بعد سنه و٨ أشهر هذه اخر اخباري

[John Cena]

السلام عليكم
اليوم تذكرت الأيام الي جنت اجيك بيهة هالمنتدى ومشاركات الأعضاء واللهفه الي جنت بيهة وقررت أسولفلكم عن اخباري بعد سنه و٨ أشهر في بلاد العم سام
بالبداية وقبل ما اسولف احب أكول لكل شخص رأي وألي راح اكتبه هو رايي الشخصي والي مو شرط تكون صح
اني جنت من اكبر المتلهفين للقدوم لاميركا وهاللهفه بدت عندي من مرحله ٢ كليه وجانت الرغبه عندي هيه إيجاد حياه أفضل ومستقبل وغيرها من الأشياء الي افتقدناها بالعراق وحاليا لو رجع بيه الوكت جان بقيت بالعراق وما سويت الي سويته وللأسباب االتاليه
خسرت عمل بالمجال النفطي ناس هنا امريكان يحلمون بي
خسرت شهادتي الهندسية وحاليا اوبريتر بشركه
كوني اعزب هنا وكلش صعب تلكه بنت بالغربه لئن هية بالعراق صارت صعبه النوب هنا!!!
تركت قسم من عائلتي بالعراق وقسم اجه هنا وبذلك أكون ساهمت بدمار عائلتي

طبعا هاي الأشياء ما جنت حاس بيهة لحد قبل فتره وجنت ماخذهة بحيل صدر اعتقد
اني مو متشائم وممكن تتطلعون على مواضيعي بعد وصولي لهنا وشلون جنت فرحان بالجيه
أميركا حلوة وقانون ونظام بس مو مال عيشه
تعال ادرس تعال سياحه اي بس مال تعيش وتشتغل شغل عادي ٤٠ ساعه بالأسبوع ما اعتقد يحب هيج حياه اغلب العراقيين
بالنهايه ومثل ما اسوي بكل رسائلي اي سؤال اني حاظر وبخدمتكم
اخوكم
جون سينا

[اسعد العراقي]

اخوية اول شيي التوفيق من الله واذا انت متوفقت ميعني نهاية العالم تكدر ترجع للعراق وتشتغل بشهادتك واهلك هم يكدرون يرجعون للعراق وتعيشون حياة سعيدة وعوفو امريكا لاهلها؟

[Sound of Soul]

اكيد كل انسان له ظروفه الخاصة الله يوفقك
اخونا جون سينا ونورت المنتدى من جديد
تحياتي .

[*Ray]

مثل ما تفضلت الغاليه ساااوند كل شخص او كل عائله وظروفهه

الله يوفقك اخ جون وربي يسهل امرك  وان شاء الله يتحقق كل الي تتمنا وندعيلك بالخير

اختك راي
U.S

[امين عبد الله]

اخي الكريم

اسمح لي ان اقول لك ان مقارنتك بين وضعك الذي كنت في في العراق مع ما انت فيه الان في امريكا هي مقارنة مغلوطة وغير منصفه. فلا مجال للمقارنة بين حياة بُنيت منذو سنين طِوال مع حياة قد بدأت للتو ومن الصفر. قبل ان تهاجر كنت تعلم جيدا بانك ستبدأ حياتك من الصفر في كل شئ تقريبا ماديا ،معنويا، اجتماعيا وحتى دراسيا. فكان عندك الفرصة حينها كي توقف كل هذا وتعدل عن فكرة السفر من الاساس كي لا تخسر الذي تفضلت بذكره لانك لابد وان قرأت ما تفضل بذكره الاخرون عن الحياة بامريكا ومعاناة اللاجئ في اول سنين حياته فيها الى ان يشتد عوده ويثبت اقدامه ويشق طريقه.
فان اردت الانصاف، فان المقارنة الحقيقية تكون بعد 10 الى 15 سنة من الان بين ماستكون عليه بعد الجد والمثابرة وبين حياتك بالعراق. اما الان ولم يمضى عليك سوى سنة وثمانية اشهر في الغربة فان عودك لازال طريا ولا خبرة لك بالغربة. اما موضوع الزواج فامره بسيط ولا يستحق كل هذه المعاناة المأساوية فبنات الحلال موجودات وبكثرة إن لم يكن من الجالية العراقية المنشرة في امريكا، فمن الجالية العربية او ممكن ان تقوم بزيارة للعراق لتختار شريكة حياتك.
اخي الكريم
ارجو ان تتقبل نقدي لك فانه نقد بناء ويصب في مصلحتك لو فكرت به قليلا. وبامكانك العودة الى العراق متى شئت.

[Ghassan2]

اتفهم معاناتك و نظرتك السلبية و اظن انة طبيعي في هذة المرحلة, ولكن ارجوا منك تقول لي كم من الابرياء راحوا بالمفخخات خلال هذة السنة و الثمانية اشهر ! كم من الناس تهجروا في نفس الفترة ! كم من العراقيين يعيش في خوف و قلق مستمر ! كم من العراقيين ماتوا على يد الاطباء الغير كفوئين في نفس هذة الفترة (مع احترامي للقلة الذي تفتهم), كم من العراقيين و اطفالهم يعيشون في بيوت صغيرة مع اخوانهم و عمامهم و خوالهم, بحيث هناك 30-20 شخص يعيشون و ينامون معا في بعض البيوت الصغيرة   , ماذا عن المدراس, كم طفل عراقي يذهب الى صف ممتلئ اكثر من استيعابة....... احمد ربك و انظر الى الأمام و ليس الخلف.

تمنياتي بالموفقية

[sindbad2014]

اخي العزيز
بعد السلام والتحيه
نحن العراقيون عاطفيون بطبعنا فلاتجعل العاطفة تتغلب عليك
اخي العزيز
اغلب من في العراق الان يحلم بالهجرة ولا يريد ان يخسر من سنين عمره اكثر مما خسره وايضا يريد ان يصنع الحياة الحرة الكريمه له ولابناءه
لكن الغالبيه تفتقد الی المبادرة بمعنی تفتقد الی الشجاعة لاخذ الخطوة الاولی فاهم شيء في اي طموح او مشروع هو ان نبادر باتخاذ الخطوة الاولی وسوف يسهل كل شيء بعد ذلك بالصبر والايمان
وانت كنت من هؤلاء الشجعان التي بادرت واتخذت خطوتك الاولی لتحقيق هدفك ووفقت فكن صبورا وفكر جيدا وابدا ببناء مستقبلك
واود هنا اسجل هذه الملاحظات وارجو ان تتقبلها مني برحابة صدر
يمكنك زيارة العراق بين حين وحين وان كانت في فترات متباعدة بسب المسافة والتكلفه
الزواج ايضا ممكن ان يتحقق بوسائل مختلفه انت فقط انوي وكل شيء يسهل
اما عن العمل فما اعتقد الي عايشين بالعراق يشتغلون 25  ساعة بالاسبوع

تحياتي الك وامنياتي الك بالتوفيق

[Lion New York]

اخي الكريم

اسمح لي ان اقول لك ان مقارنتك بين وضعك الذي كنت في في العراق مع ما انت فيه الان في امريكا هي مقارنة مغلوطة وغير منصفه. فلا مجال للمقارنة بين حياة بُنيت منذو سنين طِوال مع حياة قد بدأت للتو ومن الصفر. قبل ان تهاجر كنت تعلم جيدا بانك ستبدأ حياتك من الصفر في كل شئ تقريبا ماديا ،معنويا، اجتماعيا وحتى دراسيا. فكان عندك الفرصة حينها كي توقف كل هذا وتعدل عن فكرة السفر من الاساس كي لا تخسر الذي تفضلت بذكره لانك لابد وان قرأت ما تفضل بذكره الاخرون عن الحياة بامريكا ومعاناة اللاجئ في اول سنين حياته فيها الى ان يشتد عوده ويثبت اقدامه ويشق طريقه.
فان اردت الانصاف، فان المقارنة الحقيقية تكون بعد 10 الى 15 سنة من الان بين ماستكون عليه بعد الجد والمثابرة وبين حياتك بالعراق. اما الان ولم يمضى عليك سوى سنة وثمانية اشهر في الغربة فان عودك لازال طريا ولا خبرة لك بالغربة. اما موضوع الزواج فامره بسيط ولا يستحق كل هذه المعاناة المأساوية فبنات الحلال موجودات وبكثرة إن لم يكن من الجالية العراقية المنشرة في امريكا، فمن الجالية العربية او ممكن ان تقوم بزيارة للعراق لتختار شريكة حياتك.
اخي الكريم
ارجو ان تتقبل نقدي لك فانه نقد بناء ويصب في مصلحتك لو فكرت به قليلا. وبامكانك العودة الى العراق متى شئت.

كلام طيب

[أنا عراقي]

اني اكول ترجع للعراق افضل اذا كاره الوضع ولم شمل عائلتك اذا كنت راغب بهذا الشي والظاهر انت حيل كاره اميركا والدليل اسمك جون سينا

[الاحلام]

اخي العزيز رغم كل الظروف يجب ومنذ البداية ان تجعل امام عينيك هدف معين لكي تصل اليه وكما نعلم ويعلم الجميع بأن امريكا هيه ام الفرص وام العمل صحيح مو مثل العراق تعرف ليش لان همه اهناك عدهم رقابه احنا اهنا محد ايخاف عليك يعني عادي ناكل ونشرب ونلبس اكسباير مع العلم ان انته تقره الاكسباير بعيد جدا وهاذا واقع اني عايشه فيا اخي اهم شي لاتستعجل بأتخاذ اي قرار قد ايكون مو ابصالحك واتمنالك كل الموفقيه والنجاح

[Shining]

عذرا اخي الكريم بس الكل تعلم الاوضاع في العراق والاوضاع في امريكا وصعوبه العيش في امريكا  بس اسالك بالله اكو واحد مات من الجوع بس للاسف احنا العراقيين وللاسف على ذكر هذا الكلام احنا ندور فخفخه وجاها يااخي والله انا مثلك هم بالقطاع النفطي وايضا زوجتي موظفه بس لو تصح اكيد اروح وضعي حاليا جدددددددا مستقر بس على ياوضع تضل على الانفجارات على الامان على الطب الفاشل الي اسهل عمليه ميدبروها اخوي انت باوع لمستقبلك يااااااااااخي والله موتتني انت لوحدك ماوياك زوجتك واطفالك لو وياك كان شنو سويت انت حاليا حر نفسك تاكل اي شي تشرب اي شي لحد ماربك يفرجها
للعلم انا مااكلك امريكا جنه اكيد بيها مساوء بس لو تقارن هذه المساوء بالباقي تهون كلها
عموماااااااااا تمنيت ماكنت كاتب هذا المنشور
عموما الله يوفقك ويوفقنا

[iraqforme]

تحية للجميع ..
حبيبي جون سينا مثل ماتفضل الاخ امين حضرتك بعدك عودك طري ومماخذ على الغربه فه لتحكم عليها من بعد كم شهر ولتقارن بينها وبين العراق فهي مقارنه غير جائزة فالعراق اشبه ان يكون غابه لاقانون فيها ولا احترام للانسانيه .. صدقني يااخي هسه اني بمصر وحالف بس اطلع من الوطن العربي بعد مااعرفه لان مع كل الاسف العرب تحولو الى همج . انت بالوطن العربي اذا انت في غابه مع احترامي للزينين اللي صارو قله ..
تحياتي الك واتمنى ان تفكر ولتستعجل باتخاذ القرار .

[Dr.Zidan]

الدوام ٤٠ ساعه هوايه ؟؟؟ اني طبيب بالعراق عندي خفارتين بالاسبوع يعني ٤٨ ساعه بالاضافه لدوام من ال٨ الصبح لل ٣ الظهر من غير العمليات اللي مرات نتجاوز بيهه فترة الدوام و طبعا من دون اوفر تايم يعني بالقليل الدوام ٧٢ ساعه بالاسبوع وانت تكلي ٤٠ ساعه !!! و اذا ال٤٠ ساعه هوايه داوم بارت تايم !!! بالنسبه للعائله صحيح كلامك انه العاطفه تخلينه نمر بظروف نفسيه صعبه لكن مالازم ابد تخلينه ناخذ قرارات لانه حتكون خاطئه و هيه فتره وره ٥ سنين صير مواطن ووين متريد تروح روح

[امين عبد الله]

تحية للجميع ..
حبيبي جون سينا مثل ماتفضل الاخ امين حضرتك بعدك عودك طري ومماخذ على الغربه فه لتحكم عليها من بعد كم شهر ولتقارن بينها وبين العراق فهي مقارنه غير جائزة فالعراق اشبه ان يكون غابه لاقانون فيها ولا احترام للانسانيه .. صدقني يااخي هسه اني بمصر وحالف بس اطلع من الوطن العربي بعد مااعرفه لان مع كل الاسف العرب تحولو الى همج . انت بالوطن العربي اذا انت في غابه مع احترامي للزينين اللي صارو قله ..
تحياتي الك واتمنى ان تفكر ولتستعجل باتخاذ القرار .

 اعجبتني كلمة همج

[لورنس السفاح]

اخوية جون سينا
وماذا سيكون ردك لو كان عملك بالمجال النفطي في مصفي بيجي ؟؟
لابد وعندك اصدقاء في هذا المكان بحكم الاختصاص
اتمنى تكوللهم كلامك هذا وشوف راح يجاوبوك
تحياتي

[Imad al Timimi]

مرحبا..
هناك معادلة وضعتها سابقا وانزلتها في احدى ردودي ومفادها ما يلي:
طرف المعادلة الاول :
 في العراق .. (جيبك)  مؤمن عليه وما يخلى فرد نوب لان مصدر الرزق يجي يجي يعني بالحلال او بغيره ( لا اقصد السرقة .. بل بالفهلوة والنصب المعهود ). ( روحك ) غير مؤمن عليها ، يعني اذا فلتت من الموت طيلة هذا السنين مراح تسلم للنهاية ..ولان الوضع من سيء الى اسوأ يعني كلنا ميتون يوما ما .
والنتيجة ؟  ممرتاح .
طرف المعادلة الثاني :
في أمريكا .. (روحك ) مؤمن عليها ( والامان بألله ولكن فرص فقدان الحياة بسبب الارهاب اقل طبعا) .
( جيبك) غير مؤمن عليه.. تشتغل ؟ تؤجر عليه ... متشتغل ؟ جيبك مفلس والجيب المفلس بالغربة شنو ؟ هو الموت بعينه .
أذا كنت تقول عندي شهادة فأمريكا ام الشهادات .. ففرص التبجح بوجود شهادة مرموقة في العراق لا مجال ان تتبجح بها في امريكا والنتيجة مصيرها المعادلة .. والمعادلة تتطلب ان تنزل لمستوى علمي ادنى وتدرس حتى تستطيع جعل الشهادة التي كانت مرموقة في العراق بالكاد تكون شهادة معترف بها في امريكا ( مو نفس البريق اللي بالعراق).
الخلاصة .. هو انه في كلا البلدين لاتستطيع ان تأمن شر طرفي المعادلة  لانه من النادر ان تجد شخص عنده ما يرضي طرفي المعادلة ( فقط الذي لديه الشباب و المال اللي تم نقله الى امريكا زائدا شهادة جيدة مع اجتهاد وبحث في سوق العمل زائدا البخت ). والبخت لا أقصد به ان تنزل عليك الاموال من السماء ولكن اقول ان يضع ربك احدهم في طريقك ويجد فيك مقومات الموظف او العامل الجيد والمربح فيؤدي دوره في رسم خط حياتك في ذلك البلد ..اللهم اجعلنا جميعا من هؤلاء.
فالمحصلة من كل هذا الكلام هو .. على الشخص الذي يحب ان يهاجر ان يتحلى بالصبر والاجتهاد وبذل اقصى /اقصى جهد لكي يحصل مبلغ المعيشة والمأوى والتأمين الصحي واللي يبقى للادخار هو النزر اليسير .
  كسر بجمع .. محد يحس مرتاح لان المعادلة محد يكدر يكسب طرفيها لصالحه.
في العراق : اكو فلوس ومأوى لكن مصيرك الموت .. وفي امريكا: اكو حياة لكن ماكو فلوس ( تاخذ باليمنة وتنطي باليسرة). اذن النتيجة  الكل مفتر راسة. في امريكا: روحك محفوظة ولكن اذا ماكو فلوس انت والميت سوة. والحل؟ يم ربك ( والنعم بالله) .
مرحبا..

[abosaef]

مرحبا..
هناك معادلة وضعتها سابقا وانزلتها في احدى ردودي ومفادها ما يلي:
طرف المعادلة الاول :
 في العراق .. (جيبك)  مؤمن عليه وما يخلى فرد نوب لان مصدر الرزق يجي يجي يعني بالحلال او بغيره ( لا اقصد السرقة .. بل بالفهلوة والنصب المعهود ). ( روحك ) غير مؤمن عليها ، يعني اذا فلتت من الموت طيلة هذا السنين مراح تسلم للنهاية ..ولان الوضع من سيء الى اسوأ يعني كلنا ميتون يوما ما .
والنتيجة ؟  ممرتاح .
طرف المعادلة الثاني :
في أمريكا .. (روحك ) مؤمن عليها ( والامان بألله ولكن فرص فقدان الحياة بسبب الارهاب اقل طبعا) .
( جيبك) غير مؤمن عليه.. تشتغل ؟ تؤجر عليه ... متشتغل ؟ جيبك مفلس والجيب المفلس بالغربة شنو ؟ هو الموت بعينه .
أذا كنت تقول عندي شهادة فأمريكا ام الشهادات .. ففرص التبجح بوجود شهادة مرموقة في العراق لا مجال ان تتبجح بها في امريكا والنتيجة مصيرها المعادلة .. والمعادلة تتطلب ان تنزل لمستوى علمي ادنى وتدرس حتى تستطيع جعل الشهادة التي كانت مرموقة في العراق بالكاد تكون شهادة معترف بها في امريكا ( مو نفس البريق اللي بالعراق).
الخلاصة .. هو انه في كلا البلدين لاتستطيع ان تأمن شر طرفي المعادلة  لانه من النادر ان تجد شخص عنده ما يرضي طرفي المعادلة ( فقط الذي لديه الشباب و المال اللي تم نقله الى امريكا زائدا شهادة جيدة مع اجتهاد وبحث في سوق العمل زائدا البخت ). والبخت لا أقصد به ان تنزل عليك الاموال من السماء ولكن اقول ان يضع ربك احدهم في طريقك ويجد فيك مقومات الموظف او العامل الجيد والمربح فيؤدي دوره في رسم خط حياتك في ذلك البلد ..اللهم اجعلنا جميعا من هؤلاء.
فالمحصلة من كل هذا الكلام هو .. على الشخص الذي يحب ان يهاجر ان يتحلى بالصبر والاجتهاد وبذل اقصى /اقصى جهد لكي يحصل مبلغ المعيشة والمأوى والتأمين الصحي واللي يبقى للادخار هو النزر اليسير .
  كسر بجمع .. محد يحس مرتاح لان المعادلة محد يكدر يكسب طرفيها لصالحه.
في العراق : اكو فلوس ومأوى لكن مصيرك الموت .. وفي امريكا: اكو حياة لكن ماكو فلوس ( تاخذ باليمنة وتنطي باليسرة). اذن النتيجة  الكل مفتر راسة. في امريكا: روحك محفوظة ولكن اذا ماكو فلوس انت والميت سوة. والحل؟ يم ربك ( والنعم بالله) .
مرحبا..

مرحبا اخي العزيز معادلة قيمة جداً واعجبت بها لكن فقط اختلف معك بمسألة الموت سواء في العراق او اي دولة في العالم
لقوله تعالى بسم الله الرحمن الرحيم
(((
أَيْنَمَا تَكُونُوا يُدْرِكْكُمُ الْمَوْتُ وَلَوْ كُنْتُمْ فِي بُرُوجٍ مُشَيَّدَةٍ ۗ وَإِنْ تُصِبْهُمْ حَسَنَةٌ يَقُولُوا هَٰذِهِ مِنْ عِنْدِ اللَّهِ ۖ وَإِنْ تُصِبْهُمْ سَيِّئَةٌ يَقُولُوا هَٰذِهِ مِنْ عِنْدِكَ ۚ قُلْ كُلٌّ مِنْ عِنْدِ اللَّهِ ۖ فَمَالِ هَٰؤُلَاءِ الْقَوْمِ لَا يَكَادُونَ يَفْقَهُونَ حَدِيثًا)))

صدق الله العظيم

اذاً لابد من اعادة حساب جزء من المعادلة وتبدل بمسببات الموت وليس الموت المطلق

تحياتي واحترامي لشخصك الكريم
ابوسيف تركيا

[سمك بني]

هناك ميزه في امريكا لم يتطرق لها احد وهي ان الشخص لن يجوع هناك لان هناك اذا لم تجد عمل او دارت بك الدنيا تراجع اقرب مكتب للولفر ويعطوك مساعده ماليه شهريه وفود ستامب وتامين صحي وتلفون مجاني يشحن شهرياً مجاناً وبكل احترام وهذا هو اضعف الايمان واذا عمرك 65 يعطوك تقاعد وشقه شبه مجانيه وفود ستامب وتامين صحي وتلفون وكهرباء وهيت مخفض وغيرها حتى لو لم تعمل في حياتك ابداًواذا كان لديك اطفال فالامتيازات تتضاعف الى عمر ال 21 وهناك الرعايه الصحيه باعلى مستوى في العالم بحيث انك تعلم مسبقاً بانك لن تموت في يوم من الايام بسبب المرض لانك مثلاً ان احتجت الى عمليه ممكن تكلف مليون دولار سوف يعملوها لك مجاناً وبكل احترام وينقذوك من الموت..اما في العراق فمن يعطيك؟؟؟

[abosaef]

السلام عليكم ورحمة الله وبركاته
قرأت موضوع الاخ John Cena ولم اجد في كلامه نية او فكرة الرجوع للعراق بل فيها نوع من الاحباط والضغط النفسي  ففكرة اخونا العزيز John Cena ظاهراً الان بدء ينتابه احساس بالندم لظروف عديدة واهمها بقاء جزء من عائلته الكريمة في العراق فلو كانوا جميعهم في امريكا اختلف الامر عليه تماما

نقطه ثانيه انه غير متزوج وليس لديه اطفال وفي الغربه او امريكا بالتحديد هذا امر صعب جدا فيكتشف الاعزب فراغ شاسع في حياته مما يجعله يسترجع الماضي المملوء بالصداقات والعلاقات الاجتماعيه كذلك فرص المعيشه للاعزب تكون اقل بالمقارنه مع صاحب العائله

نقطة ثالثة موضوع مهم جداً يعاني منه العراقيين بصورة عامة فالاخ العزيزJohn Cena هو مهندس ويعمل في شركات النفط او وزارة النفط وهذا المجال في العراق جدا راقي والمهندس له قيمته وهيبته خصوصا في النفط واعرف ماذا يقصد واحسست به فالمهندس في عملنا مكانته تختلف عن الشهادة الاداريه ولديه محسوبيه وهذا واقع اداري في النفط......لابد ان نعطي له الحق عندما وصل الى امريكا وانا متيقن انه قاوم وناضل بمسألة فارق الشهادة والدليل انه لم يشكي خلال سنة و8 اشهر لكن بعد هذه الفترة فقد صبره وهذا من حقه وحق اي انسان صاحب شهادة من استاذ الى عامل جداً صعبه في بداية الامر لنكون مصفين وحتى الامريكان يؤكدون على هذا الامر في كراسهم ودوراتهم قبل السفر لكن هذا امر واقع والي يرد شي يعوف شي وهاي ضريبة الغربه والهجرة لكن مؤكد لها علاج بالدراسة ومعادلة الشهادة ولكن ايضاً ليس بالامر السهل فتحتاج سنين ومصاريف وجهد عقلي واستقرار حتى تتوجه لفكرة معادلة الشهادة في امريكا

نقطة رابعة وهي (الحظ) والحظ بالتفسير المنطقي هو قسمة رب العالمين فلنعطي لاخونا الغالي العذر اذا لم يحالفه الحظ بعد وصوله الى امريكا عكس باقي الاخوة الله يوفقهم ولكن اقول لك يا اخي ان الله لم ولن يتركك بغربتك وسوف يحين وقت الحظ لما يرى الله سبحانه وتعالى الوقت المناسب لكن الحظ لن ياتي الا بشرط ان تكون ذاكراً لله تعالى وليس ناسياً ؟؟؟؟هذا اهم شي وان شاء الله انت من الذاكرين لله بغض النظر عن ديانتك لكون جميع اديننا تدعونا لذكره عز وجل لكي يوفقنا في حياتنا

اخي العزيز امامك فرص كثيرة فقط عليك ان تقرر اما ان تجتهد وتعادل شهادتك او تتوجه لمشروع الزواج اختر واحده منها وانا اقول لك وبكل صراحة اذا بقيت بدون تحديد احد الاقتراحين سوف تخسر كل شيء وتتعب نفسياً واذا ليس لديك واهس في الدراسة فتزوج لكون الزواج يلزمك بالكثير من الامور وخصوصا اذا رزقت بطفل سوف تتغير نظريتك تماما وتنسى التفكير والمقارنة بين بلدك الام
بالنسبة لموضوع تجزء شمل الاسرة انته ليس لديك فيه ذنب هما احتمالين اما لم يتوفقوا بالسفر لاسباب تتعلق بالمنظمة او هم لم يرغبوا بترك العراق فما ذنبك بهذا الامر؟؟؟
تأكد كلامك في الموضوع الذي طرحته سوف يؤلمهم جداً ويجعلك مذنب حقا اما اذا تطورت حياتك واختلف للاحسن سوف يفرحون بك كثرا (وتسويلهم واهس يجون يمك)

لك مني كل الود والاحترام ولعائلتك الكريمة وللاخوة الاعضاء المشاركين بموضوعك الجميل ولايسعنا الا ان نتقدم لك بالشكر الجزيل لكونك شاركتنا بهمك واعتبرتنا اهلك واخوتك وكذلك نشكر عودتك للمنتدى لكونك لم تنكر فضله بعد مرور سنة و8 اشهر وهذه الخلق العراقيه الاصيله


ابوسيف /تركيا

[لورنس السفاح]

حبيبي ابو سيف
بحكم انك تعمل ايضا بمجال النفط
فراح اشملك بنفس السؤال
اسالوا المهندسين الي كانوا يعملون في مصفى بيجي
وقت حدوث الازمة
ايهما احسن حالهم الان ام حال الاخ جون سينا
بس مو ترحون تسالون جماعة البصرة ههههههههههههههه
بالتوفيق للجميع

[faisal faisal faisal]

كلامك مغلوط الظاهز حضرتك لو متريد تتقدم لو ميعجبك تشتغل لو ماشتغل بجد اني صارلي سنين بالاردن اشتغل شغلين وبمعدل  لايقل عن سبعين ساعة بالاسبوع عمي رحمة الازبعين هاي تسخت يعني كول يالله كلامك ونفسيتك راح تهيئك للرجوع فكر وشوف انت وين ووضع العراق المأساوي وين

[★★★ AIRBORNE ★★★]

الاخ جون سينا تحية لك ولكل الاخوة والاخوات الاعضاء الكرام .. اخي انا شخصياً افهم شعورك واقدره وادرك ماتفكر به والكثير رجعوا وندموا فيما بعد لكونهم سرعان ماتناسوا مأسي وضيم العراق واهواله لك الحق فيما تفكر وتشعر به ولكن لامفر ياصديقي فالعراق او امريكا كل له ثمنه ولن يستطيع الانسان ان يحصل على كل شيء بدون ثمن لذا كل منا خصوصا العراقيين بدأ يلجاً الى مايسمى بحلول اقل الخسائر واحب اترجمها لحضرتك بهالمفهوم بين قوسين ( الي يشوف الموت يرضى بالسخونه او الصخونه مثل ماتكولها الناس ) الكثير من الناس هجروا الوطن لبحثهم عن الامن والامان بالدرجة الاولى لان حياتهم وحياه عوائلهم بخطر ومهددين ولم يسافروا للبحث عن فرص عمل او سياحة وانا متاكد من ذلك 70 بالمائة منهم مرغمين وليسوا مخيرين والنسبة البقية تطلعوا للاستكشاف والحريه والخ .. لذا اتمنى ان تعزز اختلاطك بالمجتمع وتضع هدف امامك وتعمل من اجله وتعادل شهادتك حتى تعب سنين الدراسة لايذهب هدر وان شاء الله تتوفق بحياتك وتنسعد

[ضياع]

اخي العزيز كلامك اكيد صحيح مو كل الي ب امريكا ولا حتى ب اوربا مرتاحين ولا بكل مكان

اكيد كل شخص وطبيعة حياتة ومصدر رزقة ومستوى المعيشي

ف ادعيلك ربي يرزقك من حيث لاتحتسب وتحاول تستغل شهادتك

وان شاء الله تكون اسرة وتكدر توكف على رجلك

وادعي من رب العالمين محد يمر بوضع صعب بس حاول تشوف الشغلات الزينة علمود تكدر تعيش

واحب اكول للاخوة للي يكولون ارجع اكيد متكدر ترجع لان الوضيفة بعد راحت بل عراق بعدين اخي انت ب امريكا

ومتدري بل عراق شصاير اخي العراق ديحكمو من ايران ومن امريكا ومن اسرائيل ومن داعش ومن العصائب

ف وين ترجع ابقى هناك وعيش على الكد وكول الحمدلله انت عايش ب امان والامان بلله

وتحياتي الحضرتك وربي نسمع عنك اخبار حلوة وتتوفق بحياتك

اختك ضياع

[John Cena]

شكرًا جزيلا على الردود الحلوة قريته كلهة وآرائكم على راسي ونفس الوقت تولدت عندي بعض الاجابات لبعض الأعضاء
اكو طبيب يكول اني اشتغل اكثر ساعات منك احب أكوله اني جنت بالرميله اشتغل شهر ونص كامله وانزل لاهلي ٣ أسابيع فقط بس شغل بي خبره وفلوس مو شغل غبي وإلنفط اقسى بيئة عمل من بين كل المجالات والي مشتغل هناك يعرف
بالنسبه للي كال اسمك جون سينا وانت شكلك حاب أميركا فهذا احب أكله الي يحب ميسي مو يعني يحب الأرجنتين !!!!
ابو سيف من تركيا كلامك ع راسي ونصيحتك جدا اثرت بيه كلام موزون وثقافة ما شاء الله عليك
وبالنسبه للي يكول اذا ما عاجبك الوضع تكدر ترجع احب أكله ما ظل شي ان شاء الله
وبالنسبه للي كال العراق كله موت احب أكله انت  مشكلتك دينيه مو غير شي لئن محد يموت ناقص عمر والإعمار بيد الله
شكرًا جزيلا شباب ونورتوني
اخوكم
جون سينا

[ضياع]

شكراً لك اخي على رحابة صدرك وتقبل النقد واكو هواية ناس تفضل عيشة العراق

وناس تفضل تعيش بل دول المجاورة للعراق وناس اوربا وناس امريكا ف كل شخص هوة حر ببناء حياتة

بس انتبهت على ردك بشغلة انه العراق كلة موت والامان بلله كلامك صحيح بس الرسول عليه الصلاة والسلام من صار خطر علية

امرة رب العالمين بل هجرة مو الواحد يعيش بل نار وبنص حرب طائفية لابيها اول ولا اخر ويكول الامان بلله

الحذر. واجب وارجع اخي للعراق وراح تذكرني اني اختك ضياع وماعرفك قبل بس اني اخاف على كل عراقي من الاذية

راح تندم اخي وموكلشي بل حياة جمع فلوس فلوس وبعدين ..؟

المهم الواحد عندة الوارد الساتر علية وعايش مثل البشر

ياريت تتقبل كلامي لان هذه نصيحة من اختك الصغيرة

تحياتي الحضرتك اختك ضياع

[لورنس السفاح]

حبي جون سيناااااا
اني دائما بردودي احاول اخلطها بنوع من المزحة ماعرف اشوفها احسن ههههههههه
بداية انت ماعقبت ع كلامي بخصوص ان تسال اقرانك في العمل بالمجال النفطي
لان اكيييييييد هم الاقرب الك ويكدرون يكلولك ايهما احسن
بالنسبة لشغلة محد يموت ناقص عمر هههههههههه
اكو مشهد بفلم الرهينة لاحمد عز كان كاعد ويه بنية باوكرانيا
فالبنية كالتله ( الي اعرفه ع اولاد البلد انه هم لسسسه اصحاب نخوة وغيرة و و و ))
هو هنا قاطعها وكاللها لالالالالالالالالا دا احنا تغيرناااااااااا خالص
فياحبيبي هسه الموت هم اتغيرررررررررر خالص بعد ماكو مال ناقص وزايد عمر
اكو اماكن بالعراق تبقى بيها تموووووووووووت يعني تموت
والا ياحبيبي عندك هسه ملاييين من العراق نازحين بخيم معقولة كلهم بيوتهم تفلشت ؟؟
اكيد لا بسسس منهزمين من الموت
والموت يصيحلهم يكوللهم خل يشوفني نفسه الي يكول ما اموت ناقص عمر
اذا هو سبع خل يرجع لبيته اذا ما ادزله الصاروخ من الشباك

اسف ع الاطالة
بس اخذها نصيحة من اخوك واني هم مهندس ولازلت بوظيفتي وراتبي
بس مو مثل رواتبكم بالنفط انتوا مفلسين الميزانية ههههههههههههه
ابقىىىىىىىىىىىىىىىىىىىىى وحاول اطوووور وضعك بس بشرط ان تلغي تفكير العودة والنفط
لان اذا بقيت تفكر بوضعك بالعراق صدكني مراح تكدر تتطور بامريكا
لكن بس تلغي العراق والله سنة اللخ راح تجي تكتبنا وضعك غيررررررررررررر
ويجوز تكول شلون كنت افكر هيج
اتمنالك التوفيق

[abosaef]

حبيبي ابو سيف
بحكم انك تعمل ايضا بمجال النفط
فراح اشملك بنفس السؤال
اسالوا المهندسين الي كانوا يعملون في مصفى بيجي
وقت حدوث الازمة
ايهما احسن حالهم الان ام حال الاخ جون سينا
بس مو ترحون تسالون جماعة البصرة ههههههههههههههه
بالتوفيق للجميع

عزيزي لورنس السفاح ماراح اكَدر اجاوبك بالضبط لأن عملي محدد بين البصرة وبغداد والكارثه انه الاخ العزيز صاحب الموضوع جون سينا حسب مافتهمت هم عمله بالبصرة يعني جان مهندس مدلل درجة اولى رغم عناء عملهم اعتقد هو في حقول النفط وهي مجهده ووضعه المادي كان في العراق افضل بكثير من امريكا بل بدون مقارنه لكن اعتقد ان ظروفه الخاصه وطموحاته كانت بحاجة لتضحيته الباهضة الثمن؟؟؟؟وانا متأكد انه سيستمر ببقائه في امريكا وسوف ينجح كما نجح في العراق

بما يخص سوالك من الطبيعي وضع الشخص الذي كان يتمتع باستقرار نسبي يختلف عن الاخر الذي كان يمر بتهديدات مستمرة وكذلك اذا كانت محافظة ساخنة يعني شركات نفط الجنوب ونفط ميسان ونفط بغداد لاتقارن بخطورة بيجي (حقول الشمال) خطرة جدا

تحياتي واحترامي لشخصك
ابوسيف/تركيا

[abosaef]

اخي وعزيزي جون سينا امضي قدماً بمستقبلك الذي اخترته لحياتك انت وليس سواك وتذكر ان المستقبل القادم ليس لك فقط وانما لأطفالك وزوجتك فالعراق مع الاسف يحتاج الكثير من الوقت لكي يستقر

دعائي لك صادقاً بالتوفيق وانا متأكد انك في الايام المقبلة ستشارك  بموضوع يحمل في طياته التفائل اكثر واهم مايفرحني خبر زواجك

اخوك
ابوسيف/تركيا

[لورنس السفاح]

اشكر ردك اخي ابو سيف
وان شاءالله نسمع اخبار طيبة عنك
والله يسهل  ع الجميع
ولو اني اعرف شعل شركات النفط والله شغلهم تعب وتعب كبير
بس اكيد مثل متفضلت الوضع الامني يتباين من منطقة لاخرى
والله يخلينا شركة نفط الجنوب والبصرة هههههههههههه
وداعتك حاليا هي المعيشة العراق
تحياتي

[mohammad23]

اخويه انت هسه لو اتشوف وضع النازحين جان اتخبلت ناس من القصور الى خيم والمطر اغرقها
خلي في بالك لو ما الوضع الامني محد يطلع منا
انا اليوم بالقرب من مكان عملي صار انفجار كرهت حتى نفسي
هو التوفيق من الله فأصبر و طور نفسك
و أول ميتحسن الوضع صدك مراح تلكه تكت طياره لان كل الي بره راح يرجعون
تحياتي

[فتى المدينة]

السلام عليكم ورحمة الله وبركاته
قرأت موضوع الاخ John Cena ولم اجد في كلامه نية او فكرة الرجوع للعراق بل فيها نوع من الاحباط والضغط النفسي  ففكرة اخونا العزيز John Cena ظاهراً الان بدء ينتابه احساس بالندم لظروف عديدة واهمها بقاء جزء من عائلته الكريمة في العراق فلو كانوا جميعهم في امريكا اختلف الامر عليه تماما



نقطه ثانيه انه غير متزوج وليس لديه اطفال وفي الغربه او امريكا بالتحديد هذا امر صعب جدا فيكتشف الاعزب فراغ شاسع في حياته مما يجعله يسترجع الماضي المملوء بالصداقات والعلاقات الاجتماعيه كذلك فرص المعيشه للاعزب تكون اقل بالمقارنه مع صاحب العائله

نقطة ثالثة موضوع مهم جداً يعاني منه العراقيين بصورة عامة فالاخ العزيزJohn Cena هو مهندس ويعمل في شركات النفط او وزارة النفط وهذا المجال في العراق جدا راقي والمهندس له قيمته وهيبته خصوصا في النفط لكوني وكيل مدير في شركة النفط واعرف ماذا يقصد واحسست به فالمهندس في عملنا مكانته تختلف عن الشهادة الاداريه ولديه محسوبيه وهذا واقع اداري في النفط......لابد ان نعطي له الحق عندما وصل الى امريكا وانا متيقن انه قاوم وناضل بمسألة فارق الشهادة والدليل انه لم يشكي خلال سنة و8 اشهر لكن بعد هذه الفترة فقد صبره وهذا من حقه وحق اي انسان صاحب شهادة من استاذ الى عامل جداً صعبه في بداية الامر لنكون مصفين وحتى الامريكان يؤكدون على هذا الامر في كراسهم ودوراتهم قبل السفر لكن هذا امر واقع والي يرد شي يعوف شي وهاي ضريبة الغربه والهجرة لكن مؤكد لها علاج بالدراسة ومعادلة الشهادة ولكن ايضاً ليس بالامر السهل فتحتاج سنين ومصاريف وجهد عقلي واستقرار حتى تتوجه لفكرة معادلة الشهادة في امريكا

نقطة رابعة وهي (الحظ) والحظ بالتفسير المنطقي هو قسمة رب العالمين فلنعطي لاخونا الغالي العذر اذا لم يحالفه الحظ بعد وصوله الى امريكا عكس باقي الاخوة الله يوفقهم ولكن اقول لك يا اخي ان الله لم ولن يتركك بغربتك وسوف يحين وقت الحظ لما يرى الله سبحانه وتعالى الوقت المناسب لكن الحظ لن ياتي الا بشرط ان تكون ذاكراً لله تعالى وليس ناسياً ؟؟؟؟هذا اهم شي وان شاء الله انت من الذاكرين لله بغض النظر عن ديانتك لكون جميع اديننا تدعونا لذكره عز وجل لكي يوفقنا في حياتنا

اخي العزيز امامك فرص كثيرة فقط عليك ان تقرر اما ان تجتهد وتعادل شهادتك او تتوجه لمشروع الزواج اختر واحده منها وانا اقول لك وبكل صراحة اذا بقيت بدون تحديد احد الاقتراحين سوف تخسر كل شيء وتتعب نفسياً واذا ليس لديك واهس في الدراسة فتزوج لكون الزواج يلزمك بالكثير من الامور وخصوصا اذا رزقت بطفل سوف تتغير نظريتك تماما وتنسى التفكير والمقارنة بين بلدك الام
بالنسبة لموضوع تجزء شمل الاسرة انته ليس لديك فيه ذنب هما احتمالين اما لم يتوفقوا بالسفر لاسباب تتعلق بالمنظمة او هم لم يرغبوا بترك العراق فما ذنبك بهذا الامر؟؟؟
تأكد كلامك في الموضوع الذي طرحته سوف يؤلمهم جداً ويجعلك مذنب حقا اما اذا تطورت حياتك واختلف للاحسن سوف يفرحون بك كثرا (وتسويلهم واهس يجون يمك)

لك مني كل الود والاحترام ولعائلتك الكريمة وللاخوة الاعضاء المشاركين بموضوعك الجميل ولايسعنا الا ان نتقدم لك بالشكر الجزيل لكونك شاركتنا بهمك واعتبرتنا اهلك واخوتك وكذلك نشكر عودتك للمنتدى لكونك لم تنكر فضله بعد مرور سنة و8 اشهر وهذه الخلق العراقيه الاصيله


ابوسيف /تركيا

احسنت كلام رائع ينبع من قلب جميل بارك الله فيك 

[أبو توفي]

السلام عليكم ورحمة الله وبركاته
انا بداية اتفق مع الغالي أبو سيف الوردة لانه عدل ومعدل فيما ذهب اليه برأيه بخصوص الاخ جون وانا عندي رأي اذا سمح لي الاخ العزيز ...
يتضح من خلال كلامه انه شاب بمستهل عمره والخبرة بعجنة الحياة لم يمر بها وتضاريس الحياة التي تأهل الشخص لخبرة الذي قد يمر به الشخص لم يمر بها وهو عنده مشكلة اهله قسم قد أمن عليهم والقسم الاخر لم يأمن عليهم وناهيك عن شهادته والظاهر هو يراد له تعب خلال هذه السنوات ويوجد دليل شاب قد وصل حديثاً وبدأ بداية عامل بشركة الكترونيات واستقر وهو الان يفكر بدراسة هندسة بترول لانه يقول الذي يتخرج من هندسة البترول (( يطك )) يعني انت عندك اساس لماذا لا تطور نفسك والذي يتعب بالبداية اكيد بالنهاية يلعب ونحن العراقيين عموماً اذكياء وعندنا طموح لماذا لا تفكر بهدف وانت رجل بترول تستطيع ان تطور حالك ...
اما الزواج فأنت اذا قسم من اهلك موجودين عندك توكل على الله وليبحثو لك عن بنت حلال وكمل نصف دينك فهذه ليس بالمشكلة التي يفكر الواحد بطرحها لكن انت ومثل ما قال الغالي ابو سيف حيث ثمن منك انك قد طرحت موضوعك وعلى اعتبارنا جزء من اهلك لتطرح علينا بما تمر به ولكن اذا انت لم يوفقك الله وبسببك انت لانك لم تحسبها صح وليس اميركا وانت تعرف تمام الذي يذهب الى اميركا سوف يبدأ بكل مفاصل الحياة من جديد اي لا يجب ان تقول انني تفاجئة لانك والمفروض قد حسبتها مع نفسك وثانيا يا أخي العزيز انت لم يمضي على وجدك على الارض الاميركية سوى سنة وثمانية شهور يعني انت لم يمضي عليك مدة خمسة سنوات على الاقل لكي تأتي وتبدي رأيك وخصوصاً انت بالعراق رجل ناجح فلماذا لم تنجح بأميركا وخصوصاً كل الافاق مفتوحة وكل الخيارات امامك ولا يوجد شيء صعب... فعيد حساباتك لاجلك ولكي تخرج من هذه الدوامه التي انت فيها الان وفكر صح ولا يوجد شيء مستحيل لشاب مثلك وأتمنى لك النجاح والتوفيق وتقبل مني كل الود والاحترام



     أخوك أبو توفي

[John Cena]

شكرًا جزيلا عالردود وآرائكم على راسي وكلكم اهلي وإخوتي ان شاء الله

[زورائي بيانكونيري]

اخي العزيز الله يوفقك .. بس المقارنه فعلا ما تكون هسه تكون بعد 5 سنوات من الغربه .. اكيد راح تترقى في عملك بل يمكن تلاقي اللي احسن منه .. بس الموضوع محتاج صبر
و تأكد مهما كاعد يصير وياك هو افضل من الجلوس في العراق في هذه الاوضاع .. الله يسهل طريقك

[um shaheen]

اخويه العزيز جون سينا
طبعا من قريت الفتره الي قضيتها بامريكا نفس الفتره الي احنه قضيناها دخلت الموضوع حرت شكتبلك
ربي ألهي يوفقك بكل خطوات حياتك والي صبر سنه وثماني شهور اكيد يكدر يكمل المشوار
يارب يقويك ويصبرك ويهديك للتفكير الصحيح
يارب اسمع اخبارك الطيبه دائما
تحياتي
اختك ام شاهين

[امين عبد الله]

شكرًا جزيلا عالردود وآرائكم على راسي وكلكم اهلي وإخوتي ان شاء الله

بارك الله بك اخي الكريم

[zoka]

اخي العزيز يمكن حقك بكل شي كتبته ويجوز ضروفك حكمت اني تحجي هيج حاول تغير ولايتك قد تطون هي سبب احباطك او حاول تغير وجهتك تكدر تقدم عالجيش او تكمل دراسة ومليار شغلة ثانية لا تتقوقع على شي واحد بالنسبة للشغل كلنه الي اشتغلنه ويه الشركات الامريكية جان دوامنه 72 ساعه بالاسبوع فال40 تعتبر زلاطه وبالنسبه للزواج بالعراق هم صعبه تلكه وحده بيها خير فنفس الشي بأمريكا اما بالنسبه لأهلك حاول تسحبهم كلهم يمك لأن العراق ديتجه من سيء الى اسوء . وربي يوفقك مثل ما كتلك حاول تغير تفكيرك توجهاتك خططك . تحياتي

[موزارت]

كلام الاخ جون سينا صحيح 100% وانا عندي نفس المعاناة وربما اكثر كوني المعيل الوحيد للعائلة وامريكا متعبة جدا جدا وفرص التطور بيها محدودة برغم كل اللي نسمعه من مغريات والحياة صعبة ولاول مرة بحياتي اشعر اني مهدد بالتشرد عمري ما حسيت بهالشعور غير بامريكا لان لازم تشتغل 40 ساعة اقل شي واذا اتمرضت او تعبت او انشغلت معناها اجورك ما رح تكفي وذاك الوقت رح تكون مهدد من قبل الايجار والفواتير اللي ما تنتهي

[CivilEng]

اخويه العزيز جون سينا
طبعا من قريت الفتره الي قضيتها بامريكا نفس الفتره الي احنه قضيناها دخلت الموضوع حرت شكتبلك
ربي ألهي يوفقك بكل خطوات حياتك والي صبر سنه وثماني شهور اكيد يكدر يكمل المشوار
يارب يقويك ويصبرك ويهديك للتفكير الصحيح
يارب اسمع اخبارك الطيبه دائما
تحياتي
اختك ام شاهين

و اني اضم صوتي لصوت الاخت ام شاهين و ادعو الله عز و جل ان يفرج همك و يوفقك .
بس احب اكول لك اللي يشوف مصيبة غيره تهون عليه مصيبته . اكو ناس  بالعراق و الله حالتهم تبجي الصخر . تمنياتي بالتوفيق و النجاح . اختك المهندسة المدنية

[CivilEng]

كلامج صح دكتورة  Sarab .. بس احب اكول ان الطبيب بالعراق على الرغم من تمتعه بوظيفة محترمة و مرموقة و راتب كبير لكن عايش تحت خطر التهديد بالقتل و الخطف و الابتزاز و الفصل العشائري و ما اتصور عايش فايخ .

 افهم تماما معاناة الاخ  gohn cena  و كل الناس اللي خسروا وظائف مرموقة و جوي لامريكا و بدوا من الصفر لان اني همين خسرت وظيفة  زينة و بديت من الصفر بامريكا . محد كال ان امريكا جنة و لا الغربة سهلة.  ظروف بلدنا الماساوية  هي اللي اجبرتنا على الغربة و لازم نتحمل و نكافح .   

الشغل اليدوي مو عيب  كل الاطباء و المهندسين و اصحاب الشهادات الامريكيين اشتغلول ببداية حياتهم  عمال و منظفين  الى ان اخذوا شهاداتهم .

بالمناسبة  40 ساعة بالاسبوع عادي و مو هواية . اني اشتغل بين الاوفيس و  موقع العمل 40 ساعة بالاسبوع اضافة الى ساعات الاوفر تايم و تعتبر شي عادي .

اخ جون سينا تمنياتي بالتوفيق و النجاح

[اجونة]

السلام عليكم
من خلال قرائتي للموضوع وتقريبا لكافة الردود تبين انه النقطه الوحيده تقريبا هي الشغل .... احب انوه انه فقط بالعراق اكو دلال بالشغل ﻻنه حكومي وشلون مجان تكضي الوقت وبالاخير يجي راتبك كامل...اما في الخارج اقصد خارج العراق مو اﻻ اميركا فالشغل هو معظمه بيد القطاع الخاص وهذا يريد منك شغل يعني شغل... انتاج اما فكريا او جسديا ...ﻻن هذا ده ينطيك راتب من جيبه الخاص ويكون جدا حريص بالمحاسبه والدفع الراتب ....وللعلم بس يوم الجمعه عطله ومرات حتى ايام اﻻعياد والعطل الرسميه يريدون منك شغل واكثر من 8 ساعات يوميه .... فيا أخي انت بعدك شاب ومامرتبط... اذا هسه ماتتعب وتكون نفسك شوكت لعد ؟..... والله يوفق الجميع
تحياتي....
اختكم اجونه من اميركا

[alwaleed88]

السلام عليكم ورحمة الله وبركاته
قرأت موضوع الاخ John Cena ولم اجد في كلامه نية او فكرة الرجوع للعراق بل فيها نوع من الاحباط والضغط النفسي  ففكرة اخونا العزيز John Cena ظاهراً الان بدء ينتابه احساس بالندم لظروف عديدة واهمها بقاء جزء من عائلته الكريمة في العراق فلو كانوا جميعهم في امريكا اختلف الامر عليه تماما

نقطه ثانيه انه غير متزوج وليس لديه اطفال وفي الغربه او امريكا بالتحديد هذا امر صعب جدا فيكتشف الاعزب فراغ شاسع في حياته مما يجعله يسترجع الماضي المملوء بالصداقات والعلاقات الاجتماعيه كذلك فرص المعيشه للاعزب تكون اقل بالمقارنه مع صاحب العائله

نقطة ثالثة موضوع مهم جداً يعاني منه العراقيين بصورة عامة فالاخ العزيزJohn Cena هو مهندس ويعمل في شركات النفط او وزارة النفط وهذا المجال في العراق جدا راقي والمهندس له قيمته وهيبته خصوصا في النفط واعرف ماذا يقصد واحسست به فالمهندس في عملنا مكانته تختلف عن الشهادة الاداريه ولديه محسوبيه وهذا واقع اداري في النفط......لابد ان نعطي له الحق عندما وصل الى امريكا وانا متيقن انه قاوم وناضل بمسألة فارق الشهادة والدليل انه لم يشكي خلال سنة و8 اشهر لكن بعد هذه الفترة فقد صبره وهذا من حقه وحق اي انسان صاحب شهادة من استاذ الى عامل جداً صعبه في بداية الامر لنكون مصفين وحتى الامريكان يؤكدون على هذا الامر في كراسهم ودوراتهم قبل السفر لكن هذا امر واقع والي يرد شي يعوف شي وهاي ضريبة الغربه والهجرة لكن مؤكد لها علاج بالدراسة ومعادلة الشهادة ولكن ايضاً ليس بالامر السهل فتحتاج سنين ومصاريف وجهد عقلي واستقرار حتى تتوجه لفكرة معادلة الشهادة في امريكا

نقطة رابعة وهي (الحظ) والحظ بالتفسير المنطقي هو قسمة رب العالمين فلنعطي لاخونا الغالي العذر اذا لم يحالفه الحظ بعد وصوله الى امريكا عكس باقي الاخوة الله يوفقهم ولكن اقول لك يا اخي ان الله لم ولن يتركك بغربتك وسوف يحين وقت الحظ لما يرى الله سبحانه وتعالى الوقت المناسب لكن الحظ لن ياتي الا بشرط ان تكون ذاكراً لله تعالى وليس ناسياً ؟؟؟؟هذا اهم شي وان شاء الله انت من الذاكرين لله بغض النظر عن ديانتك لكون جميع اديننا تدعونا لذكره عز وجل لكي يوفقنا في حياتنا

اخي العزيز امامك فرص كثيرة فقط عليك ان تقرر اما ان تجتهد وتعادل شهادتك او تتوجه لمشروع الزواج اختر واحده منها وانا اقول لك وبكل صراحة اذا بقيت بدون تحديد احد الاقتراحين سوف تخسر كل شيء وتتعب نفسياً واذا ليس لديك واهس في الدراسة فتزوج لكون الزواج يلزمك بالكثير من الامور وخصوصا اذا رزقت بطفل سوف تتغير نظريتك تماما وتنسى التفكير والمقارنة بين بلدك الام
بالنسبة لموضوع تجزء شمل الاسرة انته ليس لديك فيه ذنب هما احتمالين اما لم يتوفقوا بالسفر لاسباب تتعلق بالمنظمة او هم لم يرغبوا بترك العراق فما ذنبك بهذا الامر؟؟؟
تأكد كلامك في الموضوع الذي طرحته سوف يؤلمهم جداً ويجعلك مذنب حقا اما اذا تطورت حياتك واختلف للاحسن سوف يفرحون بك كثرا (وتسويلهم واهس يجون يمك)

لك مني كل الود والاحترام ولعائلتك الكريمة وللاخوة الاعضاء المشاركين بموضوعك الجميل ولايسعنا الا ان نتقدم لك بالشكر الجزيل لكونك شاركتنا بهمك واعتبرتنا اهلك واخوتك وكذلك نشكر عودتك للمنتدى لكونك لم تنكر فضله بعد مرور سنة و8 اشهر وهذه الخلق العراقيه الاصيله


ابوسيف /تركيا

كلام كبير من شخص كبير
لا فُض فوك

[star_usa]

عاش من شافك يابه هههههه حقيقه تجربتك بيه ندم بصراحه انت لوعايش مرتاح بامريكا جان اصلا مدخلت للمنتدى لان راح تكون ملتهي بالونسه والنعيم الي اني اتمناه لكل عراقي غيور فظهرت بالمنتدى حتى تفرغ همك =(زين المن و وين ) يم الي على باب سفر شبيه الشغل ال40 ساعه وانت تنام مرتاح احسن من تنام وتبقه تفكر خاف لاتجيك قذيفه هاون اوصاروخ على بيتك ويموتك عمي الحجي بيناتنه احمدالله واشكره انت خسرت وظيفتك صح وتركت عائلتك صح واني وياك بكلشي تكوله لان الغربه مو هينه ومواي واحد يكدر يتعايش وياهه يرادله قلب من حديد وصبر .بس اكو ناس اصلا ماعدها مستقبل بالعرق ولاشهادات وكدرت تبني مستقبله بامريكاوكدرت توصل اطفاله بمستوى عالي جدا وبالنسبه كونك اعزب وتفكر راح يفوتك القطار وتشيب وتعجز واتريد اتكون عائله وتزوج عندي صديق الي من فلوريدا اتزوج شابه عراقيه وعاشو وانجبو اطفال وهسه همه باحسن حال اثنينهم متوظفين واحلى عيشه واشترو بيت وعدهم سياراتهم الخاصه اخي انت حصلت على فرصه يتمنى كل من يشاهد كتاباتك اني يحظى بها وهيه الهجرة الى امريكا اكو انسان يعيش نفسه باسوء عيشه واكو انسان يعيش  نفسه بالجنه يعني اكو واحد من الشغل للبيت ومن البيت للشغل اكيد يصير نوع من الملل والتعب ونس نفسك عيش اللحظات اضحك عيط ابجي افرح صلي قوي ايمانك الله ميترك عبده انسى ايام العراق لان راح تبقى تتالم وبالنهايه نصيحتي الك تعال للعراق زيارة فد 5 اشهر وانت اوتوماتيكيا راح تحس بالفرق تحياتي واتمنى متزعل مني المفروض من عدنا نشجعك  على الصح ونساندك لان انتو اخوتنه بهذة المنتدى تقبل تحياتي اخوك سيف

[gohnalhusaini]

السلام على الجميع وعلى الاخ جون سينا
ممكن اسال الاخوة اللي يتغنون بحياة امريكا بعض الاسئلة
-منو كال اللي يحتاج عملية يسوولهيا حتى لو بمليون دولار؟
اللي ماعده تامين صحي اذا يتمرض يموت وهذا الكلام مو من جيبي صارلي تقريبا 3 سنوات  بامريكااو متاكد من كلامي
-هل العمل في امريكا مثل العمل في العراق وخاصة مايسمى بالعامل غير الماهر؟
-هل يوجد شيء في حياة الانسان لاتفرض الدولة عليه بل او تاكس او ضريبة؟
-هل الحياة في امريكا مثاليه وامان ولايوجد لا عصابات ولا مخدرات ولا خطف ولا اغتصابات؟
-هل جميع الامريكان متساويين في الحقوق والواجبات ؟ الدستور يقول نعم والواقع شيء مختلف
-كلام الدكتورة صحيح شغل العامل في امريكا 8 ساعات يوميا فل تايم 8X5=40
40 ساعةعمل =1000 ساعة عمل مما تعدون حتى المصريين الجانو بالعراق مو مثل امريكا امريكا حلم جميل مر المذاق حتى اللي يعادل شهادته راح ينصدم بواقع انه العمل علاقات وواسطات ومحسوبيات والوان واعراق الخ اخي جون سينا بالنسبة لي لا يائس ولا مبتاس ولا اندب حظي اتورطت وراح اضل بعد سنتين اخذ جنسية الي ولعائلتي وشهادة امريكية واطلع من امريكا ولن اعود وهذا قسم امامك عودتك او ندمك على المجيء الاثنان خطا كبير عليك ان لاتضيع كل شيء من اجل لاشيء والله يوفقك ويصبرك واكو  ناس هوايه يريدون يعيشون الدريم والمشكلة يدافعون عن الدريم بضراوة وهم لا عايشيه ولاشايفيه

[Bernard Alhaskani]

راح اقارن نفسي بك اخويا اني درست 16 سنة وتعينت مدرس لمدة 3 سنوات  وبعدين بنيت بيت كملت وطبيت بيها 3 اشهر وخربت العراق وهسة اخوك نازح الاهل كاعدين بالخيم ويومية عليهم فيضانات
واني اشتغل عامل باحد الشركات من سبعة الصبح ل سبعة العصر ولله العظيم والشهرية مليون وتلات ايام اجازة 50 الف يروح كروة واني مرضان كل شهر 150$ بس علاج , ولله علواه لو هسة اني مكانك جنت اسويلكم حفلة على حسابي

[sarab waham]

ا واكو  ناس هوايه يريدون يعيشون الدريم والمشكلة يدافعون عن الدريم بضراوة وهم لا عايشيه ولاشايفيه

اقوى رد

الكل تحجي نفس الحجي ولما توصل وتلمس الواقع المر تعض كل اصابع الندم

[star_usa]

اقوى رد

الكل تحجي نفس الحجي ولما توصل وتلمس الواقع المر تعض كل اصابع الندم

التجربه حلوة ههههههههه

[CivilEng]

واضح ان كل واحد يتكلم عن امريكا من خلال تجربته الخاصة . فاللي يكول امريكا مو زينة اكيد انصدم بيها و شاف مصاعب و طبعا هو محق لان ما شاف بيها خير .
بس اكو هواية ناس نجحوا بمجهودهم بدون واسطات و لا علاقات و لا محسوبيات  و عادلوا شهاداتهم او درسوا ماجستير . قسم حتى ما عادلوا شهادات  واشتغلوا و تاقلموا  في حياتهم في امريكا . و هؤلاء الناس لما يكولون امريكا زينة هم  صادقين بكلامهم  100%  لان تعبوا و شفوا ثمرة تعبهم و ما يتكلمون عن ""دريم"" .   
 خلاصة الكلام كل انسان من حقه ان يتكلم عن تجربته الشخصية لكن ما يحاول يفرض رايه و تجربته على الاخرين كانها حقيقة ثابتة .

 

[sarab waham]

بس اكو هواية ناس نجحوا بمجهودهم بدون واسطات و لا علاقات و لا محسوبيات  و عادلوا شهاداتهم او  درسوا ماجستير .

اذن فليكن هناك اسنفناء هنا لمعرفه عدد الناس اللي نجحت وعدد البائسين

استفتاء فقط للمغتربين

كل واحد يدخل ويكتب كلمه واحده

1-سعيد بالحياه الجديده

او

2- بائس

واني حكون الاولى وعائلتي


بائسين


ننتظر الرد

[★★★ AIRBORNE ★★★]

خطية هالناس كاعده تفرفح.. عراقي وين ماتروح متعوب ومهموم
هذه ضريبة وطن الايجار

[ابن ديالى1]

اني اتفق تماما وية الاخ صاحب الموضوع على ندامته واختلف معاه لان حساباته وتقديره للسفر خاطئة
ولا واحد بيكم شخص وعرف سبب احساس العراقيين بالندم على خروجهم وسبب الي خلة الكثير يرجعون.
مربط الفرس هو هدف السفر.  كل واحد يگدر يعرف نفسة راح يگدر يضل خارج العراق او لا من خلال هدف السفر.
نجي الان.  الخ صاحب الموضوع يتبين انه كان مرتاح  في العراق ولم يكن هناك سبب لخروجه.
الى كل الذين ينوون القدوم الى امريكا
اذا انت مرتاح . بالعراق،  عدك راتب والامن مو شيء مهم بالنسبة لك. . فأگلك لا تجي يا حبيب
امريكا لمن؟
لمن لايستطيع العيش ببلده بحيث هناك اسباب مهمة تمنعك العيش في العراق.
امريكا لمن لديه طموح و اهداف لا يستطيع الحصول عليها في بلده.

من يكون ابامريكا و اكو هدف للسفر فالتعب يهون والغربة تهون لان كلما يكون عدك بؤس راح اتفكر ان وجودك لهدف.

امريكا مو مو لعبة ولا بلد الراحة

الاسباب التي جعلتني اسافر هي.
الدراسة،  ويمكن من خلالهة ان اتحصل علة هواي فرص ابحياتك.
الكرامة والاحترام في العراق اقرة عليهم السلام.  ابسط شي انه شرطي بسيطرة يهينك او موضف واني عدي كرامتي فوگ كلشي يعني اهم شي.
حقوق انسان ماكو او مساواك.  اتحس نفسك انه انت مواطن درجة ثانية مقابل فئة ثانية هية درجة اولى او خلي تسميهة الطبقة البرجوازية.
شعب حشاكم متخلف لايمكن العيش معه
فأني رافض العراق من الاساس ولا مفكر ارجع الا اللهم مقلب القلوب.

 ما تطرقت لهاي المواضيع لكي افتح جدال سياسي ديني غبي وانما لكي اوضح اسباب سفر العراقي من وطنه قد يكون احد الاسباب.

عندي اخوية صارلة 4 سنوات في امريكا اجه هجرة وحاليا ديدرس وينتضر ايخلص الدراسة ابموت حتة يرجع للعراق،  نستنتج شيئين
الاول انه بقى هاي المدة الطويلة( مع العلم متزوج وعده اطفال وعائلته بالعراق) لان هدة هدف،
الاستنتاج الثاني انه بقائه في امريكا فقط لفترة انتهاء هدفه.  فكل واحد يحدد وجودة في امريكا بقدر اهدافه

اذا اتريد تجي لمريكا بسبب الونسة والانفتاح او بحثا عن الراحة وجمال البلد.  لا انصحك لا تجي لان راح ترجع بعذ شكم سهر.

هذا رأيي الشخصي بنيته من خلال خبرتي البسيطة من وجودي في امريكا ومن استنتاجاتي لأراء المتواجدين في امريكا.

اني مدا اخوفك اگلك لا تسافر.  ابد لان ماريد اكون سبب لكن اريد اطيك الصورة الواضحة حتة لاتنصدم من تجي وحتة تتخذ القرار

نصيحة ارتبط ابدراسة،  هية الشيء الوحيد الي يقلل عنك همك ويخلي عدك هدف.

تمنياتي الك الموفقية. وانشاء الله تعدل عن قرارك ومترجع

[hopeforall]

كلام الاخ جون سينا صحيح 100% وانا عندي نفس المعاناة وربما اكثر كوني المعيل الوحيد للعائلة وامريكا متعبة جدا جدا وفرص التطور بيها محدودة برغم كل اللي نسمعه من مغريات والحياة صعبة ولاول مرة بحياتي اشعر اني مهدد بالتشرد عمري ما حسيت بهالشعور غير بامريكا لان لازم تشتغل 40 ساعة اقل شي واذا اتمرضت او تعبت او انشغلت معناها اجورك ما رح تكفي وذاك الوقت رح تكون مهدد من قبل الايجار والفواتير اللي ما تنتهي .

اخ موزارت كانك في قلبي صارلي اكثر من ثلات سنوات وعندي شغل فول تايم وبعدني بالمربع الاول ومااعرف شون تاليها.

[عباس التميمي]

والله يا مان اني بالعراق اشتغل 15 ساعة باليوم من ساعة 9 الصبح لل 11 بليلل
الحمد لله على اي حال

[Awsaws]

اتفهم معاناتك و نظر
تك السلبية و اظن انة طبيعي في هذة المرحلة, ولكن ارجوا منك تقول لي كم من الابرياء راحوا بالمفخخات خلال هذة السنة و الثمانية اشهر ! كم من الناس تهجروا في نفس الفترة ! كم من العراقيين يعيش في خوف و قلق مستمر ! كم من العراقيين ماتوا على يد الاطباء الغير كفوئين في نفس هذة الفترة (مع احترامي للقلة الذي تفتهم), كم من العراقيين و اطفالهم يعيشون في بيوت صغيرة مع اخوانهم و عمامهم و خوالهم, بحيث هناك 30-20 شخص يعيشون و ينامون معا في بعض البيوت الصغيرة   , ماذا عن المدراس, كم طفل عراقي يذهب الى صف ممتلئ اكثر من استيعابة
....... احمد ربك و انظر الى الأمام و ليس الخلف.
احسنت لم نسافر بطرا ولاكن الضروف هي التي اجبرتنا ولم تدع لنا خيار لا اقول  الا ان تنضر الى من اصابه ضرر في نفسه او اهله او ماله او كرامته وقل له اتمنا ان اكون انا في مكانك ولست انعم في الامان هنا واتضر بماذا سوف يرد عليك اصبر اخي واشكر الله عز وجل على نعمة الامان

تمنياتي بالموفقية