السلام عليكم اختي العزيزة..
ان شاء الله اخوج يوصل بسلامة ويقدم اللجوء والقبول بحيل الله..
بالنسبة لدول اللجوء والمفتوح هو فلندا وفلندا فاتحة فقط للوسط والشمال يعني بغداد والمناطق الغربية والموصل وصلاح الدين هذا الي عندة معلومات عنها...اما المانيا اللجوء صعب بيه بس مو مستحيل يعني لازم يطول بالة والحلو في المانيا ما ترجع للبلد الاصلي يعني مو قسري..واما بلجيكا بيه لجوء بس اصعب من فلندا واما السويد مسدود بيها اللجوء بالوقت الحاظر..واما هولندا صعب كلش بيها اللجوء وكذالك الدنمارك..بس سمعت قبل فترة النمسا بيها لجوء وقانونها مثل المانيا ما ترجع بس اكيد اسهل من المانيا..
بس اكو ملاحظات اذا يريد يقدم للجوء فلازم يطلع لغير دولة الماخذ منها الفيزا مثلاً هو هسة ماخذ فيزا من فرنسا لازم يقدم بعير فرنسا في حالة ماكو بصمة يعني ما مبصم بالسفارة..واما اذا مبصم بالسفارة فنصيحتي لا يقدم بغير دولة فرنسا لان راح يتعذب ويخسر افلوس على الخالي بلاش ويرجعوه لفرنسا..هو حسب قرأتي للموضوع ما مبصم لذالك خلي يروح لغير دولة ويقدم لجوء طبعا وياه كيس يضمن قبولة يعني قصة يقنعهم بيها.اما سحب الاهل فهذا يطول اشوية يعني لازم ياخذ اقامة ويبقة سنة ونص يالله يكدر يسوي لم شمل بس لم الشمل مو هينة يعني بيها متطلبات مثلا لازم السويد ما تريد منة عمل ولا لغة وسكن علمود لم الشمل..اما مثلا المانيا تريد لغة وعمل وسكن اجباري ولازم العائلة تتعلم الماني قبل الوصول الى المانيا..وفرنسا كذالك نفس الماتيا..وهولندا كذالك يعني بعض الدول بيها اهم شي الي يسوي معاملة لم الشمل لازم تتوفر بيه هاي الشروط عمل سكن ولغة اللعة اكيد الي جاي لدولة المعنية وحسب لغتها وبعض الدول تغض النظر عن هاي الامور بس مستقبلاً تكون موحدة بالشروط لان كاعد يسوون معاملات بفلوس بس مجرد زواج على ورق علمود يطلعون..
وعندي نصائح من يروح لفرنسا بما اني صادفتني هيج مواقف واحب انوها بيها..
اهم شي التامين الصحي يكون نافذ يعني خلي يسوي التامين بأول يوم دخولة لباريس لان ضابط الجوازات راح يسألة عن التامين فخليه ينسق الوقت بيوم وصولة..
ثاني نصيحة خلي يشيل وياه مبلع من المال يعني فد 4000 دولار او اقل براحتة بس مو اقل من 2000 دولار ووياها عملة اليورو اكيد راح يصرف وياخذ وياه لان الضابط راح يكولة عندك فلوس ويطلب منة يشوف الفلوس بما هو اول دخول..
واذا عندك رصيد بالبنك نصيحتي يطلع الة فيزا كارد او ماستر كارد هاي تفيدة اهواي بالسفر صحيح فرق التصريف بس تفيد بالعوزات..
ومرات يسألون شنو شغلة راح يجاوبهم كذا عملي راح يكولون انطينة هوية عملك اذا هويتة بيها معلومات بالاتكليزي فعادي ماكو مشكلة يقروها وما يحجون يعني مجرد اثبات شخصية غير الجواز وهذا كلة اول دخلة يعني اشياء روتينية..وهاي الامور الي حجيتها روتيينية يعني مو تخوف لان بعض الاخوة ما يدرون بيها لذالك ياخذ احتياط وكوليلة حتى لو ما اقتنع بكلامة وكلة تعال بوليس ترى عادي مجرد يتاكدون من المعلومات لان اول دخلة لازم يدققون ولا يرتبك بس همة اكيد من يشوفون الفلوس راح يسكتون الي وياه علمود ما يكولون هذا يريد يبقى بفرنسا.
واي سؤال اني حاظر
الف الف شكر على هذه المعلومات وَبَارك الله فيك وعندي كم سؤال ايضا بدون زحمة
١- هو راح يروح بوفد رسمي تابع لوزارة الزراعة يعني مجموعة من الموظفين وعدهم دورة هناك (( يعني دخوله الى فرنسا راح يكون سهل .. مو صح؟؟ لو اكو مشكلة ؟؟
٢- هو يقول انه يكمل الإيفاد او الدورة حسب الأصول ثم يتوجه الى السويد مثلا لان عنده أصدقاء هناك .. فهل هذا افضل ؟؟
٣- اذا وصل الى السويد ان شاء الله هل يجب ان يذهب بالقطار ؟؟ وهل يقدم على اللجوء مباشرة عند وصوله ؟؟
وألف الف شكر ألك واعتذر على الإطالة
