السلام عليكم ورحمة الله وبركاته
اخوتي اخواتي الاعزاء تحية طيبة
من خلال ملاحظتي للكثير من اصحاب العوائل يسألون عن المساعدات التي تقدم لهم عند طلبهم اللجوء واستقرارهم في البلد المضيف مثل تركيا مصر عمان
اعزائي كل عائلة ليس لديها مبلغ من المال او ليس لديها وارد شهري من العراقي رجاءاً وحفاضاً على عوائلكم تأنوا قليلاً وراجعوا حساباتكم
الجميع متفق على ان الهجرة ليس بالامر السهل والبسيط والجميع متفق انه لايوجد عمل للاجئين وان وجد فهو لايسد مصرف اسبوع او اكثر وطالما نصح الاخوة في المنتدى وشرحوا كافة التكاليف حتى اسعار الخضروات تجدها في المنتدى والايجارات وغيرها
لكن المثير للاستغراب ان كثير من العوائل تأتي ولها علم بالتكاليف وفي نفس الوقت ليس لديهم مورد مادي او لم يجلب معه مبلغ من المال؟؟؟؟؟؟والله عجيب؟؟؟؟انتوا ليش هيج تتصرفون؟؟؟؟شنوا الغاية؟؟؟؟؟
اما انتم لم تثقوا بكلام الاخوة في المنتدى
او لديكم اموال وتتدعون العكس
او في نيتكم الاستجداء
او غايتكم ايام وترجعون
لايوجد تفسير غير ذلك يعني ننصح ونصرخ يا اخوان لاتجون اله عدكم اقل شي فد شدتين جوة ايدكم او عدكم راتب شهري اقل شي 600 دولار لأن الجوء يطول اكثر من سنتين ولا كأنه وتضربون الكلام عرض الحائط؟؟؟؟ليش اخوان؟؟؟؟والله صرنه حجاية بحلك العالم ليش متفكر بعائلتك وتجيبهم وتحطهم بنص الغربة ومعندك فلوس يا اخي موت بالعراق ولا تستعطي من العالم والله اشرف بهواي يعني وين العقل وين الدين وين التربية كلش راحت بعد ماكوا بس كون اطلع من العراق وتاليهه؟؟؟؟مو انته ابلد الاستضافة وبعت كلشي هناك بالخارج شراح تسوي؟؟؟؟؟؟
اخواني ارجوا ان تعذروني لكن الذي اراه كارثة كارثة كارثة والله سمعتنه صارت بالوحل احجوا لاتسكتون من تشوفون عوائل ماعدهه فلوس لاتخلوهم يجون ميخالف خلي يموت بالعراق الموت بيد الله يعني شنوا هنا مراح يموت؟؟؟؟؟بس حته الموت مال العراقي بذلة؟؟؟امانة الله عليكم اخواني انصحوا العالم وكتبوا بالمنتدى والي تشوفوا وصل وماعنده نصحوا يرجع (وليجي واحد يكلي الناس بكيفهم وتمنع العالم) اي امنع اهلي وناسي من الخطأ مسوؤل العائلة اذا معنده عقل شنوا ذنب اطفاله ؟؟؟؟هاي امان برقابكم كلكم شويه خلي نكون صريحين مع انفسنه والناس مو كلمن يريد يطلع انكله اي تعال وبسيطة والله موجود وسنة ونص وتسافر ويمكن سنتين لا يا اخواني خلي شوية نرضي رب العالمين وننصحهم نكلهم لاتجون اذا معدكم فلوس؟؟؟؟وين وصلنه ؟؟؟صار الاستجداء بالنت وصفحات فسبوك؟؟؟يعني شنو؟؟؟والعوائل وابنات والاطفال تستغل؟؟؟؟خلي نصحه شوية
اسف للاطالة لكن ملخص كلامي لكل عائلة تفكر بطلب اللجوء اخواني لاتوجد مساعدات ولاسكن ولا راتب وان وجدت فقليله جداً جدأً وعليكم حساب مصاريف سنين طويله يعني هسه مو مثل عام 2012 قبل يرادلك مصرف سنتين هسه احتمال خمس سنوات هيج احسبوهه محد يعرف وعوائلكم امانة برقابكم موتجي وتكول على الله اخي ونعم بالله بس الله مايقبلك بالذل ونطاك عقل
تقبلو مني كل الاحترام والتقدير
ابوسيف/تركيا
عليكم السلام ورحمة الله وبركاته كتابتك لهذا الموضوع دليل حرصك على كرامة وشرف العراقيين شكرا لك
اخي الكريم مثل متعرف الروح عزيزة يعني صعب دكول موت بالعراق او لتجي
او اعتقد بسبب كثرة العراقيين الغير ميسرين ماديا هو الي لفت نظرك بس لوتذكر بعد دخول الارهابيين الى الموصل نزح اهلها المسالمين وجرى النزوح على مراحل فقبل ان يتعشعشو الدواعش في جميع انحاء الموصل اخذت العوائل الجوازات والمبالغ المتاحة لديهم وقصدو دول الجوار اي تركو منازلهم ولم يكونو مخططين للسفر وكذلك بسبب ذعر وخوف الناس على عوائلهم في اغلب المحافظات العراقية تركو العراق يعني لو احنة بمكانهم شنسوي ؟ اكيد نسوي مثلهم
يعني بدل ميكضون سنين بالبهذلة والذلة والجوع مال المخيمات دون امل يكضيهة باحد دول الجوار او عندة امل تطلعلة دولة توفرلة الامان والاستقرار وترجعلة كرامتة
اخي في لحظة من الحظات وخوفا على اطفالي الثلاث فكرت بالذهاب الى احد دول الجوار وانا لست ميسر ماديا لدي اطفال عندي العالم بكوم وهم بكوم وهذا راي اغلب العراقيين لان الولد عزيز يعني عندي استعداد اذهب الى دول الجوار و اجدي ولا يموتون اطفالي ......
اخي المحترم خرج اغلب العوائل من العراق مجبرين لا مخيرين ارجو ان تاخذ هذا بنظر الاعتبار
شكرا لك
