ܬܦܩܬܐ ܡܥܠ ܠܦ̈ܐ ܕܙܒܼܢܐ لقاء عبر امواج الزمن

[بولص دنخـا]

ܬܦܩܬܐ ܡܥܠ ܠܦ̈ܐ ܕܙܒܼܢܐ
ܦܘܠܘܣ ܕܢܚܐ ـ ܣܘܝܕ

ܒܸܕ ܐܵܬܸܢ ܠܟܸܣܠܵܟܼܝ ܘܓܵܝܫܸܢ ܥܲܠ ܦܵܬܵܟܼܝ
ܟܡܐ ܕܫܸܢܹ̈ܐ ܥܲܒܼܪܝܼ
ܒܸܕ ܥܲܒܼܪܸܢ ܠܢܲܗܪܵܐ ܥܲܠ ܠܲܦܹ̈ܐ ܕܓܘܼܠܦܵܟܼܝ
ܥܲܠ ܓܸܫܪܵܐ ܕܚܘܼܒܵܟܼܝ
ܘܓ̰ܵܘܓ̰ܸܢ ܥܲܠ ܠܲܦܹ̈ܐ ܡܝܼܠܹ̈ܐ ܕܐܵܢܝ݇ ܥܲܝܢ̈ܵܟܼܝ
ܒܸܕ ܬܵܦܩܸܢ ܒܸܝܵܟܼܝ ܡܥܲܠ ܠܲܦܹ̈ܐ ܕܙܲܒܼܢܵܐ
ܘܐܝܼܡܲܢ ܕܒܸܕ ܬܵܦܩܲܚ ܒܸܕ ܓܵܚܟܵܐ ܫܡܲܝܵܐ
ܘܪܵܩܸܕ ܟܠ ܒܸܪܝܵܐ ܓܵܘ ܫܠܵܡܵܐ ܘܫܲܝܢܵܐ.

ܒܸܕ ܚܵܡܲܚ ܦܲܓܼܪܲܢ ܒܛܸܠܵܐ ܕܐܝܼܠܵܢܹ̈ܐ
ܒܸܕ ܚܵܡܲܚ ܠܘܲܪ̈ܕܹܐ ܘܟܠܵܝܗܝ ܫܘܼܫܲܢܹ̈ܐ
ܡ̣ܢ ܥܢܵܢܹ̈ܐ ܟܘܿܡܹ̈ܐ
ܘܒܸܕ ܚܵܢܸܩ ܛܠܘܿܡܝܵܐ
ܒܸܕ ܩܵܢܲܚ ܒܲܗܪܵܐ
ܒܸܕ ܩܵܢܲܚ ܣܲܗܪܵܐ
ܘܡܥܲܠ ܐܘܼܦܩܵܐ ܪܸܚܩܵܐ ܒܙܵܪܸܩ ܦܘܼܪܩܵܢܵܐ.

ܒܸܕ ܚܵܡܲܚ ܠܓܲܢܬܵܐ ܕܘܲܪ̈ܕܹܐ ܘܫܘܼܫܲܢܹ̈ܐ
ܘܟܠܵܝܗܝ ܐܝܼܠܵܢܹ̈ܐ ܕܝܼܠܵܝܗܝ ܡܛܘܼܪ̈ܦܸـܢܹܐ
ܘܦܸܩܚܹ̈ܐ ܘܗܲܒܵܒܹ̈ܐ ܕܪ̈ܝܼܚܵܝܗܝ ܥܸܛܪܵܢܵܐ
ܡܟܠܵܝܗܝ ܥܸܠܥܵܠܹ̈ܐ ܨܼܗܝ̈ـܹܐ ܠܟܠ ܚܪܵܒܼܵܐ
ܠܐܲܪܥܲܢ ܫܲܦܝܼܪܬܵܐ.
ܠܐܲܪܥܲܢ ܫܲܡܝܼܢܬܵܐ.
ܡܥܲܠ ܐܘܼܪܚܵܐ ܕܬܦܵܩܬܵܐ
ܒܸܕ ܚܵܡܲܚ ܛܲܝܪܹ̈ܐ ܘܟܠܵܝܗܝ ܒܘܼܠܒܘܼܠܹ̈ܐ
ܕܩܵܠܵܝܗܝ ܒܲܣܝܼܡܵܐ ܒܛܘܼܪܹ̈ܐ ܙܲܢܓܘܼܪܹܐ
ܥܲܡ ܢܫܲܡܬܵܐ ܕܙܪܵܩܵܐ ܘܢܚܵܡܬܵܐ ܕܩܲܝܕܲܡܬܵܐ
ܫܘܼܠܵܡܵܐ ܕܛܠܘܿܡܝܵܐ ܢܘܼܚܵܡܵܐ ܚܲܕ݇ܬܵܐ
ܗܵܐ ܦܪܵܣܵܐ ܒܲܗܪܵܐ ܠܐܲܪܥܲܢ ܫܲܡܝܼܢܬܵܐ
ܗܲܒܵܒܹ̈ܐ ܦܩܵܚܵܐ ܒܪܵܓܼܘܿܠܵܐ ܘܓܲܢܬܵܐ
ܦܲܪܣܲܡܬܵܐ ܙܪܵܩܵܐ ܒܦܵܬܵܐ ܕܦܲܩܝܼـܪܹ̈ܐ
ܕܚܲܝـܝܼ ܒܚܵܕܘܼܬܵܐ
ܕܚܲܝـܝܼ ܒܦܨܝܼܚܘܼܬܵܐ
ܕܚܲܝـܝܼ ܒܚܹܐܪܘܼܬܵܐ.

ܗܹܐ ܒܸܕ ܬܵܦܩܸܢ ܒܝܼܵܟܼܝ  ܟܡܵܐ ܕܙܲܒܼܢܵܐ ܝܵܪܸܟܿ
ܗܹܐ ܒܸܕ ܬܵܦܩܸܢ ܒܝܼܵܟܼܝ ܐܵܦܸܢ ܚܘܿܪܕܸܝܵܐ
ܒܦܵܘܚܹ̈ܐ ܘܥܸܠܥܵܠܹ̈ܐ
ܐܸܠܦܝܼ ܒܸܕ ܛܲܪܝܵܐ ܡܥܲܠ ܥܲܝܒܹ̈ܐ ܘܥܢܵܢܹ̈ܐ
ܒܥܕܵܢܵܐ ܕܠܲܓ̰ܠܲܓ̰ܬܵܐ ܟܲܘܟܼܒܼܵܐ ܕܒܹܝܬ݇ܓܒܼܝܢܵܟܼܝ
ܓܡܝܼܪܘܼܬܵܐ ܕܣܲܗܪܵܐ
ܙܪܵܩܬܵܐ ܕܗ̇ܘ ܒܲܗܪܵܟܼܝ
ܦܪܵܣܬܵܐ ܕܗ̇ܘ ܒܲܗܪܵܟܼܝ ܥܲܠ ܐܲܪܥܵܐ ܕܢܝܼܣܵܢ
ܐܲܪܥܵܐ ܕܫܘܼܫܲܢܹ̈ܐ ܘܘܲܪ̈ܕܹܐ ܕܢܝܼܣܵܢܹ̈ܐ.


ܒܙܲܗܪܝܼܪܹ̈ܐ ܕܒܲܗܪܵܟܼܝ ܘܚܘܼܒܵܟܼܝ ܘܲܚܢܵܢܵܟܼܝ
ܒܸܕ ܙܵܩܪܸܢ ܠܓܸܫܪܵܐ ܕܡܲܡܛܹܐܠܝܼ ܠܬܲܪܥܵܐ
ܕܢܝܼܣܵܢܹ̈ܐ ܕܨܲܕܪܵܟܼܝ
ܘܚܵܕܪܸܢ ܒܓܲܢܝܵـܬܹ̈ܐ
ܫܵܡܥܸܢ ܠܫܝܼܦܘܿܪܹ̈ܐ
ܫܵܡܥܸܢ ܠܩܝܼܢܵـܬܹ̈ܐ
ܫܵܡܥܸܢ ܠܡܲܙܡܘܿܪܹ̈ܐ ܕܚܹܐܪܘܼܬܵܐ ܕܐܘܼܡܬܝܼـ
ܒܸܪܩܝܼܥܵܐ ܕܐܵܬܘܿܪ ܐܲܡܝܼܢ ܙܲܢܓܘܿܪܹܐ.

ܒܸܕ ܫܵܡܛܸܢ ܠܩܲܘܕ̈ܵܟܼܝ ܥܲܠ ܙܲܒܼܢܹ̈ܐ ܘܕܵܪܹ̈ܐ
ܘܡܵܫܸܢ ܡ̣ܢ ܦܵܬܵܟܼܝ ܕܲܡܥܹ̈ܐ ܥܲܬܝܼܩܹܐ
ܘܡܲܫܬܸܢܵܟܼܝ ܚܲܝܹ̈ܐ ܐܵܦ ܣܲܒܼܪܹ̈ܐ ܚܲܕ݇ܬܹ̈ܐ
ܡܸܛܠ ܐܝܼܬܘܼܬܝܼ ܝܼܠܵܗ̇ ܓܵܘ ܚܦܵܩܵܟܼܝ
ܘܐܵܗܵܐ ܚܲܝܘܼܬܝܼ ܕܠܵܐ ܗܵܘܝܵܐ ܚܸܙܘܵܐ
ܗܵܘܝܵܐ ܨܲܠܡܲܢܬܵܐ ܘܐܲܚܟ̰ܝܼ ܚܲܕ݇ ܪܸܓܼܫܵܐ.

ܐܵܢܵܐ ܒܸܕ ܡܲܟܠܸܢ ܕܲܡܥܹ̈ܐ ܡܥܲܝܢܵܬܵܟܼܝ
ܐܵܢܵܐ ܒܸܕ ܡܲܚܸܝܢ ܡܸܕܪܹܐ ܦܲܪܣܲܡܬܵܟܼܝ
ܐܵܢܵܐ ܒܸܕ ܗܵܘܸܢ ܫܪܵܪܵܐ ܕܚܵܕܘܼܬܵܟܼܝ
ܐܵܢܵܐ ܒܸܕ ܣܵܦܪܸܢ ܗܲܠ ܕܬܵܦܩܸܢ ܒܝܼܵܟܼܝ
ܘܢܵܫܩܸܢ ܒܹܝܠ ܥܲܝܢܵܟܼܝ
ܘܕܵܡܟܸܢ ܓܵܘ ܕܪܵܥܢܵܟܼܝ ܚܸܕܝܵܐ ܘܦܵܨܘܿܚܵܐ
ܒܚܕܵܐ ܫܸܢܬܵܐ ܚܠܝܼܬܵܐ ܕܚܲܝܹ̈ܐ ܕܚܹܐܪܘܼܬܵܐ.

[sharle]

ܒܣܡܐ ܓܢܘܟ ܐܟ܆ܚܘܢܝ ܦܘܠܣ ܕܢܚܐ ܠܕܐܗܐ ܡܫܘܚ.ܘܟ ܛܝܡܢܬܐ ܐܠܗܐ ܡܒܪܟܠܘܟ ܐܚܘܢܘܟ ܒܐܘܡܬܐ ܐܬܘܪܝܬܐ ܡܚܘܪܐ ܡܢ ܢܘܗܕܪܐ
ܥܒܕܝܫܘܥ ܣܗܕܐ ܝܘܚܢܢ