السلام عليكم شباب وشابات الكروب ومشتاقين
اول شي مقصرين وياكم وصار فتره مداخل للمنتدى واسف ع الانقطاع
شلونكم شخباركم وان شاء الله تكونون زينين
نبدي نسولف شويه
طبعا وره ما كملت الاوراق والمراجعات والاجازه بديت ادور ع شغل بمساعده المنظمه والحمد لله 7 اشهر ما حصلولي شغل وراها ردت احول لغير ولايه ونويت اسافر الجمعه قبلها بيومين خابروني ع شغل وحمد لله بلشت اشتغل الشغل كان بمعمل الدوام من 12 بالليل لحد 8 الصبح و5 ايام بالاسبوع
وره فتره سووه 6 ايام وبعدين صار سبعه لحد الان زوين
شو بعدين ظلوا يطلبون تبقى اوفر تايم واجباري يعني 4 ساعات فيكون الدوام من 12 ليل لحد ثاني يوم 12 الظهر والطريق ساعه روحه وساعه رجعه خلص اليوم ما افتهمنا منه شي
وعطله ويك ايند ماكو (مايدرون احنا اجينا لامريكا علمود الويك ايند ههههههه) بديت ادور ع شغل ثاني والحمد لله حصلت شغل ثاني اشتغل 4 ايام و3 استراحه والحمد لله
الولايه الي انا بيها واشنطن سياتل بس مو بمركز الولايه بمدينه تبعد 3 ساعات ونص
-الجو يمنا حلو مره وصلت درجه الحراره 40 خطيه الامريكان يتذمرون ما شايفين شنو الجو مال البصره والشرجي من ما تكدر تتنفس
-السكن انا ساكن ويه ولد عراقي حمد لله ورده مال الله وايجارنا 700 كل شهر الكهرباء بالصيف 50 وبالشتاء 100
-الجو مال الشتاء مره وصلت الحراره -16 (يعني اذا نريد نتدفى نفتح باب الثلاجه لان الثلاجه 0 حرارتها)
-مكسيكان هواي بمنطقتي ووين ما نروح عبالهم احنا مكسيكان
-الامريكان مو اجتماعيين مثلنا يعني دخله وطلعه وهوسه ونستهم بالويد ايند بس يسافرون وكامبنك وفشنك ومن هالسوالف
-حمد لله مره رحنا تزلج ع الجليد وراها اسبوع كامل عضامي توجعني من الوكعات(بعد متعود من البصره التزلج هوايتي المفضله هههههههه)
-العنصريه:الوايت الامريكان عدهم عنصريه بس ما يضهرونها ومن ترجع لاصلهم كل واحد من بلد شكل هولندي وفرنسي والماني وسويدي واسترالي
-المكسيكان نفس العراقيين يعني شويه عدهم كلاوات وبالبيع والشراء تتعامل وياهم وتكاسرهم
-الفود ستامب وره متشتغل ينكطع اكيد
-قدمت ع الكرين كارد قبل فتره لان كملت السنه ومنتظر الرد مالهم علمود موعد البصمات
-المديكال لان كان ما عندي شغل حصلت ع اوباما كير ويبقى وياي لحد السنه الجديده بس بعدين اكدر احصل مديكل من الشغل
-حصلت مره تكت لان جنت اخابر بالتلفون 120 ودفعته مثل الورد
-مره وكفني الشرطي بالليل كلي شارب كتله لا كال انزل اوكف سد رجليك باوع ع صبعي ظل يحركه يمين ويسار بس احس عيوني تشلعت كلي اوكي روح للسياره وقلل من سرعتك للعلم سرعتي كانت 65 والشارع لازم 60
-اللحم والاكل الحلال كلش غالي بعد لازم مسلم شويه بكلبه رحمه
-بعد شنو؟؟ ذكروني
-خط التلفون 50 دولار وانترنت 2 كيكا
-تلفزيون ع الانترنت ونت فلكس
واي سؤال انا حاظر وتدللون
