موعد سفر مع حمل شهرين الرجاء ابداء الرأي والمساااااعده واعرف متقصرون

[Corelead]

اخواني أبشركم أجانه موعد سفر والحمد لله ومتتصورون الخبصه الي احنه بيهه هسه والمشاعر المختلطة ويارب يوم الكل تسافر وترتاح سؤالي هوه اكتشفنه أنو زوجتي حامل شهرين وطبعا احنه مامبلغين المنظمه لانه عرفنه من بعد مابلغتنه المنظمه بتاريخ السفر وهسه حاير وخايف بنفس الوقت اخاف أبلغهم ويتاجل السفر وإذا مابلغتهم اخاف اجهزه السونار الي بالمطار تكشف حملها وهم يرجعونه ودايخ دوخه بس عند الله خبرهه رجاءا اخواني الي مار بهاي إلحاله او الي عنده اي معلومه ليبخل بيهه عليه 

[Corelead]

عشر مشاهدات وولا جواب واحد ؟؟؟؟؟؟؟؟؟

[غريبــه!!!]

اولا الف مبرووك لحمل زوجتك والفين مبرووك للسفر
 اخي لا تبلغ المنظمه ولا ابد
وحته من تريد تروح تاخذ الحبايه اخذوها بس خل زوجتك متبلعها 
اختي قبل شكم سنه هم كانت حامل وعادي اخذو الحبايه بس مبلعتها وكانت تقريبا 4 اشهر 
وبيوم السفر لبست ملابس عريضه وعادي 
وهو ماكو منع للحوامل مجرد انو بالاشهر الاخيره يخافون عالحامل
وبالنسبه لاجهزه السونار بس بمطار بغداد يعني شوي قلق كوللهم انو احتمال اكو حمل ومراح يدخلوها سونار
واكيد اللي عدهم معلومات اكثر يجاوبوك 

[mulla]

مبارك عليكم  السفرو الحمل ويارب يكون ادم السعد
اخي لاتبلغ المنظمة  سافر وتوكل عل الله

[سوق الشيوخ]

مبروك السفر ولا اتبلغ المنظمه 

[Hussein Programmer]

حبي الف مبروك و لتبلغون المنظمة نهائيا و غلسو عن الموظوع ترة تاكل تاجيل ابو السنتين و نص . بس اهم شي لتخلي زوجتك تبلع الحباية نهائيا .. خليهها تخلي علج بحلكها و من ينطوها الحباية تتلفلها وية العلج 

[Corelead]

اخواني اشكر ردودكم ومشاعركم الطيبه بس أشوو خوفتوني من الحبايه ليش هيه شنو هاي الحبايه وشنو تاثيراتهه على الحامل 

[iraq_ela7zan]

حبيبي اولا الف مبروك السفر والحمل وان شاء الله كصة الطفل خير اتوكلو على الله وروحو ولا اتبلغ وما اعتقد الحباية الها اي تاثير على الحمل بس الافضل لبس الملابس العريضة والرجل يفضل نزع الحذاء اثناء السفر ورفع القدم ان امكن كل فترة لعدم تجمع السوائل وهية تعب اكيد بس اتوكلو على الله وان شاء الله رب العالمين يسهلها ويوم النا وللكل السفر العاجل 

[dr.eva]

دزيتلك رسالة على الخاص وفهمتك شنو تسوي بالضبط واذا سويت عكس اللي كتبته اللك ترى يتأجل سفرك ولاتكول محد نصحني وماكلتولي 

[rock106]

حبيبي الغالي
 راح تسافر بنفس الموعد ولا تخبر المنضمه  احب ان اقول لك انو ماكو جهاز كشف حمل بالمطار وبعدين انصحك بان موعد الحبايه لا تبلعها زوجتك اخذها وخلي الحبايه بين الاسنان او جو السان وبالموفقيه اخي العزيز وتوكل على الله وروح نفس الموعد والله يسهل اموركم

[amireo74]

اخي العزيز
قبل يوم  راح بلع الحباية بابن البيطار همة بالقاعة سالو من عده حمل قبل بلع الحباية واحد كللهم زوجتي حامل 3 اشهر الموضفة كلته اوكف ودخلت سالت ورجعت كالتله روح للحارثية سوي سونار جيبليا بسرعة وكملول الاجرات ومش كلشي مشة اوكي لا تخاف وتوكل

[Corelead]

اشكركم جميعا اخوتي واخواتي على تعاطفكم وردودكم اللطيفه وسرعه انتباهكم لمشكلتي ومشاركتي بها عن طريق ارائكم وحلولكم وهذا ان دل فانه يدل على طيب اصلكم ويارب السفر العاجل لكل الناس 


اخوكم كورليد 

[اسعد لطفي]

اخي الف مبروك لاتبلغ المنظمة ابداااااااااااااا 

[سمك بني]

اخواني اشكر ردودكم ومشاعركم الطيبه بس أشوو خوفتوني من الحبايه ليش هيه شنو هاي الحبايه وشنو تاثيراتهه على الحامل

الحبايه هي عباره عن ماده دوائيه تؤدي الى تسريب اي فايروسات مرضيه يمكن ان تتواجد في المعده والامعاء الى مجرى الدم وعند الوصول الى امريكا وعند اجراء الفحوصات للواصلين يتم عمل فحوصات للدم تحاول ان تكتشف تلك الامراض اي بمعنى اخر هي وسيله بديله عن فحوصات الخروج ووسيله ادق ايضاً ولكن لماذا تمنع الحامل من اخذها؟ الجواب هو لتلافي تسرب فيروسات الام الى دم الجنين اي بمعنى اخر نصائح بعض الاعضاء بتخبأتها تحت اللسان او مضغها مع العلكه هي ايضاً خطره .. 

[بلاد العجائب]

اخي الكريم اسمع مني وانتبه !! مع احترامي الى كل اخواني واخواتي الذي جاوبوك انته ما تعرف شنو هذا الجهاز الذي انته والاهل الذي تعبر منه هذه اشعه خطيره جدا على الجنين وتسبب تشوهات في الجنين واذا ما مقتنع اسأل اي طبيب او طبيبه عن اجهزة المطارات يعني اسأل دكتور خارجي ...وان شاء الله حتى لو كلتلهم ما ياثر كلي شلون انا وديت ولد صديقي وصلته للمطار وسافر الى امريكا وكاللهم انو زوجته حامل فشسوو اخذو زوجته على دكتور المطار ومع العلم كانت في شهرها 3 والدكتور اعطاها تقرير انو مافي اي خطر على سفرها وسافر والله رزقه هناك وحاليا اخذ الجنسيه الامريكيه للطفل فيا اخي العزيز هذا الطفل الله سبحانه وتعالى رزقك بيه فحافظ عليه وان شاء الله تسافر وترتاح والف مبروك الطفل والف مبروك السفر ولا تنسانه بلدعاء 

اخوكم ابو وطن...

[جنكو فيس]

اخي ترة السفر ممنوع خلال الاشهر الثلاث الاولى والاخيرة لان هناك خطورة على الطفل من المطبات الجوية و الضغط و كثرة الجلوس ...ف لتكلهم انو زوجتك حامل و دير بالك تاخذ الحباية لان هناك خطر انه تسبب تشوهات على الجنين  ...وترة مدا  احجي بكيفي لان احنة عشنة هذة الموضوع و سئلت عليه هواية

[Corelead]

اخي ترة السفر ممنوع خلال الاشهر الثلاث الاولى والاخيرة لان هناك خطورة على الطفل من المطبات الجوية و الضغط و كثرة الجلوس ...ف لتكلهم انو زوجتك حامل و دير بالك تاخذ الحباية لان هناك خطر انه تسبب تشوهات على الجنين  ...وترة مدا  احجي بكيفي لان احنة عشنة هذة الموضوع و سئلت عليه هواية

اخي الغالي ممكن تشرحلي تجربتك بهذا الموضوع حتى لو برساله عالخاص وأكون ممنون منك 

[Corelead]

طيب بالمطار يكولون اذا اكتشفوا ان المراه حامل راح يدزوهه على الطبيب مال المطار حتى يكتب تقرير بحالته وفيما اذا كانت مؤهلة صحيا لركوب الطائرة هل هذا صحيح