للاسف مفاهيم حول عين كاوة (مجرب ومن نص الحدث)...اترجاكم الكل تقراه وتقرة اضافتي في التعليقات ...لانها معلومات جدا مهمة وضرورية لاهلي بعين كاوة

[بغداد الجراح]

منتدى عينكاوة منتدى الخير علية وعلى كل العراقيين لكن للاسف وجدت هواية مفاهيم خطاء فيه وتحليلات خطاء في حطاء لكنني افتخر انني من رواد هذا الموقع العظيم ..المهم اني حاليا في الطريق وصارلنا يومين ...اتصلوا بيه الثلاثاء 29 بالشهر ليخبروني ان موعد سفري الاحد 3-8 علما انهم اتصلوا بيه الخميس الفات واجلت سفري اذا تتذكرون علمود عمليتي لكن من خابروني ولحوا علية ان اسافر مرة ثانية صارت الشغلة صدك لذلك رحنا للفخص الخميس الفات وكنا عائلتين فقط وسمعنا انه الطيران بيننا وين الاردن متوقف وبالفعل طلع الخبر صحيح من وصلنا للمطار بحيث طرنا 19 نفر من الاي او ام وويانا ركاب من غير جهات في طيارة صغيرة للاردن وحتة بالاقلاع اجلوها 40 دقيقة للحصول على الوافقات الامنية ..نزلنا بالاردن وتلكانا ولد وردة وحباب واخذنا لفندق المطار والفندق جدا راقي ومرتب وبتنا ليلة وبعدين اليوم الصبح اجونا ورجعونا للمطار وطرنا بالطيارة من الاردن لشيكاغو و14 ساعة دك ولطم طلع حتة بالسمة اكو طسات وكل شوية تشتغل رحمة الله ...وصلنا لشيكاغو وكان بانتظارنا عدد من الاخوة في الاي او ام وماقصروا ويانا وساعدونا هواية وهنا كلمن اخذوا على طريق ولايتة وضلينا احنة عائلتين ننتظر لباجر ختة نطير لولاياتنا انشاء الله ...احوان اعتمدت على مفاهيم كثيرة كنت اسمعها من الاخوة واني صار خمس سنين من مقدم لكن للاسف طلعت عكس ماكنا نسمع بيها ومثالها ان يجب تاخذ اكل وياك علة مود الجهال  ..اصلا والله بقى اكلهم علة حطتة كد ماهواية ..واني من نوع المجرم بالاكل يعني ماارحم بس والله خير من الله وضلت العلاكتين مال الجبس والبساكت على حطيتهم ..طبعا احنة اللي عدنا اطفال شفنة تعب لكن ينسي من توصل لهنا ..يومين وارتب اموري وبس اوصل لولايتي واسولفلكم هواية امور فهمناها غلط  ..سامحوني اذا طولت وكل الاخترام لكل رواد هذا الموقع الراقي واسف للاطالة

[سوق الشيوخ]

بالف سلامه يا محترم

[اسعد العراقي]

توصلون بالسلامة انشاء الله

[Hasan&Yaseen]

انشاء الله اتكمل رحلتك بخير وسلامة

[نصبر والله كريم]

توصل بالسلامه وتمنياتي الك بالنجاح والموفقيه بحياتك ..   بس بلا زحمه شكد ظل عندك السفر  بالانتظار ؟؟

[سمك بني]

الحمد لله على سلامة الوصول وشكراً للمعلومات وللمزيد.

[سرب الطيور]

الحمد لله والشكر على سلامتكم 
ظل بالنا يمكم من انقطعت الاتصال وياكم الحمد لله انتم بخير وسالمين
ربي يوفقكم ويفتحها بوجهكم ويقدملكم الخير اجمع
سلامي للاهل وسلام لكم من خالو يوصيك بالصغار 
ربي يوفقكم ونسمع اخبار الخير عنكم دائما 
بحفظ الرحمن يرعاكم 
تحياتي سرب الطيور

[ليث سعد]

الحمد لله على سلامه الوصول وبالتوفيق 

[سبيس]

مبروك عليك السفر والوصول وهذا ما تمنيناه وكنا ضد تأجيل سفرك اذا تتذكرنا وايضا نحن نفتخر بك لانك من الرواد 
كما نأمل ان تكون معافى من كل المشاكل الصحية يسبب العمليات التي ذكرتها سابقا مع تحياتي لك بالشفاء
ابو الوليد

[ام الجود]

مبروك الوصول وان شاء الله صحه وعافيه وسعاده دائمه

[AUS2013]

الف الحمد لله على سلامتكم وبالتوفيق ان شاء الله بحياتكم الجديدة

[2014human]

الف الف مبروووووووووووووك سفركم ووصولكم بالسلامة تمنياتي لكم بالتوفيق في حياتكم الجديده وننتظر منك تفاصيل اكثر وبكيفك شتريد تحجي .... مع التقدير

[Firas_msc]

بعمان من تبات يوم    يصير تنزل بالمدينه   لو لازم تضل بالفندق ؟
 اخي اني سفري قريب ان شاء الله !  انت حظرتك سافرت  شتنصحني  شنو الشغلات المهمه اللي اخليهه بحساباتي بالسفره ؟
 وهل اتصلو بيك قبل كم يوم اكدوا  عالحبايه ؟  اني انطوني الموعد   بس مكلي ببيش الساعه بالمطار !!!!!

[اجونة]

الحمدلله ع سلامه الوصول وان شالله تتهنون بحياتكم الجديده وﻻ تضوج من العلاكتين مال اﻻكل ضلت خليها للذكرى من العراق ﻻ تاكلوها بس تفرجو عليها  هههه  تقبل مروري
اختكم اجونه عمان ﻻ نتسونا بدعائكم 

[سبيس]

بعمان من تبات يوم    يصير تنزل بالمدينه   لو لازم تضل بالفندق ؟
 اخي اني سفري قريب ان شاء الله !  انت حظرتك سافرت  شتنصحني  شنو الشغلات المهمه اللي اخليهه بحساباتي بالسفره ؟
 وهل اتصلو بيك قبل كم يوم اكدوا  عالحبايه ؟  اني انطوني الموعد   بس مكلي ببيش الساعه بالمطار !!!!!

راح اجاوبك باختصار وانشاء الله الاخ صاحب الموضوع هم يجاوبك
اولا ليس كل المسافرين عن طريق IOM راح يباتون لان اكو سفر 10 الصبح واكو 10 بالليل من بغداد
الذي يكون سفره 10 بالليل من بغداد وراح يوصل 12 بالليل وسفره من عمان الى الولايات بعد الثامنه صباحا
هذا فقط يحتاج حجز فندقي وهذا يادوب يلحك يتعشه وينام ويفطر 
واما تفاصيل الرحلة غالبا ما يكون الاتصال في يوم الحباية وعند وجودك في المستشفى وهذا حدث مع الكثير
ابو الوليد

[INVISIBLE]

مبرووووووووك اخي والحمد لله على السلامة

[بغداد الجراح]

اتقدم بالشكر لكل من سال عني وهناءني واسال الله ان يوفقكم جميعا وان يمنجكم كل ماتتمنون ...اريد اولا ان اذكر انهم اتصلوا بي قبل اسبوع 10 ايام من الموعد لكنني طلبت التاجيل لانني شرحت  ضروفي سابقا لكن بعد اربعة ايام عاد شخص واتصل بي وكان اسلوبه شئ لن انساه من الطيبة والنصيحة وبقى يحاول اقناعي ان اسافر حتى لو ضغطت على نفسي وعلى عمليتي وبالفعل هذا ماحصل علما اننا كنا في ايام عيد وعطلة لذا وافقت وحتى زوجتي صدمت للخبر اذا لم يبقى سوى خمسة ايام ونحن لسنا على استعداد لكن جمعنا مانستطيع جمعه وسافرنا ..اما للاجابة على اسالة الاخوة فانا مقدم منذ خمسة سنوات وكان موعد سفري هو نفس يوم انتهاء الفخص الطبي الثاني والسفر بالانتظار لمدة 50 يوم تقريبا وموعد الحباية كان قبل يومين من السفر وكنا ثلاث عوائل فقط يوم 30 والسفر صباح الاحد 3-8 بطيارة صغيرة للاردن بسبب توتر حالة الطيران بين العراق والاردن..بقينا للمبيت بفندق المطار وكان جدا راقي..ولايمكننا مغادرة الفندق لانه اصلا داخل المطار وصباحا جاء الباص واخذنا للمطار وسلمونا جوازاتنا وكانوا شباب جدا متهاونين وطيبين ..طرنا الى شيكاغو في رحلة 14 ساعة من الدمار والتعب (حتة ردت اشمر جهالي من الشباك كد مابهذلونة خخخخخخخخ) ووصلنا الى شيكاغو وكان الجو عصرا واكملنا الاجراءات الامنية واخذنا الحقائب ..قسم ذهبوا بهم خارج المطار ليذهبوا الى ولاياتهم بالباص لانها قريبة اما نحن عائلتين لولايتين اخذونا للفندق وكان فندق جدا راقي او بالاخرى سويت ...بقينا للمبيت وعدنا صباحا للمطار والموضفة كانت امريكية واخبرتني انني اخرتها لكن بفضل الله ومع لغتي التي تفاجاء بها الجميع هناك اجبتها انها هي من تاخر وكان يجب ان يلتزموا بموعد فسكتت(انلصمت على حلكها ) وهذا لو عراقي ماعندة لغة كان لعبوا بي خلقة وشفتها مع كثير منالعراقيين الذي لايستطعون التحدث لكنني حاولت مساعدة الجميع على قدر تمكني...طرنا الى ولاية مينوبولي والمشكلة ان الموظفة اعطتني تكتات لكي انزل من هذه الطائرة واركب طائرة اخرى وهذا شيء صعب جداجداجداجداجدا طولت بالجدا للعراقي بدون لغة لان مطاراتهم كبيرة وتدوخ ومو مال يعتمدون عالمسافر لاننني شاهدت اغلب المسافرين لايعرفون اللغة..على العموم نزلنا من هذه الطيارة وبقينا نبحث عن الطيارة الاخرى علما انه حقابي ستذهب مباشرة لولايتي من المنطقة السابقة ...ساعدني احد رجال الامن ودلاني على البوابة مال الطيارة بس المشكلة انها تبعد تقريبا ربع ساعة ركض مو مشي وبالفعل جهالي بايد وحقائب اليد بايد وماراثون اني وزجتي ...وصلنا للطيارة ولكيت ازدحام بشكل كلت خل اسوي شوية سوالفنا فاخذت عائلتي وعبرت الازدحام على اسا داسال الظابط ومن وصلت ليكدام بقيت واكف يعني مختصر ضربت السرة وميصيرلنا جارة خخخخخخخ ..ركبنا الطيارة وكل الطيارات خدماتها حلوة وزينة عدا مشكلة الطيران الهبوط دتويلنا بلبلة بالقاطع ونحس روحنا رح تطلع من الضغط ..وصلت لولايتي باقصى غرب امريكا وهي منطقة جبال مثل كردستان بس هنا فرق التطور مليون وخمسمية سنة ونفس المشكلة نزلت من الطيارة وماكان احد بانتظارنا لكنني سالت الموظفين بالصالة وهنا اللغة هم تلعب دور وخبروني انني لازم انزل للصالة الخارجية واسال هناك لكن اذا نزلت ومالكيت احد بعد مالي حق ارجع يعني ------------- ..بس الحمد لله نزلت ولكيت وخدة حلوة تنتظرني وانكتلت من زوجتي خمسين مرة لان كل شوية اتحرش بيها ودك سوالف وللصبح ..اخذتنا للمنظمة زهناك وقعنا اوراق واقسم بالله العظيم ان عضلات عيني طلعت ليبرة من النعاس والتعب وتاخرنا وللاسف شاهدت بام عيني ترجمة مايحصل في عين كاوة لمن واحد يكول امريكا مو خوش بلد ومن هالحجي لان تخيلوا واحد صارلة سنتين هنا ويفشر عالمنظمة لان قللوا المساعدات مالتة ..طيب اخي ليش ماتشتغل يكلي شسوي بالشغل مو همة دينطوني فلوس ...بلة هذا بالعراق هم جان هيجي حجة ولو بالعراق هم جان احد باوع عليه ..للاسف هذ الحالة شفتها اليوم وية خمس اشخاص بالمنظمة ...ترة اللي ميريد يطور روحة خل يكعد ببيتة احسنلة ...اني صارلي ساعات هنا وطلبت من الموظفة ان تلكالي شغل وانشاء الله لكيت وية لغتي ورح اخاول الكة شغل لزوجتي ايضا ...اخوان اللي عايش مكدي وعالة بالعراق هو هذا اللي يكلك امريكا بلد فاشل ......اترجاكم خلوا هدف لنفسكم قبل ماتجون هنا لان هنا كل شي بفلوس ولازم تشتغل حتة تعيش ولاتضلون تسمعون الحجي منا ومنا لان اكوا هواي حجي قريتة بعينكاوة صار 5 سنين اني ناقضتة وذكرت منة شيل وياك اكل لان مكاو اكل وطلع الاكل حير من الله ومن كال ديروبالكم الادوية ممنوعة اني شايل وياي 15 كيلو ادوية تحسبالاي طاري ..اللي كال عل وزن فتمنيت اطك صور بالمطار لبعض الجنط مالتي حتة تشوف الوزن مالتها علما ان الضابط سالني هل اخبروك بوزن الجنط كتلة اي نعم فطلب مني توزيع الوزن الزايد علة باقي الجنط ...اما محتويا الجنط لو اذكرها حاجة حاجة يمكن بعد محد يسولف بعين كاوة ...يااخوان كونوا دقيقين رجاءا لان اكو كثير من الناس تعتمد على كلامكم وارائكم لذلك اذا عندك معلومة جديدة او مفيدة كولها والا لاتجتهد من يمك ترة الناس تعبانة ...بالمناسبة ترة اني ماعندي كفيل وماعندي احد بهذه الولاية لكن كفيلي الباري عزوجل والحمد لله سهلت الكثير من الامور اللي كنت شايل الها هم من اللي اسمعة بعين كاوة ويارب يمكنني ان اساعد الجميع واعذروني جدا للاطالة بس كلبي محترك عالكل والحمد لله رب العالمين ...مراسلكم من واشنطن جريح بغداد الجراح

[المهندس الزورائي]

الحمد لله ع سلامتك .. واتمنالك كل الموفقية والنجاح .. جهد كبير منك وانت بعدك ممستقر وبعد رحلة سفر طويل ومتعبة .. جزاك الله خير والله يديم عليكم الصحة والعافية والرزق ... ويوم ال الي واذبح طلي

[اجونة]

الف رحمه لوالديك ع هل الوصف الممتع والسهل والواضح والف الحمد لله ع السلامه ومبارك عليكم حيااتكم الجديده ويارب تحقيق جميع اﻻماني بفضل الله سبحانه وتعالى 
بس اخونا ماذكرت المبلغ المالي الي ممكن تاخذه وياك صحيح كل نفر 10000 دوﻻر( دفتر يعني بلغتنا )  ؟ وهل يتم التصريح بها ؟ واين تضعه بحقيبة اليد ام بالجنط الكبيره؟ السؤال للجميع اذا ممكن وشكرااا وان شالله الكل اتسافر وترتاح
اختكم اجونه عمان 

[Firas_msc]

 الله  يسهلك اخويه وتمنياتي لك بالتوفيق والسعاده وراحة البال ......
بس صخيخ انو الجنط لازم قياسات معينه !   اشو هيج كالوا بالدوره التثقيفيه !!!

[سبيس]

اخي العزيز انت مريض اشوفك مستعجل على الشغل
اني افضل بعد ما تخلص 15 كيلو الادويه لان عملياتك
صعبه حسب ما ذكرت نوع العمليات وردت تأجل سفرك 
مضبوط كلامي ام لا
ابو الوليد

[AUS2013]

الحمد لله على سلامتك ومشكور للمعلومات
بالنسبة للاعضاء اكيد رح يدورون على اسم الولاية الي انت بيها بس اطمئنوا مراح تلكوها علخارطة

بالتوفيق عزيزي

[بغداد الجراح]

المبلغ حاول تشيلون عشرة الاف دولار لكل شخص وتوصل لامريكا ماتطلعها من جيبك ولااحد يكلك شكد عندك بس رح يسالوك شايل اكثر من 10 الاف كول لا وخلص ....الجنط اي قياس واني اخذت قياس الجامبو اللي هوة متر ارتفاع في ستين سنتمتر ....عمي ابو الوليد الشغل اول شي تفكر بي هنا لو مريض لو مدري شنو لان هنا لو تعيش بكرامة وبجهدك لو تعيش مثل ماشفت بعض العراقيين هنا مع الاسف والاسف الشديد....حبي اوس واشنطن سبوكن تصير بصف سياتل باقصى شمال الغرب قرب جدود كندا ...واني خادم الكم

[اجونة]

تسلم اخونا بغداد الجراح على المعلومات وصحيح كلها ضروريه وياريت تبقى تتواصل ويه المنتدى وتذكرلنا اﻻشياء الضروريه الي ناخذها ويانه ونستبعد الغير ضروريه منها طبعا بعد ماتستقر اكثر بوﻻيتك  وتخبرنا  وبالف عافيه عليكم اميركا وحياتكم الجديده تمنياتنا لكم بتحقيق جميع اﻻمااني
اختكم اجونه عمان ...... ويارب الكل تسافر وترتااح

[سبيس]

...عمي ابو الوليد الشغل اول شي تفكر بي هنا لو مريض لو مدري شنو لان هنا لو تعيش بكرامة وبجهدك لو تعيش مثل ماشفت بعض العراقيين هنا مع الاسف والاسف اا ...واني خادم الكم

كلامك صحيح حول العمل وبارك الله فيك
بس انت صارلك يومين من وصلت شوكت لحكت وشفت عيشة بعض العراقين هههههههه
ابو الوليد

[AUS2013]

حبيبي الغالي والطيب جراح بغداد
خادم ربك يا طيب
اني كنت احجي على اسم الولاية انت نطيت حتى المدينة 
حبيبي شايف كل الخير 

[أبو صهيب]

شنو هي المفاهيم الجديدة اللي حضرتك ذاكرها ؟ انت كاتب خط وتفاصيل الرحلة مالتك بس وباقي الامور اللي كاتبها كلها موجودة قبل المنتدى وكلنا نعرفها وكلامك عن مفاهيم خاطئة بالمنتدى شوية مو حلو لان دا احس بي بسامير لبعض الاعضاء اللي سهرانين ليالي وليالي حتى يفيدون الناس

راجع كلامك وهسة تشوف انت مكاتب شي جديد وكل اللي كاتبه طبيعي ومنطقي ونعرفه

وصدك على كولة الاخ سبيس شلون كدرت تعرف العراقيين هيج وتتأسف عليهم وانت مصارلك يومين من واصل , المفروض انت هسة بعدك نايم على هيج تعب بالطيارة مو صح خالووا ؟

[نــــاصر]

طبعا اكو فد كم عضو مادري امين طالعيلنا بالجديد كلامهم وتعليقاتهم كلها تهجمية ومعاجبهم العجب واي موضوع ينزل يدخلون يعترضون ويشككون ارجو من الادارة الانتباه الانتباه لان هذا سيضعف مشاركات الاعضاء وحتى قد ينفرهم من المنتدى
احترامي

[نــــاصر]

مشكور خويي وماقصرت وان شاء الله التوفيق من رب العالمين والشفاء العاجل

[ghassan_alabdi]

السلام عليكم . الف الف مبارك اخي العزيز ويارب تكون فاتحة خير عليك . بس اعتقد اكو بوري صغير عبر عليك . بالنسبة للوزن الزائد الي حضرتك اتكلمت عنه هذا انحسب وزن اضافي صح يتوزع على الجنط لكن كل كيلو زيادة ب 3-10 دولار حسب الشركة واعتقد انو انظاف الى ثمن التذكرة الي راح ادفعة بعدين على شكل دفعات للمنظمة . وحتى لو صدق كلامي ففدوة لان المهم انو وصلتوا بالسلامة

[تفرج2]

الى الاخ العزيز .. بغداد الجراح ... اولا نتمنى لك الشفاء العاجل ولعائلتك الصحة والسلامة وكل عام وانت بالف خير وبركة ...وثانيا" الشكر كل الشكر لك على هذه المعلومات القيمة التي ذكرتها وطبعا هي تعكس طيب اخلاقك واصالتك ... نتمنى ان تبقى على تواصل مع اخوانك الذين ينتظرون السفر ..لكي تفيدنا اكثر واكثر (وندري بيك متقصر) .. وانشاء الله الموفقية والصحة الدائمة في بلدك الجديد ...

[أبو توفي]

السلام عليكم ورحمة الله وبركاته
ألف حمد الله على السلامة لك ولجميع افراد العائلة واتمنى لك الصحة الدائمة واستمرارهذا التفائل الذي كثير من أخوتنا لا يتوخون الدقة بنقل المعلومة بأيجابيتها وسلبياتها ...اليوم نحن بحاجة لاعضاء تنقل الايجابيات والسلبيات في بلاد المهجر لا نريد واحد ينقل لنا الحلو بها ويترك المر ليكون الواحد بنا على بينة ودرااية بالذي ينتظره ومهما الواحد استطاع ان ينقل الحقيقة كاملة تبقى ناقصة بتدبير كل واحد منا ومدى ادراك عقولنا وتقبلنا للحياة الجديدة...أغلب الاخوان متصورين الحياة بالمهجر عمل بسيط وسفرات وجيبك مليىء بالدولارات ومرح ..لا يا اخوان الحياة بالمهجر كما تفضل الاخ العزيز بغداد الجراح يجب ان يكون لكل واحد بنا هدف والتوكل على الله لكي نحقق هذا الهدف ..
أتمنى لك الحياة السعيدة والاستقرار والنجاح والموفقية ونتمى منك ان تقطع عنا هذا النفس العراقي الاصيل ونقل الحياة كما هي يا عزيزي



              أخوك أبو توفي