السلام عليكم ورحمة الله وبركاته
بعد التحيه والاحترام لكم اخوتي واخواتي اكتب هذا الموضوع رغم مافيه من بساطة لكنه يحمل في طياته نصائح جداً مهمه للجميع وهذه المعلومات حصلت عليها مؤخراً رغم اني لم افحص لكن قمت بأستغلال فترة بقائي في المنظمة لحل مشكلتي وحصلت على هذه المعلومات بطريقة او اخرى وسأوجزها بشكل نقاط
1- كثراً مايقلق الاخوة انه بعد مقابلة الوفد انه لم يتصلوا بهم على فحوصات طبية ودورة تثقيفية فأقول لكم انه بدون ايعاز من قبل المحلف لم يتم اجراء اي فحوصات وتحديداً عام 2014 يعني اذا قابلت محلف سواء حصلت على موافقته او لم تحصل لايتم فحصك الا باعطائه ايعاز لهم بذلك والسبب لم استطيع معرفته حسب وجهة نظري وجود نقطه معينه وجدها المحلف بالملف يرغب بالتأكد منهاواكثر نقاط المحلف امنيه لذلك تسمى بالاجراءات الامنيه حتى لايتم صرف تكاليف ماديه بدون فائدة والله اعلم
2-الفحص الطبي منفصل تماماً عن موافقة المحلف التي تظهر في موقع اليوان بعد مقابلة المحلف يعني موضوع الفحص والدورة فيه ترتيب اخروتوصية اخرى بغض النظر عن وجود الموافقه يعني تقريباً من مجموع 100 شخص وجدت 20 شخص لديهم موافة محلف في الموقع والباقي بدون موافقة محلف وقد تم ترشيحهم للفحص بعد مقابلة الوفد يايام جداً قليله؟؟؟؟اما العشرين شخص فهم مقابلين الوفد منذ الشهر الثالث والخامس اذاً الفحص الطبي والدورة بايعاز من قبل المحلف( يعني هذا فحصه وهذا خلي هسه اشوف موضوعه) اقصد يوجد اجراءات امنيه او ادارية حسب وجهة نظري
3-لايوجد ربط بين تاريخ مقابلة الوفد وبين موعد الفحوصات يعني شخص يقابل وفد ورة شهرين يجي موعد فحص وشخص اخر بعد الوفد باسبوع يجي فحص يعني اترك موضوع تاريخ المقابلة ولاتربط بينه ولاتحسب ايام
4-نصيحه لجميع الاخوة التقديم الجديد اخوتي ابتعدوا عن التقارير الطبيه لغرض تسريع الملفات والمقابلات وهذه النقطة جداً مهمه وفيها عدة سلبيات واهما كثرة التقارير الطبية سوف تبعد استيطانك من كندا واستراليا نهائياً لكون هذه الدول وبصريح العبارة تقول لليوان لانريد اصحاب الامراض مما سؤدي بك الى الاستيطان لامريكا لكونها الوحيدة التي تستقبل المعاقين واصحاب الامراض طبعاً لهم كل التقدير الامريكان على هذه النقطة الانسانية والسلبية الثانية اي تقرير طبي تعطيه لليوان سوف يتم حفظه في ملفك حتى بعد مرور سنين وسوف تجده امام الطبيب اللذي يقوم بفحصك بعد مقابلة الوفد واما الوفد والحذر الحذر من التقارير النفسية؟؟؟؟
هذه عدة نقاط مهمه عسى ان تنفعكم بشيء
الان سوف نشرح بالتفصيل ماهي الدورة التثقيفية وماهو الفحص الطبي
أ- بعد الاتصال بك لتحديد موعد الفحوصات والدورة يفضل الذهاب قبل يوم بالنسبة للعوائل الساكنين بالمدن البعيده لكون اول يوم سيكون جداً متعب للاطفال ومن الصعب المباشرة بالدورة من اول يوم كذلك اغلب الفنادق التي سوف تسكنون فيها قد تكون بمناطق غير ترفيهيه لذلك من يريد الترفيه لعائلته يذهب قبل يوم يونسهم ويخلص ويتفرغ للدورة والفحص وانتم بكيفكم حسب وضعكم
ب-المستمسكات الواجب احضارها (الكملك التركي/-ورقة TU/-تكت الباص)
ج-تجهيز احتياجاتك من ملابس وغيرها بما يناسب البقاء لمدة اربعة ايام
د-تحتاج اول يوم لمبلغ من المال في جيبك لكون ثاني يوم يصرف لك مبلغ التذاكر
ه-سوف يصرف لك مبلغ التذاكر ذها واياب وفي الفندق لديك وجبة افطار فقط والغداء في المنظمة والعشاء انته تحير بي...بالنسبة لغداء المنظمة سندويج جبن نفس مال المقابلة بالاولى والثانيه الي مايعجبه خلي ياخذ ويا اكل وخاصة للاطفال لان يجوعون ويكظوهه بواجي عليكم
و-الاطفال سوف ياخذوهم حسب العمر الى غرف اخرى والطفل من عمر 13 سنة ونازل وبالاستراحه لازم تديرون بالكم على الاطفال
ر-وصوا اطفالكم ابو 10 وابو 12 سنة لايحجون بكيفهم من يسالوهم ديروا بالكم خاصه اذا طفل متعلق بالكيس اوقات يسالوهم كم شغله بحجة السوالف؟؟؟؟؟
غ-بعد دخولكم للمنظمة سوف يتم توزيعكم على ثلاث مجموعات على الاغلب كل مجموعه في قاعه يتم ترشيح مجموعه للذهاب الى المستشفى لاجراء الفحوصات اما المجموعتين الاخرى سيتم دخولهم للدورة التثقيفيه ثاني يوم ترشح مجموعه ثانية وثالث يوم مجموعه ثالثة يعني مو شرط اول يوم تروح للفحص سيكون الفحص مستمر لثلاثة ايام كل يوم مجموعه
ق-الدورة التثقيفية عبارة عن مدرس او مدرسة تركية تجدي الانكليزية بطلاقة ومعها مترجم مواضيع الدورة بالملخص المفيد عن الحياة في امريكا من التامين الصحي والفود ستام ومنويشغلك وشنو راح ينطوك وواجبات الكفيل والقوانين في امريكا وشلون تروح للمطار ومنو يستقبلك وشنو الجنط وشكد وزنهه وشنو تاخذ وياك ممنوع ومسموح وشلون تدرس هناك ...الخ الدورة من الساعة التاسعه لغاية الثالثة عصراً بينها فتراة استراحة
م-يرجى تنبيه اطفالكم بحسن السلوك والهدوء ومراقبتهم بأستمرار
الآن بالنسبة للفحص الطبي
سيكون الفحص الطبي في بناية خاصة فيها مختبرات بسيطة عند تحديد يوم الفحص من قبل المعلم الخاص بك سوف تأتي اليك سيارة للفندق وتاخذك للمستشفى هنا سوف يتم تقسيم المجموعة الواحده الى قسمين ايضاً مثلا 15شخص في التاسعه صباحا و15شخص ب 12 ظهرا
الفحص الطبي لجميع افراد العائلة ويشمل فحص النظر والطول والوزن وفحص الدم والضغط والاشعه والفحص السريري
بالنسبة لفحص الاشعه بعض الاخوة يشربون لبن وحليب وما اعرف شنو اخواني هاي السوالف ماتوكل خبز؟؟؟الاشعه مايكظهه لاحليب ولا لبن انته راح يودوك للاشعه اذا لكو شي ابيض بالاشعه راح يكلولك تنطينه بلغم نفحصه وتبقه تنطيهم بلغم لمدة ثلاثة ايام يعني تبقه ماتروح ورة الدورة تبقه ثلاثة ايام والموضوع ليس له علاقة بالمدخنين الموضوع يخص الجميع احتمال شخص اصلا مايدخن ويطلع شي بالاشعه واحتما شخص يدخن 3باكيتات جكاير ومايطلع بي شي الموضوع يخص (الرئه) طبعا لاتخافون هيه شغله عاديه لكن ابو البلغم راح يتاخر فد 40 يوم عن الي مابي شي وخلاص اذا مابيك شي اوكي ويستمر اجراءات الملف واذا بيك شي راح ينطوك علاج وهم تسافربس شوي تأخير
طبعاً الاشعه اهم مافي الفحوصات ويارب كلكم مابيكم شي واني هم قلق لكن الله موجود
الفحص السريري يوجد طبيب او طبيبة وهنا راح يطلع على ملفك وشنو عندك من نقرير منطي لليوان او مراجع مستشفى راح يبين عندة ويسألك يعني لاتضم شي هو اصلا يدري ونوب تنزع ملابسك ويفحصك وطبعاً سولف وياك ويفحص ركز شوي بهاي السالفه مو تكضيهه اي ونعم ومتعرف شنو سواله؟؟؟
بعد كل هاي الامور راح تنتظر السيارة تجيك وترجع للفندق
اخواني لاتوجد هنالك نتيجة للفحص في نفس اليوم او بعد انتهاء الدورة النتيجه تسلم للمنظمة بعد فترة والامر لايخصك نهائياً بعد فترة 40 يوم تقريباً اذا وجد شيء في فحوصاتك سوف يتم الاتصال بك بصدد ذلك اما اذا اوكي فتستمر باقي الاجراءات
اخر يوم وهو الرابع سوف ينجمع المجموعات الثلاثة وتسلم شهادات تخرج من الدورة وهي ليس لها علاقة بالفحص الطبي نهائياً
وهسه اني نعست وما ظليت اشوف المهم غدا اراجع الموضوع واي اضافات اجدها مناسبه سوف لن ابخل بها عليكم
ورجائي من الاخوة الي اكملوا الدورة والفحوصات المشاركة والاضافة على الموضوع حتى نفيد هاي العالم المظلومة والله العالم تبهذلت اخواني خواتي لاتبخلون بشي ولاتتعاجزون من الكتابة اقسم بالله ردت بس اوصل واكتبلكم وصارلي يومين مانايم كلت خلي نفيد اخواتنا واخواتنا حته الله سبحانه وتعالى هم يفرج همنه
تقبلوا حبي واحترامي وتقديري لسيادتكم بجميع اديانكم وطوائفكم لكونكم اهلي وناسي يارب الفرج الكم بحق محمد وآل بيت محمد
ابوسيف/تركيا
