خطوات مهمة لكل من يريد المجيء لتركيا والتسجيل بالمفوضية .....
الموضوع منقول من احد العراقيين الاجئين في تركيا... وهو يروي كيفية الذهاب والتقديم للامم المتحدة مع عناوين...فالذي يهمه الامر التاكد من العناوين عن طريق الانترنيت ...ومن ثم يتوكل
...........................
الاجئين العراقي المتغربين في تركيا
خطوات مهمة لكل من يريد المجيء لتركيا والتسجيل بالمفوضية .....
رح اقسمها قسمين القسم الاول بعدك بالعراق والقسم الثاني من تدخل للحدود التركية لحين الاستقرار بالمحافظة .....
بعدك بالعراق :::
1- صفي امورك كلها واستعد للسفر وقبل كل شيء توكل على الله
....
2- اشتري جنطة صغيرة تحط بيه الاوراق المهمة ((الجنسية , شهادة الجنسية , التموينية , بطاقة السكن , جوازك ,دفتر خدمة العسكرية (( مهم اذا عندك جيبة لان رح يغنيك عن كثير من الاسئلة )) واذا ماعندك هم مو مشكلة لكن رح يسئلوك على العسكرية اذا كانت مواليدك في زمن النظام السابق استحقت الخدمة العسكرية , هويات مثل اذا كنت طالب كلية او اعدادية او أي شي , 12 صورة (( هاي رح تحتاجها هنا بتركية لعدة اشياء فخلي دائما يكون عندك صور )) ,عقد زواج ( اذا كنت متزوج ) , تقارير مستشفى ( ان وجدت ) , اوراق اثبات مثل بلاغ مركز او ورقة تهديد ( ان وجدت ) واذا ماعندك اثبات مو مشكلة لا تقلق , باجات او شهادات ( اذا كنت تشتغل مع الامريكان ) ,
3- جنط كبيرة تحط بيها ملابس , ادوية ( لتخاف ميحجون وياك بالحدود علمود الادوية حتى لو كانت كمية كبيرة )) انا سئلت شركة السفر اللي جيت بيها كلتلهم الادوية عندي كمية كبيرة كالو لا ميصير وممنوع ومدري شنو ....كلاوات بكلاوات جيب ادوية شكد متكدر اني جبت ادوية تكفيني لمدة سنة ونص ومحد حجة وياية بالحدود .....اذا جنت تدخن جيب وياك بس 3 تكات لان ممنوع اكثر (( طبعا هاي اذا جيت بالسيارة الباص )) ...
4-المبلغ اللي تجيبة وياك (( جيب وياك مبلغ يمشيك هنا بتركيا يعني جيب وياك 50 ورقة على اقل تقدير لان هاي ال50 ورقة يجوز تمشيك سنة اذا تقتصد بشكل كبير جدا )) بس هاذ المبلغ ميكفيك خلال وجودك بتركيا لحين موعد الطيران ....لازم تشتغل هنا بتركيا ...اذا اشتغلت بتركيا من اول شهرين حتى بعد متحتاج تصرف من ال50 ورقة ....رح يكلولك العمل ممنوع ويرحلوك للعراق ومدري شنو ومن هاي السوالف ....لا اخوية العمل صحيح ممنوع بس البوليس يقدرون ظروف الشخص وميقطعون رزقة (( بالمناسبة الاتراك يحبون الشخص اليشتغل ))...لكن لتسوي مشاكل تمشي امورك...
5 – اذا عندك شهادات جيبها وياك بعد تصديقها لان رح تحتاجها ان شاء الله في دول الاستيطان ..
6- جيب وياك لابتوب وسيديات فرمتة وبرامج والعاب وكلشي وكلاشي لان هنا السيديات غالية وماكو بالعربي
...
7 – الموبايل العراقي رح يقفل بتركيا بعد مرور 10 ايام الى شهر ويقفل بعد متكدر تخابر بي .....لكن تكدر تفتحة من أي مكتب موبايلات (فتح الموبايل 25 ليرة لمدة سنة ))....السيم كارتات العراقية تشتغل بتركيا لكن نهيبة يعني بالدقيقة الوحدة يقطعون منك 3000 ...!!! السيم كارت العراق خلي بس مال طريق تتصل بي على اهلك او اصدقائك ولما توصل لتركيا اشتري سيم كارت تركي .....ملاحظة لتشتري سيم كارت من الحدود لان كلاوات وغير مسجل بالشركة وينغلق بعد كم يوم ....اشتري من المحلات من توصل لتركيا ....
8- تروح تحجز من أي شركة تكلهم تركيا انقرة ...شوف همة شكد يكلولك (( اني بوكتها جان 80 دولار بعد ماعرف هسة شكد )) واذا تريد بالطيارة هم مو مشكلة تعال بطيارة ....الطريق بالسيارة 30 – 40 ساعة واحتمال اكثر لان احتمال بالحدود تتاخر ....
....
9 – كلشي متوفر بتركيا ادوات المطبخ متوفرة والاثاث الرخيص متوفر وكلشي متوفر هنا يعني لا تفكر تجيب وياك اشياء كبيرة وثقيلة ....لكن جيب وياك مكينة حلاقة كهربائية اذا عندك وجيب وسشوار وجيب شغلات خفيفة وصغيرة اذا عندك بس بدون باكيت ...!!!! لان اذا بالباكيت رح تسببلك مشكلة بالحدود واحتمال تصادر ...بدون باكيت يعني استعمال شخصي ومابي أي مشكلة ...
..
10 – الطعام :: جيب وياك معلبات كثيرة رح تحتاجها هنا توفر عليك المصاريف (( الفول , الحمص بطحينة , الاجبان مثل كرافت وغيرها , شاي لازم تجيب كمية كبيرة من الشاي لان هنا شايهم مو طيب , واذا كنت من محبي الاندومي جيب وياك لان هنا ماااااكو اندومي واذا اكو كلش غالية , بهارات جيب وياك لان بهاراتهم مو مثل بهارت العراقية الطيبة , باكيتات فلافل هههههه هاي اهم شي لان هنا ماكو فلافل وتطلع ارخص اذا تجيب وياك , صاص وعمبة لان هنا مااااعدهم وميعرفون شنو الصاص والعمبة , دبس جيب وياك لان هنا ماكو دبس عدهم , ....الخ ))
...
هسة انت حضرت كلشي وحجزت و وصلت لتركيا ,,,هسة نجي لتركيا
1- اول متوصل للاوتوكار (( الكراج )) مال انقرة تنزل وتدخل من الباب وتروح للباب المقابيلك تطلع منة (( لا تظل تفتر ومدري شو بالكراج ,,,,تدخل من الباب وتمشي كلة كبل وتطلع من الباب المقابيلك ...رح تشوف باصات واكفة وتكسيات ....بما انه انت متعرف تركب المناطق للوصول الى منطقة التسجيل فالافضل ان تركب تكسي 20 ليرة وتفضها كولنة هيج سوينة ....تكدر تترك الاغراض مالتك بالاوتوكار بالامانات احسن مما تاخذها وياك وتشيل وتحط بيها ههههه ....اركب تكسي وانطي هاذ العنوان ::
EMEK . MAHELLESI . 8 GADDE . 29. SOKAK NO = 37
BAHGELIEVLR / ANKARA. ASAMI
...
2- من توصل لهاذ العنوان رح تشوف ناس واكفين من دول كثيرة عراقيين وايرانيين وصومال وافغانستان ومدري شنو هههههه ...انت تعوفهم وتنزل رح يفتشوك السكيورتي وتدخل للقاعة تاخذ رقم وتنتظر رقمك...ملاحظة :: قبل ما تاخذ رقم تروح تشتري سيم كارت تركي ويفضل ان يكون توركسيل لان رح ياخذون رقمك التركي وهو رح يكون الوسيلة الوحيدة للتواصل معك
3- بعد ميصيحون رقمك رح تصعد فوك وياهم ياخذون منك كم سؤال (( يعني مواليدك وعدد افراد عائلتك وشلون جيت من أي طريق بسيارة لو طيارة وهل جنت مقدم على لجوء بغير دولة ومن هاي السوالف ....بس لتخاف ميسئلوك على قصتك ولا يطرقون الها .....بس اذا تشكي من مرض او عندك مريض كوووولهم مو تنسى ديربالك تنسى تكولهم على مرض اذا تكولهم على مرضك او عوق او أي حالة مرضية احتمال يقدمون موعدك واحتمال يكلولك هسة تروح عندك مقابلة فورية .....طبعا نادرا ما يدخلون شخص مقابلة فورية الا اذا كان رجل كبير بالسن وامراءة كبيرة بالسن او عنده حالة عوق بدرجة كبيرة فوق 90 درجة ........
4- بعد ما يسوولك مقابلة تعريفية يكلولك المحافظات المفتوحة فلان محافظة وفلان محافظة ويمكن يعددولك 5 او حتى 10 محافظات ويكلولك اختار وحدة منها ,,,,انت تختار محافظة وينطوك ورقة بيها الموعد مالتك ورقة للامنيات مال محافظتك اللي اختاريتها ....
5- الموعد هسة اللي جاي ينطوه كلها 2017 و2018 ولتنصدم اذا نطوك 2020 ....هاي المواعيد كلها يقربوها وميخلوك تنتظر لهاي المواعيد يعني لتخاف ....
6- بعد ما تطلع من التسجيل تروح مباشرة للكراج وتحجز للمحافظة اللي اختاريتها ....كروة الباص للمحافظات مو غالية يعني 30 ليرة الى 70 ليرة اقصى حد ....
7 – تنزل بالمحافظة مالتك تاخذ فندق تنام بي مؤقتا (( فنادق هواية متحير بيها ولتخاف كل الفنادق امينة ان شاء الله ....لان قوانينهم صارمة جدا وهمة منظبطين بالقوانين ....
...
8 – ثاني يوم تنزل للشارع وتروح ادور على كلمة Emlak
يعني دلال مال عقارات ....تدخل عليه وتكلة ((كيرالك ايف فارما )) يعني اكو شقة او بيت ايجار ....همة الدلالين يعرفون انك اجنبي وجاي تاجر شقة او بيت لان مارة عليهم هاي السوالف ويعرفون شلون يتعاملون ويتصرفون ....رح ياخذك لعدة شقق او بيوت وانت رح تشوف الانسب الك من حيث الاسعار والحجم والمكان وكلشي .....توقع العقد وياه ودائما العقد يصير مال سنة ....بس انت متنطي مال سنة كولة(( ايلك )) يعني شهري ...شهر بشهرة
بس العقد يكول انك لازم تكعد بي لمدة سنة واذا تريد تطلع من الشقة قبل السنة تروح عليك التامينات ....وبعد ما يكون عندك سكن تروح للامنيات مال محافظتك وتسجل يمهم
9- تنتظر يتصلون بيك على مقابلة و ورة ميتصلون بيك رح تقابل رح يسئلوك على قصتك وليش جيت ويكلولك انطينة المستمسكات مالتك (( ويفضل ان تكون الاصلية )) ولازم ما بيها نفص لان اذا بيها نقص احتمال ينطوك اعادة مقابلة .... وينطوك الفسفورة وتكوم اتابع ملفك عبر الموقع مال مفوضية.......
10 – لازم تتعرف على عراقيين لان رح تحتاجهم بس الحذر اهم شي ....العراقيين اللي رح تتعرف عليهم رح يلكولك احتمال شغل او رح يساعدوك بهواية اشياء مثلا مستشفى او يدلوك على مناطق بيها مثلا مساعدات ينطون او ما شابه ....لكن الحذر واجب
...
ملاحظة :: المفوضية متنطي رواتب الا للحالات الخاصة جدا جدا......لكن اكو بعض المحافظات بيها منظمات تساعد اللاجيء تنطي مواد غذائية وبعض الملابس المستعملة النظيفة
