقد زوجك له مستقبل جيد هنا بس يراد له شويه صبر و لا يمل من السؤال أو التقديم للعمل. انا أيضا مهندس ميكانيك و عندما قدمت هنا عملت فى البناء و مقهى و قدمت على بعض الدروس فى AutoCAD وبرمجيات المكائن CNC و بعد سنتين قدمت على عمل فى احدى الشركات و حصلت على عمل و لازلت حتى الان اعمل معهم كمهندس اختصاص.
أتمنى التوفيق لكم واذا احتجتم للمزيد من المعلومات انى حاضر

[Lamyaa alani]

الحمد الله رب العالم لحد الان اكو ناس بهل الكرم والأخلاق أمثالك
ما اعرف شلون أشكرك لان انطيتنا بعض الأمل
وأشكرك لان تجاوبني الله يوفقك ويفتحها بوجهك يارب
 بالنسبة الزوجي ديدور شغل بس مو سهل أتصور ويمكن المفروض يدخل دورات او يحصل على شهادات
ياريت تفيدنا لان حذرتك نفس الاختصاص
على فكره هو عنده خبره 7 سنوات في دبي
شكرًا

[reem90]

حبيبتي نقش الحنه صار معروف من قبل الامريكان وكلش مطلوب انتي لازم تشوفين الصالونات لان اكثرهن بيهن نقش حنه بس ما اعرف اذا يحتاجون منج شهادة خبره لولا

[Lamyaa alani]

والله رحت ودخلت وسالت بس مايريدون
وما اعرف وين اسأل على لأشاهده او دورات
شكرًا على ردودكم ومحاولة مساعدتكم

[FIVE-STAR]

اذا تكدرين تسويلج business card وتذكرين بيه اختصاص حنة و توزيعه على محلات الصالون أو مثل flyer دعاية مكتوبة على الكمبيوتر و هم توزيعها اذا اكو أسواق عربية واني متأكد راح يتصلون بيج و راها اذا صاروا زبائن تكدرين تفكرين فى محل.
بالنسبة لزوجك جيد جدا  عنده خبره و أكيد راح  تفيده هوايه، بصورة عامه المهندسين الجايين يأخذون عده طرق، إلى عنده فلوس أو ماكو التزامات ماديه يدرسون من جديد أو يكملون ماستر لانه بعد 3_4 سنوات راح تكون شهادته من هنا وأكيد راح يشغل كمهندس. اكو ينتظرون سنه و يقدم على community college و هذه شهادتها مثل المعهد لكن دراستها ببلاش وعند  التخرج بعد سنتين راح يكون عنده certified degree و يشتغل بيها و  هم واحد يكدر بعدين يكمل دراسته، واكو يأخذون امتحان اسمه EIT Engineering IN Training لان هذا الاختبار يؤكد ان الشخص هو مهندس و يحتاج إلى دراسة و تفرغ، يعنى هنا اكو طرق عديدة و صدقيني الي يثابر و يدور راح يوصل و اعرف هواية مهندسين هنا فى San Diego درسوا  و خلصو و ديشتغلون مع العلم ان San Diego غير صناعية  انما السياحة و الخدمات هي المطلوبة. انا استطعت ان ادرس في اختصاص برمجيات المكائن و قدمت بعدها و حصلت على عمل. المهم هو ان تعرف ماذا تريد و تسير عليه للنهايه لان الوقت هنا يسير بسرعه جدا وان لم تخطط جيدا سوف تبقى في المؤخرة. وبالتوفيق

[Lamyaa alani]

شكرًا جزيلا على المعلومات الي كولشششش استفدنا منها
الله يكثر من أمثالك 
طبعا زوجي فرح بالمعلومات كولشششش ويشكرك ويسألك  اذا حصل على EIT ، شنو المميزات يعني يعتبر مجاز من قبل الولاية او يكدر يشتغل كمهندس مرخص
شكرًا

[FIVE-STAR]

EIT تعطي صاحبها تأكيد على الشهادة و اكو قسم شركات تطلبها و تختلف أهميتها حسب الولاية و الاختصاص بس متعطي امتياز عمل كمهندس مختص لانه وراءها تجي PE Professional Engineer l و هذه تأتي بعد ممارسة المهنة لعدة سنوات وبعد اخذ EIT . ودام زوجك ماشي بهذا الطريق أكيد يعرف التفاصيل و هذه راح تفتح له أبواب كثيرة، تمناتى بالموفقيه و النجاح

[Lamyaa alani]

شكرًا اخي وَبَارِكْ الله بيك

[مغتربه عراقيه]

السلام عليكم اختي حبيبتي اني اقترح حطيلج اعلان بالمسجد القريب لانه دائما النساء يحطون اعلاناتهم بالمسجد عن مهنهم ومنتجاتهم والله يوفقج ان شاء الله