أعضاء الموقع الكرام تحية طيبة..
قبل فترة وصلتني دعوة من شركة امريكية, وبشكل طبيعي قدمت على B1 ومثل متعرفون بغداد توقفت تمنح تأشيرات لهكذا نوع طلبات فكملت إجراءات المقابلة بأنقره وبالفعل طلعت وتمت المقابلة..
طبعاً الموضوع شويه مربك لأن سفر ولازم توفق بين حجز التذكرة وبين موعد المقابلة والراحة من السفر من غير مهزلة الأتراك مع اللغة الإنكليزية (بحياتي مشفت ناس متعرف ولو بس الأرقام بالأنكليزي!) فـ الله يكون بعون كل عراقي إنجبر يعيش بتركيا... الله يسهل امورهم آمين.
وقت المقابلة أختاريت 8 الصبح ووصلت قبل نص ساعه تقريباً لذلك ماكو داعي واحد يروح غباش جراد لأن كلشي مرتب حسب الأرقام وأكو حجوزات 9-10-11 الصبح وحتى 1 الظهر أحياناً موجود حجز.
ومن خلال موقع الحجز للمقابلة اكو كليشة تفيد أنو المقابلات متوفرة باللغة الإنكليزية والتركية والفارسية فقط. لذلك دائما ننصح شبابنا شوية يشدون حليهم عاللغة لأنها تفيد وإذا متفيد فـ متضر.
قبل ما أروح للموعد دخلت كم موقع أستفاديت من تجارب الناس حول هيج نوع فيزة ويه القنصليات والسفارات ويكدر أي أحد عنده مقابلة يبحث عن كلمة visa interview questions ويخلي وياها نوع فيزته حتى على الأقل يتوقع جزء من الأسئلة إلي راح تواجهه, طبعاً 90% من المواقع هي إنكليزي فلا تتعبون نفسكم بالعربي لأن المحتوى العربي على النت فقير , مع ذلك العم كوكل متوفر عند الحاجة.
أسئلة الضابط كانت محدودة وعكس ما كنت متوقع نوعاً ما.
- إلى أي ولاية سفرك؟
- الغرض من الزيارة؟
- المدة؟
- ليش فلان شركة؟ يقصد سبب الزيارة.
- شغلك بالعراق؟
- تشرف على كم شخص؟ يقصد موظفين شركة العراق.
- طبيعة عملكم؟ طبعاً هنا الجواب كل ما كان قليل وبعلومات مركزة أفضل من الإسهاب.
- طبيعة عملك أنت تحديداً؟ وهذا الشي يشبه مؤهلاتك لما تخليها بالسيفي مثلاً.
لهنا إنتهت أسئلته وحسيت الطابعة كدامه إشتغلت تطبع الرفض أو القبول لأن ماكنت أعرف أكو خيار آخر للموضوع.
كال التالي: تأشيرتك تحتاج إجراءات إدارية أكثر طبعتلك على الورقة موقع ألكتروني تتبع من خلالة حالة التأشيرة , إذا بين معاك "مكتمل" أرسل بالبريد جواز سفرك "طبعاً هنا يقصد البريد التركي الرسمي" , طبعاً شكرته على أية حال ولملمت أوراقي وجواز السفر وأنسحبت بهدوء.
الغريب بالموضوع, أغلب أسئلته كانت موجودة على ملف الـ DS الخاص بإسمي كدامه, وما طلب ولا ورقة تثبت كلامي!
وآني مترجم "مُحلف + تصديق خارجية" أوراق الشركة والجنسية وكشف الحساب من غير الدعوة مال شركة أمريكا! غير يغلط ويكول أنطيني على الأقل الدعوة... أبد.
على كل حال آني هم ما كذبت خبر فتحت الموقع ودخلت رقم الـ DS ويطلع عندي رسالة : Administrative Processing
إضافة إلى الموضوع مو شغلة أيام ربما أسابيع أو حتى شهور, فرجعت للبلد وبلغت الشركة بالصار ويايه "على إعتبار طالبيني بشهر الـ 12 أسافر" والحمد لله على أية حال.
ربما شوية طولت عليكم بالموضوع لكن حبيت أشارك وياكم تجربتي بشرح مبسط عسى أحد يفيده شي من موضوعي. أو ربما مر بمثل تجربتي حتى على الأقل أفهم شنو إلي صار.
وإذا عندكم سؤال حول الموضوع أجاوبه هنا حتى الناس ربما تستفيد.
أمنياتي للجميع بالتوفيق.
دمتم بخير
أخوكم إنــسان.
