تحية طيبة اخي العزيز اذا تريد تجي الى لبنان فأشرحلك وانته بكيفك خوية وف اذا تكدر واتمنى ان اكون انشاء الله افيدك وأفيد اي واحد يريد يجي لبنان
1- تعتبر لبنان بلد غالية نسبيا بالنسبة لبقيت الدول يعني الاجارات في بيروت غالية من 500$ الى 1000$
وفي الضاحية الجنوبية لبيروت ارخص نسبيا يعني تحصل اجارات بال250$ بس مناطق يعني شعبية جدا واكو تتراوح من 300$ الى 800$ تكون احسن والعيشة بيه زينه
2- بالنسبة الى المواد الغذائية بالمناطق الشعبية جيدة ورخيصة انسب من المكانات الباقية واكو مواد ارخص من العراق يعني راح اختصر بالنسبة للسكن والمواد الغذائية للعائلة المكونة 3 اشخاص اذا سكن رخيص 500$ تكدر تمشي امورك بيه هاي اذا بالضاحية الجنوبية غير مناطق تكون اغلى بكثير يعني احسب سكن اقل شي 500$ ويه المصاريف الباقية يعني مو اقل من 800$ واذا تسكن بالجنوب فأكيد ارخصوانسب من بيروت وضواحيها هناك بالجنوب ال500$ كافية وزايدة وبالجنوب الماي حلو وكهرباء احسن من بيروت
3- بالنسبة لل UN لبنان احسن من باقي الدول بالاجرائات يعني المدة من سنة الى سنة ونصف حسب قوة القصة والادلة يلي تملكه اكو حالات اكثر من هاي المدة واكو اقل حسب القصة واكو رفض ماكو شي اسمة حظ يلي يكول حظ مع احتراماتي فهذا كلام موصحيح لأن اكثر المرفوضين بلبنان من ايديهم يعني بسبب غلط منهم هسه حاليا مواعيد المقابله الاولى من 10 ايام الى 25 يوم اكو ناس قابلوا بنفس اليوم وره شهر قابلو الثانية بس قليلة هاي الحالات بس المقابلة الثانية ثابتة 7 اشهر وبعد هاي المقابلات التوطين سريع وبعده icmc وبعده سفارة وكلهن سريعات بالنسبة للمقابلة الاولى والثانية يعني يلي يكملهن يخلص 65% بس تبقة شغلت القصة القصة ارجع انبه يعني الدقة بالكلام والتواريخ
4- الاقامة يلي يجي لبنان يخلي باله ماكو اقامة يعني غير شهرين ميجدد الامن وبعده تصير متجاوز
الحواجز الامنية تحاسب المتجاوزين موكل وقت بس لازم واحد ياخذ حذر من الحواجز وعلى الاخص حواجز الدرك الشرطة متشددين اكثر من الجيش يعني ربعنة كلهم بلنان ينزل قبل الحاجز او يفوت بغير طريق علمود لحد يحاسبة ميحاسبون يلي يمشي اقصد بالسيارات بالنسبة اذا لا سمح الله واحد انسجن فالامم المتحدة تتكفل بي وهاي بيه شرح بغير وقت اجاوب علية
وبالنهاية اتمنى اكون شرحتلك شرح يفيدك ويفيد الجميع واي سؤال اني حاضر وبيك خير وتدلل
ابنكم واخوكم
احمد المضلوم
