دَگـّاتْ ماتـنـّسي

[ميسون نعيم الرومي]

نظم الأخ الشاعر الرقيق نضال عبود الشبيبي قصيدة مطلعها
 
لاتغيب ... وتاخذ الدنيه معاك
ياحبيبي ... اني اتنفس هواك
 
اهديه واهدي القراء الكرام مانظمته من ابيات
-----------------------------------------------------
دَگـّاتْ ماتـنـّسي
ميسون نعيم الرّومي

( لاتغـيـبْ او تاخـذ الدنـيَّـه مَـعـاكْ )ـ
هـذا گلبي غَـنَّـه باسْـمَـكْ مانـساكْ
 
سَــــهْـرانْ اعد واحســبْ النَـجْماتْ
إيعاينلي الگـمَرْ ينـشـدني وين اهواكْ
 
صَب الدَمعْ مِـزْناتْ عَ الوَجْـناتْ
وَي لـَحنْ الغنَـه اسْـمَعناه آنه اوياكْ

چانونْ اشْـتِعَـلْ بالروحْ مايطفاشْ
شــاخْ الدَمعْ بالعـيَـنْ من اجْـفاكْ

ياتَـعبْ التِعَـبْـتَـه اعْـليَـكْ واويَـلاه
ليَـلْ السَهَـرْ هَـدّ الليَـلْ من فَـرگاكْ
 
يا طبـعْ الخِـيانَـه بـيـكْ يا غَـدّارْ
مَـتْـگلّي ليش اشبيكْ شنهي الجاكْ

اسنين العمر شبعَنْ ضيم وَي لوعاتْ
تِـجْـرَحْ بالجَرحْ والغَـدر من سلواك

وَنْ الوفَـة مَگصوصْ بـيـه الجـنْحـانْ
أشْـكالْ أنواعْ الشعـرْ متوَزعْ اهنا واهناكْ

بـبـتـوتْ الگلبْ تـتْـمَـرجَـحْ اوفَـرْحانْ
مَوجوع اصبَحِتْ وامشي على الراگْ
 
تـلعَـبْ لعبْ لاينحچي اولا يـنْـگالْ
اشْـرايـــدْ دَ گـلـّي بَـعَـدْ من دنْـياكْ
 
دَگـّاتْ ماتـنّـسي دَگـّاتَـكْ إكـْـثـارْ
تـشْـكي بالچـِذبْ من ظلمْ ليَـلاكْ
 
يالرخَصتني ابقَـلـَم مايسْـــــــــواشْ !
تمسَحْهَه ابعَـباتَـكْ ؟.. رحمَه لبو السَمّـاكْ

ياعـيشَـة مَـرارْ اوياكْ ماتـنْـرادْ
كـلْ الجـرَه والصارْ من بَـلواكْ
 
اوياكْ العمرْ هالصارْ كومَه ارمادْ
يا صَلفَه اووكيحَه اشكـثـرْ عيناكْ
 
ما يسوه العَـتَـبْ ياروحي بَسّـچْ عادْ
ياللوَعتني ابْـعــــرفْ مــن اصباكْ
 
أكـْسـرْ هالقَـلمْ واحْرگْ الأوراقْ
يغصبني غَـصبْ واكتبْ ابطرواكْ
 
آنه الي چنتْ شَــمسْ اوتـشعْ باسْـماكْ
روحْ ابْـتعـِــــدْ ريَـــــتْ الله لا وَيّـاكْ
-----------------------------------------------------
آيار / 2014
ســــــــــتوكهولم